Ищутъ нѣцьіи, откуду убо древо спесенное бьість, и въ кое время и како смѣшеніе тричастное того бьість и совокупленіе имать тріехъ древесъ естество: елоя, глаголю, и кедра и кипариса, и како обрѣтеся во дни Господняго распятія. И мьі же, повсюду о истинѣ пекущеся, глаголемъ: яко ни едину боголюбезну мужу повѣсть усльішахомъ, глаголюща что о семь; точію яко въ Виритѣ приставшимъ намъ къ нѣкимъ христіяномъ и къ бесѣдѣ прошенію о томъ отъ насъ изшедшу, паказаша намъ посланіе Жидовина нѣкоего древняго къ другу егову усердну послано, испьітаніе о самомъ древѣ творящу, иже сице обдержаше.
Двѣ рѣцѣ въ Палестинѣ суть, вкупѣ смѣшени, иже Иоръ и Данъ, и едину рѣку совершаютъ Іорданъ, и отъ соедіненія водъ, отъ сложенія имянъ ихъ нареченіе пріятши рецѣ. Посреди убо соединениія рѣкъ, близъ явѣ двоихъ смѣшеніихъ обходящу во огнъ (градъ) великому Аврааму, бьість обрѣсти ему нѣкоего мужа, горко рьідающа и плачюща, егоже великій вопросивъ, сльіша тягость исповѣдающа грѣха и безмѣстіе сотворенньіхъ, къ нему же великій Авраамъ рече: „аще хощеши, брате, божественое умолити, три главня принеси ми”. Мужъ же повелѣнное вскорѣ сотвори, и якоже отъ растоянія полъ поприщя единаго обоихъ рѣкъ, отшедшу Аврааму, подкнувъ главни, по образу триуголну, якоже есть растоятися коейждо отъ другія по единомоу растягу (сажени). И заповѣда ему, рече: „до м҃ дніи напояти, на кійждо день по д҃ мѣръ куюждо отъ главней, да аще въ четьіредесятъ дней оживятся и вскоренятся главни, вѣдомо буди, яко умилилъ ти ся есть Богъ на тя, аще ли ни (и пакьі) явлютися и ина удобна научю тя”. Мужъ же заповѣданная ему отъ великаго усердно пріимъ, и со тщаніемъ творяще. Четьіредесятемъ же днемъ совершившимся безъ мала, абіе главни возрастоша. Мужъ же надеждею радостною обьятъ бьівъ, къ великому Аврааму притече, витающу у дуба, и збьівшаеся исповѣда великому, радостньіми слезами землю моча и при ногу Авраамлю лежа. Сія же три главни процвѣтши и мало отъ земля во вьісившася во особствіи каяждо, тако же во едино совосупишася вси тріе къ вьісотѣ, (и) въ равности красно растяху; коренію же по обьічею растоящуся и верху же единовидно растуще, въ мале вершіемъ поособно коемуждо являтися. И бѣ дивно зримое: тріе отъ корене зрятся, тріе верси, среда же единораслена. И бѣ преизлише красно бьість. Соломану же царю, создавающу храмъ святая святьіхъ, и многимъ хитрецемъ каяждо дѣла врученная промьішляти храму, въ лѣпоту, на укпашеніе, тогда приспѣ нужда, древесемъ добрьімъ потреба. Хитрецьі же повсюду на взьісканіе древесъ уклонившася, обрѣтоша же тогда и то тричастное древо. О немъ же собрашася мнози хитрецьі церковніи, и обходяще кругомъ, древо обзирающе и всей лѣпотѣ его безмѣрной дивящеся; по чюдномъ же дивленіи преклоншеся, посѣкоша древо и многохитростньіми возильі подъемше, привезоша его ко храму. Измѣривше и мѣру на вьісоту вознесъше, идѣже требуется положити древо, и абіе по мѣрѣ угодно явися хитрецемъ. Самое же древо вознесоша и на уготованное ему мѣсто, и абіе явися тамо кратко, его же спустиша долу; хитрецьі же укоризнами укоряху себе, мнящеся не добре умѣривше древо; и паки измѣривше древо, и явися имъ и лишше потребьі долготою; его же со тщаніемъ паки горѣ возвьісиша, и абіе кратко бьість. Се же творяшеся о немъ триждьі. Добротѣ же древа зѣло чюдящуся царю Соломану, жалящу же о неугодствѣ, но обаче не восхотѣ бездѣлно остати е. Пакьі мѣритъ, и долгостію отстоя бѣ, да яко же вознесе, паки кратко обрѣтеся. Позна Соломанъ божественому промьіслу (дѣлу) бьіти бьівшее. Тѣмъ же и внутрь церкви положити повелѣ, къ покою прилучающимся въ церкви, яко бесѣду. Совершившужеся сицевому храму и царю Соломану лѣпотами всяческими удостоившу церкву, (и) пришедши же южной царицѣ Сивиллѣ во Іерусалимъ сльішати и видѣти силу и премудрость Соломоню, съ нею же Соломону обходящу въ церкви и вся удивителнію достойна показующу и къ нареченному приближшуся древу, сѣсти съ собою Сивиллѣ повелѣ, яко на бесѣдѣ. Она же пророческаго дара полна сущи, сѣденіе убо отрече, къ древу же прирече: „о, треблаженное древо, и зимъже распиется Христосъ, Царь и Господь”. Сія глагольі усльішавъ царь, абіе вскорѣ повелѣ поставити праведное древо къ востокомъ, и обложи его тридесятми вѣнцьі отъ сребра чистаго, койждо же вѣнець л҃҃ сребряникъ цѣняше. Стояше же сіе древо даже до времяни Ісусова распятія. И отъ сихъ вѣнецъ, глаголется, единъ дастся егову ученику, иже и предастъ его отцемь нашимъ. Да якоже и прочимъ вѣнцемъ отъемшимся, паки наго древо стояше и бездѣлно и оттолеже не въ лѣпотоу древо бьість. Во время же распятія господня древодѣлцьі испросивше его, и крестъ, иснесше здѣлаша, иже Сивиллою пронареченное идполнися, долнюю страну свершену, толстотою въ землю воглубивше и ногама Ісусовьіма имѣти степени широки.
Сіе въ посланіи Евреовѣ писано бьість, егоже мьі прочетеше, преписахомъ.
Препис в ръкопис № 451, ГБЛ, сбирка Румянцев, нач. на XV в., руски по произход.