Мъчение на св. Уар

(л. 203а) Маѯимїаноу м(ч)телю ⸱ злочьстиво и по всеи ѿ ноу(д) вьселѥнѣи иꙁложшоу ꙁаповѣданїе ⸱ пославшꙋ же и иже по єгӱптоу кнеѕемь ⸱ ꙗко или вьсѣмь иже вь нѥмь хр(с)тїанѡ(м) скврьнныи(х) въкоушати жрьтьвь и своее ѿмѣтати се вѣри . или раꙁличними моуками и истеѕанми житїа прѣмѣнꙗти се . и мноѕѣмь о семь вѣрныимъ сьшь(д)шим се ⸱ и ѡ вѣмь оубо юже ѡ хѣ сьмрьтъ блгославнѣ приемлющимь ⸱ ѡ вѣм же въ тьмнице и ꙋꙁы ѿпоущенѡ(м), гладем же и жеж(д)ею дрꙋчимомь . Мꙋжь нѣкыи ѿ иꙁбранныи(х) Егӱптьскыхъ ⸱ много ꙋбо достоинь маѯимїанꙋ ⸱ мнѡго(ж) и самомꙋ воинствꙋ ⸱ Страшень на и паче ратникѡ(м) ⸱ оуарь именемь ⸱ родѡ(м) нарочить⸱ славою вьꙁорнь ⸱ добродѣтѣлїю прѣсловꙋщь, ѡ таи вь всѣ(х) нощехъ въꙋꙁ(д)иши ѿходе ⸱ ѡво оубо прилежанїа спо(д)блааше мꙋже ⸱ ѡво же и ѡнѥмь млтвꙋ творити молꙗше, ꙗко равнь ѡнѣмь и томоу подвигь сьвръшити ⸱ боꙗше бѡ се и єще

(л. 203б) ѡбьꙗвлѥнь быти вѣрою ⸱ Ꙁа еже ꙁастꙋпникѡ(м) нечьстїа ꙋбїистьвнѣ нѣкако дыхати на блгочьствꙋющее и неистовнѣ. и их же аще ѡбрѣщоуть хр(с)тїаны ⸱ ѡвѣ(х) оубо огню ⸱ ѡвѣх же морꙋ ⸱ ѡвѣх же и ннѣмь моукамь и сьмрьтемь прѣдаати . Елма оубо вьꙁвѣщено бы(с) кнеѕꙋ ⸱ꙗко и нѣцїи ѿ иже, въ поустынꙗхъ живоущи(х) вѣрныи(х) ⸱ ѿ слоугь нечьстїа єти быше . порадовав се вьꙁвещенїю, ѡ вѣмь оубо по настоещомоу вь тврьдѣ тьмници ꙁатворенѡ(м) быти повелѣ ⸱ мꙋчителные же сьсꙋди послѣж(д)е ꙋготовати ⸱ и тѣ(м) вьве(д)номь быти на испитанїе ⸱ Въ оуши ꙋбо блаженомоу оуарѹ вещи прищь(д)ши ⸱ имѣнїа настоещїи тьмници подавь, нощїю въниде кь стыимь мꙋжемь ⸱ и раꙁ(д)рѣшаеть тѣ(х) ѿ ꙋꙁь ⸱ и ꙁимает же и ногыи(х) ѿ дрѣва. ꙋспокоенїа же спо(д)бивъ и пищоу приети оустроивъ ⸱ вь всѣ(х) ѡсмїихь днехъ беꙁ пище ꙋже прѣбывшимъ, падь прѣ(д) ними молѣше(с) ⸱ млю се вамь глѥ пр(с)нїи

(л. 204а) рабы хви ѡ мнѣ ба помлите, тоеж(д)е вамь спо(д)бити и мене чести ⸱ и дати ми трьпѣнїе противоу лютыимь ⸱ рабь бѡ єсмь и аꙁь хвь и стхь его ⸱ нь ме раꙁличное и лютоемоу камь и сꙋдїамь жестокое въ срѣдоу привести себе хотеща, ѿводить и страхованїе въꙁлагаеть ⸱ Помолите се ꙋбо о мнѣ стїи мꙋченици помолите, въ ꙋтрѣ оубо вы о ги скончаваете се . Къ симь стїи ⸱ никто(ж) рѣше оуаре брате же ти вь радости можеть, аще не вьꙁимѣ прьвѣе стѣмена вь врьжетъ ⸱ и иже ѡ нихь по(д)иметь трꙋдь ⸱ по(д)бнѣ же и страдалць не вѣнчавает се, аще не прьвѣ ꙁаконнѣ постраж(д)еть ⸱ греди ꙋбо брате сьпоутникъ намь бꙋди, и сьврьшень воинь хвь ⸱ имами бѡ оного о нѥмже мꙋкы приемлѥмь, члколюбнѣ на(с) и сьвыше ꙁастоупающа ⸱ и многꙋ неꙗвлѥннѣ подающа помощь ⸱ Сїа стымь иꙁ главшимь, прїидоше нѣцїи ѿ воинь приве сти тѣхь повелѣни бывше кь кнеѕꙋ ⸱ иже и блаженаго ꙋара ꙋꙁрѣвше ꙋногоу

