в(ч)е на г͠и възва(х) по(с). с(х). ѕ͠ и поемъ стры(х). гла(с) .а͠. ... (за св. Евтихий)
ины стры(х) прпо(д)бнѣи гла(с) .и͠.
Ѡ прѣславное чю(д) ты Филоѳее чьстнаа въ юности тѣлеснѣи. нераз(д)рѹшень и сьврьшень съмысль показала. Е'ввѹ древле прѣльстившаго и раꙗ лишивша. бж(с)твною силою низложила еси. силою бл(д)тию ѿ ч(с)тые б͠гоѡтроквице вьсїавшаго и мирь сп͠сша:—
Блг(д)тию ѡбогативши се исцѣлѥнїемь ѡ Филоѳее чьстнаа. врачевати недꙋгы и д͠хы лѹкавные ѿгонити славнаа. свѣтозаренїемь б͠жїа д͠ха. кь ч(с)тнѣи ц͠ркви твоеи притѣкающе касают се рацѣ твоеи славнаа. радостно пѣ(с)нми почитаемь х͠а б͠а нашего:—
Д͠вьстьвное ѹкрашение, постникѡ(м) ѹдобренїе и прѣпо(д)бныимь вѣнць,
женскаа похвала. и вѣрныимь с͠псенїе. Филоѳее дн(с)ь вьси пѣнми цвѣты вѣнчаимь и похвалами почьтемь за ны молеще се.
сла(в) и н͠нꙗ .б͠. гла(с) тьж(д)е. по(д) тож(д)е:—
Пльть вьсприемь ѿ крьвеи ти. прѣвѣчныи б͠ь те прѣ(д)стателницѹ показа. чл͠кѡ(м) прѣч(с)таа. тѣм'же избави раби свое вьсакое нѹж(д)е и напасти. и ѿ сѣтеи вьселѹкавааго врага и сїанїа причестити се спо(д)би избранны(х). вьсе славещее и покланꙗющее ти се:—
кр(с)то б(о):—
Сл͠нце видѣв' те ѹстраши се. на кр(с)тѣ Ї͠се распростьрь хотѣнїе. и землꙗ трѣшѣ се. и каменїе распадааше се. и гроби страхѡ(м) ѿврьзаахꙋ се. и силы вьсе дивлѣахꙋ се. сїа ѹбо видещи д͠ваа вл(д)кѡ(м). жалостию ѹвы мнѣ вьпїаше что зримое:—
на ѹ(т)рни. ст(х)лѡ(г). обычнаа.
канѡни .г͠. вь ѡ(х). и с͠тымь на .и͠. канѡ(н) гла(с) .д͠. ... (за Евтихий)
инь їрм(с). гла(с) .д͠. Водѹ прошь(д) ꙗко:—
Неизре(ч)нными ти б͠жїемь промысломь. б͠е вьседрьжителю. прпо(д)бнаа твоа б͠лгочьстно м͠лтвами бл͠гоприетнами подаж(д)ь ми разꙋмь сьпочитати твою паметь:—
Цр͠ковь прѣѡчистованнꙋю себе г͠ви измлада ѹстроила еси. свѣтозарно вьсакь б͠ѹ ѹкрашенїемь.
Красна ѿробы (sic!) ч(с)тнаа ꙗкоже избран'на б͠ви. достолѣпно причьте се кь ликомь избранныимь. ты Филоѳее прпо(д)бныимь ¹крашенїе:—
ѳ (богородичен)
Скорое сьгрѣшающимь примиренїе, грѣшникомь ч(с)таа готово порѹченїе. и ненадѣющим се едина надеж(д)а пѣвце твое ч(с)таа сьблюди вьсегда:—
пѣ(с) .г͠. їрмѡ(с) ...
