Житие на св. Иван Рилски от Георги Скилица (пространно)

Свѣщенное начѧти повѣданїе желанїе ꙋбо понѫж(д)ает мѧ, стра(х) же възбранѣеть, мн҃ѡго ми ѡ(т) начѧтїа ꙗвлѣѧ прѣпинанїе. Мѡусеови бо възвѣсти. ѡ(т)рѣшити сапогь повелѣвь. ег(д)а на ст҃ѫѧ възыти хотѣше землѧ, и Озань бж҃їи гнѣвь призвавы. иже къ кивотꙋ ст҃омꙋ дрьзнѫвь прикоснѫти сѧ. ст҃҃ѣми левгиньскими слꙋгами. ненаписань сыи и еще же сщ҃еннаго и огнемь полѧщаго. подолка архїереа Аарона кромѣ ст҃льскаго помазанїа, нѫ гл҃и бж҃а гнѣва на себе въжегшимь. иже бо неѡчищенными ср(д)чными стопами. ни мрт҃вых дѣль себе очищьше. и достоини бж҃҃їа прикосновенїа ꙗвишѫ сѧ. и безь расѫжденїа къ чистымь пристѫпаѧть. ти Дв҃дьское прѣобыдѧть запрѣщенїе, иже сказати бж҃їа оправданїа. и възпрїимати ѧзыкомь завѣта его, еже избранны(м) своимь завѣща. ѡ(т)селе ѹбо начинанїе прѣсѣцает ми, и възбранѣет ми сѧ прилежанїе. мн҃ого съвѣмь себе къ сему, дѣли недо(с)нна. нѫ ѡ(т)тѫду, иже дѣлы съврьшитель, новыѧ бл҃г(д)ти начѧлникь. б҃ъ и чл҃вкь, чл҃вколюбець сыи. иже фарисеѡ(м) заграж(д)аѧ ѹста не добрѣ прише(д)шїи. иже не помышлѣѧщемь. и прикоснѫвшеи сѧ краа рызь его ве(ч)рѣѧ съ митари. и въ Закхеѡвь дѡ(м) на сп҃сенїе прише(д). и не изгонѧ вьнь приход­щи(х) къ нему. дрьзати же обрѫчаеть, и того ради ты ѡ(т)врьсты врати въсѣмь, понежеи ѡ(т)врьзати тлькѫщи(м) готовь е(с). и просѧщи(м) въдаеть прошенїе. нинѣ же съ высоты г(с)нѧ призывааше силѫ. понеже без того ничтоже творити на(м) невъзможно. ꙗко же въ еу(г)лїи ре(ч) съписанїе бж҃(с)твное бг҃олюбивыи(м). послушникѡ(м) прѣ(д)лагаемь. ревности бо пострѣкатель нашь ср(д)це ꙋꙗзви, еже писанїю не прѣда. и мѫжа прѣпо(д)бна и съврьшена. аг҃гл(с)комь ѧзыкомь тькмо ꙗвлѣема ѡ(т) оц҃ь къ чѧдѡ(м). ꙗкоже и мн҃ѡжаишаа ѡ(т) нихь, ꙗко и каменна погрѫзошѫ. дльгыимь врѣменемь съдѣловаемаа. нинѣ же въсѫдꙋ въсѣчѧскаа бѣднꙋѧщеи въсѣчьскыѧ памѧ(т) чл҃вчьскыѧ. ѡставити врѣмене лѣностнѣ житїе, къ бл҃гомꙋ въводѧщее наслажденїе. нѫ ꙗко и бл҃годаренїа по(д)бно. иже оставити писанїе разсмотрьномь. скораго врача богативше. въ пагꙋбныхь недѫзѣ(х) и въ лѣтѣ(х) тѣ(х). нѣгог(д)а (sІc!) бо въ Срѣдець послани бѣхѡ(м) ѡ(т) самодрьжца Манꙋилѣ. въсѣ(х) възде древле цр(с)твоваши(х). прѣимѧщаго. ицѣленїе приемше безмъз(д)но. и безболѣзньное ꙗкоже инѡчьства. зимоѫ одрьжимꙋ бити. ни ѡгнемь жещи сѧ паче мѣры. нѫ и о мышцѧ болѣ зни измѣнше сѧ еже намь противныѧ врагы, на велицѣмь сл҃нци приврьже. нѫ что ꙋбо что же нѫ бл҃горазꙋмнѣмь ѡ немь ꙗвити потьщимⸯ сѧ. и о таковѣ(м) стльпѣ, еже къ нашемꙋ бл҃годѣанїю прѣ(д)писанїемь полагае(м). нѫ да приврьжемⸯ сѧ къ повѣ данїю ~