(л. 204б) лежеща м(ч)никѡмь ⸱ и ꙗко оудивлѣшем се ѡновѣмь тѣмь ꙁрѣни ⸱ и сего ради члко любїа словеса еже мнѣти се приносеще, неистовишили се глаше кь нѥмоу члче; не боиши ли се вьсако да не оувѣдѣнѣ быши игемонꙋ вещи, сь воиньскымъ санѡмь погоубиши и животь ; Къ нимже блаженыи ⸱ бꙋди мнѣ хр(с)тїа ниноу ре(ч) сьврьшенꙋ ѡбрѣсти се ⸱и стыимь симь сьстрадалникꙋ же и ськровникꙋ ⸱ оувѣщавает бо ме дрьꙁати кь вамь дроу(ж)ба, и ничто(ж) ѿ иже ꙁде глѥмы(х) или дꙗемы(х) ꙁаꙁрѣти ⸱ Симь сице ре(ч)нѡмь, воини стые шесть сꙋще число(м) седмь ꙋбо вси бѣхꙋ . достѣже єдинъ въ пꙋстыни ѹмрѣти ⸱ свеꙁани веригами кь игемонꙋ привож(д)аахѹ . он же на высоцѣ оубо сѣдѣше прѣстолѣ ⸱ ѡбъ стоаще же мнѡжьство воинъ ⸱ того словесемь иманїю вьсако приготовлѥнѥ ⸱ Повелѣ ꙋбо сьвлѣчены соуще вьводити стые ⸱ и абїе ꙋбо какова рѡда въпрашаше ⸱каковы же чьсти есте ⸱ кааже вамь соу(т)

(л. 205а) имена ⸱ и ѿвѣтьвь скорѣ прошааше ⸱въ ꙗꙁирателныи бѡ вамь кльноу се ре(ч) соудь. вь великоую боговь силоу ⸱ ꙗко и єще живѣ(х) соущи(х) ва(с) ѕвѣрѣ(м) и ѱомь на снѣ(д) прѣ(д)ложꙋ. стїи же ничто(ж) ни противоу грьдомоу ѡбраꙁа ⸱ ниже кь жесточьствоу словесь оубоꙗвше се ⸱ намь ѡ сꙋдїа рѣше, ѿчьство на земли ни едино же. Странны бѡ мы вь истинꙋ есмы и пришелци. ѿчьство(ж) хр(с)тїанѡмь истинное и градь, на нб(с)ѣхь сьꙁдань ѥ(с)⸱ Сїа вѣроу и намь сице имѣти, ѡ твоих же прѣщени(х) мало попеченїе . паче же и вь млтвѣ вещь творимъ ⸱ не даже до словесь сьстаноути твоемоу прѣщенїю ⸱ нь и вь дѣло иꙁыти ⸱ Сице бѡ и намь любовь ꙗже кь хоу ꙗвѣ боудеть ⸱ и самь поꙁнаеши въсако, каковы ѿ нѥго полꙋчаемь помощи . Таковаа стымь иꙁглавшимь ⸱мꙋчитель кь сѣдещимь сь нимь ѡбращ се єдиноре(ч) и тож(д)е имоущи(х) поꙋченїе ꙁлочьстные сїе ꙗко ѿ сьглашенїа ꙁрꙋ ⸱ раны оубо тѣ(х) и ꙗꙁвы ѡбилнѣ да прѣемлю(т) .

(л. 205б) Ꙗко же биеми оубо ѕѣлнѣ ничто(ж) ѿвѣщаваахоу, соудїа навож(д)аше вь прошенїе сице рекь ⸱ иже наи паче искомыи седми ѿ ва(с) где ѥ(с). Семоу ре(ч)нꙋ бившꙋ абїе текомь ѿ народа оустрьми се доблѥстьвныи оуарь ⸱ и ставь посрѣ(д) гла кь игемѡноу. Онь оубо ѿ многа житїе прѣмѣни ⸱ мене же наслѣдника своимь ѡставѥ(л) е(с)⸱ аще оубо онь что дль(ж)нь е(с), вьꙁдати аꙁь придо(х)⸱ Слыша кнеѕь и вьсь ꙗрости испльни се ⸱и кто сь є(с) и котора(г) чина, воини да глю(т) ре(ч). Ꙍни же ⸱ чина оубо иже ѿ тїань ⸱ воин же ѥ(с) и ѿ ꙗвлѥны(х) ѿвѣщаше . и кнеѕь оуꙗꙁви се ѡ семь, кыи те лоукавыи бѣсь вь бѣдꙋ рече сице ꙗвлѥно себе вьринꙋти сьтвори ⸱ ꙗко и настоещаго прѣславна(г) воинства сань ⸱ и ꙗко(ж) ѿ ѡнꙋ(д) питателства ни въ что же положи(т)⸱ и толицѣми свою дшꙋ ѡбложити лютими . и блаженыи ⸱ хлѣбь рече иже сь нбсе сьшь(д)шїи ⸱ и бж(с)твноую чашоу чъстные крьве ха га моего, паче же твои(х) прѣ(д)почьтохь чьсте иже

(л. 206а) и ѡбрѡкь ⸱ и славоу приснопрѣбивающоую, ѿ текꙋщее ⸱ и жиꙁнь непрѣстанноую, ѿ нетлѣнные и врѣмѣнные .Та же ꙗвлѥнь о страсти бивь сꙋдеи, вьꙁрѣвь на стые въ мнѡ(ж)ствѣ метежи и горести дше ⸱ свѣ(д)тель ре(ч) великы(х) богь сила, ва(с) прьвѣе вьꙁлыи(х) ѿ имꙋ ѿ житїа ⸱ таковаго мене ѡ тѣщивши(х) воина ⸱ ваше бѡ ѥ(с) сїе а не иного кого . М(ч)ници же ни вь что(ж) словеса его твореще ⸱ мало рѣше (пожⷣи) ѡ сꙋдїа ⸱ и орꙋжїа ннꙗшнꙗго воинства какова соуть раꙁꙋмѣеши ⸱ кь аггльскомꙋ бѡ чинꙋ мꙋжа сего прѣведохѡ(м). Семоу ре(ч)нѹ бывшоу ⸱ ѡвь оубо ꙋвѣщавати начинати стые сьложити се нечьстїю, и жрьтвꙋ соуетныи(м) принести сꙋетныи велѣше ⸱ они же, ниже слѹ(х) вьсако подающе того гломъ, въсприношаах(ꙋ) ⸱боѕи глюще иже нбсе не ꙁемлѥ не съ творише, да погыбнꙋть . Съ ними же и блженныи оуарь болшїи гнѣвъ вьжигае кь сꙋдїи, что вещи подаещи

(л. 206б) глаше неповинныи(м) ⸱ боуа глѥ и ни вь что(ж) потрѣбна ⸱ боу и бѡ рече бꙋаа вьꙁглѥть ⸱ исаіа великыи тебѣ сїа глѥ(т) а не аꙁь ⸱ та(ж) и ниже вьꙁрѣти кь тѣ(м), ниже въ словеса прїити вьса помогыи . сїа слышавь ѡнь, нектомꙋ оудрьжимь бѣ ⸱ нь ꙗрости множаишее исплънив се, на дрѣвѣ оубо оуара ѡбѣсити велѣше . кь стыим же⸱ аще ваши(м) ре(ч) съпротивлѥнїемь побѣж(д)ено боудꙋ, ѿврьжень вьсако и боговь слꙋжбы боудꙋ ⸱ Сице крѣпко нѣкако и силно є(с) истина ⸱ и немощь мнѡжицею ѡбличающи дшевнꙋю, носити тоѥ свободоу нємогꙋще . х(с)ви же мченици, искꙋси ѡбаче свою силꙋ рекоше на сїемъ нашемь братѣ ⸱ и аще сего лꙋчши ꙗвиши се, тогда не гли и ѡ нась блгыи имѣти имаши надеж(д)е ⸱ Кь симъ сѹдїа стїимь оубо лютѣишаа вьꙁпрѣтивь, сь дрѣва сьнети повелѣваеть м(ч)ника ⸱ и ꙗко(ж) неволно не пщевавъ кь таковомоу блгородномоу м(ꙋ)дрованїю

(л. 207а) и противлѥнїю дшемꙋ коусїю, ременми сꙋровѣми рече по ꙁемли протегнꙋвше би(т)⸱ Таже четырми влѣкомоу дрьколми де(б)лѣми съкроушити и ранамь триты ⸱ Доблѣстьвнѣ оубо лютаа сїа трьпестрадалць, кь стымь ѡбращ се вь оуслы шанїе всѣмь, бл(с)вите раба вашего рече стїи ѡци бл(с)вите ⸱ помолите се еже ѿ га вьꙁможнꙋ ми бити и ꙁастоупити ме того десницею ⸱вѣсть бѡ ть члчь скоую немощь, иже и ѡблѣщи се вь ню иꙁволивы ⸱ и рекь ꙗко дхь бьдрь пль(т) же немощна ⸱ Стїи же ѡци роуцѣ на нбо вьꙁдѣвше, бь рѣше бь силамь ⸱ ть да послет ти силоу ⸱ сьвише ⸱ и да вьꙁложить на главоу твою шлѣмь спсенїа и риꙁою ѿмѣщенїа одѣетꙿте ⸱ роука его да ꙁастоупиттꙿе ⸱ и мищца его ѹкрѣ питтꙿе ⸱ Свѣтла(ж) пода(с) на сьпротивна(г) побѣдителнꙗа ⸱ Въꙁ(д)вигни се ꙋбо вьꙁ(д)ви гни се ⸱ одѣи си крѣпостїю мышце твоее, ѿ бж(с)твнаго семꙋ писанїа оучимъ ⸱ и вѣды каковь намь съвише

(л. 207б) прѣ(д)стоить помощни(к)⸱ и каковѣ(х) блгь наслаж(д)енїе ѡжидаеть, им же єго ради сїа страдати прониꙁволивши(х) . хвь же м(ч)никь на то лицѣ биемь ⸱ ꙗко(ж) ѡщꙋти вь сьвышнѥе роукы помагающь, вь радости дше рече кь стїимь ⸱ ни едина же печаль вь ваша давь ходить ср(д)ца ради на(с) ⸱ себо блгоꙋвѣщаннаа ваша млтва ⸱ жестокое мꙋкамь вь гладкоую ⸱ и ѡпечалꙗющее въ ѡслабоу прѣтвори. и толико, єлико ниже ꙗꙁви намь ѡщꙋщати . По сихже оувѣщавати м(ч)тель начинааше пакы ⸱ и кь ѿврьженїю влѣчаше страдалца блгаа емꙋ ѡбѣщавае ⸱ и самые юже даже до толѣ по(д)еть моукы, не ѡного нь хви м(ч)никы виновны творе . и ꙗко(ж) ꙁрѣше стго смѣюща се паче его кьꙁни и ꙋхищренїю, еще мнѡжаишꙋю ꙗрѡ(с) раж(д)егь, нам ꙋчителнѣ(м) дрѣвѣ и пакы повѣсити повелѣваеть оуара ⸱ и ноктми желѣꙁними стрꙋгати ⸱Елма же м(ч)ничю стрѹжемꙋ телеси, мнѡ жаишее пльти на ꙁемлю ниꙁпадаахꙋ.

