Свободивь же се царь ѿ приключаюштихь се бѣдь навѣрныхь прїиде вь Ѳракїю и ѿ тоудоу сьниде сь Солоунь поклонити се светомоу великомоу моученикоу Диомитрїю. и остави тоу вь Солоунѣ воеводоу избранна сь силою многою. противлэти се Самоуилоу начелникоу бльгарскомоу. царь же прїиде вь Иверь понѥже сумрьль бѣ ... Давидь начелникь ѥго. и ѿтоудоу ѿиде вь Константинь градь. наслѣдникь же бысть Иверскои странѣ ... и постави кнеза надь ними Георгїа брата Давидова ... Сына же ѥмоу вьзеть талца. и ѿтоудоу прїиде вь Финикїю оумири вь кнезе тѵрскааго и виритскаго и дамаскѵнскаго и триполскаго и оустрои сихь не плѣновати ... Антїохїю нь паче повиновати се римлꙗномь. вьзет же талце и ѿ сихь вьсѣвь вьзвратише се. и сице оубо сїа быше.
бльгарскыи же начелникь Самоуиль не тьчїю Ѳракїю и Македонїю плѣновааше и погоублꙗше. нь и Елладоу и ть самыи Пелопонесь. и посла царь кнеза собор на западнеаго Нїкѵфора нарицаемааго небо. иже пришьд обрѣте Самоуила лежештаго сь бльгарскою воискою близь рѣкы нарицаемые Сперхїа. и пришьд небо Никифорь паде сь воискою об онь поль рѣкы. и занѥ бысть тогда дьждь велїи ... надѣаше се Самоуиль ꙗко не хотеть судобь прѣти рѣкоу грьци. воевода же небо ноштїю изобрѣте броды и прѣходишта рѣцѣ и прѣиде таи безмльвнѣ сь воискою. Самоуилоу же лежештоу ѿраднѣ. вьнезаапоу нападе на нь воевода небо. и ... оубоавше се бльгаре начеше ведми бѣжати. ни малаа не сьпротивльше се. римлꙗне же сихь сѣкоуште вь малѣ хотѣхоу вьсхытити Самоуила и сына его Романа. суꙗзвише бо и сихь нь лекаахоу облїани крьвїю и сице оутаише се ...
по сихь же воинствова царь на бльгары. и соуштее грады окрьсть Сардикїе разори. и вьзврашт се прїиде вь Мосїнополь. прѣет же тогда царь великоу прѣславноу Иверїю и малоую ... самь бо Добромирь прїиде начелникь ѥе и прѣдасть се цароу. срьпчишта же ноуждею прѣеть. и Николица начелника срьпчишта прѣеть царь и почьте патрїкїемь. Николиць бо царицаахоу сего понѥже бѣ маль вьзрастомь велми он же вьзврашт се пакы бѣжа кь Самоуилоу. и пакы воинствова царь на Бдинь и прѣеть сего. и дондеже прѣемааше царь Бдиннь прїиде Самоуиль вь незаапоу на Адрианополь и ... обрѣте трьгь великыи сьбрань. и плѣни чловѣкомь имѣнїа вьса и плѣнникы ѿведе. царь же прѣемь Бдинь и вьзврашт се гредыи ѿоудоу обрѣте Самоуила обитаюша сь воискою на рѣцѣ ... Вардары ... и понѥже бѣ рѣка велїа зѣло и сьмоуштеннаа. свобождьше се бльгаре падоше расточени не надѣюше се ꙗко хотеть прїити римлꙗне. царь же пришьд таи обрѣте броды и прѣиде. и многые ѿ бльгарь изби. Самоуил же оубѣжа. имѣнїа же ихь и станишта римлꙗне вьсхытише. прѣет же царь и Скопїе не ноуждею нь прѣдасть сїе Романь сынь Петра бывшаго начелника бльгарскааго. вѣрова бо Самоуиль Романа и постави сего начелника Скопїю. он же прѣдасть Спокїе цароу.
царь же вьсегда бльгары приходе плѣновааше и озлоблааше ... сихь. начелник же ихь Самоуиль не могыи противити се римлꙗномь. ноуждею сьтвори елико можааше и изри прьсты на поутехь и затвори сихь ... и постави стражїе оны. понѥже крѣпцѣ сьпротивлахоу се бльгаре соуштїи на поутехь онѣхь ... и посла воеводоу своего ... проити инѣмь поутемь и провести цара. пришьд же воевода онь и многые отьзе обходе вьпаде ... вь страхоу бльгарскоую. и сего видѣвше стражници начеше бѣжати. и сице обрѣтше римлꙗне поуть вьнидоше. и царь вьшьд самь и многыхь изби дроугые живѣхь ѥть. и сь ноуждею велїею бѣжавь Самоуиль спасе се. бѣ же числомь вьсхыштенныихь тоу бльгарь в҃і тысоушть. и дьсе множьство оно царь Василїе ослѣпи. ослѣплꙗаше бо рҁ҃ѳ. стоштаго же оставлаше сь ѥдинѣмь окомь водити рҁ҃ѳ онѣхь. и сице ослѣпи вьсѣхь в҃і тысоушть онѣхь. и посла сихь кь господиноу ихь кь Самоуилоу. и видѣвь сихь Самоуиль и не могыи трьпѣти прѣизештноую страсть и безмѣрноую скрьбь паде се из немогь и мало врѣмена прѣбывь оумрѣть. царство же бльгарское прѣеть сынь его Гаврїиль нарицаемыи Романь. и ѥдино лѣто прѣбывь оуби сего ... братоучедь ѥго Владиславь Іоаннь Аароновь сынь. прѣшьд же царь оузокые и жестокые поути оны ꙗкоже прѣжде рѣхомь. вьниде и прѣеть многые страны и грады бльгарскые. сынь же Самоуиловь Романь ... вь Мосинополи сыи посла обѣштанїе кь цароу поработити се семоу. слышавь же царь ꙗко Самоуиль оумрѣть. вьшьд и дроугые страны и грады бльгарскые. по малѣ же врѣмени ... прїиде Іоаннь нѣкто рабь Владиславовь и рече да вѣси о цароу ꙗко сынь Самоуиловь оумрѣть. мои же господїнь Владиславь царство прѣеть и хоштеть поработити се царствоу твоемоу. прїидоше же и дроузи кнези бльгарски и прѣдаше се цароу. послѣд же ꙗви се льжь Владиславь и не прѣдасть се. и се видѣвь царь пакы ноинствова на бльгары. и многые страны плѣни. Ахридь же ... обстоупив и ноуждею прѣет сего. и воеводы его дроугые грады прѣеше. и сїа сьтворь вьзврати се вь Константинь градь.
Не прѣстае вьсегда озлоблꙗти бльгары и грады ихь прѣемае ... Владислав же начелникь бльгарскыи воинствова на Драчь. и обстоупивь сего прѣети оубїень бысть тоу. тьчїю двѣ лѣтѣ и е҃ мѣсець бывь начелникь. се же оувѣдѣвь царь абїи прїиде вь Адрианополь. и тоу прїидоше водшїи кнези и прѣдаше се семоу. и прѣдаше ѥмоу градь глаголѥмы Перникь и прочїихь ле҃. и дроузи мнози ѿ варварскыхь езыкь прѣдаше се томоу цароу. и царица бльгарскаа нарицаемаа Марїа жена Владиславова посла архїепископа бльгарскааго Давида ... прѣдати бльгарскоую страноу вьсоу цароу.
Библиотека на Руската академия на науките, Санкт Петербург, № 24.4.34