Житие на св. Иларион Мъгленски от патриарх Евтимий

(Л. 130а) Сла(д)ка ꙋбѡ настоѫщїа жизнь, нѫ бесъмрътїе вьсѣкоѫ сладости сла(д)чѣише. и вѣстъ самохтръствовати чл͠чьствѡ образомь нѣкотѡрмь чюднмь и ꙋсвоавати, и кь бѫдѫщомꙋ ѿсилати вѣкꙋ. ибѡ ожидаетъ на(с) инаа жизнь еиже не касает сѧ разоренїе. и аще ꙋбо вь настоѧщемь добрѡтѫ съблюдемь дш͠евнѫѧ, бѫдѫ(т) намь сїа тѣлесна въ лꙋчьшемь вьзмъздѣваема ѡбразѣ, и ꙗко же юнѡсть вь прѣднѣа внѫ простираѫщи сѧ. и аще нбс͠ни ꙋбѡ имѣли бихѡмь ѧзкъ, вь лѣпотѫ бѫ(д)ѫщаа ѡна сказовали бихѡмь, сь вьсѣкоѫ сладостїѫ ѕѣлѡ ꙋслаждаѫщеѫ и проливаемоѫ вь житеискѧ вещи . Елма же сїѫ бл(д)дти не оу(с)п(д)бихѡм сѧ, она вѣщаемъ ꙗже тѣлесное чювство вѣстъ съзръцѡвати. Не вьзможно бѡ тлѣнномꙋ чювствꙋ ꙋдѡбъ нетлѣннаа и несказаннаа вѣрѡѫ же тъчїѫ прїемлемаа сказовати. Единомꙋ бѡ бѫдеть (л. 130б) тъчїѫ ꙋдѡбъ та повѣдати і̇ларіѡнꙋ, иже и д͠шеѫ и чювствѡмь та обилнѣ наслаждаѫщомꙋ сѧ . Егѡже нн͠ѣ призвавше блг(д)ть, аще и не по лѣпотѣ, ѡбаче по възможномꙋ тогѡ сьповѣм дѣанїе же и житїе. нѫ ꙗкоже каплѧ дъждевнѫ изчьсти неоѵдѡбно, сице ниже сегѡ дѣанїе и житїе. разсѣанна же малѡ нѣгде ѡбрѣтше вь ꙗвлѥнїе извести покꙋшаем сѧ. вѣрꙋѫ бѡ ꙗко вь сласть прїиме(т), ꙗко чѧдѡлюбивъ ѿц͠ъ младенечнаа наша нѣмотованїа. аще ли и ѿ подѡбаѫщагѡ далече нѣгде останемь, прѡстить намь блаженаа она дꙋша и вьсѣкоѫ сладѡсти исплъненаа ꙗко ѡ͠целюбезнымь чѧдѡмь. непонѡсит бѡ намь оꙋсръдїи, нѫ и помощь да(с) и съпо(д)спѣшить и рѫководствꙋеть кь истинныи(м) сказан(ї)ѡмь. вѣсть бѡ вѣстъ радовати(с) и спѣши(ти) кь искрънїихъ полѕи. Сегѡ ꙋбо блажена(г) рѡдителїе, ѿ ѕѣлѡ нарѡчити(х) сьлꙋчишѫ сѧ. б͠голюбезни же аще и ктѡ инъ, и вь всѣ(х) ꙋсръдьствꙋѫще заповѣде(х) г͠нихъ, въ мл͠твѣ д͠нь и нощь ꙋпражнѣѫще(с). бѣста бѡ безчѧдна, и вьзж(д)елѣтелнои мѣста како полꙋчити плѡ(д). м͠ти же егѡ неплѡдна сѫщи, ꙗкоже Анна самꙋилева непрѣстанно молꙗше(с), гла(с) же еѫ не слишааше( с). и ꙗкоже себе никакоже вь прѣднѣа идѫщѫ расмотри, на б͠гом͠тре себе вьзложи, и чѧстѡ кь тоѫ притѣкааше храмꙋ. чѧстаа стенанїа и тѡплѫ слъз, сь сицевыми испꙋщааше глас. не прѣзри вл(д)чице своѫ рабѫ. не остави мене единѫ безчѧднѫ ꙗвити сѧ въ рѡдѣ моемъ. Ѕѣ(л.131а) лѡ бѡ печалїѫ сънѣдаема есмъ, и поношенїе безчѧдїа носити не могѫ. Сегѡ ра(дї) тебѣ единои прибѣго(х), могѫщои неплѡ(д)ства моегѡ раздрѣшити ѧз. Сїа и сицеваа тѡи на въсѣкъ молѧщи се ча(с), въ единѫ ѿ нѡщеи вь сънѣ тои ꙗви сѧ с͠таа б͠ца. и ногоѫ тѫ тъкнѫвши, въстани рекши жено. имаши бѡ просимое тобоѫ, и прѡчее не стѫжаи ми. ꙗко ꙋбо сїа ѡна слшавши, вьсѣ радости исплъни сѧ . и паче же ꙗко слша рѡдиши с͠на, и мнѡг ѡбрати(т) ѿ глѫбѡкѫ прѣльсти, къ свѣтꙋ б͠горазꙋмїа. о си(х) ꙋбѡ бл͠гѡнадеждна бывши, ве(с)лѣше сѧ прѡчее о бл͠ги(х) надеждахъ. не мнѡгꙋ же врѣмени прѣшедшꙋ, заченши роди блаженаагѡ і̇ларі́ѡна. Третїе же тѡмꙋ проваждаѫщꙋ лѣтѡ, ѡ чю(д) аг͠гл(с)кѡе онѡ еже вь вшни(х) пѣваемое вьспѣть пѣнїе, с͠ть. с͠ть. с͠ть травлизаѫщи единъ б͠ь. Сїа ꙋбѡ ꙗко м͠ти слышавши, радости кꙋпно и недоꙋмѣнїа исплънѣаше сѧ, дивѧщи(с) о г͠лемыи(х) ѿ негѡ. ꙗкоже ꙋбѡ вьспитань б(с), вьдашѫ и(с)? с͠щеннимь ꙋчити(с) пи(с)менемъ. Осмь на десѧтѡе же прѣше(д) лѣтѡ, рѡдителѧ и миръ оставлъ къ инѡчьскѡмꙋ притече житїꙋ. и вь мѡнастырь нѣки ѿ тамо сѫщїи(х) ше(д), начѧлствꙋѫщомꙋ своѫ о г͠и прѣклѡни вѧ. и влас ꙋбо ѿемъ, аг͠гл(с)кыимь прѡчее одѣа сѧ образомь. и бѣ ꙗко маслина плѡдовитаа въ дѡмꙋ бж͠їи, ꙗко(ж) дрꙋги ісаакъ въ въсемь своем(ꙋ) покарѣѫ сѧ ѡц͠ꙋ и до конца своѧ ѡтсѣцаѫ вѡлѧ, и въсѣкѫѧ съ ꙋсръдїемъ прохѡдѧ слꙋжбѫ. тѡликѡ ꙋбѡ добрѡдѣтѣлїѫ просїа, ꙗко же въсеи брати тѡго на ѧзцѣ обносити, и тогѡ красити сѧ (л.131б) добрѡдѣтѣлми. Сїа тѡ(г) зрѧ дх͠ѡвни ѿц͠ъ, на въсѣкъ ве(с)лїа исплънѣаше сѧ дн͠ь. Сице ꙋбѡ дш͠евнимъ того прозрѣ ꙩкомъ, и разꙋмѣвь блг(д)ть иже ѿ б͠а томꙋ дати сѧ хѡтѧщѫѧ, молѣше сѧ неискꙋшенꙋ томꙋ до конца прѣбыти. Лѣтѡм же довѡлнѡмь прѣше(д )шемь ѿц͠ь свое еже къ г͠ꙋ ѿхѡжденїе разꙋмѣвь, вьсѧ иже по(д) нимь повелѣ съзвати братїѫ. и довѡлно наказавь, прѣ(д)стателство иларі́ѡнꙋ върѫчи. и мало дн͠и поживь, гв͠и свои прѣда(с) дх͠ъ. і̇ларі́ѡн же прѣ(д)стателства ѡча͠агѡ и благѡдѣти кꙋпно же и молитв ꙗко б(с) наслѣдникъ, вьрѫченое ѿ б͠а томꙋ прочее съблюдааше стадѡ. Смѣрѣѫ себе вь вьсемь братїи, и себе вьсѣмь образъ прѣ(д)лагаѫ. постомь и бдѣнїемь и вьсенѡщнми стоанїи себе ꙋдрѫчаѫ, и слъзнѫ на вьсѣкѫ нѡщь проливаѫ истѡчник. и вь вьсемь подражаваѫ великаагѡ ѡногѡ еѡ(д)сїа общежителѣ. Гладю ꙋбѡ нѣкогда ѕѣлнꙋ наставшꙋ. и братїамъ недоꙋмѣѫщимь оскѫдѣнїа ра(дї) житнаагѡ; и ѕѣлѡ бѣдствꙋѫщимь, блажени і̇ларі́ѡнь на молитвѫ себе обрати. и съ слъзами бж͠їе принѫж(д)ааше чл͠кѡлюбїе. и ѡ чюдо. на прасно житница исплъни сѧ жита, и братїамь належѫщїи печали ѡ(т)гна облакъ. близь бѡ си г͠ь бѡѧщи(х) сѧ егѡ, и молитвѫ ихъ ꙋслша. и мнѡга же ина достоинослшателна исправленїа сътвори. ꙗже аще по дробнꙋ повѣствовати начънемь, ѕѣлѡ вь дльготѫ произде(т) словѡ. Сице ꙋбѡ втѡри і̇ѡсі́фъ житѡдавецъ своимь ꙋченикѡмъ ꙗко показа сѧ, мнѡжаишее ꙋсръдїе и вѣрѫ къ (л. 132а) немꙋ стѧжашѫ. и мнѡжааше (с) числѡ ꙋченикъ. въси бѡ окръстнїи мѣста оногѡ, къ немꙋ сътѣкаахѫ сѧ, и бл(с)венїе почрипаахѫ. Ови же инѡчьскимь ѡдѣваахѫ сѧ образомь и величааше сѧ о немь б͠ь. Слꙋ(х) же о немь прослꙋвшꙋ сѧ по въсѫдꙋ,не бѣ нигде(ж) мѣсто иде(ж) имѧ егѡ не обношааше сѧ. Нѫ і̇ларі́ѡнь никакоже сими ꙋслаждаѧ сѧ бѣ, смѣренїем же па(ч) Х͠вомь себе облѡ(ж), не намъ, г͠и, гл͠ааше не намъ, нѫ имени твоемꙋ даждь славѫ.