Иже нинѣ въ постницѣ(х). прѣсловѧщи сыи Іѡаннь великїи въ чюдесе(х). бльгаринь ꙋбо родѡ(м). ѡ(т)ч҃ьство же его срѣдечьскыи гра(д), иже ѡ(т) древны(х) славныи. и елико же ѡ(т) далече того рож(д)енїе сказати, [испытно же ѡ(т)ч҃ьства рож(д)енїе сказати]. село нарицаемое Скрыно. въ лѣта же бѣ цр҃ѣ Константина. [и по тоговѣ же съмрьти], дрьжавѫ цр(с)вїе прѣѧт Іѡаннь, того свѹѧ грьчьскїѧ прѣдѣлы до Искра. Написа родителѣ же того Іѡанна. бѣста бо ни ѕѣло богата, [ниже пакы до конца нищетоѫ страждѧща] нѫ доволно имѧща трѣбованїе. о пищи и одежди, по великомꙋ Павлꙋ. не изнемагати, нѫ да и съ послꙋшанїемь ѡ(т)даваеть кесарева златника написанїемь. то ѹже проше(д), въ дв҃ьствѣ и цѣломѫдрыи прѣбывааше. паче же и прѣболее дв҃ьства помышленїемь [имѣше ѡ(т)лѫченїе]. ни събирати сѧ на бесѣды влѣкѡ(м). ниже ревновааше пространнном житїю необꙋзданномꙋ. и къ цр҃квамь бж҃їамь ꙋпражнѣѧ сѧ не прѣстааше.и сщ҃енны(х) послꙋшааше книгь, ꙗко же трꙋдолюбⸯнаа пчела въ ср(д)чнѣмь скровищи. паче медовнаго съта сла(д)чаиша словеса г(д)нѣ полагааше. и ꙗко же блгорѡ(д)ное дрѣво въ приисходищи(х) ѹчителскы(х) вѡ(д) въкоренив сѧ. и ꙗко же бл҃гь плѡ(д) въ времѧ свое начѧкы ѡ(т)даваѧ, всѣмь разꙋмѣнїе. не тькмо же нѫ и Ха҃ ꙋвѣдѣвь въ еу(г)лїи. своеи матери и тоѧ обрѫчникꙋ покараѧща сѧ. и зыти ѡ(т) Іер(с)лима въ Назареѳь, за в҃і лѣ(т) по пльти того възращенїа також(д)е и родителма раболѣпно повиновааше (с). и чьсти ѡ(т)ц҃а и мт҃ре по древнем(ꙋ) законꙋ наꙋчив сѧ заповѣди. тою ꙋбо ѡ(т) трꙋда питааше сѧ. са(м) же, ꙗко незлобивїи Авель дѣлааше землѧ. и Адамскыѧ клѧтвы. себе же и тою, измѣнити хотѧ. понеже ѹбо и сиа землѧ мт҃ре своеѧ, въ глѫбокѫ старость доше(д)ша възвратистѣ сѧ. наслѣ(д)никⸯ же обьѧста сѧ к҃е лѣ(т) възрастѡ(м) съчетаемь. житеискы(х) же печалы ѡ(т)нѫ(м) ѡ(т)ложи сѧ. и богатьства приобрѣтенїа. нищїи(х) же прїобⸯщевааше хлѣбꙋ своемꙋ и солы. и сънмища и пꙋстошны(х) бесѣ(д) ѹдалѣаше (с), и празнословїе възненавидѣ. а великаг(о) Павла заповѣди съ мльчанїе(м) въ простотѣ живыи житїе. и по Іакѡвꙋ ѡномꙋ. еже Ісава прѣж(д)е рож(д)ства възненанидѣ бж҃їа прѣльстника. иї себѣ единомꙋ тъкмо вънимаѧ. и чювестьвныѧ двери къ житеискы(м) похотемь затвори. ꙗкоже непотрѣбень сыи мнѣше сѧ по Соломѡнѣ. и безчьстень въ жилищи ѡ(т)ч҃ьства си въмѣнень бы(с) и въсѣми прѣобыди(м). не бѣ того ѡ него же сѧ тькнѫ. и вънѹшенїе полагаахѫ мѫжа. по Х(с)вꙋ повелѣнїꙋ жити хотѧщаго. [по прѣмн҃огѹ же мльчанїе имѣше]. храненїе ѹстнама своима, аще же коли хотѣаше развести ѹста. н тако ꙋ тѣсныи пѫ(т). и скрьбныи ꙗвлѣаше къ немꙋ, и та жестокаа и пространна стьѕа. добродѣтелми ꙋдобь проходна къ раистѣи ꙋбо пажити, къ тамо сѫщїимь рѣка(м) шествꙋѧщаго еѫ въводѧщи. ѡни же ѹбо подражаѧще и рѫгаѫще сѧ емꙋ не прѣстаахѫ. въсѣчьскы стѫжаѫще, и ѡ(т) дѡма изгнати понѫждаахѫ сѧ лѫкавыи(м) наставлѣеми. и да ре(ч)ть кто ꙗко(ж) Іѡсифь, ѡ(т) братїѫ продае(м) бѣ. Іѡаннь въсѫ землѧ бж҃їѫ бити съвѣдїи Х(с)вѫ. еже къ ѹченикѡ(м) заповѣда помысливь, и пра(х) земни ѡ(т) ногь ѡ(т) трѧсти повелѣваѧще града того, иже не послꙋшаеть проповѣданїе ѹченикь Х(с)вь. и ѡ(т) ѡтечьства изыти поꙋчаше (с). и ѡ(т)нѫ(д) бы(с) ктомꙋ бж҃їи съсѫ(д) себе ѹстрои, и еже ктомꙋ желанїе(м). ѡнь же не тькмо Авраамовь Б҃ъ сы и Ісааковь, иже сь тѣми, нѫ и въсѣ(х) по съдѣтелномꙋ словеси присвааеть къ себѣ. ꙗкоже Авраама вѣрꙋѫща. въ снѣ ѹбо великомꙋ семоꙋ Авраамскомꙋ добродѣтелми ꙗвль сѧ и ре(ч) емꙋ. изыди ѡ(т) рож(д)енїа своего, и прїиди въ землѧ въ нѧже ти покажѫ.