(л. 208а) и ꙗко(ж) тамо ꙁемлꙗ крьвїю ѡброщааше се. благыи ꙋбо оуарь ꙗко ничто(ж) страж(д)етихь бѣ ⸱ стр(д)ааше стхь лютѣ дша ⸱ и ꙋтробы тѣ(х) болѣꙁноваахꙋ ради єдинодшнааго ⸱ тѣмже и соуровство несьтрьпѣвше сꙋдїино . Что же нераꙁꙋмѣеши рѣше, и ѕвѣреи самѣ(х) сперѣпѣишїи ⸱ Ꙗко и каменїе и желѣꙁо постра(д)ли быше ꙋбо толико ꙗꙁвами; ть же и тако не оумекче(н) бѣ ⸱ и ꙗко(ж) вь роуганїе вещь полагае, хс вашь рече пришь(д) ѿ моею того иꙁметь роукꙋ. не вѣди несьмысльныи ⸱ ꙗко еже сїа мощи трьпѣти великодꙋшнѣ, ꙗвлѥнїе бѣ ꙗко и прихож(д)ааше ѡнь и изымааше. и юже ѿ нѥго росꙋ, исцѣлѥнїе дааше болѣꙁнемь . блаженыи же и строужнъ(м), не бꙋди мнѣ рече мꙋкь сихь врѣменныи(х) прѣмѣнити се ⸱ нь ожидающи(х) мои да иꙁмет ме хс ⸱ тебе же и твое сꙋровство таковѣмы до(с)инѣ ѡсꙋдить ⸱ Сїе слово дѣломь вьꙁдавае сꙋдїи, стрꙋгы на м(ч)ничю наношааше ꙋтробꙋ ⸱ да ꙁрить глѥ прѣ(д) ꙫчима своима проклетїи ꙗко(ж) водꙋ

(л. 208б) своа иꙁливаема вьноутрьнꙗа . нь хва м(ч)ника, ниже мꙋкы сее горесть, ослабити что ѿ еже стра(д)ти ради ха ꙋстрои ⸱ниже гль провѣщати недоблѥстьвнь ⸱ ни ино что мало или велїе обинованїа дѣло покаꙁати ⸱ раꙁвѣ и болшее паче еже кь хоу расплалꙗше раченїе ⸱ и противоу лютыимь мꙋкамь, и лютѣишими сѹдїю ударати твораше ѿвѣти ⸱ Ты ѹбо рече лꙋкавне лꙋкавныи(х) бѣсѡвь слꙋжителю и члконенавистне ⸱ и ѕѣлѡ блгиимъ сьпротивниче, иꙁети равно вьꙁможеши вьноутрьнꙗа . моего же ср(д)ца ꙗже вь ха вѣра, не крадома бꙋде(т), и неѿмлѥма . Стїи же м(ч)ничю ꙋтро боу растрьꙁаемоу же и на ꙁемлю сице, раꙁкѣваемꙋ ꙁреще ⸱ члкѡлюбнѣ(ж) и ѕѣло болѣꙁньннѣ просльꙁивше, ха ѡ нѥмже сїа стр(д)ааше помощника приꙁиваах(ꙋ)⸱ на нимже вьꙁведь ꙫчи соудїи ⸱ и члкѡлюбїа или паче братолюбїа видѣвь ꙁнаменїе юже вь ꙫчию сльꙁы ⸱ и ꙗко(ж) нѣкые исплъни все сладости, побѣж(д)ени

(л. 209а) бистре ре(ч) въсако с(ъ)вьплѥмь побѣж(д)ени бисте ⸱ и семоу ѹкаꙁанїе, многоѥ сїе скрьбѣнїе и сльꙁи ⸱ Аще бѡ би ре(ч) могль вашь бь баснословимоую сїю вамь бесьмрьтиꙋю жиꙁнь подати, чесо ра(дї) сице ꙁлѣ погыбаꙗщаго дрꙋга вашего плачете се . Они же кь нѥмоу ⸱ Сльꙁные сїе каплѥ, е(с)стьвное вьꙁвѣщають милованїе . Елмь никогда же мы нравомь брата въсплачем се, таковое оꙋмирающа сьмрьтїю ⸱ паче же и блженаго того ѡ таковѣи кончинѣ въмѣнꙗемь и ревнѹемь ⸱ ꙗко врѣменною сею мꙋкою, пр(с)нопрѣбывающеѥ цр(с)тво приѡбрѣте ⸱ не того ꙋбо ꙗко же рѣхѡ(м)⸱ нь тебѣ паче рыдаемь о погибѣли ⸱ но ихже хощеши наслѣдовати люты(х) вьꙁданїи ⸱ хвь бѡ е(с) ꙁакѡнъ и ѡ ва(с) враѕѣ(х) сльꙁити, любовныимь ꙁакѡнѡ(м) и благостїю . Въ єлицѣ же сїа глаахꙋ се, стые оубо и пакы тьмница приемлꙗаше ⸱ доидеже сѹдїи расмотрить каковымь мꙋкамь тѣ(х) прѣдасть ⸱ Блжены же оуарь на дрѣвѣ бѣше и еще висе, сице бѡ бѣ