Сице ꙋбѡ тѡмꙋ лѣта довѡлна сътворшꙋ, ниѡчъскыѫ добрѣ правѧщꙋ лик, не сътръпѣ г͠ь тогѡ свѣтꙋ по(д) спѫдѡмь скрыти(с) и инѡчьскѡе тъчїѫ правити състоанїе, нѫ и осирѣвшее стадо своимъ просвѣтити свѣтѡмь и архїереискыи ꙋкрасити прѣстѡлъ, въ видѣнїи с͠таа прѣдставь б͠ца иже въ Ѿхридѣ блъгарскѡмꙋ тѡгда архїеп(с)кпꙋ. Еѵстаѳїе же бѣ томꙋ прозванїе. и таковаа къ немꙋ провѣща. Не ѡ(т)лагаи, архїеп(с)пе, нѫ полѡжи свѣтилникъ на свѣщницѣ. иларі́ѡна г͠лѧ иже общежитїꙋ наставника поемь, Могленѣнѡ(м). тогѡ полѡжи пастырѣ. хѡще(т) бѡ мнѡгы(х) ѡт прѣльсти обратити, и кь свѣтꙋ б͠горазꙋмїа привести. Ꙗко ꙋбѡ сїа архїереи б͠жїи слыша, абїе възбънѫ и видѣнїа расмотри силѫ, и повелѣ(н)ное на дѣлѡ произвести покꙋшааше( с). Въ тоиже нѡщи и бл͠женномꙋ і̇ларі́ѡнꙋ сла(д)ко нѣкое видѣнїе прѣ(д)ставь, и таковаа кь немꙋ провѣща . се дне(с) начинаѫ вьзнести тѧ ѡт с͠нѡвъ і̇и͠левь. Азъ г͠ь б͠ь призвах тѧ правдоѫ и ꙋдръжѫ рѫкѫ твоѫ и ꙋкрѣплѧ тѧ. И дах тѧ въ завѣтъ рѡдꙋ вь свѣ(т) (л. 132б) ѧзыкѡ(м). ѡ(т)врѣсти ꙫчеса слѣпы(м) и извести ѡ(т) ѧзъ свѧзаныѧ, и ѡ(т) домꙋ темницѫ сѣдѧщѫѧ въ тъмѣ. Ꙗко ꙋбѡ възбьнѫвь и видѣнїа силѫ расмотривъ, разꙋмѣ ѡт б͠а быти ꙗвленное. и скръбѣше ꙋбѡ о разлѫчени братїи, покарѣаше же сѧ бж(с)тьвномꙋ повелѣнїꙋ. Малѡ ꙋбѡ ꙗко прѣше(д)шимь д͠немь, рѫкополѡжен бы(с) еп(с)пъ Могленꙋ ѡт прѣ(д)реченнагѡ архїеп(с)кпа блъгарскагѡ. Ꙗко ꙋбѡ въ свои прїиде гра(д). и вь събѡрнѫѧ въше(д) цр͠кѡвь. Бж(с)тьствныѧ ꙋсръдно ѡблообза икѡны. и прилежнѫѧ о стадѣ сътвори м͠литвы, миръ дарова стадꙋ, и ве(с)лїа тѣ(х) исплъни ср(д)ца. Поꙋчи же тѣ(х) прїлежнѣ правыѫ дръжати (сѧ) вѣры. прилежати же заповѣдем г͠нимь, и правѡславнимь послѣдовати повелѣнїѡмь. нечьстивх же ересеи и тѣ(х) тъщегласїа ꙋдалѣти (с) по ре(ч)номꙋ не ненавидѧщѫѧ ли тѧ г͠и възненавидѣ(х). притицати же кь събѡрнѣи цр͠ки и свѣнити сѧ ѡт вьсѣкого чл͠ка безчинно хѡдѧщаго вѣровати же вь ѡ͠ца и с͠на и с͠таго д͠ха, вь троицѫ нераздѣлнѫѧ. и еще же въ въчлѡвѣченїе Х͠во и вь животворѧщее дрѣво, ꙗко непобѣдимо сѫще орѫжїе на невидимыѧ врагы, почитати же с͠тхъ мѡщи ꙗко б͠жїи(х) присны(х) ꙋгѡдникъ,тако ждеже и вьсѣ цр͠ковнаа прѣданїа. проклинати же въсѧ еретикы, Арїа гл͠ѧ и Еѵномїа, Савелїа же и Македѡнїа, Аполинарїа и Оригена, и съписанїа ихъ. Ѳеѡдора Мопсꙋестїискагѡ и Несторїа ꙋченика его, Дїоскора и Севира, и Еѵтихїа и по(д)бныѧ имъ. и еще же и Манента и Павла Самосатеанина и вьсеѫ дꙋшеѫ си(х) гнѫшати (с) (л. 133а) и ꙋченїа и(х). Сїа и ина мнѡжаишаа изрекъ, и миръ стадꙋ давъ, въ своа ихъ ѡтпꙋсти. Сїа ꙋбѡ слышавше, вѣрнїи радѡваахѫ сѧ, мнѡгѫ исповѣдаѫще б͠ꙋ блг(д)ть, дарѡвавшомꙋ тѣмь таковагѡ пастырѣ и ꙋчителѣ. еретици же завистїѫ и гнѣвѡмь раж(д)иѕаахѫ сѧ .сам же бл͠женыи, върѫченныи ем(ꙋ) ꙋмнѡжити тъщаше (с) талантъ.

Малꙋ же врѣмени прѣшедшю. и с͠томꙋ прїлежнѣ вѣрныѫ ꙋчѧщꙋ и наказаѫщꙋ люди, ꙋвѣдѣ ꙗко мнѡжаиша чѧсть манихеиска бѣ и Арменска. и еще (ж) и богѡмилскаа, кѡви и навѣт на нь твѡрѧще, и тъщѫще сѧ състрѣлѣти въ мрацѣ правыѧ ср(д)цемь. развращаѫще правѡславное и расхыщаѫще стадо ꙗкоже дивїи нѣцїи ѕвѣрїе. Сїа онъ зрѧ на въсѣкъ мнѡжѫща сѧ д͠нь, лютоѫ сънѣдааше сѧ печалїѫ, и въсесилномꙋ б͠ꙋ прилежныѧ ѡт ср(д)ца възсилааше молбы, вь еже заградити тѣ(х) незагражденнаа ꙋста, и чѧстаа поꙋченїа кь своимь творѣше людемь, оѵчѧ и ꙋтвръж(д)аѫ тѣ(х) правѡславныѫ дръжати сѧ вѣры. Прѣ(д)реченыѫ же ереси, сїа чѧстѡ ѡт негѡ гл͠ема слышѫще, распыхаахѫ сѧ ср(д)цы. и ꙗкоже дивїи ѕвѣрїе скрежетаахѫ на нь зѫбы. пакости емꙋ твѡрѧще, и любѡпрѣнми и сътѧѕанми съпираѫще сѧ съ нимъ. Нѫ дѡбрыи слѡвесныи(х) ѡвецъ Х͠вѣхъ пастырь, і̇ларіѡнъ, вышнѣгѡ положи прибѣжище себѣ, и вьсѧ тѣ(х) къзни и шеперанїа ꙗкоже паѫчиннаа тканїа ꙋдѡбь раздирааше, и въсе вѣрныи(х) веселѣше исплъненїе. Нѣкогдаже иже скврънныѧ ереси манихеискыѧ побѡрници, ꙗко(ж) влъци овчеѫ (л.133б) ѡблъкше (с) кожеѫ, крѡтцѣ прїидѡшѫ къ нем(ꙋ). искꙋшаѫще егѡ ꙗкоже г͠а Фарисее и хѡтѧще егѡ ѧти въ слѡвесе(х). Нѫ слъга неправда себѣ, и въ сѣти ѧже съкрышѫ, ꙋглъбѡшѫ и лъжа истиноѫ обличена бы(с). Вьпрашаахѫ бѡ егѡ, гл͠ѧще, како ꙋбѡ мы бл͠гагѡ б͠а гл͠ѧще съдѣтелѣ быти нб͠си, земли же и иже на неи иного лѫкава творца быти мѫдръствꙋѫще, вы не покарѣете сѧ и прѣрѣкꙋете истинѣ. Кь нимже бж(с)тьвныи ѡ(т)вѣща і̇ларіѡнъ . послꙋшаите Х͠а, въ еѵ(г)лихъ гл͠ща. мое ꙋченїе, нѣ(с) мое. нѫ пославшаго мѧ ѡ͠ца. И азь ꙋбѡ, не ѡт себе имамь гл͠ати, нѫ ѡт Х͠ва еѵ(г)лїа, имже себе ꙋтвръждати непщꙋете. Також(д)е и ѡт ап(с)ла. Тѣмже аще послꙋшати мене хѡщете, гръдѡсть въсѣкѫ ѡтложите. Како ꙋбѡ вы г͠лете бл͠гагѡ б͠а съдѣтелѣ быти неб͠си тъкмо, земли же и иже на неи творца иного вьводите? Нѣцїи же ѡт ва(с) и тѡ самое н͠бѡ и ꙗже вь немь въсѣ, творенїа вражїа быти г͠лѧть. Аще ꙋбѡ е(с) н͠бѡ по вашемꙋ словꙋ дѣлѡ лѫкавааго, како бл͠гыи б͠ь на н͠бсе(х) почиваеть, съдѣаныи(х) ѡт лѫкавааго? Како(ж) сп͠съ нашь молити сѧ чю(д)нѫѧ онѫ и страшнѫѧ молитвѫ наꙋчи прѣда(с) рекъ : Ѿче нашь, иже еси на н͠бсехъ, бѫди волѣ твоа ꙗко на н͠бси, и на земли. И пакы . аще оставлѣете чл͠кѡмь съгрѣшенїа ихъ, оставить и вамь ѡ͠тцъ вашь н͠бсныи. И пакы. Иже аще сьтворить вѡлѧ ѡ͠ца моегѡ, иже е(с) на н͠бсе(х) тъ ми бра(т) и сестра и ѡт͠ць е(с). Чтѡ ꙋбѡ има(т) кто рещи, ѡ нихже сп͠сь неб͠снагѡ и на н͠бсе(х) ѡ͠ца намъ проповѣдꙋеть. Что (ж) сегѡ гл͠а ꙗснѣише, гл͠ѧщагѡ. исповѣдꙋѫ ти (с) ѡ͠че г͠и нб͠есеи и землѧ? Не (л. 134а) тъчїѫ бѡ зде г͠а на н͠бси, нѫ и земли тогѡжде г͠а быти ꙗснослѡвить. Зрите ли како еѵ(г)льскыми ꙋтвръж(д)ати сѧ мнѧще г͠лы, сими па(ч) себе разарѣете; Что же пакы сп͠сь къ Петрꙋ ре(ч). Дам ти ключѧ цр(с)ва нбснаагѡ и прѡчее? Слышите же и се. И кр͠щь сѧ ре(ч) і̇͠с, възыде ѡт вѡды (и) абїе развръзѡшѫ (с) нб͠са. Како зданїе лѫкаваагѡ, бл͠гагѡ ѡ͠ца с͠нꙋ кр͠щьщꙋ сѧ, ѡтвръзе сѧ. Чьсѡ же ра(д) ѡтвръзѡшѫ (с) и по что. Видѣ д͠хъ божїи ре(ч) съходѧщъ ꙗко голѫбъ. Се третїе нечьстїа въ малыи(х) слѡвесе(х) обличенїе. Какѡ бѡ въ образѣ зданїа лѫкаваагѡ б͠жїи д͠хъ въобрази сѧ и съниде на г͠а. Съмотрите и четврътое облїченїе нечьстїа. И гла(с) бы(с) съ небесе, Съи е(с) с͠нь мои възлюбленыи о немже бл͠гѡизволихъ. Ктѡ съ; иже въ вѡдѣ кр͠щаемыи емꙋже ѡтвръзошѫ (с) н͠бса, на иже д͠хь ѡт͠чь въ видѣ голѫбини