Сїа ст҃аа и прѣпо(д)бнаа Параскевїи. бы(с) ѿ вьси Епиватемь наричемѣ ѿ гра(д) Каликратїе. дьщи б҃лговѣрьнѹ родителю. ни числомь богати, ни ѡбласти имѹщихь. ниже пакьї нищетою страж(д)ѹщихь.
иже до сьврьшенаго вьзраста достигши. и помьїсль ѹтврьдивши и поревновавши житїю аг҃глскомѹ. и ѡставивши родителе и дрѹги. и вса ꙗже сѹть вь мирѣ и послѣдова х(с)ꙋ. и добродѣтельми себе вьперивши. и вьшь(д)ши вь пѹстиню прѣбивааше тамо. безмльвное житїе полюбльши. житїе рещи вь истину аг҃гл(с)кое. пощенїемь и бденїемь тѣло ѹдрꙋчающи. и не бѣше вь неи видѣти ꙗстїа и питїа. нь пища и брашно еи бѣше сльзьї и непрѣстанньїе м҃лтвьї. тако все свое житїе проваж(д)ающи. вь тои странѣ добродѣ(т)льми просвѣтивши се. доблестьвнѣ прѣбьївши. и ꙋмь и чювⸯство вь себѣ сьмѣшень и сьвькѹплень имѹщи. и винꙋ горѣ прѣбивающь. ни едино ѿ земльныа тои прилѣплати се. нь прѣбьїваше вса кь б҃ѹ вьперивши се. и ѡстри и жестокьїи пꙋть шьствѹющи. и свое прѣставленїе ѹв(д)вⸯши. ѡставлꙗеть пѹстиню и приходить вь Цр҃иградь. и ст҃аа мѣста ѡбьшь(д)ши. и тѹ мало прѣбивши. и до своегѡ ѿчьства Каликратїе дошь(д)ши. и тѹ прѣда(т) б҃лженїи свои д҃хь вь рѹцѣ бѹ живѹ. и почьсти вѣнца нб(с)наго вьспрїеть჻
ꙋлꙋчи же се вь то врѣме корабникѹ нѣкоемѹ болѣвшѹ лютимь недѹгомь. и прѣставив се погребень бы(сть) близь стльпа. и тако смрадѹ исходещѹ ѿ гроба того, ꙗко никомѹ мощи минѹти пѹтемь тѣмь. и тѹ стльпникѹ сѹщꙋ понꙋждень бивь и-с-тльпа изьїти, и трꙋпа ѡного гльбоче вь землю погрѣсти, ꙗко да вонꙗ из гльбини нѣсходить. и нїиже сльїшавше, и ѿ пѹта трꙋпь вьзьмⸯше близь тѣла ст҃ьїе погребоше. тѣложе тое цѣло видѣвше самоѹкрѣплено сьврьшено и здраво, дивише се. и ѿ сего разꙋмевше. ꙗко аще бьї ст҃о било тѣло сьїе. б҃ь ѿкрьїл бьї чюдеси. и вь томьж(д)е мѣстѣ ѡставльше тѣло ст҃ье, ѡтидоше. и се нѣкто ѿ ньїхь имене(м) Геѡргїе. видѣ сьнь таковь чюдⸯнь и ꙋжаснь. ц҃рцꙋ нѣкою сѣдешꙋ на прѣстолѣ, и чиновь множьство ѡбъстоеще ѥю ихже и видѣвь абїе страхѡ(м) ѻбьдрьжимь бы(с), и ниць паде. единже ѿ ѡнѣ(х) мꙋжеи свѣтлы(х) ємьї и за рѹкꙋ вьз(д)виже єго. и г҃ла кь немѹ, ч҃лче. Небоиши се б҃а, ꙗко сьїе тѣло ст҃оѥ (с). и како сие тѣло гнило и смрьдещее, сь симь тѣломь б҃жїе рабе Петⸯке погребосте. нь иди н҃нꙗ на скорѣ и всемъ вьзвѣсти. да ѿ толика смра(дь) избавет ме. аше ли сего несьтвориши. по истинѣ познаваи, ꙗко ѡгньемь имате ѿ б҃а погибнꙋти ибо и азь ѿ ч҃лкь есмь. и ѡчина ми (ѥсть) Епивате. вь тѹж(д)е нощь нѣкаа жена имене(м) Ефїмїа. Тож(д)е видѣнїе видѣ. и ѡба на ѹтрїа всемь вьзвѣстише. Сльїшавше (же) вси и прїемше свѣще притекоше на(д) тѣло ст҃ьїе. и изьмⸯше тѣло положише вь рацѣ. и несше положише ѥ вь ц҃ркви ст҃хь ап(с)ль. иже ицѣлбьї точить до сего д҃не. бѣсньїи цѣлⸯбы приемлють: слѣпии прозрѣнїе. хромьїи хож(д)енїе, и всакьїими различними недꙋгьї ѡбьдрьжими цѣлⸯбы прїемлють:
Сльїшав же великьїи ц҃рь Їѡ҃ань Асѣнь сн҃ь великаго и стараго Асѣнꙗ ц҃ра, ѡ чюдесе(х) ст҃ьїе. и желанїемь вьзж(д)елевь, вьсхоте прѣнести ст҃ьїе тѣло вь своꙗ си. Тог(д)а фрꙋгомь Цр҃иградь дрьжещимь и дани давающимь великомꙋ ц҃рꙋ Їѡанꙋ Асѣню. ѡнⸯже не трѣбова ни сребро ни злато. ни каменїе многоцѣнⸯное, нь нь (sic!) трѹдолюбьзно подвиг се прѣнесе ст҃ьїе тѣло вь свои славньїи ц҃риградь Трьновь. и ѹсрѣть сь патрїархомь и всемь причтомь и народомь. сь свѣщами и кадиль. и сь всакою чьстїю. положише вь ц҃рсцѣи ц҃ркви. и еже м҃лт(в)ами да спо(д)бить ньї г҃ь ц҃ртвїю своемꙋ, аминъ:~
служебен миней Дечани-Црколез № 6, лл. 73б-75а