Сіꙗ с͠таа и прпо(д)обна Параскеви, бы(с) ѿ вьси епіватемь наричемѣ. ѿ града Каликратіе,
дьщи б͠лговѣрнѹ родителю. ни числѡ(м) б͠гати ни ѡбласти имѹщꙋ и(х). ни же паки нищотою страж(д)ѹщи(х), еи же до сьврьшеннаго вьзраста достигши, и помисль ѹтврьди(в)ши и поревновавши житию аг͠глскомѹ, и ѡставльше родителе и дрꙋгы. и вса ꙗже сѹть вь мирѣ.
и послѣдова х͠ѹ. и добродѣтелми себѣ вьперивши, и вьшь(д)ши въ пꙋстиню прѣбиваше тамо, безмльвное житіе полюбльши. жітіе рещи въ истинꙋ аг͠глское, пощеніе(м) и бдѣніемь тѣло ѹдрѹчающіи. и не бѣше вь неи видети ꙗстіа и питіа. нь пища и брашно еи бѣше сльзи и непрѣстанїе м͠лтви, тако все житіе свое проваж(д)ающи вь тои странѣ добродѣтелмы просивши,
и доблестьвнѣ прѣбивши. и ѹмь чюв(с)тво вь себе вьмѣщень и сьвькꙋплень имꙋщи въсег(д)а
къ горныимь вьзивающи, ни единном(ꙋ) ѿ земльни(х) тои прил(ѣ)плꙗти се, нь прѣбиваше
вса кь б͠ѹ вьперивши се. ѡстри и жестокы пꙋть шьствꙋющи, и свое прѣставленіе ꙋвѣдѣвши,
ѡставлѣе пꙋстиню и приходить въ ц͠ригра. и с͠таа мѣста ѻбьшь(д)ши, и тѹ мало прѣбивши,
и до своего ѡ͠чьства Каликратие дошь(д)ши и тꙋ прѣда(с) б͠лженіи свои д͠хь вь рꙋцѣ б͠ѹ живѹ.
и почь(с)ть вѣнца нб(с)на(г) въспріетъ. чь(с)тное же тѣло се положено бы(с) вь землю჻
Прилѹчи же се вь то врѣме корабникѹ нѣкоемꙋ болѣвшѹ лютиимь недꙋгѡ(м),
и ѹмрѣти, погребень бы(с) близь стльпа, идеже стльпнь нѣкои же бѣше прѣбивае,
смрадѹ же многꙋ схождешꙋ ѿ гроба ѡно(г)о, ꙗко не мощи никомѹ же минꙋты пꙋтемь тѣмь, стльпникꙋ же ѡномѹ понꙋжденꙋ бивши сьнити ѿстльпа. и трꙋпа ѡного смрьдещаго гльбочаиши погрести вь земли, ꙗко да вонѣ из гльбине исходить иніи, слышавше, и пѹта трꙋпь вьзьмши блызъ тѣла с͠тіее погребоше, тѣло(ж) тое цѣло видѣвши самоѹкрѣплено съврьшено и з(д)раво, дивише се, и ѿ сего разꙋмѣвше, ꙗко аще би с͠то било тѣло сіе, б͠ь ѿкрыл би чюдеса, и вь томж(д)е мѣсто ѡставише стые тѣло, ѻтидоше, и сіе нѣкто ѿ ни(х) именемь Геѡ(р)гіе, видѣ сьнь таковь,
чю(д)нь и ꙋжаснь, ц͠рѹ нѣкою сѣдещѹ на прѣстолѣ, и чиновь множьствѡ ѡбьстѡеще ею, и видѣвь абие страхо(м) ѻбьдрьжимь бы(с), и ниць паде, единь(ж) ѿ ѡнѣ(х) мѹ(ж)и свѣтлии(х) емшꙋ его, за рѹкꙋ и вьз(д)ви(г)шꙋ, и ц͠рци къ немѹ рекши, ѡ чл͠че, не боите ли вы б͠а ꙗко сіе тѣло с͠то ѥ(с), почто тѣло гнило и с(м)рьдещеѥ, с тѣломь раби б͠жіе Петкіе погребѣте, нь иди н͠нꙗ наскорѣ и вьсѣмь вьзвѣсти, да ѿ толика смрада избавит ме, аще ли сице не сьтворите ѡгнемь ѿ б͠а погибнꙋти, имате ибо азъ ѿ ч͠лкь есмь, и ѿчьство ми ѥ(с), Епивати, въ тьж(д)е нощь
нѣкаа жена именемь Ефїміа, тожде видѣніе видѣ, и ѡба наѹтріа вьсемь вьзвѣстишѥ. слыш(а)вше(ж) въси и прием же ѣще (sic! вм. свѣще) и притекоше на(д) тѣло с͠тіее.
и изьмше тѣлѡ и положише въ рацѣ. и несоше вь ц͠ркви с͠тіи(х) ап(с)ль. иже и цѣлби точить до сего д͠не. бѣсніе цѣлби пріемлють, слѣпи прозрѣние, хроми хож(д)еніе. и всакими различнимы недꙋгы ѡбьдрь(ж)ими цѣлби пріемлють. слышав же великы ц͠рь Іѡань Асѣнь. с͠нь великаго и ст(а)раго ц͠ра Асена, ѡ чюдесѣ(х) с͠тие, и желателно въсхотѣ принести тѣло с͠тиѥ вь своа. тог(д)а же фрѹгомь дрьжещимь ц͠риграда, и дани дающимь великомѹ ц͠рѹ Іѡанѹ Асеню, ѡставлꙗеть, имь сребро и злато и каменіе многоцвѣтное. и трѹдолюбно подвиг се прѣне(с)ти тѣло с͠тое въ свои славни ц͠ригра(д) Трьновь. и ѹсрѣтаеть самь съ патриархомь и прочими с͠тли, и лю(д)ми. съ(вѣ)щами и кадили и въсакою чь(с)тїю прїемь полагаеть въ ц͠рьскои ц͠ркви. и по лѣтѣ(х) нѣкои(х) раз(д)рѹшает се ц͠ртво бльгарское, и поганимъ исмаилтѡ(м) покоривши въсе страни
бльгарское (sic!) и срьбские, приносит се ч(с)тное тѣло с͠тїе Петки въ Бѣльгра(д).
иде же и н͠нꙗ лѥжить исцѣленїа и чюдеса вѣрни дающи. тои м͠лтвами х͠е б͠е пом(л)ꙋи на(с) ⁘
Препис в ръкопис от НБКМ № 167 от 1694 г., л. 49б-51а