съниде съ н͠бсъ. Се ꙗвѣ показахѡмь истиннѫ, ꙗко б͠ь н͠бси и земли и въсеи твари е(с) творецъ. Како же ли прч(с)тѫѧ б͠цѫ вышнїи і̇еросолимь нарицаете. Ѿ(т) котораго писанїа. ѿ котораго ст͠го. Или пр(о)рока. или ап(с)ла. Кого ꙋбѡ семꙋ безꙋмїꙋ оучителѣ имѧще, вь тѡликѫ себе пропасть злобѣ вьринѫсте. таже свѣтлѣ и ꙗвленнѣ еѵ(г)листꙋ Ма(т)еꙋ гл͠ѧщꙋ. І͠с Х͠во рож(д)ъство сице бы(с). обрѫченѣ бѡ ре(ч) матери егѡ Марїи і̇ѡсїфови прѣж(д)е даже не сънидѡста сѧ, обрѣте сѧ вь чрѣвѣ имѧщи ѡт д͠ха с͠та, и прѡчаа. И проше(д) ꙋбѡ тънкочѧстнѣ о рѡж(д)ьствѣ егѡ, прїиде даже до вльхѡвъ. и гл͠еть. ꙗко. и прише(д)ше въ дѡмь, видѣшѫ отрѡчѧ съ Марїеѫ м͠терїѫ егѡ, и па(д)ше поклони(л. 134б)шѫ (с) емꙋ. Також(д)е же и Лꙋка велегласнѣише сказꙋе(т) еже по пльти г͠нее ѡт Марїѫ б͠цѫ рож(д)ьство. И ина мнѡга свѣ(д)телства ѡ(т) еѵ(г)лїа и апл(с)кыѫ книгы обрѧщете. ѧже книгы тъчїѫ вы приемлете и почитаете, иныѫ же ѡтмѣтаете. ꙗко прѣч(с)таа б͠ца Марїа рѡди по пльти г͠а нашегѡ і̇͠с х͠а. Сегѡ ра(дї) и сп͠сь вь еѵ(г)елкои книѕѣ мнѡжицеѫ себе с͠на члч(с)ка именꙋе(т). Се и з(д)е показахѡмь истинѫ. ꙗко бл͠гѡвѣстници нигде(ж) именовашѫ ст͠ѫѧ б͠цѫ вышнїи і̇еросолимь ꙗкоже вы непщꙋете. Ѿ кꙋдꙋ же пакы изьобрѣтосте хꙋлное ѡнѡ и б͠гоненавистное ꙋченїе, егѡже и бѣсѡве рещи ꙋжасаѫт сѧ. Они бѡ х͠а с͠на дв(д)а именовашѫ, вы же тогѡ пль(т) ѡ(т) нб͠сь сънесша безстꙋднѣ дръзаете гла͠ти; ѡт послѣднѣаго безꙋмїа. аще нб͠сно бѣ тѣлѡ Х͠во, не хѡтѣше члч(с)кымь по(д)лежати страстемь непрѣмѣнныимь. г͠лѧ же алчбѣ и жѫжди. сънꙋ и трꙋдꙋ. и печали и слъзамъ. и елика такова. Аще нб͠сныи чл͠кь бѣ емꙋже по съставꙋ словѡ съедини сѧ, не би тлѣнень и съмрьтень и земень. нб͠снїи бѡ жителе, нетлѣнни сѫ(т) и бесьмрътни. Каа же бѣ и потрѣба еже ѡ(т) д͠вы вьпльщенїꙋ? Не тъчїѫ же, нѫ и по вьскр͠сен(ї)и сп͠сь своѫ ꙋвѣрѣѫ ꙋченикы. ꙗко не привидѣнїе или мъчтанїе е(с) пль(т), ѧже ѡт на(с) приѧ(т) ре(ч). видите рѫцѣ мои и нѡѕѣ мои ꙗко самь азъ есмь. осѧжите мѧ и видите ꙗко дꙋхь пль(т) и костеи не има(т) ꙗкоже мѧ видите имѧща. Аще привидѣнїе бѣ, чїа ребра ѡма осѧѕа. слышите ꙋбѡ и Павла великаагѡ гл͠ща къ евреѡмь. поне(ж) ꙋбѡ дѣти приобщи пльти и кръви, и тъ по(д)бнѣ прїчѧсти сѧ тѣхж(д)е. (л. 135а) възражаѫ же и мнѣнїе н͠бсныѫ пльти, приведе. не ѡ(т) аг͠глъ бѡ когда приемле(т) нѫ ѡт сѣмене Авраамлѣ прїемлет, ѡ(т) нѫдꙋ же длъжен бѣ по вьсемꙋ по(д)бити сѧ братїи. се проꙗвленно бы(с), ꙗко х͠с тлѣннѫ и мр͠тъвнѫ вьзѧ(т) пль(т) ѡт прч͠стыѫ б͠цѫ Марїѫ. где пакы вьпрашаѫ ва(с) изобрѣтосте д͠шетлѣннѫѧ сїѧ ꙗзвѫ е(ж) гла͠ти ꙗко древнїи законь ѡ(т) лѫкаваагѡ бѣше. възникнѣте чл͠ци ѡт належѫщаго вамь мрака. ѡ(т)рѧсѣте ѡт ꙫчїю вашею нечювьствїа сънъ. аще ꙋбѡ ѡт лѫкавагѡ бѣше ветхыи закоонъ како вьпрашаемь сп͠съ о древнѣгѡ Закѡна Заповѣде(х) котѡраа ѡ(т) ни(х) пръваа и бѡлша е(с), ѡ(т)вѣща. пръваа и бѡлша(а) е(с), слыши і̇і͠лю. г͠ь б͠ь твои , г͠ь единь е(с) и прѡчаа. И вьпрѡсившомꙋ сълѡжившꙋ сѧ, не далече еси цр(с)твїа б͠жїа ѡ(т)вѣщавшꙋ како ꙋбѡ Мѡѵ̈сеиское Закѡнополѡженїе аще би вражїе, единого г͠а и б͠а закѡнополагалѡ би вѣдѣти. Аще же единогѡ б͠а и г͠а проповѣдꙋе(т) Мѡиси, и развѣ тогѡ ниже слꙋжитъ ниже покланѣет сѧ иномꙋ, где сѫ(т) иже лѫкавое начѧлство вьвѡдѧщеи, и тѡ древнемꙋ законоположенїꙋ вьзлагаѫще. А ꙗко древнїи Закѡнъ бж͠тьвень е(с) и нбснагѡ б͠а, вьзыва е(с) Павелъ истинѣ проповѣдникъ г͠лѧ. что ꙋбѡ рече(м). закѡн ли грѣ(х); да не бѫде(т). и пакы. вѣм бѡ ꙗко закѡ(н) д͠хѡвень е(с), и съслаждаѫ сѧ закѡнꙋ б͠жиїꙋ по вьнѧтрънемꙋ чл͠кꙋ. и пакы. тѣмже азь ꙋмѡмъ ꙋбѡ работаѫ закѡнꙋ б͠жїꙋ, пльтїѫ же грѣхꙋ. и прѡчаа. тѣмже закѡнь ꙋбѡ с͠ть ре(ч). и заповѣдь с͠та и праведна и бл͠га. кь симь вьсѣмъ безмѣстїѡмь, и еще смѣете кр(с)ть хꙋлити и вра(л. 135б)ждѫ тогѡ нарицати. и ниже понѣ ап(с)ла стыдѧще(с), ни(ж) вь разꙋмь прїити могѫще . аще ꙋбѡ ап(с)лскыимь послѣдꙋете прѣданїѡмь ꙗкоже любѡпрѣпираете сѧ, пѡ что не кланѣете сѧ кр(с)тꙋ. Павлꙋ ап(с)лꙋ гл͠ѧщꙋ, мнѣ же да не бѫде(т) хвалити(с), тъкмо о кр(с)тѣ (г͠а) наше(г) І͠с Х͠а, имже мнѣ миръ разпѧ(т) сѧ и азъ мирꙋ. и пакы. словѡ кр(с)тное, погыбаѫщїимь ꙋбѡ бꙋиствѡ е(с), сп͠саѫщим же сѧ намь, сила б͠жїа естъ. Аще ꙋбѡ сила б͠жїа е(с) кр(с)ть ꙗкоже и е(с), пѡ что силѣ б͠жїи не вѣрꙋете. Е(л)ма ап(с)льстѣи вѣрꙋете проповѣди глѧщѡи, вѣрѡѫ Аѵ̈раамь сътвори се и се и прѡчаа. Вѣра же неиспытанна вещь е(с) и несказанна. и ѡ(т) нѫ(д) ѧзыкѡмь плътѣнѡ(м) сказати(с) не могѫщи. Вѣроѫ же приемлет сѧ еѧже с͠тии вьси вѣрꙋѫще полꙋчищѫ ꙗже тѣми чаемаа, вѣрѫ и вы по(д)бнѫ прїемше поклѡните сѧ кр(с)тꙋ, сирѣчь б͠жїи силѣ. Въсѣкѡ ꙋбѡ дѣанїе и чю(д)дѣиствїе Х͠во великѡ е(с) и чю(д)но и бж(с)тьвнѡ. Нѫ вьсѣхъ е(с) чьстнѣиши животворѧщїи кр(с)ть. Ничимже бѡ инѣмь развѣ кр(с)томь съмръ(т) ꙋпразни сѧ. и прѣрѡдителнїи грѣхъ потрѣби сѧ. и адъ испровръже сѧ. и вьскр͠сенїе дарѡва сѧ. сила намь, еже прѣобидѣти настоѧща(а) и самѫѧ съмрь(т), дарѡва сѧ. чѧда б͠жїа и наслѣдници ѡт кѫдꙋ быхѡмь, развѣ ра(дї) кр(с)та г͠а нше(г) І͠ѵ Х͠а. тѣм бѡ вьсѣ исправлѣѫт сѧ. Елици бѡ кр(с)тихѡм сѧ въ х͠а ре(ч) бж(с)тьвныи ап(с)лъ, въ съмрь(т) егѡ кр͠стихѡм сѧ. и елици пакы вь х͠а кр(т)тихѡм сѧ, Х͠а облѣкѡхѡм сѧ. Х͠с же е(с) б͠жїа сила и б͠жїа прѣмѫдрѡсть. Се съмрь(т) Х͠ва, сирчѣчь кр͠сть, съставноѫ б͠жїеѫ силѡѫ и прѣмѫдростїѫ нас (л. 136а) облагае(т). сила же б͠жїа е(ст) словѡ кр(с)тное. или ꙗко сила б͠жїа, сирѣчь ꙗже на съмрь(т) побѣда, ра(ди) егѡ намъ ꙗви сѧ. или ꙗко ꙗкоже четыре крае кр(с)тꙋ срѣднѣаг(ѡ) ра(ди) сложенїа дръжѫ(т) сѧ и сьтищѫ сѧ, сице ра(ди) б͠жїѫ силы. высѡта ꙋбѡ и глѫбина. длъгѡта же и ширѡта. сирѣчь вьсѣ видимаа же и невидимаа тварь съдръжит сѧ. Тъ намь знаменїе да(с) на лици, имже образомь І͠илю обрѣзанїе. того бѡ ради вѣрнїи ѡ(т) невѣрныи(х) ѡ(т)бѣгаемь и вѣрни познаваем сѧ. тъ щитъ. и орѫжїе. и побѣда на дїавола е(с). тъ печа(т) ꙗко да не кѡснет сѧ намь гꙋбитель. тъ лежѫщ(ї)имь вьстанїе. стоѫщїимь ꙋтвръж(д)енїе. немѡщныимь по(д)пѡръ. пасѫщїимь жезлъ. обращаѫщим сѧ рѫкѡводитель. дрѣвѡ жизни вѣчныѧ. Чтѡ ꙋбѡ вьсечьстное дрѣво на немже себе о на(с) х͠с жрътвѫ прїнесе, ꙗко ѡс͠щенно прикѡсновенїе(м) ст͠го тѣла и кръве, въ лѣпотѫ прїемлемь и достѡлѣпнѣ тѡмꙋ покланѣем сѧ. Покланѣем же сѧ образꙋ чь(с)тнаго кр(с)та аще и ѡ(т) иныѫ вещи бѫде(т). не вещь почитаѫще, да не бѫде(т). нѫ образъ ꙗко Х͠во вьображенїе. Ре(ч) бѡ къ своимь ꙋченикѡ(м). Тѡгда ꙗвит сѧ знаменїе с͠на чл͠чьскагѡ, кр(с)ть г͠лѧ. тѣмь и кь женамь г͠лааше иже вьскр͠сенїа аг͠глъ, вѣмь ꙗко Іс͠а ищете назарѣнина пропѧтагѡ. и ап(с)лъ. мы же проповѣдаемь Х͠а распѧта. Не ре(ч) прободена, нѫ распѧта. Сегѡ чьстнагѡ кр(с)та проѡбрази дрѣвѡ живѡтное иже вь раи насаж(д)енное. Елма бѡ дрѣва ра(ди) сьмрь(т), до(с)аше дрѣва ра(ди) пакы дати сѧ жизнь и вьскре(с)нїе. Іакѡвъ, кр(с)таобразно рѫцѣ прѣмѣнивъ,(л.136б) с͠ны і̇ѡсифѡвы бл(с)ви. Жезлѡ(м) Мѡѵ̈си кр(с)таобразно вѡдѫ знаменавь, мѡре раздѣли. и прѡсто рещи, кр(с)тѡмь вьсемꙋ мирꙋ сп͠сенїе съдѣа сѧ· Сїа и сицеваа сщеннѣишїи і̇ларіѡнь кь скврънн̈омꙋ ономꙋ изг͠ла събѡрꙋ, въсѣхъ затъче ꙋста. и стꙋда мнѡга исплънше(с), сташѫ ꙗкоже рыбы безгласны. и чюждаахѫ сѧ блг(д)ти и силѣ изхѡдѧщїи изь ꙋстъ истинн̈агѡ пастырѣ. И ꙗко себе разꙋмѣшѫ невьзмѡгшѫ съпрѡтивь ѡ(т)вѣщати ни кь единомꙋ г͠лꙋ, размшлѣахѫ въ себѣ чтѡ ꙋбѡ сьтворѧ(т). къ сим же иларіонь, вьсприемь словѡ пакы рече. аще по прївидѣнїꙋ въчл͠чи сѧ Х͠с, ꙗко(ж) непщꙋете или ѡ(т) нб͠сь сънесе пль(т), како вь осмыи д͠нь обрѣза сѧ по древнемꙋ закѡнꙋ. Сїе бѡ едино тьчїѫ, довѡлно е(с) вьзьꙋсти(ти) блѧди неразꙋмныи(х). обрѣзаное бѡ, пль(т) бѣше нашеи пльти сърѡ(д)на. Проꙗвленно ꙋбѡ показа сѧ, ꙗко по истиннѣ вьчл͠чи сѧ ѡт чистыи(х) д͠вчьскы(х) крьвеи, ѡ(т) кѫдꙋ оубѡ вы ѡ въседръзїи г͠нее тѣло г͠лете злаго быти начѧла. Аще ли дръзаете и еще лѫкавѡмꙋ се възлагати, како ръци ми лѫкавое съчета сѧ бл͠гѡмꙋ. и како сьтрьпѣ бл͠гыи б͠ь сь лѫкавыимь тѣлѡмъ, мирскѡе съдѣати сп͠сенїе, или како тѡ съпосади на ѡ(т)чьскѡмь прѣстѡлѣ. аще древнѣаго завѣта законѡполѡжникь е(с) лѫкавыи, какѡ Х͠с гл͠ет испытꙋите писанїа, ꙗко вь ни(х) обрѧщете живѡ(т) вѣчныи. писанїа же гл͠еть, Мѡѵ̈сеова, и ины(х) вьсѣ(х) пр(о)ркь. не ꙋбѡ бѣщѫ книгы нѡвыѫ благѡдѣти. где бѡ живѡ(т) вѣчныи обрѧще(т) сѧ вь нихже лѫкавыи законопѡлагае(т) иповелѣвае(т). (л.137а) Како(ж) вь ины(х) Х͠с истина гле(т). аще Мѡѵ̈сеꙋ вѣровали бисте, и мнѣ ꙋбѡ вѣрѡвали бисте. о мнѣ ꙋбѡ онъ писааше. и не рече, вь нѣкыи(х) вѣровали бисте мѡѵ̈сеꙋ. нѫ просто тогѡ достоинѡ вѣрное проповѣда. Аще лѫкавѡ е(с) начѧлѡ древнее, како великыи Павелъ начинаѧ кь римлѣнѡмь посланїе, провьзвѣщенꙋ быти гл͠еть б͠ꙋ прр(о)кы своими вь с͠тыи(х) писанїѡ(х), о с͠нѣ своемь бывшїимь ѡ(т) сѣмене дв(д)а по пльти. аще бѡ б͠жїи сѫть прр(о)ци и писанїа ст͠аа, имиже б͠ь прѡвьзвѣсти о с͠нѣ своемь, како древнїи завѣтъ вьмѣнит сѧ лѫкаваагѡ. И маркѡ же еѵ(г)алисть ре(ч). Зачѧлѡ еѵ(г)лїа І͠ѵХ͠ва, с͠на б͠жїа, ꙗко(ж) писано есть въ про(р)ѡц(ѣ)х. И мнѡжицеѫ бѡ вь четыре(х) еѵаг͠глистѡ(х) писанѡ е(с), вь прр(о)цѣ(х). и мнѡжицеѫ бѡ вь четыре(х) еѵ(г)листѡ(х) писано е(с), ꙗко да събѫдет сѧ ре(ч)еное прорѡкѡмь онсицѫ. аще правда б͠жїа ꙗви сѧ свѣдѣтелствꙋемаа ѡт закѡна и прѡрѡкь по ап(с)лꙋ Павлꙋ, како закѡ(н) и прр(о)ци, не ѡ(т) бл͠гагѡ б͠а вьдъхнѡвенїа же и истины непщевани бышѫ ꙋбѡ+

Се показа(х) вамъ ѡт еѵ(г)лїа же и ѡ(т) ап(с)ла, ꙗко б͠ь н͠бꙋ и земли и вьсѣкѡ(ї) твари е(с) твѡрецъ, и ꙗко древнїи и нѡвыи закѡнь ѡ(т) негѡ дань бы(с) и ꙗко нашѧ тлѣнн̈ѫѧ и мрътвнѫѧ възѧ(т) пль(т), и тѫ, об͠жївъ на нб͠са вьзнесе и ѡ деснѫѧ ѡ͠ца съпосади. и ꙗко ѡ(т) дв͠чьскы(х) чисты(х) кръвеи пльт възѧ(т), и ꙗко Х͠с кр(с)тѡ(м) вьселенѫѧ сп͠се. и ꙗко тѡмꙋ поклѡнит сѧ въсѣко кѡлѣнѡ нб͠сны(х) и земныи(х) и прѣиспѡдни(х) и въсѣкъ ѧзыкъ исповѣстъ ꙗко г͠ь І͠ѵ Х͠с въ славѫ б͠ꙋ ѡ͠цꙋ +

Прочее прїимѣте чювствѡ одръжѫщѫѧ ва(с) тъмы, и сꙋетнаа и лъжѫ ѡставите. познаите истинѫ и тѡѫ озарите( с) свѣтѡ(м). се бѡ о ва(с) гл͠еть г͠ь дне(с). (л. 137б) Аще не би(х) прїишелъ и гла͠лъ имъ, грѣха не бишѫ имѣли. ннѣ же вины не имѧ(т) о грѣсѣ своемь. пристѫпите ꙋбѡ къ сьбѡрнѣи цр͠кви, и прїимете банѧ ст͠аго д͠ха вь оставленїе грѣхѡмь. се бѡ о ва(с) нб͠сныи ра(д)оует сѧ ѡ(т)цъ. и телца закалае(т) ꙋпїтѣннаагѡ о вашемь обращени. и дрꙋгы и съсѣды съзывае(т) о вашемь обрѣтенїи. +

Сїа ꙋбѡ ѡни ꙗко слышавше, ꙋмилишѫ(с) ср(д)цы. и вьседꙋшно припадѡшѫ, прѡсѧще ѡ(т) негѡ даръ ст͠гѡ кръщенїа. и мнѡго своѫ ꙋкоривше и опльвавше вѣрѫ, пристѫпишѫ кь събѡрнѣи цр͠ки, и избранн̈омꙋ съчеташѫ(с) стадꙋ. видѣв же сїа правѡславны(х) събѡръ, неизгла͠нн̈оѫ радѡваахѫ сѧ радостїѫ, и б͠ви и своемꙋ архїереꙋ непрѣстанн̈а вьздаваахѫ бл͠гѡдаренїа ѡ тѡликы(х) д͠шь прїѡбрѣтенїи. Видѣвше(ж) сїа скврънныѧ и б͠гѡмръзсксыѧ ереси арменскыѫ прѣстателе, гнѣвѡмь и завистїѫ исплънишѫ (с). и досаж(д)енми и хꙋлами различными тогѡ облагаахѫ, и льстца и блазнителѣ нарицаахѫ, иже тъмы сѫщеи прѣльсти сн͠ѡве. б͠жїи же архїереи, невьзбранно ꙋчѧ и наказꙋѫ не прѣстааше словѡ истинное, и прїлагааше сѧ пр(с)нѡ кь числꙋ правѡславны(х) мнѡжьствѡ мнѡгѡ людїи. Прѣдре(ч)нїи же еретици армене, наꙋстишѫ иже тѣмь покарѣѫщїи сѧ нарѡдъ ꙗко мнѡгъ сѫщъ ꙗко да ст͠гѡ ꙋбиѫть. Б͠жїи же ꙋгѡдникь ꙗко ѡвчѧ незлѡбивѡ по срѣдѣ влькъ нечьстїа хѡж(д)ааше, и ѱалѡмскѡе онѡ вь ꙋстѣ(х) обношааше пѣнїе г͠лѧ. Аще поидѫ по срѣдѣ сѣни сьмрътныѫ, не ꙋбѡѫ сѧ зла ꙗко ты съ мноѫ еси. Ѡни же чѧстаа прихѡж(д)енїа кь немꙋ творѣхѫ. не ра(ди) пѡлѕы се творѧще, (л. 138а) нѫ винѫ нѣкѫѧ тѡм(ꙋ) вьзлѡжити хѡтѧще. ꙗ(к) ꙋбѡ себе бездѣлны зрѣхѫ ѡ(т) хѡдѧщѫ, ꙗко(ж) прашеѫ нѣкоторѡѫ биемы, мнѡжае распалѣахѫ сѧ гнѣвѡмь. Единоѫ же сътѧѕаѫще(с) съ нимь. и не могѫще стати противѫ прѣмѫдрѡсти и слѡвесемъ ѡт негѡ г͠лемыимь, ꙗрѡстїѫ подвигше сѧ каменїе вьземше немилѡстивнѣ тогѡ ꙗко(ж) инѡгда пръвѡм͠ченика побишѫ. и того ꙗко мрътва непщевавше, ѡставишѧ. И м͠чника побишѫ. И тогѡ ꙗ(к) мр͠тва не пщевавше, оставишѫ. И м(ч)никъ без кръве і̇ларіонь показовааше сѧ прѡизвѡленїемь. Вь себе ꙋбѡ ꙗко при(д)ше. и дїавѡлее кѡварствѡ тѡ быти разꙋмѣв, роу(д)ѫ сѧ вь своѫ отиде келїѫ. далече сѫщꙋ ѡ(т) гра(д) мѣстꙋ и ꙋединенꙋ на немже побишѫ и. ꙋврѣдѣв же сїа правѡславныи(х) събѡръ, единод͠шьнѡ начинаахѫ ꙋстръмити сѧ на нѧ и тѣ(х) до конца потрѣбити. Х͠вь же подражатель и незлобливагѡ вл͠дкы ꙋченикь і̇ларіѡнъ, вьзбрани имь г͠лѧ, ни чѧда, ни. нѫ поминаите г͠нѧ ѧже кь петрꙋ г͠лы. рекшꙋ. Вьньзи нѡжь свои вь нѡжницѫ своѫ, зане