(л. 209б) повелѣно доидєже испюустить дшоу ⸱ ꙗко(ж) оубо стїе ꙋꙁами и стражи кь тьмници ведомы ꙋꙁрѣ, велїемь гласѡ(м) дрьѕаите рече оци мои дрьѕаите, ꙗко ни вь что(ж) аꙁь вьмѣнѣю наводимые ми мꙋкы ⸱ нь моемоу ме х(с)оу приложите и спсꙋ. и надѣе се поидоу къ нѥмоу, вашими млтва(м) сьхрнꙗемъ ⸱ На петь оубѡ часовь въ моуцѣ сы прѣтръпѣвь, сь миромь дхь давшомоу бꙋ прѣдасть ⸱ И еще(ж) жива того иже на(д) мꙋками мнеще, ниже прочее оставлꙗах(ꙋ)⸱ нь врановь нравъ и по съмрьти мꙋчаахꙋ ⸱ Елма же и тѣмь и м(ч)тлю ꙗвѣ бы(с) ꙗко ꙋарь ꙋмрѣть, тѣлѡ его мрьтво сьневше и по срѣдѣ града влѣкше, ѱѡмь ѱи на сьнѣдь прѣда(ш). и ꙋарь ꙋбо сицевь обрѣте конць, и тако ѕѣлѡ блжене въ ꙋтрѣ иже м(ч)никы мꙋчитель прѣ(д)ставль ⸱ Елма ꙋвѣщати немощнь бѣ, хотѣше бѡ ⸱ и все твораше побѣдитель ꙗвити се, еже прѣтворити иже сице тврьдые ⸱ по мнѡгы(х) и раꙁличныи(х) мꙋкахь, мьчною тѣ(х)

(л. 210а) осоуж(д)аеть сьмрьтию ⸱ и оубо м(ч)никѡ(м) съ сладостїю и оусрьдїемь скончашвшим (с)е⸱ Сщенны стѣ(х) мощи нощїю хр(с)тїане нѣцїи вьꙁьмше ⸱ прп(д)бнѣ вь нарочитѣ мѣстѣ положише . Жена же нѣкаа ѿ иже на единого ба ꙋпованїе положивши(х)⸱ ѿ палестинскые сꙋщи ꙁемлѥ ⸱ клеопатра тои име страж(д)оущоу мчникꙋ оуара блиꙁь нѣгде сꙋщи ⸱ и горкые ѡни мꙋкы ихже по(д)еть ха ради ꙁрещи, тешцѣ оубѡ ср(д)цемь съдраꙁааше(с) и лютые испльнꙗшаше(с) печали ⸱ молꙗше же ба постомь дрꙋчещи се ⸱и млтвою, свои ж(д)рѣбїи, ѡ вьꙁванїи ѿ ꙁлыи(х) посѣтити . та своего сна пръвїи имоуща вьꙁрасть, съ инѣми нощїю поемши ⸱ и иде(ж) тѣло мⷱника поврьжено бѣ пришь(д)ши, того вьꙁемлѥть ⸱ аромати же мно(г)цѣнны(м) помаꙁавш(ї)и ⸱ и свѣтлыими одеж(д)ами одѣавши ⸱ и понѥже на чьстїа бꙋра ѡдрьжаше ⸱ и прѣвише главы въꙁдвиѕаахꙋ се лютаа ⸱ въꙗвлѥнѣ боещи се

(л. 210б) проиꙁвести блгочьстїе ⸱ по(д) своимъ одро(м) ꙁемлю елико доволно бѣ ископавши, чьстнѣ того полагаеть ⸱ Свѣт же неоугасаемь томоу вьꙁжигающи ⸱ и кадыли ꙗко(ж) имѣаше подающи чьсть ⸱ Врѣменем же послѣж(д)е идолскомꙋ нечьстїю ꙋвѣдающꙋ ⸱ вь ꙋмѣ приеть тоу(ж)доую ꙁемлю ѡставити, и вь ѿчьствѣ пакы быти ⸱ Елма же немощно бѣ и тѣло прѣнести м(ч)ника, аще не пръвѣе скажеть игемонꙋ ⸱ и ꙗже о себѣ добрѣ вьса ꙋстроивши съ нѣкыимъ иже вь вѣтїахь написаныи(х) иже на мѣстѣ томь вл(д)чьствꙋющомꙋ приходить ⸱ и мѹжа имѣнїе(м)ъ оумытивши, молꙗше даровати еи мрьтва(г) иꙁношенїе . Кто же ѥ(с) мрьтвьць и кыи ѡбраꙁь сьмрти его скаꙁꙋющи, своего глааше мꙋжа иже вь воинствѣ прьваа имѣвша ⸱ Свѣтла же и ꙗвлѥна мнѡжицею ꙗже на ратникы поставльша оуделѣнїа ⸱ и мнѡгы(м) иже о ниѥмь оукрашена бывша храбо(с)ти,