инь їрмѡ(с). Нб(с)номꙋ крꙋ(г)
Прѣмѹдриимь ср(д)цемь. пльтьскые стр(с)ти ѹведивши. ꙗви се вьздрьжанїемь вь тлѣнны(х) мѣсто нетлѣнна. почьла еси. славѹ и х(с)во цр(с)тво изволила еси:—
Да славы бж(с)твные спо(д)биши се. вьса мирѹ краснаа прѣзрѣвши. Филоѳее ч(с)тнаа. б͠а бо възлюбила еси нб(с)нааго жениха. бесьмрьтные жизни спо(д)бльшаго те:—
Вьзлетевши на высотꙋ нб(с)нꙋю славнаа. ꙗко(ж) голꙋбица вьздѹшнаа. мирскаа ловлѥнїа ѿпльвала еси. и миродрьж'цꙋ врагѹ. порѹга се х(с)вою силою.
б(о).
Несказанно чюдо. и рож(д)ство ти странно. едина вьведши м͠ти паче ч͠лка его(ж) моли да ѹдивить се на на(с) свою мл(с)ть ходатаиством' ти:—
катавасїа:—
Нб(с)номꙋ крѹгꙋ врьхотворче г͠и. и цр͠кви зиждителю, ты мене ѹтврьди вь любви своеи желанїемь краи вѣрныимь ѹтврьж(д)енїе. едине чл͠колюбче:—
сѣ(д). гла(с) .д͠. (за Евтихий)
дрѹ(г). с͠тѣи. по(д) тож(д)е
Иже беспльтныимь слѹгамь ꙋкраситель. и вь сее твары(и) дѣлатель. его(ж) сили аг͠гльскые трепещꙋть говѣино. ихже ѡбразѹюще таино вьспѣваемь. поюще немльчно триїс͠тѹю пѣснь. бренными ѹсты ꙗко б͠ѹ. тои бо Филоѳее сам те прославиль есть:
б(о).
По б͠зѣ кь твоемѹ б͠це. прибѣгнꙋвь смѣреныи кровѹ бж(с)твномꙋ. молю и мил' седѣю пом͠лꙋи ч(с)таа. ꙗко прѣвьзидоше главѹ мою грѣси. и бою се вл(д)чце мѹченїа и ѹстрашаю се. молбѹ сьтвори ч(с)таа кь с͠нꙋ своемꙋ. ѿ си(х) избавити ми се:
кр(с)то б(о).
Д͠вице вьсенепѡрочнаа м͠ти х͠а б͠а. ѡрѹжїе проиде твою прѣч(с)тѹю д͠шѹ. ег(д)а распинаема волѥю. с͠на и б͠а твоего. Его(ж) бл(с)венаа молещи непрѣстаи. прощенїе грѣхѡ(м) намь даровати⁖
пѣ(с) .д͠. їрмѡ(с) ...
инь їрмо(с). Ѹслыша(х) г͠и сьмотренїа твоего:—
Законь б͠жїи вьзлюбльши. вьсе вражїе сѣти ськрѹшила еси. поѹчающи се д͠нь и нощь ѱ͠лѡмьскы законѹ б͠а н͠шего⁖—
Ѹкрашьши се дѣлесы. просвѣти се ч(с)таа д͠хомь б͠жїемь. приетилище показа се ч(с)тные троице прѣѡчистованно⁖
Славы б͠жїе вьж(д)елевши, славы мир'скыихь страстеи попрала еси. нб(с)ному селѥнїю по(д)би се ѿроковице достославнаа⁖—
б(о).
Оцѣщенїе прѣгрѣшенїемь. еже вѣчное рож(д)ьши избавленїе испроси ѹ вьсещедрителꙗ г͠а. д͠вце его(ж) родила еси⁖
пѣ(с) .е͠. їрмѡ(с) ...
инь їрмѡ(с). Вьскꙋю ме ѿринꙋ ѿ лица твоего⁖—
Раж(д)ег'ши се б͠жїемь раченїемь прѣхвалнаа Филоѳее. слад'каа и краснаа мира. ни вь чтоже вьмѣнила еси б͠гоприетнаа. свѣтлѹю свѣщꙋ д͠шевнꙋю вьжегла еси. б͠готворенїа масломь напающи⁖
С͠щенно възложи се вьса г͠ви ч(с)тнаа ѿ юности. чистомь ср(д)цемь и ѹмо(м) коньчныимь б͠гомѹдраа. сь постничьскыми ликы сьѡблистающи достоино. вь пищи раистѣи вьсели се⁖
Те жени(х) красныи вьсѹ ѡбрѹчиль есть. чистѹю и непорѡчнꙋю. и того вьслѣ(д) ишла еси разѹма тврьдостию. ѹкрашьши се добродѣтел'ми Филоѳее. и чюдесы блг(д)тию ѡбогати се:—
б(о).
Мл(с)рдїа ме б͠жїа. иже милосрьдно слово порож(д)ьши. м͠лбами б͠лгоприетнами спо(д)би. ꙗко славлю те теплое сѹще прибѣжище и застѹпницꙋ и кь б͠ѹ ходатаицꙋ прѣмилостивꙋ⁖
пѣ(с) .ѕ͠. їрмѡ(с) ...
инь їрм(с). Оцѣсти ме с͠псе многа:—
Възлетѣ ꙗко же грьлица въ чещѹ, дѣтѣлныи(х) добродѣанїи. и д͠вьства брьз(д)ами страсти ѹмрьтвивши. въпїе любовїю женише х͠е где почиваеши. желанїем ти ѹꙗзвлꙗе се:—
Мѹдрости паче ѹмные. доброты ѿнѹ(д) възлюбивши. мѹдрителꙗ злобѣ дрьжавно низложила еси. того ѹзы растрьзавши б͠жию бл(д)гтию⁖
Блаженыимь мь истинѹ сьмисломь ѿграж(д)ьши се. д͠во отроковице б͠ѹ ѹгодила еси. б͠лженыи житїю поставльши конць. б͠лжены(х) почьсти ꙋлѹчила еси⁖
б(о).
Надеж(д)е грѣшныимь. надеждами извѣстна ꙗви се. скрьбещиимь радости. бж(с)твные ме испльни вьсемогꙋщїа помощи мирꙋ. помощница ми бѹди н͠нꙗ дрьжавнаа⁖
ко(д). гла(с) .д͠. по(д) ꙗви се днь(с):—
Вь пристанище достигла еси бесьмрътнааго ц(с)ртва славнаа. ты Филоѳее ѹкрасьши се вь истинꙋ. прѣ(д)стоиши жениха твоего добротѣ неизре(ч)ннѣи:—
икѡ(с)
Прѣкрасные х(с)вы вьж(д)елѣвши доброти. д͠во Филоѳее. ѡ(с)тавила еси богатьство и ꙋневѣсти се х(с)ѹ. неѹгасимꙋю свѣщѹ твою сьблюдающи пр(с)но. свѣтло вьнишла еси сь петие д͠вь ликьствꙋющи. ѹкрашена ꙗко д͠ва прѣпо(д)бна. бж(с)твнымь свѣтомь блистающи се. веселещи се вь радости сь беспльтными. вьсприе'мши ꙗсно почьсти болѣзнемь и н͠нꙗ на н͠бсе(х) пищꙋ неиздаемꙋю. жениха твоего добротѹ неизре(ч)ннꙋю⁖
пѣ(с) .z͠. їрмѡ(с) ...
инь їрм(с). иж ѿ Юудеи дошь(д):—
Недоѹмѣнные доброты. б͠жїе красоты желающи ч(с)тнаа. и наслаж(д)ающи се. ꙗко ѹꙗзвлѥ его любовию. ѿць наши(х) б͠е бл(с)вень еси:—
Ѹкрасистѣ се вь истинꙋ ланитѣ твои бж(с)твнѣи. приближающи се кь б͠ѹ м͠лтвами и молѥнїемь. вьпїе ѿць наши(х) б͠е бл(с)венъ еси:—
Въздрьжанїа славꙋ тьзоименитнꙋ. званїемь полѹчивши. сь х(с)омь женихом си вьстала еси. ꙋмрьщвлѥнїемь ст(с)рты цр(с)твовав'ши, пое ѿць на:—
б(о).
