Вие сте тук

Написание за правата вяра

Написание ѡ правѣи вѣрѣ. изꙋщеное кѡстантиномъ блаженымь фїлософомъ. Оучителемь о бз͠ѣ словѣнскомоу ѫзикоу:⸟ въ имѧ ѡ͠ца и с͠на и ст͠го д͠ха.

Кѡстантинъ философъ правовѣрно о истинѣмъ б͠зѣ. Оучитель словѣнскыи исповѣдоуѫ подьписанїа. Вѣроуѫ бо оубѡ въ единаго б͠а ѡ͠ца въседръжителѣ. всѣмь видимымъ и невидимымъ. Творца же и г͠а. безначѧлна. Невидима. Неѡдръжима. Неизмѣнна бесконечна. И въ единого г͠а І͠у х͠а с͠на единорѡдна. Безначѧлно и безврѣменно. И прѣж(д)е вьсѣхь вѣкъ. ѿ оча сѫщьства висиавша. И въ единъ дх͠͠ъ ст͠ыи. Исходѧщъ ѿ ѡц͠а единого. И съ ѡ͠цемь и с͠номъ б͠͠гословимыи же и славимы. ꙗкосъ естьетвныма и съ нима прѣбываѫ. Тро(и)цѫ оубѡ славлѧ ипостасми. Сирѣчь лицы. И которагож(д)е ѿ реченыхь. Несмѣсна. Ни размѣсна. Блюдыи размѣснаа своиства. ꙗко никакоже прѣлагаемъ и движемъ. Ѡч͠ее оубо есть нерождение и винѫ сѫщима ѿ него. Сн͠овнее есть рождение, дх͠а исхождение. И ꙗко ѿ ѡца едино. Раждаемое же и исходимое. Ѿ того въспавь и ꙗко свѣтъ котороеж(д)о ѿ свѣта прошедъ: единъ свѣтъ надъ всѣмъ миромъ. Трьмѣсѧченъ и тръслънченъ единствоу же сѫщьствомь кланѣѫ сѧ. Съвъкоу плѣѫщомоу сѧ въ единѫ высотѫ бж(с)тва. Прѣсѫщнѫ прѣестествнѫ томоуж(д)е нераздѣлно и нерастѫпнꙋ. Славѫ же и дръжавѫ имѧщоу. Въ единомъ свѣтѣ и хотѣнїи. И вь едино и силѣ и дѣтѣли знаемомоу. И ꙗко сѫщоу вьсѣмь ц͠рю. И вьсѣми ѡбладаѫщомоу. Ѿ вьсеѫ видимыѫ же и невидимыѧ твари равночьстномоу и равнопрѣстолномоу. Кланѣние приемлѧщоу и слоужбѫ. Едино боб ж(с)тво видимь вь трехь сѫщьством единоуѫще сѧ. Три же сълична въ единомъ бж(с)твѣ. Нераздѣлно раздѣлѣемь. Инако како по коиждо ѿ сѫщїихь своистьвъ. Ни сн͠а ѿ сѫщьства нѫ рожденаго ѡ͠ца тоужда творѧще. Зане есть рожденъ. ни ст͠го же дх͠а тоужда творѧще ѡ͠цоу и сн͠оу. Зане ѿ ѡц͠а исходить. Ни размѣшениа вѣдѧще за единение естьствное и нераздѣление. Нѫ въ ѡбщенїи есьствнѣмь. Разлѫчение примѣшаѫще къ своиствномоу. раздѣлѣет бо сѧ нераздѣлно. и съвъкоуплѣеть сѧ раздѣлно. Едино бѡ въ тре(х) бж(с)тво. И триедино вь ни(х) бж(с)тво. ꙗкоже ны оучить бг͠ословъ григорие наньзианскы. Б͠а оубо ѡц͠а чьтѫ. Ѿ негоже вьсѣ въ бытие приведошѫ сѧ. Б͠а с͠на славлѧ. Имже вьсѣ бышѫ. И въ сѫщнѣмь бытии прѣбываѫть. Б͠а д͠ха ст͠аго величаѫ. Имже всѣ съхранѣѫт сѧ и съдръжѫть. Единого ба въ трехь чьтѫ. Не въ три богы раставлѣѫ единого бж(с)тва. Да сѧ ꙋклонѧ ѿ три бж(с)тва. Паче же многобж(с)твнаго безбожиа. И съвръшена къж(д)о ѿ сихъ съвѣмъ. Не ѿ три бо несъвръшенъ единъ что исповѣдаѫ съвръшено. Нѫ ѿ трїи съвръшенъ едино