Възпрѧн ѫвь дивныи съ мѫжь, и въсѣ маломощнимь расточивь елико же имѣше ѡ(т) ѡтечьскыѧ чѧсти. и на наше ѡшествїе ѹправлѣет сѧ. иї мнишьскыи възпрїемле(т) ѡбра(з). и тькмо едино ношааше врьтише. възпрїемле(т) и кожнѫѧ рызѫ съшвенѫ. ꙗко же подалече ѡ(т) ѡтечьскаго села изыде. показаемь землеѫ и наставлѣемь. положи абїе ризы своѧ на пѫти. вѣдїи ꙗко нагь създань бы(с) пръвозданныи. и облѣче сѧ въ кожнѫѧ рызѫ. стр(с)темь ꙋмръщвленїе прознаменаваѧи. на прѣди ре(ч)ннѫѧ емꙋ горѫ вызыде. и тамо сътвори себѣ колибѫ съ нѣкаковы(м) храстїемь. на основанїе и съгражденїе събра. и на мн҃ѡгы ꙋбо дни прѣбивааше алчень, бдѧ и молѧ сѧ. идеже ѹбо е(с)ствꙋ понѫж(д)енїе, тꙋ и дх҃ь бъдрьно прѣбивааше. билїи ꙋбо того тъкмо питѣаше сѧ, хлѣба насытити сѧ не имааше. и никто же того не присѣщааше. б҃ѹ, въсѣчьскыи творѧщомꙋ сїа, и трьпѣнїе его искꙋшаѧщꙋ. стоанїе же его бѣ въсенощное къ Бꙋ҃ кꙋпно и въседн҃евное. и рѫкꙋ прѣпо(д)ною въздѣанїе. ꙗкоже ни тѣлесемь обложенꙋ мнѣти сѧ, нѫ по безпльтны(х) сѫщьствꙋ без работи прѣбывааше и без болѣзны. сльзныѧ его рѣкы кто изчьсти може(т), ѫже ꙗко ѡ(т) източника точааше. нѫ ꙗко же прѣж(д)е завистїѫ дїаволеѫ змїа из раа Еввѫ и Адама изгнавь. полагаеть ꙋбо и нинѣ постникꙋ Іѡаннꙋ. пѹстынѧ тоѧ прѣселникꙋ бити понѫж(д)аѧ. иже по ѡбразꙋ бж҃їю и по по(д)бїю до конца съхранити и тьщьще сѧ. разбоиникы ꙋбо въорꙋжи на безьименнаго и на безьорѫжнаго. и ничто же иного развѣ тѣло рызоѫ, въ смоковнаго мѣсто листвїа ѡбльчено имѧща. и ѡбтекошѧ ѡколоврьсть хижицѫ его, и тъ въскорѣ не разоришѫ. самого (ж) бишѫ ранами рекше емꙋ. аще въскорѣ не ѡ(т)идеши ѡ(т) мѣста сего, то мечѧ имами и раздробити тѧ имами гл҃ахѫ емꙋ. и тако прѣтѧще емꙋ ѡ(т)идошѫ. ѡн же не тькмо из града въ гра(д), ꙗкоже Хс҃ ѹченикѡ(м) свои(м) заповѣда. нѫ и ѡ(т) пꙋстынѧ въ пꙋстынѧ, Ха҃ ра(д) ѡ(т)гонимь на ползѫ бити помысливь. по шесть м(с)ь ѡ(т) тоѧ горы отиде.

Ѱалмописца цр҃ѣ послꙋшавь бг҃оѡ(т)ца. прїидѣте възыде(м) на горѫ г(с)нѧ велегл(с)но гл҃ѧще. Мѡусеа же кѫпиноѫ. и Илїѫ ѹвѣдѣвь видѣвша бж҃їѫ славѫ въ гора(х). самого же Ха҃ на горѣ бж(с)тва своего славѫ. тѣ(м) же врьховны(м) ѹченикѡ(м) показавша. на горѫ пакы вызыде на дрꙋгѫѧ, еѫже около рѣка течаше. сиѫ же тꙋ живѫщи именоваахѫ Рыла, дрѣвеси же мнѡгыми ѹчѧщена, и храстїемь. и тѹ҃ абїе обрѣте дрѣво тьмами вѣтвїе имѧще безчисла. само же ѡ(т) корене ѡ(т) мнѡгы(х) лѣ(т). и толикѫ҃ дебель имѣѧ. ꙗко два мѫжа ставша противѫ себѣ имета сѧ за прьсти рѫчныѧ, и тако възможе та ѡсѧгнѫти. въ немⸯ же иї дꙋплина бѣ велика ꙋстроила сѧ, и врата ꙗкоже въходити вънѫтрь. Бѹ҃ въсѣчьскы(х) хотѣнїе видѣнїи дрѣвꙋ ѹстроившꙋ. въ то(т) ѹбо бж(с)твныи сыи мѫ(ж) жилище по(д)бно себѣ сътвори, ꙗкоже нб(с)ныѧ птицѧ. ни ѡ инѡ(м) ничто же печалꙋѫт сѧ, ни о пищи. нѫ тъкмо къ нб(с)номꙋ цр(т)вїю възлетѣти понѫждаѧ сѧ. не токмо же ничто ѡ(т) прьваго прѣбиванїа не остави бѣды ради прѣселенїа. нѫ ѡ(т)толи поболше постѣше сѧ. и нѫждѧ сѧ въ всенощное стоанїе. мн҃ѡжаише же теченїе сльзное показавше. нѫ что ꙋбо, вѣдыи Бъ҃ чл҃вчьскѫѧ немощь и нель жно рекыи, въсѣ приложѫт сѧ иже на того възложшимь печаль. понеже видѣ в постѣхь того прѣбиваѧща. даже и до вторїѧ не(д)лѧ. ни ѡ(т) дивїаго мѣ ста себе стѫживша. не трѹднѫѧ томꙋ трапезѫ ꙋготовлѣ еть. сланꙋткы ꙋбо землѧ процвитаеть на ѧ(м) мѣстѣ без рала иї без сѣмене. и питѣаше сѧ до(с)ино прѣпо(д)бныи. ѡ(т)нѫ(д) къ раиском(ꙋ) въходѹ бываѧща. егда же Адамь испаде прѣстѫпленїа ради. и ꙗкоже ономꙋ прѣж(д)е прѣслѹшанїа ненапоени плоды прозѧбаѧще.