въсѣ(к) прїемлѧи ножь, ножемь и погыбнеть. и апостѡли же, биеми за имѧ г͠не ѡт лица сънмꙋ идѣхѫ ра(д)ꙋѫще (с). оставите ꙋбѡ ихъ не вѣдѧ(т) бѡ что творѧть. лѫкаваа же она съимица и кръвь пролїати готѡваа. ꙗко ꙋвѣдѣшѧ бывшее, не доꙋмѣваахѫ. и ꙗко(ж) о г͠дѣ сице и о немь ови гл͠аахѫ бл͠гь е(с), ови же, ни нѫ блазнитель е(с) и льстить нарѡды. Сице ꙋбѡ мнѡгꙋ разгласїꙋ бывшꙋ в ни(х), прѧ и сьтѧѕанїа междꙋ собѡѫ творѣхѫ. Нѣкогда же пакы недѫгѡмь прѣльсти ихъ пїани сѫще, прїидѡшѫ къ бл͠женномꙋ(л. 138б) гл͠ѧще мнѡгаа, и своѫ ꙋтвръж(д)аѫще ересь. и само и онамо себе прѣлагаѫще. и хвалѧще(с) правѡславнѣ мѫдръствовати. и въсѣ прѣданїа дръжати цр͠кѡвнаа. Також(д)же и с͠тыѫ слꙋжбы. и пѡсты и вьсѣ инаа, правѡславна сѫща и ѡт събѡрныѫ прѣдана цр͠кве. кь ним же крѡткыи ср(д)цемь, крѡтчаиши же мѫдрѡванїемь ѡтвѣща і̇ларіѡнъ. дѡбрѣ ꙗко вьспомѣнѫсте ѡ(т) събѡрныѫ цр͠кве наченше. събѡрнаа ꙋбѡ цр͠ки дѡбрѣ прѣемши ѡ(т) самовидецъ слова с͠тхъ ап(с)лъ, добрѣ ꙋставленн̈а и прѣданна, непоколѣблемо даже до ннѣ дръжи(т). ꙗже и вы крѣпцѣ и непоколѣблемо дръжасте даже до четврътааго събѡра иже въ халкїдѡнѣ. Ѡ(т) толѣ же ѡ(т)врьгше себе сьбѡрныѫ цр͠кве. нѣкѡтѡрыимь еханїемь, иже и мантакꙋнїи прѡзванъ бы(с), и иже сь нимь сквръными і̇ереими. и еѵтихїевѡ и дїоскорѡвѡ злославїе прѣемше, приложенїе нечьстивы(х) велѣнїи ꙋдръжасте. и гл͠ете не приѧти Х͠ꙋ единѡсѫщнѫ намь пль(т), нѫ нетлѣннѫ нѣкаковѫ и безстрастнѫ, и тенкѫ и несъзданнѫ и нб͠снѫ. Сицевое ꙋбѡ хꙋлное велѣнїе сьбѡрнаа цр͠ки, ниже прѣѫ(т) когда ниже прѣда(с)+

 Аще ꙋбѡ нетлѣнна и безьстрастна и нб͠сна бѣше г͠нѣ пль(т), безьстрастное бѡ ни трꙋди(т) сѧ ни спи(ть) ни ꙗстъ ниже пїе(ть). ни рѫкама осѧѕает сѧ, ктѡ спѣше вь кораби, а не наше естъствѡ. ктѡ о градѣ поплака. ктѡ на(д) Лазарѡмь просльзи. въ дѡмꙋ Сїмѡна прѡкаженаго кто вьзлеже. ктѡ нѡгы ꙋмы(т) ꙋченикѡмь. ктѡ таинства прѣда(с). ктѡ свѧзань ведень бы(с) въ двѡръ каїафинъ. (л. 139а) кто на кр(с)тѣ повѣшенъ бы(с). Ктѡ въ грѡбѣ положенъ бы(с). Ктѡ по вьскр͠сени ꙋченикѡмъ ре(ч), осѧжите мѧ и видите ꙗко д͠хь пль(т) и кѡсти не има(т) ꙗко(ж) мене ви(д)те имѧща. Се ꙗвѣ показахѡмь, ꙗко истинноѫ вь чл͠чьскѫѧ нашѫ сїѫ пль(т) г͠ь одѣа сѧ. они(же), ꙋтѣснѣеми ѡ(т) истинныи(х) блаженагѡ г͠лъ, хꙋлное се ѡ(т)вѣщашѫ, гл͠ще. та ꙗвльшїа сѧ Х͠ва пль(т), съединив (с) бж(с)твꙋ, бы(с) едино естьство Х͠с. къ ним же прѣмѫдрѡстнаа она ѡ(т)вѣща д͠ша. аще едино е(с) естьство Х͠с. и тѡ вьсе е(с) бж͠ствѡ, Х͠во же естьствѡ ѡ(т) о͠ца неразлѫчно бѣше, проꙗвленн̈о ꙗко и пль(т) Х͠ва, вь врѣмѧ стр(с)ти сьединивши(с) Х͠вꙋ естьствꙋ, неразлѫчна бѣ ѡ(т) о͠ца. и како страждаше долѣ дръжима и ранима и пробадаема. и по истинѣ ꙋмерша. и вь грѡбѣ мрътва и недвижима лежѫщи. аще ꙋбѡ пль(т) Х͠ва бж͠твѡ бы(с), како самъ Х͠с гл͠ааше: Б͠же мои, б͠же мои, вьскѫѧ мѧ остави. Како же кь Марїи гл͠ааше Марїе не прикасаи сѧ мнѣ, небѡ вьзыдѡ(х) кь ѡ͠цꙋ моемꙋ. Како же и ап(с)лѡмь по вьскр͠сени гл͠ааше, осѧжите мѧ и видите ꙗко д͠хъ пль(т) и кѡсти не има(т), ꙗко(ж) мене видите имѧща. И ина прѣмнѡга такѡва о вьчл͠чени Х͠вѣ ꙗснѣише трѫбы свѣдѣтелствꙋѫтъ. Пакы же вь трїс͠тѣи пѣсни принѡсѧще еже, с͠ты и бесьмрътны распеныи сѧ. и ꙗвестъвнѣ свое изьꙗвлѣете безꙋмїе. паче же нечьстїе. аще ꙋбѡ бесьмрътна пль(т) и нетлѣнна и нб͠сна, како распѧ(т) сѧ. аще (ж) распѧ(т) сѧ, како тѫ бж(с)тво нарицаеши. пакы же вь с͠тѣи слꙋжбѣ не приносите хлѣбъ ꙗко(ж) мы, нѫ безкваснаа. Іꙋдеискѡ бѡ е(с) (л. 139б) безьквасное вьсѣчьскы. Таже ап(с)лꙋ Павлꙋ и б͠гѡсловꙋ Грїгорїꙋ велегласно вьзываѫщемь, древнѣа мимоидѡшѫ и се бышѫ въсѣ нѡва. И Златѡꙋстꙋ гл͠ѧщꙋ о ветхѡмь законѣ и новѡмь. тамо писмѧ, зде же д͠хь. тамо кївѡ(т), зде же д͠ваа. тамо жезлъ Аарѡнѡвъ, зде же кр(с)ть. тамо агнецъ, зде же Х͠с. тамо безкваснаа, зде(ж) хлѣбъ. Они же, о гл͠емыи(х) дивѧще сѧ, и прѡтивѫ не имѧще что ѡ(т)вѣщати, стꙋдѡмь съдръжими бѣхѫ. Обаче поздѣ нѣкѡгда ѡ(т)вѣщавше рѣшѫ. ꙗко хлѣбъ егѡже х͠с да(с) ап(с)лѡмь, Опрѣснѡкь бѣше а не хлѣбъ, се бѡ въ таковое врѣмѧ обрѣте(с), сего ра(ди) и мы опрѣснѡкъ на жрътвѫ прїнѡсимь. +

Кь ним же бл͠женыи ѡ(т)вѣща і̇ларіѡнъ. Бѫди ꙗко ѡпрѣснѡкъ бѣше хлѣбъ онъ, егѡже Х͠с вь врѣмѧ онѡ тѣснѡты ра(ди) врѣменныѧ вьземь, ꙗко да не непрѣданно ѡстанетъ нѡвыѧ вечерѧ таинствѡ, зане по малѣ хѡтѣше прѣдань быти і̇ꙋдеѡмь, ꙗкѡв же обрѣте хлѣбь такѡвь прїѧ(т), ꙗко да не вьсѣчьскы лиши(т) на(с) такѡвагѡ сп͠сенїа. ꙋченици же егѡ и прѡчїи по рѧдꙋ цр͠кѡвнїи пръвѡпрѣстѡлници ст͠ии ѡ͠ци, хлѣбъ сьвръшень а не безкваснаа на жрътвѫ прїнѡшаахѫ. имже мы послѣдꙋѫще, хлѣбь на жрътвѫ прїнѡсимь. И ина же мнѡгаа Х͠с ꙋбѡ инако прѣда(с), ап(с)ли же и иже тѣ(х) прѣемници инако ꙋчинишѫ та бывати. не ꙗко противѧще сѧ Х͠ꙋ, како бѡ нѫ ꙋпространѣѫщи(с) и растѫщи вѣрѣ, ꙋпространѣахѫ и ти съ вьсѣцѣмь бестрашїемь Х͠ва таинства, вь славѫ и беличьствїе егѡ. Ꙗко(ж) егда кр(с)тити сѧ Х͠с хѡтѣше, не къ западѡмъ (л. 140 а) обращ сѧ сатанѫ ѧзыкѡмь ѡ(т)връже сѧ, ни(ж) вьображенїе вѣры изг͠ла. ниже м͠лтвы кр͠щенїꙋ потрѣбова. Ниже вь кѫпѣли кр(с)ти сѧ. ниже мѵрѡмь помаза сѧ. ниже абїе кр͠щь сѧ вл͠дчнемꙋ прїчѧсти сѧ тѣлꙋ и кръви. и пакы Х͠с ꙋбѡ таинство д͠хѡвныѫ слꙋжбы вл(д)чнѣго тѣла и кръве, по цр͠квахъ не преда(с), нѫ на гѡрници общеи и на трапезѣ общеи, и пръвѣе ꙗдъ иныѧ сънѣди и вьзлегь. и ниже вь одеж(д)ѫ сщ͠енничьскѫѧ облъчень, ни(ж) мл͠итвы нашегѡ сщ͠енн̈одѣиства прїемь съ ѱалмы и пѣнми и пѣсньми д͠хѡвными. мы же вь цр͠ква(х) слꙋжбы съвръшаемь. и на д͠ховнѣмь жрътьвницѣ сщ͠енн̈ыѫ г͠лѧ трапезы. (и) алчни. и стѡѫще. и вь ст͠ителскѫѧ одеждѫ облъчени. не вь разоренїе прѣ(д)ре(ч)ныимь, нѫ чьстнѣиши творѧще чинь. Ибѡ ап(с)ли и иже по ни(х) истинн̈їи пастырїе и правїи ꙋчителе цр͠кѡвнїи д͠хомь б͠жїемь вьси вѡдими и ѡ(т) онѫдꙋ осїанїе имѧще, ѡваа ꙋбѡ ꙋпразнишѫ, ѡваа же вьзрастишѫ, съ выше прїемше таковѫѧ блг(д)ть. и вьсѣ кь полезномꙋ дѣиствꙋѫще, и бг͠олюбезнѣ повелѣваѫще же и вьображаѫще. Аще ли же опасно съмотримь, обрѧщемь ꙗко не без кваса бѣше хлѣбъ егѡже прѣда(с) Х͠с ꙋченикѡ(м). Ибѡ иже о пасцѣ закѡнь, сице гл͠еть. Вь четыри на десѧтыи м(с)ца пръвааго ѡ(т) свечера сънѣсте безькваснаа даже дѡ д͠не два десѧте и единогѡ, даже дѡ вечера. седмь д͠нїи квасъ да не обрѧще(т) сѧ домѡ(х) ваши(х). И закѡнн̈аа ꙋбѡ такѡва+