прѣсъвръшено и прѣсъвръшенѣе. ꙗкоже ст͠хъ ѿ͠ць настъвлѣеть блгословествие. Ни сѫщьствомь же оубѡ. ꙗко естьствь тоуждъ. И различень неравеньствомь, етеры ѿсѣ(ка)ти начинаѫ нѫ раздѣлѣѫ словомъ своистьвнымъ. Къ единствоу сѫщномоу. Съвъкоуплѣѫ лихое ѿ сихь. Ли мнѣние ѿметаѫ бо(о)лшаа бо ли мнѣиша ꙗко нѣ(с) видѣти. Въ единосѫщнѣи троици по сѫщьствоу или по бж(с)твоу. Да арианское неистовство ꙋгашѫ. Ѿ него же и къ немоу же ми нинѣшнѣа брань. Ни пакы въ едино сѫщьство слагаѫ или смѣшаѫ. Нѫ лицы сѫщими. И вещьми имены. Раздѣлное съвъкоуплѣние по сѫщьствоу приношѫ. Да савелианское неист(о)вьство ѡмрачѧ. Противнаа зла и коупна нечистымъ. И та тебна рещи. Съвъкоуплѣѫ и раздѣлѣѫ ба͠гочьсто. И раздѣлѣѫ съвъкоуплѣѫ б͠голѣпно. Къ семоу же еже есть раз(д)ѣлено сѫщьствомъ. ѡбщениемъ естьствнымь съвъкоуплѣѫ а съвъкоупленое сѫщьствомъ и бж(с)твомъ раз(д)ѣлениемь триличнымъ разоумѣваѫ по ѡбоемоу. О велицѣи б͠жїи прѣвышнїи таинѣ сѫщїи о на(с). благовѣроуѫ и здравъ сыи оумомъ. Такъ сыи слоужитель прѣс͠тѣи тр(о)ци. д͠хомъ и истиноѫ слꙋжѫ еи. Въ чистѣ и непорѡчнѣи славѣ, вьсѧ дн͠и живѡта моего. Тако ꙋбо о прѣкращенѣмь семь и неизре(ч)ннѣмь бж͠ии словеси. Оутвръждены и подъ пръты исповѣдаѫ единого ѿ единосѫщныѫ троицѫ. Г͠а нашего і͠у х͠а с͠на бж͠иа б͠а нашего. Зарѧ ѡч͠ѧ славы. Свѣтъ ѿ свѣта. Неизмѣнное ѡч͠ее по(д)бие и ѡбразъ сѫщьства его. Въ пльть пришедша на земѧ. И скончавша съмотрение еже о на(с). бывша по нашемоу ѡбразоу. Неизре(ч)ннымъ бо тъ чл͠колюбиемь. Мл(с)рдиемь милости и щедрѡтами движемъ. Не тръпѣ до конца нашего рода зрѣти. Горкымъ мѫчителемь порабощена. Нѫ благоволѧщоу ѡц͠оу и прѣс͠томоу и живѡтворѧщомоу дх͠оу поспѣшьствоуѫщоу. ѡч͠ѧ славы никакоже ѿстѫпль. Ни своихь и бг͠олѣпныхь чьстїи по чьсомоу етероу ѡставль. Низложи сѧ въ смѣрение волное. И въпльщь сѧ ѿ ст͠го д͠ха. И ѿ прѣс͠тыѫ и славныѧ въ истинѫ бц͠ѫ и присно дв͠ы марїѧ. И дш͠ѫ и пльть прѣдъ очищьшѫ дх͠омъ. И чл͠къ по всмоу кромѣ грѣха бывъ. Въ мрътьвное естьтво и истлѣваемое и исписаемое ѡблькь сѧ. един ѿ обоего въшедъ. Тъж(д)е ѿ бж(с)тва и чл͠чьства. И съвръшенъ по всемоу неизмѣненъ прѣбы въ бж(с)твомъ. И съвръшенъ також(д)е и непрѣложенъ чл͠чьствомъ. Имжи и сън ами поживъ. Адамово оубѡ прѣслоушание своимъ несъгрѣшениемь исцѣли. А истлѣние еже ѿ грѣха, волноѫ стр(с)тиѫ пльтскоѫ. И съмртиѧ животворѧщоѫ. И въскръсениемъ бг͠олѣпнымъ разорь, неистлѣние намъ дарѡва. Въскръсе бо тридн͠евно испр(о)връгъ съмръть. И пръвѣнець из мрт͠выхь бысть. Собоѫ наставль чл͠чь родъ на нетлѣнныи пѫть. изем же невидимаго врага