Мало же ѹбо прѣиде врѣмѧ великомꙋ томꙋ ѡцꙋ, въселившѹ сѧ въ дꙋплинѫ дрѣва того. и жестокое Ба҃ ради житїе съврьшаѧщꙋ. и е(с)тьвнѫѧ потрѣ бѫ сланꙋткѡ(м) изпльнѣѧщꙋ аще коли понѫждааше (с), да не въмѣ нит сѧ дх҃ь пль тїѫ обложень за прѣмнѡгое алканїе. нѫ и гра(д) врьхꙋ горы стоѧ ꙋтаити сѧ мимоходѧщимь не може(т). ни свѣща на свѣтилницѣ възжежена, не има(т) съкрити свѣ(т) свои. ѡ(т) въходѧщи(х) въ храминѫ. тако и великыи тъ Іѡаннь ѹкрити сѧ Бг҃ѡ(м) не оставлень бы(с). пастырїе ѹбо нѣцїи далече на поли пасѧще ѡвцѧ многы. и ѡ(т) стада ѡ(т)лѫчивше с­ѧ ѡвец ихь и на гора(х) изьоставишѧ блѫдѧше. възпрїемше слѣ(д) пастырїе овца(м), и начнѫ(т) звати ихъ съ свиренїемь и възклицанїемь ꙗкоже имаахѫ ѡбичаи. ѡвцѧ же ѡбычны(х) забивше бѣжахѫ пръ(д) пасѧщими, и ѹстрьмишѧ сѧ. ибо ни ѡ(т) теченїа почишѧ, донде(ж) прише(д)ше сташѧ по(д) дрѣвѡ(м) прѣпо(д)бнаго дьхтѧше. прїидоша же пастырїе послѣдꙋѧщеовца(м), и видѣшѧ страшно трьпѣнїе чл҃вчьско прѣболше видѣнїе. чл҃ка непокрьвенѫ главѫ имѧща. и боса ногама. и кожноѫ тъкмо ризоѫ въсе тѣло его ѡбльчено. ꙗкоже въ дѡ(м) въ дрѣво въселша сѧ. вѣтрьнѫѧ нѫждѫ трѣпѧща. и зимнѫѧ стѹдень по(д)емлѧща. и мѣста того пꙋстынѧ и горы ѹдаленїе чл҃вка ни единого видѧща. и пищѫ не имѧща. и въсего иного ꙋтѣшенїа не имѧща, нѫ ѡбаче лишена. и видѣвше приближивше с въпрашаѧще, ѡ(т)кѫдꙋ ꙋбо е(с) твоерож(д)ьство, и которыи е(с) гра(д) възпитавыи тѧ. и пакы начѧша гл҃ати, колико лѣ(т) имаши въ злѣмь семь стр(д)анїи. и прѣж(д)е того что е(с) вина сицеваго ти ошествїа. ѡнь же кро(т)ко къ пастыремь пристѫпи и сътвори имь мл҃твѫ. и питѣаше ихь сланꙋткѡ(м). повелѣ имь трьзати рѫкама. а ѡ немже мѧ въпрашаете, нѣ(с) врѣмѧ настало исповѣдати. и по тѡ(м) овца(м) и пастыремь повелѣваеть. тиѧ же послꙋшавше прѣпо(д)бнаго гла(с). и пѫтемь тѣмь имже бѣжѧще възыдошѧ, и ꙋравнишѧ(с). стьзѧ же пастырїе не обрѣтаѧще. ꙗкоже и великомꙋ ѡц҃ꙋ помышлѣти, еда како овца(м) слꙋчит сѧ погꙋбленїе. снидоша ꙋбо и ти съ чюдесемь. ꙗкоже древнїи ѡни пастырїе Ха҃ видѣвше мл(д)нца въ ꙗсле(х) повита и лежѧща. си же на пꙋстѣи сеи и неплѡ(д)нѣи земли и на далечнѣ мѣстѣ, плодовити сланоткы видѣвше, страннном(ꙋ) ꙋдивишѧ сѧ прорастенїю. потомⸯ же и къ чрѣда(м) прїидошѧ къ дрꙋжинѣ своеи, ѡ(т) ни(х) же и вчера ꙋдалили сѧ бѣшѧ. и изповѣдашѧ ꙗже видѣшѧ. и на прѣдѣлѣ(х) тѣ(х) ѡ тѣмь мѫжїи възвѣстишѧ. и елико же ѡ(т) ни(х) бг҃олюбивыи(х) възж(д)елѣвше прѣпо(д)бнаго видѣти. и съ пастырми кѹпно възыше(д)ши(м) на врьхꙋ горы. и видѣшѫ и ти иже въ пльти агг҃лⸯское житїе стѧжавша. сланꙋткы же и ти видѣвше и въкꙋсивше ѡ(т) ни(х) елико же къждо хотѣаше. иже неприкосновенно гнѣвливыимь и ѡ(т) гонѧщимь неприобщено. и абїе въ своа си възвратишѧ(с). и пастыри бишѧ проповѣдници добродѣтелемь прѣпо(д)бнаго.

Нѫ что ꙋбо ревновахѫ, и прочее въсе множьство людїи прѣж(д)е видѣвши(м) ст҃го, и съ тѣми пакы поидошѧ. ин же ꙋбо хлѣбь. дрꙋгы же мѧса. дрꙋзи же ино что еже къ напитѣнїю томꙋ приношенїе несохѫ. и ꙗкоже тог(д)а поидошѫ пѫтемь. мѫ(ж) нѣкто единоселникь дꙋхѡ(м) лѫкавыимь злѣ ѡземьствовань раздираѧ ризы своѧ, и въ дѡмѣ не живѣше, ни врача обрѣсти не надѣаше(с). примѣси же сѧ и тъ идѧщомꙋ нарѡдꙋ. пра(х) же на въздꙋ(х) сыплѧ. и незнаемыми клицанїи и дивыми мъмранїи таковаа сътваръаше. бѣ же чл҃коненавистникь дїаволь мысльноѫ омрачаѧ силоѫ. поврьже ѹбо того ꙗко двою пьприщꙋ прѣди р(ч)еннаго дрѣва ꙗкоже бѣхѫ грѧдѧще. и то абїе чюдо творить Бъ҃ на(ш) ꙗвленїе иже къ немꙋ присвоенїа. блаженїи же ѹгодникъ прѣпо(д)бныи ѡ(т)ц҃ь сътворивъ знаменїе. и