Х͠с же прѣж(д)е четыри на десѧтагѡ д͠не, сирѣчь вь трї на десѧтыи, закѡнн̈ѫѧ пасхѫ съвръши, (л.140б) и таинѫѧ прѣда(с) вечерѧ. вь иже д͠нь иже съ квасѡмъ хлѣбѡмь невьзбранно вьси причѧщаахѫ сѧ. аще ли ктѡ ре(ч)еть. И аще закѡнн̈ѫѧ тѡгда пасхѫ сьвръшаѫ, безкваснаа сь гѡрчицами ꙗде сам же и ꙋченици егѡ, ѡ(т) кѫдꙋ оубѡ имѣ(а)хѫ безькваснаа. Ре(ч)мь кь немꙋ. ꙗко лѣпѡ бѣ прѣж(д)е ꙋготовити сѧ и(м) по повелѣнїꙋ сп͠сѡвꙋ. или по прѡꙋвѣдѣнїꙋ дѡмꙋ вл(д)кѫ вѣрнꙋ и тѡмꙋ сѫщꙋ. вь сщ͠енн̈ѣи же слꙋжбѣ пѡ что не прїнѡсите вино сь водѡѫ смѣшено, нѫ тъчїѫ винѡ без воды, едино сего ра(ди) естьствѡ Х͠ꙋ вьзвѣщаѫще. Ре(ч) бѡ и бг͠ослѡвь Грїгѡрїе. ꙗко кръвь и вѡда ѡ(т) ребра изливаемомь, ꙗвлѣе(т) овѡ ꙋбѡ ꙗко чл͠овѣка. Ѡвѡ же ꙗко па(ч) чл͠ка. Тѣмже егда прихѡди(т) ктѡ кь жрътьвникꙋ и причѧ(?)стит сѧ кръви Х͠вѣ ѡ(т) чашѫ, да непщꙋе(т) ꙗко ꙋста своа къ ребрꙋ Х͠вꙋ приложи, и ѡ(т) ребра егѡ пие(т).Ѡ(т) ребра же Х͠ва не кръвь тьчїѫ нѫ и вѡда истече, вь ꙋвѣренїе тогѡ обѡимь естьствѡмь ꙗкоже прѣ(д)показа сѧ. А ꙗко и чаша ѡ(т) неѫже пода(с) Х͠с ап(с)лѡмь смѣшена бѣ сь винѡмь и водѡѫ, свѣдѣтелствꙋе(т) ап(с)лъ, бра(т) б͠жїи Іакѡвъ, и Маркѡ еѵ(г)листь въ свѡи(х) литꙋргїа(х), обѡ и гл͠ѧще сице. ꙗко прїе(м) чашѫ и вьлїа винѡ и вѡдѫ и бл͠годаривь бл(с)лови, да(с) имь рекь, пїите ѡ(т) неѫ вьси се е(с) кръвь моꙗ. ꙗ(ж) за вы и за мнѡгы изливаемаа. вьсѣко бѡ ꙗко нельжень и провѣдець б͠ь, ꙗковѡ же хѡтѣше из ребръ истѡчити, таковѡ и прѣда(с) ꙋченикѡмь. кр(с)ть же пакы ѡт ꙗкѡвы же аще бѫде(т) вещи сѫщь,не пръвѣе почитаете аще не кр(с)тите тогѡ ꙗко чл͠, и вьньзите гвѡздїи по срѣ(л. 141а) дѣ егѡ. и помажете егѡ кръвїѫ жрътъвноѫ. Таже рѫкѡѫ творѧще кр(с)ть на челѣ, и на кр͠щенїи. и вь сщ͠енныи(х) слꙋ(ж)ба(х) и на ины(х) мнѡгы(х), сице непщꙋете ос͠щати себе· Нѫ, ѡ мѫжїе армѣнстїи, достоить ꙋбѡ кь вамь пр(р)очьскы рещи, прїиимѣте наказанїе да не когда прогнѣвает сѧ г͠ь, и чювство прїимѣте своегѡ заблѫж(д)енїа и слѣпоты · аще ꙋбѡ иже рѫкоѫ вьображаемыи кр(с)ть ос͠щаеть и вьсѣ на нихже полагает сѧ, и вѡдѫ г͠лѧ кр͠щенїа. и маслѡ. и мїрѡ. и лица чл͠ча вѣрꙋѫщаа. и таинныи хлѣбь. и с͠щеннѫѧ чашѫ и прѡсто инаа вьсѣ, како иже ѡт вещи каковы либѡ вьѡбражаемыи кр͠сть, ꙗкоже скврънень и мръзькь, кр͠щенїемь и вещїѫ и кръвїѫ ѡ(т) ва(с) ос͠щает сѧ. како(ж) иже и кр͠щенїе и жрътвѫ ос͠щаѫ и кр(с)ть, ѡ(т) ос͠щаемыи(х) ѡбразь ос͠щает сѧ. Ꙗкоже бѡ прѣжде даже распѧти(с) Х͠ꙋ, кр(с)ть ѡргань бѣше сьмрьтныи проклѧ(т), и образь егѡ ѡ(т)бѣгателень и ѡ(т)връжень, сице по еже пригвоздити(с) Х͠ꙋ на немь. влд͠чнеѫ крьвїѫ самь ос͠ти сѧ и ѡбразь егѡ, ос͠щенїе вьсѣмь вѣрнымь ꙋстрои сѧ. пръвѣе ꙋбѡ чл͠кы ꙋбиваѫщъ, послѣ (ж)де же бѣсы· тѣмже и бж(с)тьвныи Григѡрїе великыѫ арменїѫ, кр(с)ты дрѣвѣны по мѣстѡ(х) нѣкѡтѡры(х) поставль, повелѣ покланѣти(с) и прибѣгати кь нимь ꙗко кь ос͠щаѫщимь· таже и не оу рѫкѡполѡжень архїереи. ниже нѣкѡтѡрымь кр͠щенїемь или вещїѫ или кръвїѫ ос͠щь ихъ ꙗко(ж) вы творите. како(ж) смѣете три кр͠сты дрѣвѣны сьтворше, и тѣ(х) кꙋпно съвькꙋплъше, ст͠ѫѧ (л. 141б) троицѫ именовати. не трепещѫще творити образь блаженыѫ трѡицѫ. единыѫ несъзда(н)ныѫ. и неизчьтенныѧ и неизслѣдимыѧ и ѡтнѫ(д) недомыслимыѫ. Пакы вьпрашаѫ вас ра(ди) чьсѡгѡ пѡстите(с) пѡсть Арцевꙋрїевь+ Ѡни же ꙗко единѣми ꙋсты ѡтвѣщавше рѣшѫ. сергїꙋ нѣкоемꙋ армѣнинꙋ таковыи пѡстим сѧ постъ, иже вь нашеи странѣ постра(д)вшомꙋ· Ѡ(т)вѣщавъ ст͠ыи гл͠а кь нимь. вамь злославномь сѫщемь, ѡт кѫдꙋ имате показати ꙗко сергїе онъ православень бѣ, и Х͠а р(ди) пострада. Зрим бѡ ꙗко никѡтѡры иже пр(о)ркъ. ниже ап(с)ль. ниже м(ч)еникь. ниже пр(п)дбенъ. нѫ ниже самь ст͠ыи Григѡрїе великыѫ арменїѫ, то(г) пѡстъ или празни(к) прѣда(с). Ѡни же ꙋтѣснѣеми рѣшѫ , ꙗко нїневїискыи е(с) пѡ(с), егѡже инѡгда нїневитѣне пѡстивше(с), лютагѡ оного избавишѫ(с) погꙋбленїа. Ст͠ыи вь скѡрѣ ѡ(т)гл͠а. ꙗко ни(ж) ст͠ыимь ап(с)лѡмь. ниже сьбѡрꙋ нѣкоемꙋ ѡ(т) ст͠ыхъ ѡ(т)ць вьспомѣнѫвшꙋ ть или прѣдавшꙋ, ктѡ е(с) повелѣвыи вамь пѡстити(с) ѧзычьскыи пѡстъ, прѣж(д)е мнѡгыи(х) лѣ(т) вьчл͠ченїа Х͠ва бывшїи. аще ꙋбѡ і̇ꙋдеискыѫ пѡсты ѧже ѡ(т) б͠а Мѡѵсеѡмь повелѣныѧ постити сѧ вьзбранени быхѡмь, мнѡго паче мнѡго непо(д)бныи(х) ѧзыкь. Сице(ж) проꙗвленно ѡбличени, пакы ѡтвѣщашѫ гл͠ѧще, адамѡвь пѡстъ быти ть, егда ѡ(т) раꙗ пищѫ изгнань бы(с). Абїе же бл͠женыи ѡ(т)вѣща і̇ларїонь. ꙗко о мирст(ѣмь) бытїи. и о вьсѣ(х) иже о адамѣ, Мѡѵ̈си сьписа. и никако(ж) о семь вьспомѣнѫ пѡстѣ, и ѡ(т) кѫдꙋ имате гл͠ати, ꙗ(к) адамѡвъ (л. 142а)постъ быти тъ. Пакы(ж) недѡꙋмѣвше рекѡшѫ. ꙗ(к) великыѫ арменїѫ е(с) пѡсть, иже пѡстишѫ(с) армѣне кр(с)тити(с) хѡтѧще ѡ(т) ст͠аго Григѡрїа. Вь скорѣ же ст͠ыи кь нимь ѡ(т)вѣща. не такѡ е(с). нѫ гѡнимѡмь вамь ѡт бѣсѡвь прѣж(д)е кр͠щенїа, повелѣно бы(с) вам пѡстити(с) д͠нїи .ѯ. послѣж(д)е же хѡтѧ ва(с) кр͠тити, л͠ д͠нїи повелѣ вамь пѡстити(с), ꙗкоже вь армѣнскыи(х) написано е(с) книга(х). и ниедїнже ѡ(т) такѡвыи(х) пѡстъ арцевꙋрцевь пѡ(с) наре(ч) сѧ. они(ж) стꙋда мнѡга наплънше(с),кꙋпно же и (не)доꙋмѣнїа, чтѡ ѡ(т)вѣщати недоꙋмѣахѫ. ѡбаче инѡ чтѡ ѡ(т)вѣщати не имѧще, се рекѡшꙋ, ꙗко великаагѡ кѡнстантина тъ и по(с) е(с), егѡ же пости сѧ, кр͠стити сѧ хотѧ· Ст͠ыи же осклабленомь лицемь и дръзновленномь обычаемь кь нимь ѡ(т)вѣща. Ѡ несъмыслънїи и мꙋднїи ср(д)цемь вѣровати истинѣ. испытаите писанїа, и вь ни(х) ѡбрѧщете ꙗко никѡтѡрыи е(с) вь въселенѣи цр(с)кыи пѡ(с). нижектѡ ѡ(т) иже по велицѣмь кѡнстанті̇нѣ ть вьспомѣнѫ ни събѡръ нѣкыи ст͠ь. ниже ѡ(т) ст͠хь ѡ(т)ць ктѡ памѧ(т) сьтвори таковагѡ поста. Сицевыимъ ѡбразомь различнѣ и несьгласнѣ гл͠ще, показасте ꙗко безакѡнень и мръзькь таковыи вашь пѡ(с) е(с), и ѡтнѫдь недостоень въсѣкого хрїстїанскагѡ слꙋха· Аз же аще и не хѡщете, о таковѣмь вашемь постѣ извѣстно рекѫ, еже и сами добрѣ вѣсте. ꙗко Сергїе нѣкто арменскыѫ ереси ꙋчитель бывыи, имѣше пса зовома сице арцевꙋрцїе; бѣ же вѣстникь прѣ(д)реченѡмꙋ Сергїꙋ. и пришествїе егѡ мнѡжицеѫ при(л. 142б)ходѧ възвѣщавааше бѣсѡвскыи(м) вьзмагае(м) дѣиствѡ(м). Хѡтѧ бѡ прїити вь нѣкыи ѡ(т) градѡвь. или весь. или селѡ, вь нихже живѣхѫ оꙋчѥници и причѧстници пагꙋбѣ его. и егда прѣ(д)речнн̈ааго пса видѣхѫ, исхѡж(д)аахѫ прѣж(д)е д͠не единогѡ на пъприща нѣкѡлика вь срѣтенїе ꙋчителю. нѣкогда же на скврьнн̈ѫѧ таковѫ слꙋжбѫ песьпослань бывъ, ѡт влькѡвь сънѣдень бы(с). и вь ꙋтрѣи д͠нь поиде Сергїе идеже послаль бѣше пса. никомꙋ же ꙋбѡ срѣтшꙋ егѡ, оскръби сѧ ѕѣлѡ. И прїше(д) кь нимъ елма ꙋвѣдѣ ꙗко не прїиде кь нимь пр(д)тча егѡ песъ, посла на възысканїе егѡ. и ꙗко познашѫ егѡ ѡт кѡстеи ꙗко влькѡмь сънѣдень бы(с), повелѣ вьсѣмь армѣнѡмь постити(с) о скончанїи егѡ. и печалѡвати и сѣтѡвати на д͠ни ꙋре(ч)ны вь лѣтѣ. и пѡ(с) тъи, арцевꙋрцевь именова· сегѡ ра(ди) и вы тѡ(г) ꙋставꙋ послѣдꙋѫще, таковыи постите(с) по(с). и стꙋдѡ(м) мнѡгѡмь одръжими, не хѡщете исповѣдати истиннѫ. таковыи бѡ ваш по(с), никтоже ниже ѡ(т) пр(о)рокь ниже ѡ(т) ап(с)ль вь сьбѡрнѣи цр͠кви прѣда(с). Тѣмже вьзникнѣте ѡ(т) глѫбѡкыѫ прѣльсти иже ва(с) ѡдръжѫщѫѧ, и ѡ(т)трѧсѣте належѫщѫѧ ꙩчима вашима слѣпотѫ. и пристѫпите кь събѡрнѣи цр͠ки и съвьдвѡрите(с) сь нами. ꙗко да единь обѡи сьставльше ликь, бл͠гочъстивнѣ вьсѣчьскы(х) б͠а вьсхвалимь. велико бѡ безꙋмїе е(с) еже вѣдѣти кѡмꙋ истинѫ и не притѣкати кь неи. Сими и сицевыми тѣ(х) обличивъ слѡвесы, и ѡ(т) вьсѫдꙋ тѣ(х) изьꙗвивь ересь, безь дръзновленны показа· Они же, стꙋда исплъ(л. 143а)нше(с) мнѡга, безгласни до конца прѣбышѫ· ꙗ(к) ꙋбо вь своа оше(д)ше, сътѧѕанїа и прѧ меж(д)ꙋ собѡѧ на къж(д)о творѣхѫ д͠нь. ови похвалѣѫще того гл͠ы же и слѡвеса, ѡви же застѫпаѫще своѫ ихъ ере(с)· тѡлико бѡ оны вьзмѡглы бѣшѫ ереси, ꙗко(ж) и кирь Манѡилꙋ, ц͠рю гръчьскомꙋ, вь малѣ не ѡтпасти ѡт бл͠гѡчьстивыѫ нашеѫ вѣры, аще не бл͠женн̈ыимь иларі̇онѡмъ ꙋкрѣплень би дѡгматскыми слѡвесы и ꙋтвръж(д)ень. и нечьстївѡе онѣ(х) велѣнїе ѡ(т) ср(д)ца егѡ далече нѣгде прогна, православїа же сѣмѧ вь немь ꙋглѫби. Сїа ꙋбѡ ꙗко разꙋмѣ ц͠рь, и бл͠гѡчьстїа велѣнми наслаж(д)ь сѧ, кꙋпно же и тѣми себе оградивь, неизгла͠нн̈ыѧ исплънѣаше сѧ радости. и б͠ви бл͠гѡдарестьвныѫ вьзьсилааше пѣсни, и тѡгѡ архїереꙋ вьсѣкѡ покоренїе показовааше же и пода|аше| и дары различныѫ и инаа вьсѣ, ꙗже тѡмꙋ потрѣбнаа вьсегда посилааше· прѣ(д)ре(ч)нїи же армѣне сътѧѕанїа и любѡпрѣнїа междꙋ собѡѫ о вѣрѣ вынѫ творѧще, ꙗкоже прѣ(д)показа сѧ, вь познанїе прїидѡшѫ своеѧ ихъ прѣльсти. и ѕѣлѡ своѫ ꙋкѡривше и опльвавше ере(с), ꙋсръдно кь ст͠ѣи събѡрнѣи пристѫпишѫ цр͠кви. и чьстномꙋ тѣлꙋ г͠ню и кръви вѣрнѣ причѧстивше(с), избранномꙋ сьчеташѫ(с)? стадꙋ. И бы(с) прѡчее едино стадѡ и единь пастырь · Б͠жїи же архїереи ꙗко сїа вь прѣднѣа проише(д)ша видѣ, радости весь испльнѣаше(с) и веселїа дꙋховнаагѡ. Сїа же ꙋвѣдѣвь и бл͠гѡчьстивыи ц͠рь, ѕѣлѡ радостень бы(с), и вьсѣмь извѣствовааше дѡбрагѡ пастырѣ дѡбрѡдѣтѣли же и дѣанїа. напи(л. 143б)са же къ немꙋ и писанїе повелѣваѫщее. въсѧ б͠гомилскѫѧ ере(с) до кѡнца ѡт стада очистити. и покарѣѫщѫѧ сѧ ꙋбѡ бл͠гѡчьстїа дѡгматѡмь, ꙋсръдно прїемати, и избранн̈омꙋ сьчетавати стадꙋ. не покарѣѫщѫѧ же сѧ и вь своеи нечьстивѣи и мръзцѣи прѣбываѫщѫѧ ереси, далече нѣгде ѡ(т)ганѣти ѡ(т) правѡславныи(х) стада. Они же, ꙗко сїа слышавше, пристѫпишѫ и ти кь събѡрнѣи цр͠кви, и бж(с)стьвное сп(д)бишѫ(с) прїѧти кр͠щенїе. своѫ опльвавше до кѡнца ере(с). и бѣ видѣти мнѡжѫщее сѧ православны(х) мнѡжьствѡ. Злѡславныих же нечьстїемь помрачааше сѧ сънмица· Х͠вь ꙋбѡ подражатель і̇ларіонь. на немже мѣстѣ сьбранїа творѣхѫ прѣ(д)ре(ч)нныѧ ереси. н͠нѣже приснаа чѧда, и цр͠ковь въздвиже ѕѣлѡ чъстнѫ своимь мнихѡмь, вь имѧ ст͠ыхь и славны(х) въсехвалны(х) ап(с)ль ·(еѫ)же красота мнѡгы(х) ꙋдивлѣеть и вь славослѡвїе привѡдить б͠жїе· мнѡжьствѡ же мнѡгѡ инѡкъ въ неи събравъ, правила и ꙋставы ѡ(т)чьскыѫ тѣмь прѣда(с). и сам же чѧстаа кь нимь хѡж(д)енїа творѧ, присно ꙋчаше и наказовааше ихъ инѡчьскыи(х) дръжати сѧ пѡдвигь· Сїа же м͠ти егѡ зрѧщи, веслѣше(с) и чѧстаа кь б͠ꙋ възсилааше бл͠гѡдаренїа. съжителѣ бѡ своегѡ прѣ(д)ѡ(т)пꙋстила бѣше къ г͠ꙋ. По семже и та мало поживши лѣ(т), кь б͠ꙋ отиде. ѧже бж͠тьвныи і̇ларіо(н), вьсѣми на(д)грѡбными чьстнѣ опрѧтавъ, въ грѡбѣ погребе· и бѣ прѡчее ꙗко дрѣвѡ саж(д)енн̈ое прї исхѡдищи(х) вѡдъ д͠ха, растѫ и (л. 144а) прѣспѣваѫ по боѕѣ вь всѣ(х) бл͠гочъстїа дѡгматѡ(х). ꙋчѧ и наказꙋѫ въсѧ иже по(д) нимь лю(ди) бл͠гѡчьстивыи(х)дръжати сѧ велѣнїи. злѡславныих же ꙋдалѣти(с) ересеи и тѣ(х) ѡ(т)бѣгати· Сице ꙋбѡ правѡславныи(х) вьзнесе(с) сѧ рѡгъ, нечьстїе же до кѡнца ꙋгасе. въси бѡ иже ѡ(т) влькѡвь бывшеи овцѧ, прѣмѣнше себе дѡбрыимь измѣненїемь, послѣдѡваахѫ своемꙋ пастырю ꙗко(ж) агнъци незлѡбиви въ вьсемь тѡмꙋ покарѣѫще(с). ꙋкарѣѫще(ж) и оплюваѫще иже пръвѣе тѣ(х) одръжавшѫѧ прѣль(с). и тоѫ начѧлникы крѣпцѣ хꙋлѧще(ж) и проклинаѫще · Нечьстивыѧ же и скврънн̈ыѫ бѡгѡмилскыѫ ереси поклѡнникы еликы бл͠гѡчьстїа прїемшѫ сѣмѧ б͠жїи архїереи видѣ, въсѧ съчета къ православныи(х) стадꙋ. еликы же непокѡрнѣ належѫшѫ ꙋсмотри, различными изгнанїи и затѡченми ѡ(т) бл͠гѡчьстивагѡ потрѣби стада. Сице свои ꙋкраси прѣстѡлъ. и сице свое ꙋпасе стадѡ, ꙗко(ж) ѡ(т)нѫ(д) не имѣти сквръны или враскы. Тѣмже и вьси сѫщїи о кр(с)сть тѡмꙋ прїнѡшаахѫ дары, бл(с)венїе и полѕѫ ѡ(т) негѡ ищѫще· прѣ(д)ре(ч)нное же инѡчьскѡе онѡ състоанїе. дѡбрѣ направлѣемо и вѡдимо дѡбрыимь пастыремь, растѣше прѣспѣваѫ въ славѫ б͠жїѫ· +

Врѣменю ꙋбѡ не малꙋ мимоше(д)шю и тѡм(ꙋ) въ обычныи(х) дѡбрѡдѣтѣле(х) прохѡдѧщꙋ. свое еже кь г͠ꙋ ѡ(т)хож(д)енїе разꙋмѣ. И въсе онѡ инѡчъское мнѡжьствѡ съзвавъ, прилежнѣ наказа. Е(ж) прѣбывати тѣмь въ покорении и ѡ(т)чьстѣи любви. и въсѣцѣи прилежати слꙋжбѣ, и прѣданнааго крѣпцѣ дръжати(с) правила. прилежати же ꙋсръдно въсѣцѣи дѡбрѡдѣтѣли. петрꙋ нѣкоемꙋ тѣмъ прѣдстателствꙋѫщꙋ мѫжꙋ дѡбрѡдѣтѣлнꙋ и нарѡчитꙋ, крѡткꙋ же и цѣлѡмѫдрънꙋ аще ктѡ инъ. Его(ж) добрѡдѣтѣль въси съвѣдѧ(т) иже о кр(с)тъ тамо живѫщеи. иже и бл͠женномꙋ і̇ларіонꙋ ꙋченичьствова лѣта довѡлна, и въсѣкѫ послꙋжи слꙋжбѫ· Сице (л. 144б) тѣ(х) ꙋтвръди и наказа довѡлнѡ. и мирь тѣмь давь и въсем(ꙋ) стадꙋ, бл͠женыи(м) ꙋсиѫ съномь. Егѡ(ж) бл͠гочьстивое онѡ обстѫплъше стадѡ, тѡплыми слъзами тѡ(г) ѡбливаахѫ мѡщи. псалмы же и пѣнми и пѣ(с)ми, кадїлы же и арѡматы бл͠гѡвѡнными мѡщи почь(т)ше, погребѡшѫ чъстнѣ же и бл͠гѡчъстивнѣ. Гл͠аахѫ же и се о немь. ꙗ(к) въ юнѡсти своеи всѣ(х) тридесѧти(х) лѣтѣ(х) вина никакоже въкꙋси.

