По томѹ же ц͠рѹ Романѹ и прочи, иже // цр͠ствоваше вь Цр͠иградѣ сѹщїи вѣрнїи, бѣше же велми чтома и прославлѥнаа ст͠аа. И хвала слышанию тоѥ изиде по всеи земли грьчкои и вси прихож(д)ахѹ ближныи и далечныи на поклонѥниѥ дивноѥ и на видѣни множество чюдесь, бывающимь ѹ тѣла ѥю. Бл͠агодарениѥмь бж͠иѥмь слѣпии прозираахѹ, хромы и глѹхы и бѣсны исцѣлевающи, и вси одрьжими ѹзами и различными недѹгы вѣрою приходеще, исцѣлѥнна ѹлѹчаахѹ. Ктѡ ли можеть исчисти чюдеса бываемаа ѿ б͠а данныѥ ст͠ыѥ.
Нь подь областию латиномь и по разорению добрыѥ чьсти, іже имѣахѹ вѣрныи на ст͠ыхь, також(д)е и болшѹю на ст͠ѹю прп(д)бнѹю Петкѹ, изволи б͠ь пакы славѹ и чьсть, еже имѣ ст͠аа, не помрачити се. Възложи б͠ь на ср(д)це бл͠говѣрномѹ и бг͠очьстивомѹ, и бг͠обоꙗзнивомѹ ц͠рѹ нашемѹ, обладающамѹ всею землѥю бльгарскою Їѡ͠анѹ Новомѹ Асѣнѹ, сн͠ѹ бывшомѹ Асѣнѹ Старомѹ, испросити ст͠ѹю прп(д)бнѹю Петкѹ, ибѡ бѣахѹ тог(д)а латини. Аще и Цр͠имь гра(д)мь обладаахѹ, нь велми боꙗхѹ се и чтѣхѹ, и повиноваахѹ се словѹ, исходещѹ изь ѹсть цр͠ѹ Асѣнѹ, понеже его ради область, мнит ми се, дрьжахѹ. И аще би ѿ нихь злато или сребро, или камениѥ мнѡгоцѣнноѥ, или бисерь просиль, дали быше евѹ, нь не проси ѿ нехь чьстно тлѣѥмое, нь испроси ѿ нихь ст͠ѹю и прч(с)тнѹю, и нетлѣемѹю, ибѡ множаиши ѥ(с) та паче, нежели злата // и сребра, и прочеѥ тоѥ вещи. Ибѡ велми доброѥ себѣ испроси чь(с) и хвалѹ, и славѹ, и радо(с), и веселиѥ, помощь неѡборимѹю не тькмо на семь вѣцѣ ѹтврьж(д)ениѥ цр͠ствѹ своѥмѹ, нь и вь гредѹщимь вѣцѣ избавителницѹ испросивь. И посла сь чьстию великою прѣнести тѣло ѥе ѿ Каликратиѥ вь прѣславныи свои гра(д) Трьновь сѹщѹ митрополитѹ Маркѹ, слѹжителю прѣнесению тѣла ст͠ыѥ, еиже и сретениѥ бы(с) велико ѿ самого ц͠ра и прочиихь по(д) рѹкою его. И тако сь славою и чьстию великою, и радостию и веселиѥм и положи ю вь цр͠квы своѥи, ч(с)ть и хвалѹ дающи ст͠ѣи и вь славѹ б͠ѹ, спо(д)бльшомѹ се такѹю блг(д)ть приобрѣсти.
И по прѣставлѥны сѹщи патриархѹ лѣтѹ томѹ, посла бл͠говѣрны ц͠рь Иоакима мниха, ѿца своего мнѡгосмѣреннааго и прп(д)бнааго вь медоточнааго ѹчениꙗ, прѣити ѿ Цр͠и гра(д) вь Никыю великѹю, блг(с)влѥниѥ приети архиереиское. И тако идѹщѹ мѹ вь Каликратию и тѹ приѡбрете себе за помен(а)а ст͠ѣи пѣтиѥ и хвалѹ тою и житиѥ, ѿ нѥгоже прѣложихомь пѣти и хвалити ст͠ѹю сѹщее тоѥ хвалѥние, а не прилагати прп(д)бнѣи и м(ч)ницѹ нарицати. ś(с) бѡ дрѹгаа м(ч)ница Х͠а ра(д), еиже пѣтиѥ и хвала вьз(д)ѣ обрѣтаѥт се. Сию хвалити противѹ славѣ ѥи недоѹмѣѥмь, нь противѹ сїлѣ своѥи, елико вьзмогохомь, похвалихомь.
Да ꙗкоже дрѹго ѥ(с) родителѥмь ѿ своихь мла(д)нць ре(ч)мь набаданиа приѥмати, тако и ти, прп(д)бнаа м͠ти, приими ѿ ср(д)ца приносимѹ//ю ти хвалѹ сию малѹю и подаж(д)ь, мл͠им ти се, сьмирениѥ житию нашемѹ и цр͠квамь бл͠гостроениѥ и цр͠ѹ нашемѹ крѣпо(с) и дрьжавѹ ѥмѹ на сѹпостати, хранещи и покривающи болѣри и вѡѥ, и лю(д)е, ѥже б͠ь по(д) рѹкою емѹ дасть, сїлѡю кр(с)тною, млт͠вами пр͠стые вл(д)чце наше Бц͠е и всѣхь ст͠ыхь постра(д)вшихь Х(с)а ра(д), и вѣнце неистлѣнные приемши ѿ рѹкы вл(д)чные и цр͠ство нб͠сноѥ, егоже и на(с) достѡиныѥ сьтворить г͠ь. Томѹ сла(в) сь безначелнымь оц͠емь и сь прст͠ымь, бл͠ыимь и животворещимь дхо(м).
По изданието на Citekey Кожухаров 1974 not found Стр. 126–128.