(л. 211а) житїе ꙁде прѣмѣнити ⸱ ниже погребенїа по(д)бающаго спо(д)бльша се ⸱ Сего ре(ч) аꙁь тѣло тьщанїе ннꙗ полагаю, кь своемоу ѿчьствꙋ прѣнести ⸱ Повиноует се ꙋбѡ иже ѡбласти кнеѕь кь прошенїю ⸱ и творити еи настоещее повелѣваеть ⸱ ѡна же ꙋбѡ свое(г) мꙋжа тѣло житїе вь тѹ(ж)деи странѣ мнѡгомь прьвѣе раꙁоривша, гробоу прѣдаеть прьсть посипавши . М(ч)нка(ж) тѣло вьꙁьмши ⸱ мӱром же помаꙁавши пакы ⸱ Свѣтлѣише же ѡдѣавши ⸱ и ꙗко да не боудеть комꙋ сїе ꙋвѣдѣти ѿ хр(с)тїань, вь врѣтище влънѣно вьложивши и ськрывши . боꙗше бѡ се пръвѣе ꙋбо еллинствꙋющи(х) неистовства ⸱ потом же мнѡжае веще блгочьствꙋющи(х) топлѡты ⸱ вьсѣмь ꙗко(ж) лѣпо е(с) дѣло сїе спѣшнѣише творещимъ, еже вьꙁимати иже по хѣ пострадавш(ї)имь мощи . Симь оубо ꙗко ѡ мноѕѣ ѡ сихь тьщꙋщих се, ѡна палестиноу достижеть ⸱ тамо же бывши

(л. 211б) вь нѣкоеи въси ⸱ ꙋ Ѳаворскые горы лежещее драже име бѣше еи, бж(с)твное тѣло м(ч)ника полагаеть свъще ꙋбо ꙁапалꙗющи . и многаа ѿ блговонныи(х) жегꙋщи, и вь чьсти вьсацѣи имꙋщи . ꙗкоже ꙋбо много нѣкое мно(ж)ство члкь кь рацѣ приходещее ꙁрѣше, вь сꙋдꙋ бѡ оуже прослꙋло себѣ ⸱ и вьсѣхь блгооуханїе того блг(д)теи быстрѣе приꙁывающе ⸱и ихже лють нѣкыи припадь недꙋгь дрꙋчаше ⸱ и ихже лоукавааго дꙋха сьдрьжаше дѣиство ⸱ Вси бѡ еже кь рацѣ прихож(д)енїемь, ѿ сьдрьжещїихь ꙁлыи(х) прѣмѣнꙗахꙋ се ⸱ потрѣбно вь мѣни и храмь вьꙁ(д)вигнꙋти м(ч)никꙋ чьстьнь м(ч)николюбица ⸱ Елма же емлꙗше се ꙁданїа многоцѣнно ѕѣло и любочьстнѣ ⸱ которыи(х) ꙋбѡ бл(г)дти ⸱ которомꙋ же сь сладостїю вьꙁрастꙋ тамо неѡсклаблꙗющоу се ⸱ радости исплънѥна бывши ⸱ ра(д)у(е)т бо се дша добрѣ вещи прилежоущи ⸱ ѡво ѹбо ꙗко е(с)тво(м) блгое радости ходатаистьвно бываеть

(л. 212а – липса на листове) дѣлающи(м), ради иже ѿ сьвѣсти иꙁвѣщенїа ⸱ ѡво же и ради ꙋповаемаго вьꙁданїа ; Радости ꙋбо испльнши се ⸱ дрьжещимъ имѣнїа посилае(т) чьсти спо(д)бити сна ее ѿ нихь просещи ⸱ и вънеꙁаапꙋ цр(с)каа писанїа кь нѥѥ приходеть, оутврьждающе отрокоу сань⸱ ѡна же тог(д)а ꙋбо ѿложенїе вещи даеть о ꙁданїи прилежнѣише троуждающи се . И понеже ꙗже ѡ храмѣ конць имѣше ⸱ и вь чьсти сице стоаше м(ч)никꙋ ⸱ Съꙁывае(т) оубѡ страни тое еп(с)кпы и преꙁвитери на ѡсщенїе храма ⸱ Сьꙁывает же и елици ѿ инокь вь добродѣтелнѣмь житїи сїахꙋ ⸱ и ѿ ракы сщенное тѣло м(ч)ника изьмше, свѣтлѣ на многоцѣннѣ положи одрѣ. и вьзложи же и юже отрокь хламидою и поꙗсомь сана одѣаати се хотѣше. Бл(с)вити же се прьвѣе ѿ иже тамо сьшь(д)ших се, и тако ѡдѣати се томоу ѡбоими оустрои ⸱ потом же вьсенощное славословїе кꙋпно съ всѣмь мнѡжьствомъ

(л. 212б) сътвориши ⸱ Сама же и отрокь пръвѣе по(д)емше тѣло м(ч)нка ⸱ и то понесше, вь храмѣ сщеннѣмь жрьтьвницѣ сщеннѣ полагають ⸱ Вьсих же м(ч)николюбица клеопатра прилежоущи топлѣи сльꙁещи, сноу же и себѣ блгаавѣрнѣ прошааше ѿ мчника ⸱ вьсем же оубѡ бж(с)твнѣи слоужбѣ сщеннѣ сьврьшивши се, раꙁличною оубо и свѣтлою трапеꙁою ⸱ иже тамо сьшь(д)ших се гостѣше ⸱ и ꙗже ѡ слꙋжени семь снꙋ же и себѣ вьꙁглашааше ⸱ бѣ же ꙁаповѣдь отрокоу ѿ мтре никако же снѣди нѣкые или питїа прьвѣѥ въкоусити, прѣж(д)е даже гощенїю конць приемшимь ⸱ и дню ꙋже прѣклоншꙋ се ⸱нь єже ннѣ хотещее ре(ч)но быти, малодꙋшныимь оубо съмоутить и слоухы и дше ⸱ бжїе же соудбы елико достижно вѣдещи(м) ⸱ и великые ѡное прѣмоудрости прѣславнаа строителства, подвигнеть паче еꙁыкь вь похвалоу ⸱ и бывшее вьспрїимоуть, єже ѡ польꙁномь

