Сыи ѹбо бл͠женыи и прѣпо(д)бныи ѡ͠ць н͠шь методиѥ. ар(х)иѥп(с)пь вышнаѧѫ моравы. бра(т) сѫщь прѣпо(д)бнааго кирила философа. прьвааго ѹчителѣ словѣньскы(х) книгь. ро(д)мь сѫща солꙋнѣнина. бѣ же сыи методиѥ сь своимь братомь. вь срацынѣхь и коꙁарѣхь ѹчѧ ѩ симь православнѣи вѣрѣ. прошедша же всѧ прѣж(д)е ре(ч)ныѫ ꙁемлѧ. и вь моравѣ наѹчьше ѹченикы и поѥмша ѫ в римь идоста. римлѣне же дѣло ѥю с͠то и ап(с)лко нарекше. п(о)ставишѫ преꙁвитерѫ словѣньскыѫ. ѹченикы. абиѥ же по чинѹ. бл͠женыи кириль андриꙗнь же папежь римьскы. постави и ар(х)иѥп(с)па. бл͠женааго методиꙗ. на столь андроника ап(с)ла. панонскыѫ ѡбласти. идеже ѹчѧ многыѫ напасти и пакости прѣтрьпѣ. ѿ сьпрѫческы(х) ѥп(с)пь и преꙁвитерь. противѧщиих сѧ правѣи вѣрѣ. по иꙁблѫдению глигорѣ дилѡга. сѣдѣше вь ꙁемли моравьстѣи. прѣложивь сѧ .ѯ҃ книгь. ветхаго и новааго ꙁакона ѿ грьчьскаго. вь словѣньскы. вь .г҃. ѥндикть вь .ꙅ҃.тноѥ. триста .д҃.г(о) ста третиѥ лѣто. при с͠топльца кнѧꙁы. ц͠рь бѣше грьчьскы василиѥ. а бльгаромь ѿ б͠а кнѧꙁь борысь. краль нѣмечьскымь лю(д)мь. и наѹчь же ѹченикы своѫ правѣи вѣрѣ. и прорекь ѡ свои см͠рти. прѣж(д)е трьми д͠ньми ѹспе ѡ г͠и сь миромь. лежить же вь велицаи цр͠кви моравьстѣи ѡ лѣвѫѩ странѫ. вь стѣнѣ ꙁа ѡлтаремь стыѫ б͠цѫ. д͠шѫ в рѫцѣ б͠ѹ прѣдавше. приѥмь цр(с)тво нб(с)ноѥ. тѣ(х) мл͠твами ⁘
Лесновски пролог (САНУ 53), л. 315б-316а