Врѣмени(ж) не малꙋ прѣше(д)шꙋ и прѣ(д)ре(ч)нныи(м) мнихѡмь въ кꙋпѣ сѫщемь, нѣцїи ѡ(т) ни(х) прѣ(д)ре(ч)нное начѧшѫ нерадити правилѡ. Прѣ(д)ре(ч)нномꙋ же съпрѡтивѧще(с) Петрꙋ, и раздѡры нѣкыѫ и ереси въвѡждаахѫ. тѡмꙋ же тѣ(х) прїлежнѣ наказꙋѫщꙋ, непрѣклѡнни и неꙋмѡлими прѣбываахѫ. Ихже злое и безаконное ꙋстръмленїе ст͠ыи разꙋмѣвь і̇ларіонь, до кѡнца негѡдѡва. нѫ въ сънѣ тѣ(м) прѣ(д)ставь, безакѡннаа тѣ(х) обли(ч) дѣла, и мнѡга на ни(х) негодованїа изнесе словеса. и овѣ(х) жезломь немл(с)тивнѣ рани, нѣкыи(х) же и съмръти прѣда(с). Се(ж) видѣнїе прѣ(д)ре(ч)нныи Петръ извѣстно вѣды, въсѣ(м) иже въ обитѣли инѡкѡ(м) ꙗвѣ извѣсти. елма, ихже раниль бѣше, бѡлѣзнꙋѫще прѣбышѫ на мнѡгы д͠ни, и ихже съм͠рти прѣда(с), мр͠тви въсѣчьскы прѣбышѫ, ꙗко да не и дроуѕїи тѣ(х) съмрътоноснааго прѣимѫ(т) ꙗда. ꙗ(к) ꙋбѡ сїа видѣвше прѡчїи мѣста тѡ(г) мниси, страхѡ(м) кꙋпно и ꙋжасѡ(м) обьѧти бышѫ. и прѣбываахѫ прѡчее въ заповѣданныи(х) тѣмь правилѡ(х), и ꙋставь мѡнастирскыи неврѣж(д)ень съблюдааше(с). семꙋ же ꙋжасномꙋ чюдеси по въсѫдꙋ произшедшю, съ мнѡжаишеѫ вѣроѫ и ꙋсръдїемь въси прихѡж(д)аахѫ. различна же мнѡга знаменїа и чюдеса б͠ь съ свои(м) ꙋгѡдникѡ(м) творѧ, ѡ(т) въсѫдꙋ къ грѡбꙋ егѡ мноѕи прихѡж(д)аахѫ, и различнаа исцѣленїа възимаахѫ. Сице ꙋбѡ грѡбꙋ егѡ безмѣрнаа дѣиствꙋѫщꙋ чюдеса, цр͠кыимь кꙋпно и цр͠ковныи(м) сѫдѡ(м) изѧты бышѫ блаженаагѡ мѡщи, и въ чьстнѣи полѡжены бышѫ цр͠кви. А еже ꙗ(к) въ мимоте(ч)ни прѣидохѡ(м), не по(д)бае(т) то забьвенїа глѫбинамь ѡ(т)слати. (л. 145а)

Ꙗко ꙋбѡ бл͠женнаагѡ ракѫ ѡ(т)крышѫ, ѡ чюдо, обрѣтошѫ два истѡчни ѡ(т) ꙫчїю егѡ исхѡдѧща бл͠гоѧханнаагѡ мира. И ꙗ(к) сїа видѣ мнѡжъство ѡнѡ тѡ(г) ꙋчени(к), неизгла͠нныѧ исплънишѫ(с) радости. Въсѧ же окр(с)тныѫ страны сїа въ слꙋ(х) ꙋха (ꙗко) приемше, ꙋсръдно къ рацѣ ст͠го прихѡж(д)аахѫ различнаа почрипаахѫ исцѣленїа.

По мнѡѕѣ же врѣмени гръчьском(ꙋ) оскѫдѣвш(ꙋ) цр(с)твꙋ и ꙋмаленꙋ въсѣчьскы; Блъгарскѡмꙋ же и ѕѣлѡ възвеличившꙋ сѧ, благѡчьстивѣишїи ц͠рь Калѡꙗнь Блъгарскѡе тѡгда правѣше скїптрѡ. Ѕѣлѡ же храбѡрствꙋѫ тогда, прѣѧть Гръчьскѫѧ землѧ чѧсть не малѫ. Ѳракїѫ гл͠ѧ и Македѡнїѫ. Трївалы же и Далматїѫ. къ симже Неадѫ и Еладѫ, и еже е и Етѡлїѫ. и слыша о блаженѣмь і̇ларіѡнѣ чюдеса и знаменїа ꙗже творить б͠ь егѡ ради, желанїемь бж(с)тьвнымь раждеже сѧ. и ст͠аго блг(д)ѣти насладити сѧ хѡтѧ, съ мнѡѕѣмь посла ꙋсръдїемь. и съ дѡвѡлноѫ чъстїѫ мѡщи прп(д)обнаагѡ і̇ларіѡна въземь, съ кадїлы же и арѡматы въ свои славныи гра(д) прѣнесе трънѡвь. патрїарх же, ꙗко се слыша, изыде съ въсѣмь причьтѡмь въ срѣтенїе ст͠гѡ, съ свѣщами же и кадилы, ꙋсръднѡ облѡбыза мѡщи Х͠ва і̇ерарха. и слъзами довѡлными тыѧ облїавь, въ чьстнѣи полѡжи цр͠кви ст͠ыхъ и славныихъ великѡм(ч)кь .м͠., ѧже и до н͠нѣ лежѫще, подаваѫть исцѣленїа невъзбраннѡ въсѣмь иже съ вѣрѡѫ и любѡвїѫ къ нимь прихѡдѧщїимь. Въсѣх бѡ любитъ. и въсѣмь себе прѣдьлагаеть. и ꙗкоже живь (л. 145б) въсѣмъ себе подаетъ. и, ниже юнѡшѫ ѡ(т)рѣваеть. ни старца гнѫшает сѧ. нѫ старцѧ ꙗко старецъ любить. и юнѡшѫ обьемлеть. въсѣ въсѣмь подаеть да въсѧ приобрѧщеть. Принесѣмь ꙋбѡ и мы нѣчтѡ дѡстѡинѡ рацѣ мѡщеи егѡ. гл͠ѧ же, стѡанїе въсенѡщное. Ꙫчи въдрѡстнѣ. ꙋсръдїе благѡ. слꙋхъ послꙋшателень. Подражаимь семꙋ ѡ͠цꙋ, ꙗко да и мы ѡ͠ци бѫдемь. Възревнꙋимь тѡгѡ житїꙋ, ꙗко да и мъздѫ дѡстѡинѫ въсприимемь. Ѕѣлѡ бѡ въ сласть прїиметь, аще томꙋ ревнителїе бѫдемь и тѡгѡ възревнꙋемь стѡпамь. ничьсомꙋ же бѡ инѡмꙋ такѡ радꙋет сѧ б͠ь, ꙗкоже егда когѡ видить о дѡбрѡдѣтѣли тъщѫща сѧ даже дѡ съмръти. Ѡ сеи ꙋбѡ и мы дне(с) съставимь ликь. Обымѣмь ракѫ. въспѡимь на(д)грѡбнаа, ръцѣмь съ д͠видѡмь. чъстна прѣдь г͠мь съмръть прѣподѡбнаагѡ· чьстна бѡ въ истиннѫ съмръть ст͠ыихъ и славна, и въсѣкѡѫ дѡстѡина пѡхвалы. Сегѡ ради не тъчїѫ въ живѡтѣ прѡслави тѣхъ б͠ь, нѫ и по съмръти славѡѫ неизгла͠нноѫ. и не тъчїѫ д͠хы ихъ въ нб͠сныихъ свѣтлѡстехъ ꙋпокѡи, нѫ и тѣлеса ихъ на земли прѡслави. и чюдесемъ благѡдѣть тѣмь дарѡва, еже въсѧ силы бѣсѡвскыѫ кꙋпно же и тѣ(х) дѣиства прѡганѣти, и без вѣсти, и без вѣсти ѡ(т) вѣрныи(х) творити·(л. 146а) Нѫ ѡ архїереѡмь ꙋдѡбренїе. и мнѣ сла(д)каа вещи и имѧ і̇ларі́ѡне, ꙗко имѣѫ дръзновленїе къ б͠ꙋ, съ выше назираи на(с). ибѡ н͠нѣ раздрѣшъшем сѧ зръцалѡ(м) и гаданїѡмь, чистѣ зриши ст͠ѫѧ тр(о)ицѫ. съхрани стадѡ наше ѡ(т) въсѣ(х) съпротивнаго къзнеи ненавѣтно. оградї е блг(д)ѣтїѫ данноѫ ти ѡ(т) пастыреначѧлника сп͠са Х͠а. пращеѫ мѫдрыих ти слѡвесь, влькы нечъстїа ѡ(т)жени, съпѡстатныи(х) навѣты ꙗко(ж) плѣвелы развѣи, твоеѧ блг(д)ти вѣтрѡ(м). цр͠ковное направи исплъненїе. съпостраж(д)и тѧгѡтамь наши(м). вѣси прѣ(д)стателства врѣмѧ еликѡ тѧжко. вѣси архїереиства опасствѡ. вѣси бѡ дѡбрѣ правити и направлѣти аще хѡщеши на(с), и въ пристанище бж͠їи(х) хѡтѣнїи окръмити. въсѣх бѡ си(х) имаши искꙋсь, въсѣ тѧгѡтнаа по(д)ѧль еси ра(ди) х͠вы цръкве. ересемъ въстанїа ꙋтѡлилъ еси. съпрѡтивѧщ... сѧ бл͠гѡчъстїа дѡгматѡ(м), хытрѡстїѫ д͠ховноѫ на бл͠гѡчьстїе обратиль еси. цр͠квы въз(д)виглъ еси х͠ꙋ б͠ꙋ нашемꙋ. прѣльщенныѫ обратилъ еси. бѣснꙋѫщїих сѧ исцѣлилъ еси. ересемь къзни разориль еси. дѡбрыи(м) пѡдвигѡмь подвиѕалъ сѧ еси. Теченїе скончаль еси. и вѣрѫ съблюлъ еси, Сегѡ ради и ꙋмеръ ꙗко живъ въ съмръти прѣбываеши, и рака мѡщеи твѡихъ неѡскѫдны истѣкаеть стрꙋѫ исцѣленїи различныхъ. не тъчїѧ же, нѫ и нашъ ꙋкрашаетъ прѣстѡлъ, и къ ревности на(с) поѡщрѣеть мнѡгыих ти пѡдвигъ · не бѡ ѡ(т) чѧсти (л. 146б) подвиѕалъ сѧ еси, нѫ даже дѡ кръве, и безкръви показал сѧ еси мѫченикъ. тѣмже нинѣ съ аг͠гелскыми въдварѣеши сѧ ликѡстѡанїи, наслаждаѫ сѧ нес(ы)тнѡ она, ꙗже Ꙩкѡ не видѣ и оухѡ не слыша. и на ср(д)це члѡвѣкꙋ не възыдѡшѫ, Ѡ самѡмь Хрїстѣ г͠и нашемь. емꙋже слава и дръжава съ ѡ͠цемь и ст͠ыимь д͠хѡмъ нинѣ и приснѡ и въ вѣкы вѣкѡ(м), аминъ.