Ꙗкоже сл͠нце сиꙗеть видѧщимь є · такоже ѡ мѫченицѣхь · словеса слышѧщимь · ꙗкоже н͠бо оукрашаєть сѧ звѣз(д)амы · такоже и цр͠кви б͠жиꙗ имѫщи м(ч)кы · ꙗко ц ̾вѣти на полихь · такоже м(ч)ци вь цр͠квахь · памѫть мѫчеником ̾ · дльгомь ѿпоущениє · памѧть м(ч)комь бѣснымь свобода · пам(ѧ)ть м(ч)комь животь и здравиє · и мир ̾ подаваєть · великы(х) велика под ̾визаниꙗ · свѣтли вѣньци м(ч)комь · прѣ (да)въше мѫкамь тѣлеса своꙗ · и всѣ красна мира сего · положишѧ въ смети мѣсто · да х(с)а не ѿвръгѫт сѧ · и сего ради х(с)ь възда имь сь ан ̾г͠ли жити · мнѣвь бо стары врагь рода нашего прѣборити ѫ · нѫ паче жи/129а/теле раю створи · и не прѣста възьдвизаѫ ꙃвѣри · свѣрѣпыѫ · на живѫщѫѭ бл͠гвѣр ̾но · а побѣж(д)аємьими · ꙗкоже сѧ при на(с) · въз(д)виже звѣрь свѣрѣпыи · на х(с)во стадо ·ликиниꙗ г͠лѧ · зѧть бл͠говѣр ̾нааго ц͠рѣ великааго костаньдинаа · приємы · скивьтрь · ѿ макьсимьꙗна · нечьстивааго · и оупо(д)бы сѧ дѣꙗнию єго · и абие въз(д)ви[же] гонениє на кр(с)аны · и посла повелѣниѥ · въ всѧ гра(д)и и страны · не тькмо же се · нѫ и оучиненыѫ въ воѫ · и оубииствомь повелѣниємь · м҃ · воинь також(д)е ·о҃· сътникьи ·в҃· въ македони · видѣ же се скврън ̾ныи · ꙗко бечисла м ̾ножьство не радѧть ѡ повелѣнии ѥго · нѫ въдаваѧт сѧ на съмр͠ть вѣры · ради б͠иѧ · и оумысли же паче славныѫ · въ воихь и въ градѣхь · ємати · нꙋдити и пожрѣти идоломь ·/129б/ мне се врагь страхомь своимь · побѣдити ѧ · и ищемо мъже славьныимь вьсѫдоу · повелѣниемь ц͠ревомь · и повѣдашѧ емоу ѡ етерѣ мѫжи ѳеѡ(д)рѣ · и ꙃѣло краснѣ видѣниемь и прѣмѫдрь бесѣдоѫ · иже бѣ ц͠роу схоластикь · вриѡторь же, словѣше · юнь тѣломь старь же бо͠голюбеꙃнѣ · дѣꙗни своими · и ѡ семь слыша свѣрѣпы, ликини · и посла кь немоу слоугы сь дарьми · изь никомидие въ араклиѭ · и евьксина · пѫти близь сѧща · тоу бо живѣше бл͠ажены ѳеѡ(д)рь · привести сь многоѫ ч(с)тиѫ · ѡниже прише(д)ше бѣ жа(д)хѫ прıити кь ц͠роу · гл͠ѧще грѧди вь желаѫщомоу тѫ · ꙃѣло бо хощеть видѣти свѣтлое твоє лице · бл͠жены же ѳеѡ(д)рь · мѫдрыми словесы рꙋгаше сѧ имь · єще же /130а/и приѧти ѧ с ̾творь · люблѣше же ѫ вельми · и оудръжа же ѫ ·г҃· д͠ни · ꙩ нѣм ̾ же нѫдѧщимь сѧ поити · и самь оудрьжавь мало ѿ нихь · а прочѧѫ посла кь ликинию написав ̾ кь немоу посла писаниє · ꙗко да самь двигнеть сѧ · и да придеть кь