не възможе немощни поити, нѫ на тѡ(м) мѣстѣ па(д) въпїаше. ѡгнь ѡ(т)тѫдꙋ стрѣте мѧ и попалѣет мѧ без мѣры. ꙗко и къ вьплю приложи вьпль. и болѣзни не трьпѣше. свѧзашѫ же лежѧщаго и страж(д)ѫщаго того. и носѧщїи можаахѫ сѧ разбѣгнѫти ѡ(т) великаго клицанїа дивнааго бѣснꙋ­ща. ꙗкоже къ дрѣвꙋ приходѧщꙋ. и очи къ прѣпо(д)бномꙋ възве(д)ше. и поврьгошѫ бѣснꙋѫщаго сѧ на землѧ. и сами па(д)ше ници и бл(с)венїе прошахѫ, и о ни(х) помолити сѧ молѣхѫ сѧ. дїаволⸯ же имїи чл҃кь, пламыи пожизает мѧ пакы въпїаше, ꙗкоже и нѣкто сїи зовѣше. и что ради семꙋ таковаа прилꙋчишѫ(с), въпрашааше ꙋбо прѣпо(д)бныи прише(д)ши(х). ѹвѣдѣв же винѫ, ꙗко ѡ(т) бѣса злѫ бѣдѫ има(т). просльзи сѧ ꙋбо ст҃ыи чл҃вчьскаго ра(д) рѡда немощь. на нб҃о очи свои възве(д), и рѫцѣ простерь. възва страждѧщаго именень. он же ꙋслышавь прѣпо(д)бнаго глась, и безгласень бы(с). и пакы второе приближивⸯ сѧ къ дрѣвꙋ и припаде къ ногама его, и облобизааше валѣѧ сѧ. прѣпо(д)бныи же възв(д)иже его рѫкоѫ. и въсемꙋ мнѡжьствꙋ възьпити повелѣ. г҃и пом҃лꙋи люде(м) же ꙋбо прѣпо(д)бнаго творѧщемь повелѣнїе. и по дес­тѣмь възглашенїи, о себѣ б҃ꙋ мл҃ѧ сѧ. бѣше бо и сице съ въсѣми бесѣдꙋѧ. и ѡ(т)толѣ лѫкавомꙋ дꙋхꙋ мѫчити того и съкрꙋшити запрѣщено бы(с). нѫ тъ ꙋбо прогнань бы(с). съ же бг҃ѹ блгодаренїе и того единого і҃у х҃а исповѣдааше. колика ꙋбо радость бѣше прише(д)шимь тогда о таковѣ(м) видѣнїи. и колико ꙋдивленїе и колика ѹжась. и б҃а славлѣахѫ, и прѣпо(д)бнаго облобизаѧще. а пастыремь исповѣдаѧще бл҃годѣть.

Прїидошѫ же нѣцїи ѡ(т) ни(х) да прѣбиваѫть съ прѣпо(д)бнымь. сътворишѧ и кѫщѫ себе, и до кончины трьпѣти съ прѣпо(д)бны(м) обѣщашѫ(с). имь же и великїи повелѣваеть помышленїе ихь изпльнити рекь. бж҃їа волѣ на ва(с) да бѫде(т). ѡни ꙗже принесошѧ прѣ(д)ложишѧ прѣпо(д)бномꙋ. и положити сиа на мѣстѣ на потрѣбѫ емꙋ молѣхѫ(с). ѡни же ѡ(т) далече шествїе тѣ(х). и ѹтѣшааше их прѣпо(д)бныи, въкꙋсити повелъваеть ѡ(т) сланꙋтка. и ѡ(т) их же принесошѫ ст҃омꙋ да приѡбщѫ(т) сѧ, и подавааше дрꙋ(г) другу даѧще и прїемлѧще. нѣчто мало прїѧ (т) ѡ(т) ни(х) сѫщи(м) съ ни(м) на ꙋтѣшенїе. запрѣтивь имь ктомꙋ не приносити ничѧсоже, аще и прїити хоще(т) кто. бы(с) же и сице прише(д)ше бл҃говъзпрїемше шествованїе прѣпо(д)бнаго мл҃твы. и тако въ своа си възвратишѧ (с). съпѫ(т)шѧствꙋѧща си бл҃гостоанно сы помысло(м), иже древле несмыслѧща съ собоѫ имѧще. аще же кто ѡ(т) сланотка възьтрьгнѫти хотѣше ст҃мꙋ не повелѣвшу. възтрьгнѣше ꙋбо. нѫ ѡбаче въ рѫцѣ сꙋха и без плѡда обрѣтаахѫ(с), въси сѫщїи съ ни(м) показоваахѫ. томꙋ же ꙋдивльше (с) въси насыщенїꙋ. и дивѧще сѧ идѣхѫ. и по въсѫдꙋ ѡ(т)толи слово проиде. истинно мѫжа проповѣдашѧ. пастырїе. ктомꙋ не въмѣнишѫ мнѡгы(х) д҃ни. и далечнааго ради растоанїа. нѫ чѧсто съ дрьзновенемь прихож(д)аахѫ къ прѣподобномꙋ. их же ѡ(т) пищѧ питѣаше до сытости, и въ таинѣ ѡ(т)пѹщааше ѧ. нѫ ꙋбо не възхотѣ прѣстати ѡнъ бѣсь прѣж(д)ереченнаго мѫжа мѫчивыи. ибо аще легеѡна бѣсовскаа възпрїемь съ собоѫ и прише(д) къ великомꙋ, ꙗко къ неправеднꙋ и ратникꙋ прѣтѧ прѣпо(д)бномꙋ. и каменїе метаахѫ на нь прьвое. и о семь ꙗкоже дѹсы нѫждьни приврьгше сѧ къ дрѣвꙋ дꙋплинѣ, съврьгошѫ на землѧ прѣпо(д)бного. бѹ҃ въсѣчѧскы(м) ꙗко же Авраамь, тако и того искѹшаѧща. да иже кто вѣрѫ невѣдѧщи(м) разꙋмѣти сѧ. и блг҃(д)ть трꙋдомь възданїа прознаменавает сѧ. и бѣси пак изчезошѫ. сѫщїи же съ прѣпо(д)бнымь, по ѡбычаю въ врѣмѧ мл҃твы съше(д)ше сѧ. и обрѣтошѧ ст҃го лежѧща на земли. и прискрьбни бывше о видѣнїи. въпрашаахѫ же прилꙋчшааго сѧ. ѡнь же бывшее