Сказание за железния кръст

Прїиде к намъ бра(т) странствꙋѧ, дръжа кр(с)тъ тои. И пребывъ мало дн҃їи, разболѣ сѧ и призва мѧ, гл҃а: Ги҃ бл(с)ви, ѡ, и моли бг҃а за оубогꙋю мою дш҃ю, и възми кр(с)тъ сїи. И р(ч)е ми: Велика повѣсть ѡ кр(с)тѣ то(м), но не могꙋ гл҃ати и дръзнꙋ, вижю бо оуже близъ кончинꙋ свою, да моли сѧ ѡ мнѣ къ мл(с)тивомꙋ бг҃ꙋ да ми ѡслабить, да ти исповѣ(м). И сотворивши мл҃твꙋ, сѣдохомъ оу него и въздвнже сѧ, и сѣде, и прекр(с)ти сѧ и р(ч)е:

Азъ, ѡч҃е и гн҃е Петре, ѿ ꙗзыка есмъ новопросвѣщенна(г) блъгарьска егоже просвѣти бг҃ъ ст҃ымъ кр҃щенїемъ избранникомъ своимъ Борисо(м) кнеѕемъ в наша лѣта, егоже нарекоша во кр҃щенїи Михаилъ, иже силою Хв҃ою кр(с)тны(м) ѡрꙋжїемъ побѣди цѣпеныи, непокоривыи ꙗзыкъ блъгарьскыи и ѡмраченнаѧ ср(д)ца злокозньство(м) дьꙗволо(м) свѣтомъ бл҃горазꙋмїѧ просвѣти и не ч(с)тивыѧ ѿвръже, и требища рассыпа. И оутвердї ѧ с҃тми книгами въ правовѣрнꙋю хр(с)тїаньскꙋю вѣрꙋ. И приведъ ст҃го Стефана архіепї(с)кпа, създа цр҃квь и манастырѧ, и постави игꙋмена и попы, и еп(с)кпы да оучат люди на бж҃їи пꙋть. И пото(м) сподобї и бг҃ъ, прїимъ агг҃льскїи ѡбразъ ѿиде ѿ житїѧ сего къ Х҃ꙋ.

Ещеже емꙋ живꙋ бꙋдꙋщю въ чернѣчествѣ, прїѧ столъ его сн҃ъ его первы Володимеръ. И въста на нь ꙗзыкъ оугорьскїи, и плѣниша емꙋ люди и би сѧ съ нимъ, и ѡдолѣша емꙋ в тъи го(д). И мнѣ сꙋщю въ сѣчи тои. И ако разгониша ны оугры, побѣже на(с) .н҃. ѡдинны(м) пꙋтемъ. И погнаша нї оугры. И нача ми конь слабити и  ѡставати. И възпи(х) велми: Ги҃, бг҃ъ хр(с)тиꙗньскъ, мл҃твами великаго мч҃нка Геѡргїѧ избави мѧ”. Пакы р(ч)е: „Ст҃ыи Геѡргїи, твоимъ имене(м) прозвалъ мѧ есть попъ въ ст҃мъ крщенїи твои есмъ рабъ, помози ми и избави мѧ в сїи ча(с) ѿ поганы(х)”. И в то го(д) пропаде сѧ нога коню в землю, преднѧѧ съ десныѧ страны, и преломи сѧ. И ѿбѣгоша ѿ мене дрꙋжина. И бѣ лесець малъ близъ и долъ. И напрѧгъ рожанець и стрѣлы в рꙋкꙋ дръжа, побѣго(х) ѿ конѧ къ долꙋ. И ѡзрѣв сѧ, оузрѣ(х) оугры къ коню текꙋща. И реко(х): "Ги҃ lс҃е Хе҃, помилꙋи мѧ, и посли оугодника своего мч҃нка Геѡргїѧ да мѧ покрыстъ и съблюде(т)
в сїи ча(с)".