немоу съ ч(с)тными б͠гы ·ре(ч) да при тебѣ пожрѫ · ѻниже възвратишѧ сѧ къ ц͠рю и повѣдашѧ писание ѿ ѳеѡ(д)ра · добрѫѭ дѣтѣлъ его · рекьше ꙗко по(д)баеть тебѣ двигнѫти сѧ кь немоу · и семоу бо бываемоу · мноꙃи бо имѧть поклонити сѧ бг͠омь · и послушавь же ликинии словеса ихь · и сьбравь множьство великоє граж(д)ань · и селѣны ꙗко ·ѳ҃· тысѧщь · и поиде вь ираклиѫ · сь великоѫ радостиѫ · вь тѧже нощь с͠ты ѳеѡ(д)рь · /130б/ видѣ вь с ̾нѣ · ꙗко вьзѧть бы(с) покровь храмаа вь немьже лежаше · и стрѣлы ѡг ̾н ̾ны с ̾ нбе(с) летѧще на нь · и гла(с) г͠нь г͠лѧ кь нем(ꙋ) · дрьзаи ѳеѡ(д)ре · с тобоѫ ес ̾мь азь и вьста же бл͠жены и расмотри сьнь · и помыслии ꙗко г͠ь бѣдить и на мѫчениє · и ѻбьвесели сѧ ꙃѣло · и оувѣ(д) ꙗко, ликини ц͠рь приближи сѧ · и вьлѣзе вь нѫтрьнѫѫ клѣть своѫ · кланѣѫ сѧ ꙃѣло и г͠лѧ · пѫть шествоуи с ̾ м ̾ноѫ г͠и · вь течени и семь тебе ради · въставь же, и оумы си лице · и ѡбльк ̾ сѧ вь ризы своѫ брачныѩ · вьсѣде на конь · и срѣте ц͠рѣ · и до(с)ино поклонение с ̾твори єм(ꙋ) · и ре(ч) ра(д)уи сѧ г(д)не · дрьжавьны властелине · ц͠рь же лобьзавь ѫ и г͠лаше · приди оубо · сл͠нцоузра/131а/чне · и вѣнечно, славне · по(д)баєть тебѣ вѣнець носити · и с м(н)оѫ ц͠рьствовати · и вьшедъшоу же емоу вь ираиклиѫ · и прѣстолоу великомоу оуготованоу бывшоу ємꙋ · и сѣде ц͠рь и ѳеѡ(д)рь · и народоу м ̾ногоу прѣстоѫщоу прѣдь нимь · и г͠ла ц͠рь приꙗтелоу мои ѳеѡ(д)ре · нарьци д͠нь · в(ь) (н)ьже имаши прıнести жрьтвы великымь б͠омь · и ре(ч) бл͠жени ѳеѡ(д)рь кь немоу · принеси ми ц͠рю честнѣишѧѫ твоѫ б͠гы · да створѧ ѫ вьнести въ клѣть моѫ · и покаж(д)оу и помажꙋ и(х) · пакы принесѫ ѫ · прѣдъ тобою и пожрѫ имь · и въземь бл͠жени ѳеѡ(д)ръ · б͠гы златиѫ и сребрьныѫ · и вне(с) ѧ въ клѣть своѫ · вь · полоунощи разби и ськроуши ѫ · и раз(д)а ѫ нищимь · и двѣма же д͠ньма мимо шедьшема · и при/131б/зва ликинии м(ч)ника и ре(ч) емꙋ · ꙗкоже добра рода еси и славьнаа и чьтомь дрѣв ̾ними ц͠ри · и покажи дрьзновение свое кь б͠гомь · и прѣдь вьсѣми пожри имь · да прочи, видѣв ̾шеи тѧ · дрьꙃѣишѧ бѫдѧть · макьсеньтие же · сьтьникь прѣѫ рѣчь и ре(ч) · ц͠рю тако ми б͠зи · и славьнаа твоꙗ дрьжаваа ·порѫгал ̾ сѧ естъ · азъ бо видѣхь, вь минꙋвьшꙋѫ нощь · г͠лавѫ великѫѫ арьтемидѫ · носимѫ женоѫ етероѫ оубогоѫ · и ра(д)уѧщи сѧ ѡ неи · и диви сѧ ц͠рь