исповѣда. дрьзати же тѣмь повелѣваеть ѡ(т)нѫ(д) сице гл҃ѧ. ѡ(т)селе ктом(ꙋ) таковое ничто же не бѫдет. и се слава о немь скорыма протече(ꙋ) крылома. иже печалныи бѣхѫ спо(д)блѣхѫ(с) приходити. и овѣмь приходѧщемь. дрꙋгы(м) же на горѣ хизины ѹстроившемь. и съ сѫщιими съ великы(м) ѡц҃е(м) съжителствовати изволимь. и толицѣ прихож(д)аахѫ къ божествьвнѣи тои горѣ. ꙗкоже въ море рѣкы неизливаемιѧ бистрини. и никтоже причѧстив сѧ пищѧ не ѡ(т)хож(д)ааше доволно ѡ(т) принесеннаго брашна насыщаѧщи въсѣ(х). и николи же не оскѫдѣваѧщи. и бо Бъ҃ Иліинь, тъж(д)е и Іѡанновы. також(д)е грьстїѫ брашна не скѫдѣти сътвори. таковѫѧ же и вѣрѫ обрѣть. и ꙗко дрꙋгыи Кармиль, и тоговѫ горѫ съдѣлаль е(с), не въ вихрѣ тьнцѣ ꙗвлѣѧ сѧ, нѫ въ стѣмь дꙋсѣ своего прославлѣѧ ꙋгодника. и елико жестоко ѡ(т) бли(ж)нιихь обичны(х), недѫгы и озлобленныѧ имѣхѫ, и лѫкавыими стѫжаемы дꙋхы. приношаахѫ къ прѣпо(д)бномꙋ, ꙗкоже брѣмена неꙋдобь носима съпѫ(т)шествꙋаше. симь възпрїемлѧще ицѣленїа ѡ(т)хождаахѫ. и Бъ҃ ѡ(т)въсѣ(х) възвеличааше сѧ. хромыи бо добрѣ ходити навикохѫ. и слѣпїи прозираахѫ. и сꙋси процвитаахѫ. и разслабленны ст­заахѫ сѧ. и аще кто жегѡ(м) бѣ ꙗко Петрова тъща слꙋжаше и изцѣлѣ. и бѣснн цѣломѫдрꙋахѫ. глꙋси слышаахѫ. нѣмїи, съ въсѣми бл҃годаренїа пъсны и хваленιа исповѣдаахѫ. и никтоже не бѣ иже имѣше дрьжащаго недѫга не избави сѧ.

Врѣмени же минѫвшꙋ. и еже къ прѣпо(д)бномꙋ вѣрѣ приращаѧщи(м) въсѫдꙋ мнѡжьствѹ чюдесемь. и мл҃итвныи дѡ(м) нѣцїи ѡ(т) бг҃олюбивыи(х) създашѧ, къ по(д)горїю. хизины прѣставльше. келїѧ сътворишѧ. и монастирь съѕидашѧ идеже и прѣжде въ пꙋстыни биль бѣше, въ нем же емꙋ и власи своѧ остригшꙋ. и стопамь прѣпо(д)бнаго по силѣ послѣдовавше. и къ Бг҃ꙋ по блазѣи наде(д)и прѣставишѧ(с). тогда же и прѣдлежѧщи(м) врь(т)пѣ себѣ самь великιи затвори. и за ві҃ лѣ(т) ѡ(т)нѫ(д) добродѣтелныѧ трꙋды неизмѣнно показавь прѣпо(д)бныи ѡ(т)ц҃ь Іѡаннь. ни понѣмалїи обычнаго не оставивь въз(д)рьжанїа до о лѣ(т) приспѣвь теченїе(м). се бо число и Дв(д)ь чл҃вчьскаго живота написа. ꙗко пѫчинѫ сіѫ исповѣдаѧ. и ѡ(т) прозрѣнїа, дш҃и ѡ(т) тѣлесе своего разꙋмѣвь раз(д)рѣшенїе. и призва ѹбо своѧ ѹченикы, и мнѡго поꙋчивь и наказавь правило хранити неѡ(т)стѫпно тѣмь заповѣдавь. и по моемь прѣставлени ре(ч) имь. не болѣзнꙋите ꙋтѣшно, ꙗко не оставити ва(с) хощѫ. нѫ невидимо съ вами прѣбивати. постничьскы(х) же трꙋдовь прилежати повелѣвь, и цѣлова въсѣ(х) по р­дꙋ. и бж(с)твны(х) же Х(с)вѣхь таинь причсѧтив сѧ. и на земли самь просто легь и рѫцѣ на н҃бо въздѣвь. и абїе ꙋмльче, и очи смѣживь. и тако дх҃ь агг҃ло(м) прѣда(с). ѡни же ꙋбо сь сльзами ногы омиваахѫ прѣпо(д)бномꙋ ѡц҃ꙋ. е(с)тьвнаго съжитїа ѡбраза разлѫчиити сѧ не можаахѫ. спрѧтавше сщ҃енно и бж(с)тьвное его тѣло, и положишѧ въ рацѣ древенѣ. и абїе въ скорѣ ѹвѣдено бы(с) по въсѫдꙋ прѣставлеинїе прѣпо(д)бнаго. и въси къ гробꙋ ст҃го сътицаахѫ (с) хот­ще видѣти новое и паче е(с)тва видѣнїе. ꙗкоже бо спѧ видѣше сѧ, и никакоже измѣнивши сѧ ви(д) тѣлесе его. и бл҃гоѧханїе подавааше неизр(ч)енно постнычьское тѣло. ꙗко и еще живꙋ сѫщꙋ недѫжыи мл҃ѧще(с) ицѣленїа прошаахѫ. и ѡ(т) одрьжащи(х) болѣзни избивше радовахѫ (с). по си(х) же м҃ мь дн҃е(м) минѫвшїи(м). и нощїѫ прѣпо(д)бныи стареишемꙋ ѡ(т) ꙋченикь свои(х) ꙗви сѧ повелѣваѧ. ꙗко да погребеть въ земли тѣло прѣпо(д)бнаго. ѡнь же послꙋшавь повелѣнїе. и въ видѣнїи ꙗвленїа дѣлѡ(м) скончаваеть. и абїе чюдесемь источникь, гробное съкрьвенїе прибѣга­щи(м) подавааше. и тако бж҃їи ѹгодникь ѡ(т) въсѣ(х) величае(м) проповѣдааше (с).