ѿ нашего насилованиа. Вьсѣ сътвори и прием, елико въ ст͠хъ еу(г)лихь проповѣдает сѧ. И нами вѣроуемо есть. Ими же ветхаго адама посѫди. И нашего естьства ѡбнови. И въ пръвѫѧ чьсть възврати. И въшедъ на нб͠са, съсѣдника съ прѣстоломъ ѡч͠емь. Начѧтокъ нашего примѣшенїа сътвори. Тако бо ꙗко ꙗснѣе реши, великѫѧ и чьстниѫѧ таинѫ бывшѫѧ б͠жїа съмотренїа. Исповѣдаѫ сказаѫ. Аще же ли потрѣба есть и пространнѣе како ѡ семь ѡбѧти. Завъзницаѫщѫѧ. И етера тъщеглашениа нинѣ примышлѣѫщѫ сѧ. Абие речемъ ꙗко естьствомъ сыи б͠ъ. единорѡдныи сн͠ъ и слово б͠а ѡц͠а. рождеи сѧ ѿ него прѣжде вѣкъ. Неизгл͠анно и безсѣменно. Не ѿ ложь бытиа еже бѣ естьствомъ б͠ъ въ послѣднѣа врѣмена вѣка чл͠чее естьство приѫтъ. И пльти и кръви нашеи искръ приѡбщи сѧ. Слово бѡ пльть бы(с) и вьсели сѧ въ ны. Не въ простѫ пльть приемъ. Нѫ дш͠еѫ словесноѫ и съмыслъноѫ въдш͠енѫ. Тьѫде единъ сн͠ъ и по въпльщении сыи. единосѫщнꙋ бо͠у и ѡц͠оу по бж(с)твоу. Единочѧдноу же и намъ по чл͠чьствоу. Хранѧ и съблюдаѫ. И въ сънѧтии неиспровръжена и непрѣложна. Сѫщаа въ нею своиствомь естьвнаа различна. Въ коемьждо естьствѣ сложьшиима сѧ въ то. И едино тѣло. Се бѡ новое и дивное смѣшение. Ни зьлиавшаго сѧ бж(с)тва. И приѫтаго чл͠чьства ѿнего же въ единомѣ тѣлеси. Сънѧтие кончавше сѧ наами знаемо есть. Се бо есть дивнѣе. Еже сѧ раждаеть б͠ъ съприѫтиемь. Слово бѡ съвръшенъ сыи б͠ъ. къ съвръшеноу члк͠͠оу примѣси сѧ. Въ единоу тѣло сложно смѣшь сѧ по немоу. Сего ради и рождьшиа его, въ истинѫ и рѣсно тѫ бц͠а нами нарицаема есть. Рож(д)ь бо сѧ ѿ оц͠а без мт͠͠ре без начѧла прѣжде. ѿ мт͠ре безь ѡц͠а роди сѧ второе. Не бж(с)твоу его приемшоу ѿ себе начѧтка. Нѫ прѣывъ еже бѣ, и еже не бѣ приемь свое створи. И бы(с) ходатаи междоу б͠а и чл͠кы. Которомꙋждо приѡбщи всѧ равно естьствномоу сѫщьствоу. гл͠ѧ же бж(с)твноу и чл͠чю. Въ едино лице съвъкоуплѣѫ сѧ. Ибо и съвъкоупльши сѧ ѡбѣ естьствѣ въ едино. Единого х͠а и сп͠са и г͠а скончастѣ. Единь бо ѿ обою и шедъ разꙋмѣваемь есть х͠с. по разоумѣваемомомоу и по видимомоу. ꙗкоже съвръшенъ и неизмѣненъ прѣбы въ бж(с)твомъ. Такожде и съвръшенъ и непрѣложенъ бывъ по чл͠чьствоу. Не приемлѧ стр(с)ти по бж(с)твоу. По немоу же паче естьства чл͠ча творѣше чюдеса. ꙗко беспльтенъ неистлѣнень же. Також(д)е и неописанъ и бесмрътенъ. Приемлѧ стр(с)ти по чл͠чьствоу въпльти бо сѧ. По немоу же чл͠чѧ стр(с)ти приимашѫ. И мрътвенъ тьжде и сп(с)енъ же и описанъ. ꙗкоже бы(с) чл͠къ ѿ сѣмене дв͠да. Своѧ же сътвотить своего тѣлесе слово стр(с)ти, распѧтие же и съмрть. И прочаа елико съмотръливно