(л. 213а липса на лист) събытїа . оуже оубѡ кь ве(ч)ероу соущꙋ ⸱прѣтрꙋж(д)ень отрокь бывь, на  постели вьꙁле(ж)⸱ мти же приникши кь ꙫчима отрока, въстани чедо глааше и сьмтрїю приѡбщи се пищи ⸱ како бѡ сьнь прѣтрꙋж(д)ьшомꙋ се и не ꙗдшꙋ сладкь бꙋдетъ ⸱ Ꙍн же ѕѣлнѣм же и напраснѣмь огнѥмь сьдрьжимь сыи, ниже слово вьзможе мтри ѡ(т)вѣщатї. и та въ истиноу ре(ч) ниже аꙁь пищꙋ ниже чесо го иного въкоушꙋ, аще не прьвѣе ѡвещеи се и како сьбоудет се снови моемоу оувѣмь ⸱ и оубѡ присѣдещи отрокоу беꙁь сьна ⸱ и иже ѿ недоуга пламень ꙗко же бѣше мощно прохлаж(д)ающи⸱ или паче себѣ огнь вещьшїи ѿ оутробы вьспалꙗющи ⸱ и въ полѹнощи ꙗко вы же бжїе соудбы ꙁрить отрока недꙋгомь прѣделѣна бывша, и мрьтва беꙁгласна и беꙁдыханїа лежаща ⸱горкою оубѡ сїю вещь ѡщꙋтивши, прьвѣе оубѡ ѿ помраченїа оумнаго на ꙁемлю ниꙁпадаеть ⸱ и самыи прѣж(д)е дше

(л. 213б) ѡскоудѣваше гла(с) напраснѣи печали вь мѣсто оуѕи бывши еꙁыкоу ⸱ таже мало вьꙁведши се и мало что вьспренꙋвши, отрока мрьтвое тѣло на рамѣ въꙁемши ⸱ въ его(ж) сьꙁ(д)а м(ч)никоу приходить храмь ⸱ прѣ(д) сщенным же то(г) жрьтьвникѡмь принесши полагае(т) ⸱ и ꙁа власиемши се отрокоу вьсклицааше ⸱ погоубил ми еси глющи ꙗже ѡ тебѣ чедѡꙋпованїа ⸱ оуви мнѣ ѡ снꙋ. оувы мнѣ любеꙁныи цвѣте прѣж(д)е врѣмене сице оумилѥнѣ оувѣдыи ⸱ горе ꙗко твои аꙁь ꙁроу конць, ꙗже ѿ тебе паче и твоими надеждами на старѡсть прѣпитати се ꙋповахъ ⸱Таковы ли ми ннѣ вьꙁдаеши любьꙁнѣиши питателства ; таковыми ли аꙁь ѡкааннаа оупованїѡмь пожинаю плоды ; кыми оусти кымли еꙁыкѡ(м) твоа провѣщаю кы мали ꙫчима въсплачю ⸱ лоучше да мою съмрть видѣла би(х), и отрока мнѣ любьꙁнима роукама гробоу прѣдана би(х) лꙋчъше да са(м) 

(л. 214а) тебѣ прѣ(д)лежала би(х) паче мрьтва, твоими на гробь почитаема провож(д)енми ⸱ Сице бѡ би(х) блжена била аꙁь ⸱ Сице ѡ мнѣ ꙗвѣ мтрьскыи сьблюл себи ꙁаконь ⸱ Сице глааше, и ниꙁꙋ пакы стенꙗше ⸱ и ꙗко ѡдꙋшевлѥнѹ и еще м(ч)ника тѣлеси бесѣдовааше ⸱ что толико ѡ хвь м(ч)ниче неправдовахѡ(м) глющи ⸱ ꙗко вь горкоую сицевꙋю вьпасти бѣдꙋ ⸱ не вь тоуж(д)е или странѣ мꙋжа ѡставльши, тѣлесе твоего иꙁношенїе ѡ все(м) положихь ; не ѿ самѣх ли ѡснованїи сьꙁда(х) храмь ; и аше нечто ино то ꙋбо еже ѿ дше вьнесо(х) ꙋсрьдїе, что(ж) ми сїа хотѣхоу ⸱ что еже вь мѣсто тѣ(х) просимое блго ⸱ не ѡтрока ли спсенїе ; не даже ли до старѡсти има торства сь рож(д)ьшꙋю прѣбыти ; горе каковы погрѣши(х) надежде ⸱ каковавь мѣсто ꙋповаемы(х) видѣ(х) аꙁь ⸱ нь ѡ хвь м(ч)ниче ⸱ или ми отрока даж(д)ь жива ꙗко(ж) Елисеи соумантѣныни, или ми съмрти непоꙁави(д)