Тогда же цр(с)тѣи дрьжавѣ, по дворѡ(д)нѣмь. приложи сѧ игꙋме(н) монастырѣ, въ снѣ великїи въ постницѣхь ꙗви сѧ. и мощи свои(х) ракѫ прѣнести повелѣваеть въ Срѣдечьскыи гра(д). и тамо на(д) землеѧ положити приходѧщи(м) видѣти не невъзбранѣти. повелѣвает же си мнихо(м), и видѣнїю вѣровашѧ. ѡ(т)гребошѫ прьсть и земше ракѫ, и ѡ(т)крышѧ покровь. и видѣшѫ цѣло тѣло прѣпо(д)бнаго. и тако прославишѧ Ба҃, гл҃аще ѡ неизре(ч)нныѧ Хе҃ и безчисльнїѧ твоѧ блг(д)ти. ѡ дльговрѣменныѧ, и тли непричѧстно тѣло бы(с). и къ таинны(м) бл҃гоѧханїа въ слꙋхь изпльнѣѧ прѣдлежаще. съ псалⸯми и пѣнїи ꙗкоже и того прѣпо(д)бнаго и того ради Ба҃ възвеличивше. и въ наре(ч)ныи гра(д) прънесошѫ прѣпо(д)бнаго ракѫ. и тако ꙋбо въ епископьстѣи сщ҃еннолѣпно положишѫ. и по семь въ дрꙋгѫѧ цр҃квь прѣнести ст҃ого съвѣщашѧ. и пристѫпльше начѧшѧ възимати ракѫ. ѡна же недвижима пръбивааше. мн҃ѡзи же ѹбо и силныи мѫжїе нѫждаахѫ(с) прѣнести ѧ. ѡ(т) ни(х) же, ѡви постра(д)шѫ. дрꙋгїиим же неподано бы(с) прѣложенїе. тогда ѹбо ѡ(т) трꙋда почишѫ. потѡ(м) же паче мнѡго прѣмножьство. люди прїидошѫ, и възѧти възхотѣвше. нѫ и пакы въсꙋе трꙋждаѧще сѧ обличахѫ (с). тѣмже и ѡ(т) нѫждѫ прѣдстоашѫ на мл҃твѣ мл҃ѧще (с) прѣпо(д)бномꙋ, ѡ(т)крыти ракѫ ст҃го съ хотѣнїемь, и не възмогошѫ. ст҃ыи же пакы въ снѣ игꙋменꙋ ꙗви сѧ гл҃ѧ. въ цр҃кви ст҃го ап(с)ла і еꙋ(г)листа Лꙋкы прѣнести сѧ повелѣваеть, тогда дрѣвѣнѣ сѫщи. дн҃ю же свитѣѧщꙋ. исповѣда игꙋмень видѣнїе. и пристѫпишѧ сѫщїи къ рацѣ. и съ нѣкаковѣ(м) трꙋдѡ(м) ракѫ възѧшѧ. и съ тьщанїе(м) невещестьвно носѧщемь несѣхѫ. и тако въ цр҃кви ст҃го ап(с)ла Лꙋкы положишѫ.

Въ послѣ(д)нее же врѣмѧ Грꙋдась ѡнь ѡ(т) Пеѡнскы(х) горь сыи, рѣчїѫ и обичаемь. мѫ(ж) бл҃гочьстивь, и любѧ прѣпо(д)бнаго. богатство принесь имѣѧ вѣрѫ къ ст҃мꙋ прѣпо(д)бномꙋ ѡц҃ꙋ, емꙋ же цр҃кѡ(в) близь стѣни Срѣдечьскаго града каменїемь съçиздавь. въ неи же прѣпо(д)бнаго рака съкрьвена бъше. чюдесь пр(с)но текѫщи(х) мѡре изливаѧщи. въсепагꙋбны(х) измѣнѣѧщи(х) недѫгь, дїаволскаа искꙋшенїа ѡ ѡ(т)гонѧще. и блг(д)ть подаваѧщи, иже вѣрѫ несꙋменнѫ къ ст҃мꙋ имѧщи(м). опльченїе разꙋмни(м), иже не по чювствꙋ. слѣпїа просвѣщаѧщи. зѫбныѧ болѣзни ѡ(т)ражаѧщи. въсѣ(м) чл҃вкѡ(м) просвѣщенїе прѣдлагаѧщи. не тькмо же сїа чюдеса съдѣиствꙋѧщи, нѫ и мн҃ѡгое ꙋстрѣмленїе ꙋставлѣѧщи и изгорѣвши съ црк҃выѧ мнѧще сѧ. и приближишѧ сѧ съ дѡми. и нѣкогда бо въ градѣ пожарꙋ ѡ(т) ѫгла въз(д)вигнѫвшꙋ сѧ. пламен же паче до аера възвишааше (с). невещестьвно сꙋхоти ради земныѧ. и бли(ж)нѣа попалѣѧ поꙗдааше. въси бѣхѫ въ недѹменїе огньго ради погашенїа. ѡ(т) бж(с)твнѣи и ст҃опрїемнѣи рацѣ по(д)бно разматрѣѧще, ѡ(т) црькве тиѫ изнести съвѣть творѣхѫ. да не како безсловесно възвышаѧи сѧ пламень и до ракы доиде вѣтро(м) поганѣе(м). и съ тьщанїемь текїи нарѡ(д) и тиѫ изнесошѫ из цр҃кве и носима идѣше. и такоже къ вратѡ(м) приближившем сѧ. и носѧщи пѫ(т) прѣходити начинаахѫ. прѣпо(д)бнаго же рака тѣмь при нога(х) поврѣщи тиѧ нѫдѣше и ѡ(т) того мѣста ктомꙋ напрѣ(д) поити не можахѫ. ни понѣ стопи прѣстѫпати. ꙗкоже ѡ(т) нѣкоѫ тѧгости стѫжаеми. и ꙗкоже вѫзами нѣкїими ногы ст­гнѫти имѧще, ѡ(т)шествїа възбранѣеми биваахѫ. и възвратити сѧ пакы къ цр҃кви помышлѣахѫ. и скорѣе словесе право и бистро течаахѫ. и прѣчьстнѫѧ ракѫ цр҃квь възприѧть, вѣтрь же тихь противѫ възвѣавь, и тогда ѡгнь ѡ(т)вративь ѡ(т) цр҃кве и ꙋгаснѫти сътвори. и опалити сѧ ѡ(т) приключьши(х) чѧсти. нѫ да не въсѣ(х) бл҃годѣанїи блаженнаго изчитанїа, иже въмени сѧ мн҃ѡжьство звѣзды причитаѧ. и песка мѡрскаго прѣглѧдаѧ мн҃ѡжьство. или вльнь мѡрски(х) въстанїе.