и бы(с) безьгла(с)нь · и ѿвѣща ѳеѡ(д)рь и ре(ч) ємоу · тако ми силы х(с)ви · ꙗко тако єсть · ꙗкоже, мак ̾сеньтиє ре(ч) · добрѣ єже сътворихь ц͠рю · аще б͠зи твои не могѫть помощи себѣ то намь како могѫть помощи · /132а/ тог(д)а ликини из ̾мѣни лице своє · и колѣни си, съплеть рѫкама · и въпиꙗше г͠лѧ · оувы мнѣ оувы мнѣ · порѫгань бы(х) · и что рекѫ · или что вьз ̾г͠лѧ не вѣмь · ц͠рю дрьжавьноу к ̾ь гоубителоу, семоу си рекь · и народоу сьбрав ̾шоу сѧ · и вь сьмѣхь, быв ̾шоу · всѣмь против ̾нымь воєм(ь) · ѥще же и красныѫ б͠гы разьбыв ̾шоу · и раздаль єси нищимь · м(ч)кь же х͠вь ѳеѡ(д)рь ре(ч) · рыкаєши ц͠рю · нѫ азь играѫ · ты сь б͠гом ̾ бориши сѧ · нѫ азь б͠гословѧ и · ты хꙋлиши · нѫ азь хвалословоу · ты мр͠тьвымь слоужиши · нѫ азь б͠оу живоу · ты серапию · азь же серафи(м)скомоу · ты аполоноу · нѫ азь спа(с)ѫщомоу · ты же тракининь ꙋглъ · азь же врьховьны римлѣнинь · ты ликинии, вѣꙗтель · азь же ѳеѡ(д)рь б͠жи дарь · тѣмьж(е) /132б/ ц͠рю не гнѣваи сѧ · ни рыкаи · се бо тв(о)рѧ сам сѧ м(ч)ши · и ѡбразь ѡсли имаши · тѡг(д)а разьг ̾нѣва сѧ ликини · и повелѣ м(ч)ка съвлѣщи · и протѧгнѫти и быти ·д҃· ми по плещьма · батови ·н҃· и по чрѣвоу ·ѯ҃· рань · и потомь повѣлѣ солигами ѻловѣнами · бити по выи его · нем(лс)тив ̾но · и нокьты желѣз ̾ы трьзати плъ(т) єго · и свѣщами горѫщами жещи по строупомь ѥго · и чрѣпы ѡстры брести сьсѣдьшѧѧ крьвь ѥго и по семь повелѣ затворити въ тем ̾ници · и ноꙃѣ єго забыти вь кладѣ · и не дати емоу ꙗсти за ·е҃· д͠неи и по семь повелꙗ кр(с)ть оустроити · и поставити прѣдъ враты привести же с͠таго · и пригвоз(д)ити на нємь · и пришедьше слоугы · и пригвоздишѧ емоу рѫцѣ · и ѥдинъ гвозды /133а/вьбишѧ вь таины оудь его · и ино горе, сътворишѧ ѥмоу · и ѡтрокомь повелѣвше, стоѫщимь стрѣлѣти вь ѡчи єго ·и истрьзати стрѣли сь ꙃѣницами єго · дроузии же, таинны оудъ ѥго · ѡстры желѣзы прокараахѫ · азь же тоу бѣхь єдрописець авьгарь · зрѫ м(ч)нка · слышѫ же таин ̾ное възьдыханиє єго · и поврьгохь коньдикелы · и поклѣнѣхь сѧ на ногоу его · господин ̾ же мои · стр(с)рць х(с)вь ѳеѡ(д)рь · маломь гла(с)мь ре(ч) м(и) г͠лѧ· авьгаре дѣла своєго не ѡстави · и не прѣстани ѿ бесѣды · бѫ(д)щѧѧ[ѻ] м ̾нѣ· нѫ прѣтрьпи да ѡшестьвие моѥ напишеши · и подвизаниꙗ · и д͠нь сконьчаниꙗ м(о)его · и въпиѫ ѳеѡ(д)рь г͠оу г͠лаше · прьвѣє ми г͠и ре(ч) ꙗко с тобоѫ єсьмь · и н͠нѣ вьскѫѫ ѿстѧпи ѿ мене · виж(д)ь г͠и · непороч ̾наа мѧ сътвори · и звѣриє ди/133б/ви разоришѧ тѣло мое · и тѣбе ради изѧста се, ꙃѣницѣ ѡчию моєю · и пль(т) ми ѡг͠ноу прѣдана бы(с) · власи же мои падаѫть по земи · зѫби же ѡск(в)рънѣѫт ̾ сѧ · л[и]це же ѡсинѣеть · и кости соухи · страхом ̾ прıдрьжѫть сѧ кр(с)тѣ · помени г͠и ꙗ[ко]тебе ради постра(д)хь · нѫ и желѣзны, гвозди проидѫ мѧ · и вьс ̾прими ѡкаан ̾ны д͠хь мои · и оустрои ꙗкоже хощеши · азь бо исхож(д)ѫ ѿ житиꙗ сега · и се рекь к томꙋ не провѣща · бѣ бо сьдр(о)бено все тѣло єго · и мнѣв ̾ же ликини ц͠рь ꙗко оумр͠шаа · и повелѣ ѡставити висѧща на дрѣвѣ · и вь прьвѫѫ же стражѫ нощи · и посланъ бы(с) ан ̾г͠ль ѿ б͠а · и ѿрѣши и ѿ кр(с)та того · и сьтвори тѣло єго здраво · и лобьзавь и и ре(ч) емоу · ра(д)уи сѧ ѳеѡ(д)ре и вьзьмагаи · ѡ бл͠годѣти г͠а нашего ıс(с)а х(с)а · се бо с тобоѫ єсть г͠ь б͠ь ·/134а/ и по что ре(ч) ꙗко ѿстѫпи ѿ мене · скончаи оубо течениє и страсти твоѫ · и придеши кь г͠оу нашемоу iсоу(с) х(с)оу ·и приимеши бес ̾м͠ртны вѣнець · и се рекь ан ̾г͠ль и ѡтиде · с͠ты же ѳеѡ(д)рь здравъ бы(с) · и хвалѣше своєг(о) вл(д)кѫ · и начѧть пѣти г͠лѧ · вьзнесѧ тѧ ц͠рю мои б͠же мои · и бл͠гословѧ имѧ ти вь вѣкы вѣка · и прочеє · ликини же свѣта не дочека · по брѣзгоу посла аньтиѡха · и патрикиꙗ · ѻба своꙗ сьтника · бѣста бо и чрѣдьника · и г͠ла кь нима ц͠рь ше(д)ша и принесѣта ми злоє то смр(т)ьноѥ тѣло · льсца ѳеѡ(д)ра · да вь ракꙋ ѡловѣнꙋ вьложѧ · и вь глѧбинѫ морьскѫѫ въвр ̾жемь є · несьмысльны(х) ради крьстинь · шедьша же сьтьника кь мѣстоу · и дрѣво видѣста лежѫще · искомаго ниг(д)ѣже · не видѣше ст͠го ѳеѡ(д)ра ·/134б/ и ре(ч) аньтиѡхь кь патрикию · вь истинѫ ꙗко галилеи г͠лѧть · ꙗко х(с)ь в ̾с ̾кр͠сль есть · и сего дне(с) вьск ̾р͠си и · патрики же близ ̾ пристѧпи · и видѣ бл͠женаго ѳеѡ(д)ра сѣдѧща · и поѫща словеса б͠жиꙗ · и вьзьпи гла(с)мь велиємь и ре(ч) · велеи б͠ь кр(с)тиꙗньскы · и пристѧпльша кь немоу и рѣста · м(л)ивѣ ти сѧ · и вѣ кр(с)тиꙗнина есвѣ · и вѣроваста вь тьи д͠нь и та · и ·о҃· вои ины · и ·в҃· и оувѣдѣв ̾ же ликинии · и посла аньтипата · икеѳа · и инѣхь ·т҃· воинь да ꙋбиѫть ѫ· шедьше же и видѣвше ·ꙗже творѣше бл͠жены ѳеѡ(д)рь · и вѣровашѧ вьси вь г͠а · и сьбрашѧ сѧ множьство на мѣсто тѡ· и