И ꙗко изреко(х) слово то с плачемъ, и ѡбрѣте сѧ оу мене конь мои, цѣлꙋ ногꙋ имѣѧ. И оугры въслѣдъ его текꙋща и хотѧхꙋ ꙗти его. И не можахꙋ  приближити к немꙋ ни единъ ихъ. И реко(х): „Слава тебе, г҃и, ꙗко не далече еси ѿ тѣхъ, иже тѧ призываю(т) всѣмъ ср(д)цемъ, и великїи  Геѡргїи бꙋди со мною”. И въсѣдо(х) на конь мои. И погнаша мѧ оугры, и стрѣлѧше мѧ стрѣлами многами и не полꙋчиша мѧ.

И силою Хв҃ою и помощїю ст҃го Геѡргїѧ в томъ часѣ бы(х)оу вѣси моеѧ. Бѣ же ѿ того мѣста,  идѣже мене стрѣлѧща, .г҃. дн҃и пꙋть вдале. А ѿ дрꙋжины моеѧ прїидоста въ дрꙋгыи дн҃ь по мнѣ, а иныѧ бѣ постигали, избиюще.

И потомъ пакы повѣдаша воинꙋ. Кн҃зь оуслыша оугры идꙋща. И лежащю ми в нощь въ клѣти  своеи с подрꙋжїе(м), приде ко мнѣ во снѣ мꙋжъ голооусъ, свѣтелъ. И не можа(х) на лице его възрѣти. И р(ч)е ми: „Ити ти, Геѡргїе, на воинꙋ, кꙋпи собѣ инъ конь. Тъи бо конь, ше(д) с тобою .г҃. дн҃и и напрасно оумреть. Нъ заповѣдаю ти да ѡдереши емꙋ ногꙋ, юже бѣ преломилъ, да видиши силꙋ престыѧ тр(о)ица и помощь ст҃го Геѡргїѧ. И еже тꙋ ѡбрѧщеши на нозѣ тои, не мози никакꙋю же сътворити потребꙋ, развѣ ч(с)тнаго кр(с)та, и млъчи дондѣже оузриши славꙋ б҃ію”. И реко(х): „Ги҃, кто еси, им же не могꙋ възрѣти на лице твое”? И р(ч)е ми: „ Азъ есмъ рабъ Хв҃ъ, егоже молѧ, призываеши Геѡргїа”.

И въставъ ѿ сна, прослави(х) ст҃го Геѡргїѧ. Ꙗкоже ми заповѣда ст҃ыи, кꙋпи(х) инъ конь. Двѣма бо конема воева(х). Ꙗко бы поити на воинꙋ, призва(х) попа и сътвори(х) ст҃ꙋю слꙋжбꙋ. И заколо(х) волъ, иже бѧше дорожїи, и ѿ ѡвець и свинїи по десѧтерꙋ, и раздаꙗхъ нищимъ. И поидо(х) на воинꙋ. Идꙋщимъ же намъ, въ третіи дн҃ь разби сѧ конь, и па(д), издъше. И начаше дрꙋжина тоснꙋти сѧ и не дати ми  ѡдрати. Да ꙗко исповѣда(х) имъ, како преломилъ и пождаша ча(с), да же ѡдра(х) ногꙋ тꙋ. И ѡбрѣтохомъ на неи, ниже колѣна долꙋ, три ѡбрꙋчи желѣзны. И кость не въпрѣкы бѧше разломила сѧ, нъ на по(д)линꙋ раскѣпила сѧ. И тако дръжахꙋ ѡбрꙋч ты твердо и много понꙋждахом сѧ да быхомъ снѧли тако. И ѿрѣзавши кость тꙋ, и на камени положивше, и топоры избивше на дробно. Ти так възмогохомъ ѡдва ѿꙗти желѣза. И чюдивше сѧ велицѣи силѣ ст҃ыѧ тр(о)ца и помощи скорѣи великаго мч҃нка Геѡргїѧ, и прославивше бг҃а, идѣхомъ на воинꙋ тꙋ. И мл(с)тію бж҃їею елико на(с) иде, ни единъ же погыбе в рати тои, но вси здрави и цѣли възвратихо(м) сѧ.