Ѡ(т) прѣдлежащаго словесе послꙋ(х). азь есмь великаго того въ постницѣ(х) и въ прѣпо(д)бны(х) исповѣдаѧ иже на мнѣ бл҃г(д)ти его величьство. ꙗкоже и въ начѧлѣ писанїа вины ꙗвленїе положи(х). болѣзнь бо мѧ обьѧть несътрьпимаа и паче мѣри. на трети дн҃ь разтлѣваѧщимь земнимь подвизанїемь и тоѧ сѫщїи. и по томь пламенемь изждигаѧщи злѣ изрицааше. тогда и тѣло измъжди е(с)стьвнѫѧ крѣпо(с) и безж(д)илова. болшими же паче алканїемь стѫжаѧщи, аще же коли и понѫдившꙋ сѧ грьтанꙋ пищѧ въ ѫтробѫ посилааше. нѫ въседн҃ьное измѣненїе силы обличааше болѣзньнѣе. нѫ Х(с)вь ѹченикь. и Ба҃ на(с) ради чл҃вка ꙗвльшаго сѧ, и нашѧ недѫгы понесшаго и том(ꙋ) послѣдовавшимь. давшаго власть въсѣкѫѧ. болѣзнь въ люде(х), съ ѹбо прѣпо(д)бны(м) събесѣдникь. ѡ(т) дльгаго врѣмене съкрꙋшаѧща. и съм҃ртїѫ намь прѣтѧща недѫга измѣни водоѫ ст҃ынѧ ѡ(т) бж(с)твныи(х) мощи омивенїа, за три дн҃и помазанїемь очистивь. и пожига­щѫѧ ны попаливь вѧще. ꙗкоже древле Илїа, таинныи(м) ѹстроенїемь жрьтвы и воды попаливь. не тькмо же то, нѫ и скорѣ лѣтꙋ прѣше(д)шꙋ. Срѣдечьскыи гра(д) намь имѧщемь. прилꙋчи сѧ самодрь(ж)цꙋ Манꙋилꙋ прїити ꙗкоже пре(ж)де р(ч)е сѧ. и томꙋ на мышци ꙗвльши сѧ болѣзнь и жилы съгрьчи емѹ. и ѡ(т) того ср(д)це болѣзнь одрьжаше и, и ни нощїю оставлѣше мѫчащи его сънꙋ смѧжити сѧ очима. и абїе ст҃ль ѡ(т) свѣтилника ст҃го гроба прѣпо(д)бнаго, въземь масло помаза. и тако болѣзнь въскорѣ ѹвѧдааше. и за три дни съврьшено видѣвь бол­щѫѧ чѧсти ицѣленїа. его же ни запрѣщенїемь Пократова. ни Галиновь разꙋмь исповѣданїемь чюдотворити не возможе. сии бо Бъ҃ прославлѣеть того любѧщи(х). и тако величаеть заповѣди его хранити. сицеваа въздаанїа прѣж(д)е общаго мр҃твымь въз(к)рѣшенїе дарꙋеть, еꙋ(г)лскымь поживши(м).

Нѫ ѡ ѡц҃емь съпричѧстниче. агг҃л(с)кыи(м) житїемь постниче. жизныѧ апл(с)кымь стѧжанїемь. и не скврнне тѣлѡ(м). прѣчисте помышленїемь. и высокыи разꙋмомь. смѣренїи мѫдростїѫ. нераздѣлныѧ тр(о)цѫ свѣсть. прї­тилище прѣкрасное. бѣсѡ(м) гꙋбителю. недѫгѡ(м) прогонителю. прибѣгаѧщимь к те(б) помощниче. вышнѣго мира исплънителю. агг҃лѡ(м) ꙋдивленїе, паче чл҃кь твоего ради въз(д)рьжанїа. прѣпо(д)бнымь постникѡ(м) радованїе, съжителства ради иже съ нимь. ѡ Іѡанне прѣблажене. съвыше на(с) ѡ(т)ч҃ьскы призыраѧ. избавлѣи. и еже на(д) нами дрьжавѫ добрѣ и бг҃олюбезно ꙋстрои. и егда же Бъ҃ на сѫ(д)нѣмь пръстолѣ сѧдеть. и наша дѣла и словеса испытати праве(д)но прїидеть. прѣ(д)ложи болѣзни и трꙋди твоѧ, ꙗже на(с) ради самомꙋ до кр(с)ныѧ съм҃рти съше(д)шомꙋ сп(с)ны(х) чѧсти причѧстникы сътворити. блг(д)тїѫ и щедротами и чл҃колюбїемь самого Га҃ нашего Іꙋ(с) Ха҃. съ безначѧлнымь ѡц҃емь, и съ прѣст҃ымь и бл҃гымь и животворѧщимь д҃хѡ(м). слава и чьсть и покланѣнїе въ непрѣходимїѧ вѣкы. въсег(д)а и иынѣ и присно, и въ вѣкы вѣкѡмь, аминь : —