нас ради постр(д)ати изволи. Чьстноѫ бо его кръвиѫ искоуплени быхѡм продани грѣхомъ. Еѫ же прѣграж(д)ение оплотное разори вражди своеѫ пльтиѫ. И съмирь неб͠снаа съ земными. И единѫ цр͠квъ. И съборъ аггелѡмь и чл͠кѡмь на н͠бси и на земи оустрои. Единъ оубѡ есть ѡбое. Ибо и страждѫ. Нечесоже пострада за ны своимь естьство. Съг͠лати сѧ небж(с)твнымь нѫ пръстнымъ естствомъ. Свое бо емоу есть пострадавшее тѣло въселичьскы. Славѫ бж͠їаго естьства. И чл͠чѧ нищеты ꙗвлѣѫ да непривидѣние самотрение бж͠ие възнепщевано бѫдеть. И прѣбы(с) ꙗкоже б͠ъ въч͠лчи сѧ. Тако же и въ бж(с)твнѣи славѣ чл͠къ. Ничимже мнии есть. Въ ѡбою бо единъ въ коупѣ б͠ и чл͠къ Емманоуилъ. Понеже ꙋбо тако на прѣдѣлѣ(х) благовѣрныхь стоимь. Тако ѡ сихь славѫ. сꙋгоубое бо съшедшїма еѧ въ немъ сѫщьствома съ своисвты съ своиствы съвръшено и нескѫдно. Ѿ сею ѡбою проповѣдаѩ. Бывшее же ѿ сею сънѧтие единосѫщно въ едино лице по тѣлесномоу съвъкоуплению. Такжде исповѣдаѫ. Нераз(д)ѣлѣѫ въ два сн͠а. Единого г͠а і͠у х͠а. Въ чл͠ка ѡсобь и почѧсти. Да безоумное и чл͠кочьстное несториево раздѣление разорѧ. Ни пакы смѣшаѫ ни измѣноуѫ. Единого лица единению въ тожде къ единомоу естьствоу приводѧ. Нѫ неразмѣсна и нераздѣлна. Хранѧ различию сѫщаа въ коемждо естьства. Да соуеоумное евтихово смѣшение разорѧ. Въкоупѣ и сѫщѫѧ о севирѣ нареченыѫ добрѣ безглавны. Си бѡ смѣшаеть злѣ. А ѡнъ раздѣлѣеть нечьстно. ꙗко въ тожде въпадъ о съмотрени бж͠їи. Евтихїи къ несторию въ неже и савелии о б͠гсловствїи къ арию. Исповѣдаемома оубѡ о х(с)ѣ двѣма естьствома съвръшенома. Сѫщьствома же и сѫщаа. О сею естествнаа своиства исповѣдати съ ними подобаеть. И сѫщаа на коемж(д)о своиствѣ своистьвнаа хотѣниа и дѣтѣли. Потрѣба бо есть соугоубома сѫщьствома въ истинѫ сѫщема. Соугоубы и си на нима проповѣдѣти. Не инако бо како сѫщее въ истинѫ съвръшение въ сею блюдет сѧ. Понеже сии ѡбразъ ꙗвлѣть естьствома. И нѣ(с) о страсти естьства. Безь хотѣниа и безь дѣтѣли. ꙗко бо божскы ꙗко бъ хотѣше же и дѣаше. Такожде и чл͠че хотѣше же и дѣаше. По б͠жием же знамениемь. И по чл͠чемь вещемъ. Не противень же сихь етеръ къ етера мъ имѣше. Покарѣше бо сѧ и повиновааше. Приимы приѫтомꙋ ꙗкоже бо ꙋбо ничто же видѣно бы(с) въ немъ противно и прѣкопно ѿ съше(д)шою сѧ естьствоу. Ибѡ не противнѣ естѣ. Знамение же се имже сѫт сѫщьства различна, то и слово бываемо различно ѡ нихь. Еже о разньстьвнѣхь естьствѣхь ꙗвлѣет сѧ. Потрѣба и сѫществнаа своиства. По хотѣнию и дѣтѣли различно имѣти. Тѣми бо и хѫдожьство естьством приемлемъ. Понеже бѡ и имже сѫтъ дѣтѣли