(л. 214б) полеꙁнѣи ⸱ нь иже сице ꙁлочьстиѣ и рож(д)ьшоую и вьспитавшꙋю мене, сьоти ти съ отрокомь ꙋстрои . Вьси(х) отрока плачающи клеопатрѣ ⸱и тоу сꙋщее ѕѣлѡ болѣꙁнь нны творещи ⸱ ꙗко и тое миловати стр(с)ть, и много и беꙁднѣ бжїихь соудобь чюдити се, маль тоу сьнь нашь(д) ꙋпокои . и всако бѣше отрокь тои ꙗвль се сь м(ч)никѡ(м). прѣ(д)стоеща бѡ мнѣше(с) ꙁрѣти стр(д)лца ⸱ и ꙗко сна своего тое сна вьнѣ дрѣ(х) имоуща ⸱ ѡ дѣанїе же ѡбоимь ѿ прѣѥ(с)стьвные ѕѣлѡ и прѣсвѣтлые вещи ⸱вѣнци же тѣ(х) главы сладостнѣ оукрашаахѹ ⸱ вѣнце(ж), бж(с)твноу самоую рекль би кто добротꙋ ⸱ и никако же еꙁыкѡ(м) иꙁрицаемоую ⸱ и почто не ра(д)уеши се ѡ жено глати мнѣше се м(ч)никь ⸱ нь печалъ люта твое сътресла е(с) ср(д)це . Еда бѡ сице не блгодарьстьвнь аꙁь, и ни ѡ чесом же ѿ иже тобою бывши(х) приходевь чювство ; или ꙗже ѡни(х) вь ꙁа(д)нїа

(л. 215а) любочстнѣ не вьꙁда(х) ; неꙁриши ли каковѣ снь твои спо(д)бил се ѥ(с) славѣ ; какова блг(д)ть блистаеть на нѥмь ; что ꙋбо не скрьбное сїе ѡставльши, и сама прѣидеши кь блго дꙋшномоу ⸱ нь аще хощеши да приближит се неще паче отрокь ⸱ и тебѣ прѣ(д) ꙫчима опасно да боудеть ⸱ ꙗко да и ты сама добрѣ оувѣси ꙗже ѡ нѥмь ⸱ Сице ре(ч) ⸱ и мнѣше(с) отрока приꙁывати, поиди глѥ отроче кь мтри. ꙗко да и инаа же и ꙗко же имаши ꙗвль се, ꙋтѣши тое мнѡгослъꙁное ⸱ отрок же наи паче м(ч)ника дрьжаше(с) не ѡстави(т) его ѿ ноудь . ниже поити кь мтри вьсачьскы хоте ⸱ нь отиди мти моа ѡтиди кь нѥи глаше съпротивлꙗе се въ себѣ прѣбивающи, и рыданїѡмъ симь никако(ж) вънимающи ⸱ равнѣ бѡ мню беꙁмѣстнѣ быти ⸱ жиꙁнь прѣмѣнити нась мрь(т) ⸱ и печалїю сладость непрѣстанноую ⸱ и вьсего вѣка, живѡ(т) врѣмѣнныи прѣ(д)почьсти . Сїа ѿ отрока мти слышавши ⸱ и рыданїа ꙗко(ж) ꙁабивши ⸱

(л. 215б) приета быти и такь сноу ѥ ꙋтѣши(т) се вь ꙁримы(х), крѣпцѣ молѣше се м(ч)нкꙋ ⸱ ѡ иже и же кь спсенїю ведоуша(г) пꙋти ⸱ наи паче тои дрьжати се накаꙁовааше ⸱ и кончнѣе мирь давь, кь своимь съ отрокѡ(м) идѣхꙋ прѣбиванїѡмь, и ѿ ꙫчию ѡное ѿстоупаахѹ ⸱ ѡна же абїе оубꙋж(д)ьши се и вь себѣ вьꙁвративши се, какова ѿ м(ч)нка же и отрока пришьствїи блгодꙋшїа наслади се, тꙋсꙋщи(м) сладостнѣ иꙁгла ⸱ и чюдо всѣ(х) имѣше дше, ра(дї) прѣславна(г) повѣсти ⸱ та же блженаа и сновнѥе любьꙁное ѡно тѣло свѣтлѣ помаꙁавши и ѡдѣꙗвши, оу м(ч)нка полагаеть ⸱ вьсенощное(ж) сь сꙋродникы и инако ꙁнаемыми блгодаренїе сьтворши ⸱ Еще же и таинное сщеннодѣиство вь нѥмже сьтворити се досто(ꙗ)ше сьврьшивши, на ѡбилнꙋю приꙁываеть вечерꙋ иже сщенныимь нѣснемь тои приѡбьщивши се ⸱ и тако дале(ч) житїю радовати се рекши ⸱ въ некрадомаа же скровища нищїихь глю ꙋтробы,

(л. 216а) богатьство то е вьсе въложивши ⸱ и въ простоую ѡдѣавши се одеж(д)ꙋ, оу гроба слѹжааше м(ч)ника, сице(ж) посто(м) и млтвами ꙋпражнꙗющи себе ⸱ и вьнꙋтрьнꙗ(г) толико ѡчисти члка, елико и на кьж(д)ю недѣлни днь тои м(ч)никꙋ сь отроко(м) вь по(д)бнѣи иже прѣж(д)е приходи(т) одеж(д)и, прохлаж(д)енїе печали дающи(м)⸱ лѣто седмое ѿ нели(ж) прѣложенїе бы(с) кь лꙋчшомꙋ ⸱ и испльнь днїи дха бывши, сь мирѡ(м) оубѡ иже боу мирь дхь ⸱ тѣло(ж) оу сна пола(г)еть ⸱ ꙗко да и(х) же едина имѣше храми на сихь и едина рака прїиметь ⸱ и ниже самыи раꙁьстоанїе имать прахь ⸱ Съ ними же да дасть и намь бь спсаеми(х) бити чести ⸱ и живꙋщи(х) странꙋ видѣти ⸱ ꙗко томꙋ подобаеть вьсака слава чьсть и покланꙗнїе ннꙗ и присно и въ вѣкы вѣкѡ(м) аминъ :-