въпиꙗхѫєд(и)нь б͠ь кр(с)тиꙗнскы · ты єд(и)нь б͠ь и нѣ(с) иного · и бы(с) единь га(с) · и вепль и вьсѣмь г͠лѧщемь · кто єсть ликинии вѣатель · камениємь по/135а/биꙗт(е) и · нашь бо ц͠рь б͠ь єсть · проповѣдаєми ѳеѡ(д)ромь · и бы(с) мѧтежь и мльва велика · и крьвопр(о)литие · и притече ѥдинь копииникь · леѡдорь именемь · на с͠тааго ѳеѡдора · и срѣте и аньтипать · и исхыти оу него копиє· и пронѫзе и посрѣдѣ· моужь же етерь ·ѡбринь родомь · притекь и ско[н ̾]ча аньтипата · и приближи сѧ м(ч)нкь словесы довольними · и побєсѣдова народоу · и єд ̾ва оустави шоумь · и жало г͠лашениꙗ· г͠лѧ кь нимь ·ѡстанѣте любими мѫжи · вл(д)ка мои х(с)ь · распѧ(т) бывь и оудрьжа сѧ· анг͠лы м(ч)ти родь члч(с)кыи и грѧдѫщоу єм(ꙋ) мимо тем ̾ницоу · сь многомь народомь· сѫщии въ темници вьпиахѫ· пом(л)оуи ны рабе б͠а выш ̾нааго · ѻнь же словомь разрѣши имъ ꙋзы · и ре(ч) ѳеѡ(д)рь кь нимь · идѣте /135б/ мѧжии сь миромь · и поменѣте мѧ· много же множьство ·ѡбрати сѧ кь г͠оу нашемоу iс͠оу х(с)оу и мноꙃи ѿ имѫщии(х) дльгы и недѫгы и мѫчими д͠хы неч(с)тыми · и исцѣлѣшѧ прикасаниємь рѫкы єго · и вонами ризь ѥго · и повѣдашѧ ликинию ·ꙗко множьство ѡставльше лю(д)є б͠огы · и вѣровашѧ х(с)оу сь ѳеѡдоромь · и раз ̾гнѣва же сѧ ликинии повелѣ мꙋченика оусѣкнѫти · и видѣшѧ народи и въск ̾лицаше на ликиниꙗ· бл͠жены же многы словесы · и оучени молѣше и г͠лѧ· братиꙗ моꙗ· не имѣте печали ѡ ликинии · слоуга бо есть ѡц͠а своєго диꙗвола · мнѣ бо до(с)ить · оуже кь г͠оу б͠оу моємоу поиты · и сконьча молитвѫ· изнамєнавь все тѣло своє· и рече кь авьгароу · не оуны написати д͠нь скон ̾чани/136а/ꙗ моѥго · и тѣло моє положи вь євьхаитѣхь · вь селѣ дѣ(д)ни ми · и єг(д)а сконьчаѥши сѧ· и лѧжеши ѿ шоуѩ мене · и пакы помоли сѧ много · и скон ̾ча мл͠твѫ· и рекь ами(н) · илобьза братиѫ вьсѧ и прострѣ ч(с)тьнѫѫ выѫ· и оусѣкновень бысть · м(с)ца · феврарѣ· вь ·з҃·мы д͠нь сꙋботьныи ·а҃· не(д)лѫ поста · и вьземьше с͠тоє тѣло єго · сь свѣщами и сь каньдилы · и несошѧѿ араклие вь євьхаити · и тоу положишѧ и · многа же чюдеса · и и(с)цѣленıꙗ творить г͠ь н͠шь с͠тымь м(ч)еникомь ѳеѡ(д)ромь · на мѣ(с)томь · ꙩ х(с)ѣ iс͠ѣ и г͠и нашемь ·ѥмꙋже слава и ч(с)ть и дрьжава · и покла(н)ѣниє·ѡц͠оу и с͠ноу и ст͠омоу д͠хоу · и нинѣ и прıсно и вь вѣкы вѣкомь ами(н) ⁘ —
Ягичев златоуст, л. 128б-136а