тыжде. Ъо и естьства равна. Тако ꙋбо и бг͠омѫжно и дѣтѣли. Х(с)во житие изьꙗснит сѧ. Имже съ нами пожить. ꙗвѣ разоумѣваемо по(д)бнымъ именованиемь. Ѡбѣма естьствома ѡбѣ дѣтѣли сказаѫ. Съвъкоупленїа бо ѡбычаи. Разньствное слово въ себѣ имать съвръшено. Семоу бо дастъ кто и дѣати. Котокрыждо ѡбразъ. Съ которымждо ѡбщениемь. Не проповѣдаѫ ꙋбо единого хотѣнїа и дѣтѣли о б͠жиемь смотренїи. Ѿемлѧ етеры прѣбывшихь къ сѫщьствома, аще не въсхощѫ и самаго естьства разарѣти. ꙗко да не въпадѫ въ несъмыслънаго и неистоваго аполинариа(х) недѫгъ. Разорѧ же нимъ севирово и пирово безоумие. Еже сѧ ꙗви о бж͠їи правѣмъ словеси. Безь хотѣниа и дѣтѣли. По семь нами чьстнаа и спаснаа таина бж͠иа съмотренїа славима есть. ꙗже и разоумѣваема и неизг͠ланна прѣбываеть. И гл͠ема неизвѣдома. По рекшомоу ст͠моу бг͠оносцоутѣмь оубѡ посѣщениемъ спс͠͠ти сѧ исповѣдаемъ. И съ всѣми сѫщими и чьстными молитвищы и сиѫ ѡбразы ст͠ыѧ и знаменїа чьтемъ и ѡблобызаемъ. Ими же намъ по ѡбразеу вьсѧ еу(г)льскыѧ повѣсти сказаны бышѫ. Аще нѫ и въ памѧть въставлѣѫть бывшѫѧ сп͠сомъ на(с) ради бж͠їа словесе. ꙗкоже съ выше испръва бл͠говѣрно прѣѫхѡ(м). с͠ни ѡц͠а си хранѧще почьсти говѣние сътворимь. А не бж(с)кыѫ имъ слоужбы творимъ и кланѣнїа. Да не бѫдеть. ꙗже по(д)баеть бо͠у единомоу ѡбладаѫщомоу вьсѣми. Въси бѡ сѫщїи бж͠иемь дх͠омъ наоучени. Видѧть различие чьсти. Икѫѧ по(д)баеть х(с)оу бо͠у нашемоу чьст и кланѣние въздаати. И ст͠ымъ иконамъ по(д)бнѫѧ чьсть творити. И ѿ тѣх къ пръвомоу ѡбразоу его же тѣло есть написано чьсть възносити: ⸟ Къ симь чьтѫ чьстныѫ иконы пр(с)тыѧ и прч(с)тыѧ вл(д)чцѧ нашеѧ и присно дв͠ы бц͠ѫ маріѧ. Рождьшѫѧ по пльти г͠а ї͠с х͠а б͠а нашего безсѣмене и неизре(ч)нно. И безь всего примышленїа. Також(д)е и ст͠хь аг͠глъ. И ст͠͠хь и славных ап(с)лъ и м(ч)нкъ. И инѣхь. Въсѣхь ст͠хъ оугождьшихь емоу ѿ вѣка. ꙗкоже и никеискыи ст͠ы и великыи съборъ, бл͠говѣрно бг͠оꙋгодно прѣда и прочии бл͠говѣрнїи въселенстїи събори оутвръдишѫ. Такожде и чьстныѧ ихь памѧти творѧще. Сице азъ своѫ вѣрѫисповѣдаѫ. И съприсным моимъ братомъ меѳодїемь и поспѣшникомъ въ бж͠їи слоужбѣ. Въ сеи бо есть сп͠сение и оупование. И сиѫ прѣдаевѣ своимь оученикѡм. Да сице вѣроуѫще сп͠сѫт сѧ. И въ страшны дн͠ь сѫдныи пакы прѣдадѧть ѫ нама. Истиннѫ неизмѣннѫ съвръшенѫ ѡ деснѫѧ странѫ ставьше. Прѣ(д) и͠у хо͠мь г(д)мъ истиннымъ бг͠омь нашимъ. Емоуже слава въ всѧ вѣкы, аминъ: ⸟

Препис: 

Лаврентиев препис в среднобългарски сборник от 1348 г., намиращ се сега в ГПБ Петербург. (F. I. 376)

Транскрипция: 
Симеон Стефанов