Съно(м) ꙋснꙋвши сла(т)ки(м). и на н(е)б(с) възиде.
Сла(в) Епивато(м) ти Тръновꙋ же тръгꙋбо.
въ д҃і възиде Петка на нб(с)и и съ аг҃гли ликꙋющи.
Сїа ст҃а прѣпо(д)бна Параскевиї бы(с) ѿ вѣсїи зовомїе Епївати. бл҃горо(д)нихь родителеи дьщи. вьспитана же и наказана бы(с) ѿ нихь вьсакомꙋ б҃лгочьстїю и ꙗко кь сьврьшеномꙋ вьзрастꙋ доспѣ ѕѣло ап(с)льскомꙋ възревновавши жите(л)ствꙋ. и прочее прѣбиваше въ цѣломꙋдри и чистотѣ. вь постѣ же и молитвѣ д҃нь и нощь. и толико вьзлюби нищи(х). елико сьвлачити сь себѣ д҃вическꙋю свою ꙋтварь. и тѣ(м) ѡда(с). се же единою тькмо. нь и множицею сътвори. Сїа же зреще тое родителїе. негодовахꙋ. имѣше же и брата юнеиша тое. иже въдань бѣше сщ҃ени(м) ѹчити се писмѣне(м). ꙗко ꙋбо таа родители єе негодованїе разꙋмѣ. въсѣхь ѹтаивши се. въ пꙋстиню ѡти (sic!), идеже п(д)виги и трꙋди многи показа на лѣта многа. по сиа же къ ст҃и(м) поиде мѣсто(х). Многи(х) насладити (с) м҃лтвь. и тамо вьсед҃шьно покло(н)ши (се). по ѿкрьвенїю паки кь своемꙋ възврати се ѿтьчьствꙋ. никомꙋ же себѣ ꙗвленꙋ показавшꙋ. и родителе ѹбо ѿ здешни(х) прѣше(д)шее се ѡбрете. Прѣ(д)реченаго же брата. ст҃ите(л)ски(м) ѹкрашена прѣстоло(м). и Мади(т)ское добрѣ пасеща стадо. Евѳїмїе томꙋ име. Иже многа тамо и дстоина (sic!) паме(т)на чю(д)са творить. съ мир(м) ѹспѣ. тамо же том(ь) положенꙋ. мира исто(ч)никь. ст҃ї его мощи истекаю(т). даже до мора вътичеще. ѡна же б҃лгополꙋчно врѣ(м) ꙗко ѡбретⸯши. никомꙋ же познаваема. прѣбы(с) тꙋ врѣ(м) доволⸯно. и свое же къ г҃ѹ ѿхожденїе разꙋмѣвши. въ рꙋцѣ г(с)ни д҃хъ свои прѣдасть тѣло же ею многа твораше прѣславна чю(д)са.
Сїа же слишавъ б҃лгочъстиви ц҃рь Ꙗсень посла и спроси то. и принесе въ прѣславни свои гра(д) Трьновь. и положи въ своеи полатнѣи ц҃ркви [1]. и разли(ч)на въсѣмь подающи исцелена. єи же м҃лтвами да спо(д)бити и г҃ь цр(с)вꙋ своємꙋ:
[1] В преписа публикуван от Нихоритис 2005 на това място е добавен пасаж:
иде(ж) и до н҃нꙗ лежить.
Миней от НБКМ № 132, лл. 17б – 19а