Бл(с)ти масло б͠лгосрьдїа, м͠ти вьседрьжителꙗ вьзливающи. нб(с)номѹ чрьтогѹ сьсѣдника сьтвори. вьпїюща ѿць⁖
пѣ(с) .и͠. їрмѡ(с)...
инь їрм(с):— Седмь седмицею:
Новоꙗвлѥнно ꙗко с͠лнце. лѹчами блистала еси. добродѣтѣлїи и добрыми дѣлы ꙗвльши се. и вьсе раз(д)рѹшила еси бѣсовскые тьмы. недѹгы стр(с)ти ѿгонещи мракь. г͠ви поющи дѣти бл(с)вите с͠щеннїи:—
Великоносно прѣшла еси. житїе си ѹправльши. десними г͠ни ѡправданїи. сльзами потопльши, ꙗко же дрѹгаа фараѡна силѹ м͠лтвами тькмо призиванїемь. г͠ви призивающи. дѣти бл(с)вите с͠щеннїи поите людїе и прѣвьзноси:—
Бл(с)вено бы(с) ѡ г͠и теченїе твое. вь постничьскыи(х) болѣзне(х) и в по(д)визѣ(х).
прѣпо(д)бно ꙗвльши се. красотами добродѣтѣл'нами ѡбꙋченїемь б͠гоприѡбртнааго житїа. вь прпо(д)бны(х) дворе(х) зовещи дѣти бл(с)вите и прѣвьзносите:—
б(о).
На молбѹ вл(д)чце призиваю те. тебѣ ходатаици кь нѥмѹ бити непостыднѣи. припадаю и молю се. разꙋмно касаю се тебѣ прѣч(с)таа. и вьспѣваю г͠а поите дѣла⁖
катавасїа:—
Сед'мь седмицею пещь. халдеискыи м(ч)тель. б͠гочьт'цемь люте ꙗко раж(д)еже. силою лѹчшею. с͠псныи(х) дѣвь творцꙋ и избавителю вьпїаше дѣти бл(с)вите с͠щеннїи—
пѣ(с) .ѳ͠. їрмѡ(с) ...
инь їрмѡ(с):— Ѹдиви се ѹбо ѡ семь нб͠о и земли ꙋжасоше се:—
Красна и свѣтоносна. и вьсесвѣтлаа прпо(д)бные вьсїа паметь. с͠лнчные испꙋщающи зре чюдесь. юже любовию сьтвораемь. и радостно поимь вѣрныи. б͠а б͠лгодареще тое вѣн'цодав'ца. и б͠лгодѣтемь мьздодателꙗ присно:—
Пристѹпите вьси вѣрни, и почрьпѣте стрꙋе пр(с)нотекѹще ѿ ракы чю(д)точные. се бо раздаваеть. вьсемь исцѣлѥнїемь з(д)равїе. и вьсакы(х) недѹгь раз(д)рѣшаеть болѣзни. и бѣси вьскорѣ ѿганꙗющи⁖
Ꙗко имѹщи молитвꙋ б͠гоприетнꙋ. емꙋ же любовїю д͠ше ѹгодила еси истин'но. творещимь радостнꙋ и вьсечьстнѹю паметь. проси избавлѥнїе. приети прѣгрѣшенїи.
и напасти и бѣды и скрьби. твоими б͠лгоприетными ѹтѣшенїи⁖
Молбы твои(х) скороточными д͠во м͠лтвами. да избавим се вьсакого ѡзлоблѥнїи и напасти. скрьби и бѣды и печали. и вьсакого врѣда вражїа. и искꙋса бѣсовскаа да те по дльгѹ вѣрою величаю вьзвеличившꙋю рода нашего
катавасїа:—
Ѹдиви се ѹбо о семь н͠бо и земли ѹжасоше се конци. ꙗко б͠ь ч͠лкѡмь ꙗви се пльтию. и чрѣво твое бы(с) пространнѣе н͠бсь вьсѣ(х). тѣм же те б͠це аг͠гль и ч͠лкь чиноначелїа величаемъ:—
Сръбски служебен миней за месеците април/май от ХVІ в., НБКМ № 154 (л. 219б – 225б)