Вие сте тук

Житие на св. Кирил от Простия пролог

Февралѧ д҃і. Въ тъжь дьнь памѧть преподобнаго отца нашего Кюрила философа и ѹчителѧ словѣньска.

Въ Селѹньстѣмь градѣ бѣ ѥтеръ добророденъ мѹжь именемь Левъ, саном же сотникъ, от негоже роди сѧ блаженыи Кирилъ. Егда же бысть ꙁ҃ лѣтъ отрочище, видѣ во снѣ, ꙗко нѣкы воѥвода събра всѧ дѣвица и повелѣ Кюрилови от всѣхъ иꙁбрати собѣ ѥдину. Онъ же избравъ ѥдинy собѣ именемъ Софью и въставъ от сна, сказа си отцю и матери. И глаголаста ѥму родителѧ ѥго: храни чадо, ѥже видѣ; воѥвода бо ангелъ ѥсть божии, а дѣвица мудрость ѥсть божиꙗ, но да ти бѹдеть чадо сестра.

Мудро же бѣ отроча зѣло. И поꙗша и в полату цесареву и преданъ бысть цесаремь логофету философу. И въ три мѣсѧци наѹчи сѧ всеи хытрости и мудрости, и четырми ꙗзыки философии наѹчив сѧ: и ѥлиньскы, и римьскы, сурьски, жидовьски. И бысть любимь цесаремь. И не изволи чьсти цесаревы, но паче божiю възлюби; и отшедъ но Оузкоѥ море, бысть мнихъ.

Ревность же имѣꙗ свѧтого Павла, тщаше сѧ за Христа пострадати. И посланъ бысть цѣсаремъ въ срацины въстѧзати сѧ о вѣрѣ. И обличи ѥресь Махметову нечьстиваго. И всѧ волхвы ересьскыꙗ ѹкоривь, и възвратив сѧ съ великою чьстью. И пакы отиде на сѣверьскую страну въ Козары, и ѹчаше вѣровати въ Христа. и створше свѣть жидове, хотѣша и ѹбити, но не дасть ѥго игѣмонъ: дондеже ѹприте ѥго, рече, не имате власти погубити ѥго. И събраша сѧ мнози жидовьстии хитреци съ агарѧны на нь. Кюрилъ же ѥдинъ вшедъ, побѣди всѧ: агарѧны бо ꙗко бѣсовьскыꙗ слугы обличивъ ѹкори, жиды же ꙗко божии преступникы посрами. И оки от нихъ ꙗкрьстиша сѧ, дрѹзии же изгнани безъ имѣньꙗ.

По семь иде в Мораву, и многи наѹчи вѣровати Христови. И Замбриꙗ ѥретика молитвою ѹмори, иже наѹсти ѹбити свѧтого. По семь иде в болгары, проповѣдаꙗ Христа. Тако же и въ словѣны прошедъ, всѧ грады наѹчи Христовѣи вѣрѣ, и по Дунаю. И створиша и ѥпископа в Канаонѣ градѣ, и молиша и да наѹчить ꙗ своимъ ꙗзыкомъ книгамъ. Он же постив сѧ м҃. днии к богу молѧ сѧ, и написа имъ л҃. словъ и и҃. И наѹчи ꙗ тако словѣньскымъ ꙗзыкомъ книгамъ, и сего ради словѣньскыи ѹчитель нарече сѧ.

И тако поживъ и чюдеса створь, в старости добрѣ въ Господу отиде. И погребенъ бысть въ Кананонѣ градѣ.

Библиография: 

Кирилъ и Методи

Теодоров-Балан, Александър, авт . 1934. Кирилъ и Методи. Университетска библиотека № 146, редица “Помагала”, брой 3. Том 2. (Университетска Библиотека № 146, Редица “Помагала”, Брой 3). София: Придворна печатница.

Славянски извори за Кирил и Методий

Ангелов, Боню Ст, авт . 1958. Славянски извори за Кирил и Методий. Известия на Държавната библиотека “Васил Коларов” за 1956. (Известия На Държавната Библиотека “Васил Коларов” За 1956). 179-215.
Транскрипция: 
Ана Стойкова