Народно (безименно) житие на св. Иван Рилски

Бы(с) члвкь дховень, блговѣрень и хр(с)толюбивь, боѧ сѧ Ба и страхѡ(м) слꙋжа емꙋ, и безь сльзахь николиже прѣбываѧ, нѫ възпоминаѧ слово пр(о)рчьское, иже ре(ч)но бы(с) ѹсты Дв(д)выда. Измїѫ на въсѣкѫ нощь ложе мое, и сльзами моими постелѧ моѧ омочѫ (Пс. 6, 7). И тако въ вѣрѣ велицѣ сыи, въставь изыде из мира. Бѣше бо пастырь и ничто же имѣѧ, тъкмо брата единого и вола. И егда помысли изыти въ пꙋстынѧ, поѧ вола и поиде. И невѣдѧщꙋ никомꙋ, идѧщꙋ же емꙋ пѧтемь ѿ мѣста своего, тогда врагь ненавидѧи добраа, въложи въ ср(д)ци братꙋ емꙋ и ꙋбѣди люди, и постигохѫ его на поли, нарицаемѣ(м) Мрьдища, и по(д) дѫбомь великїимь,

и начашѧ вращати ѿ пѫтѣ бжїѫ дїаволїимь наꙋченїемь. И ꙗко же его начѧшѧ вращати, сътвори великѫѧ млтвѫ бжїѫ къ нимь и едва изпроси еже ношаше воль звонець, знаменїа ради мира, а себѣ на памѫ(т), да се ꙋвѣсть, что изнесе стыи ѿць Іѡаннь из мира, а воль емꙋ възѧшѧ. И привѧза стыи ѿць воль по(д) дѫб(м), нарыцаемѣмь великїи дѫбь, съ своима стыма рѫкама. И ѿ того часа наре(ч)сѧ стго ѿца дѫбъ, и еще и до днешнѣго дне знаати е(с) вѫже ѡколо дѫба, знаменїе стго ѿца . И ѿврати лице свое стое ѿ ни(х) и поиде въ пꙋстынѧ Рылскѫѧ, и ѡбращ сѧ къ нимь и не бл(с)ви  ихъ, ни проклѧ, и да(с) имь знаменїе, рекь: Азъ излазѧ ѿ ва(с) смѣѧ сѧ и глꙋмѧ.

И поиде въ пꙋстынѧ Рылскѫѧ и иде на мѣсто, нарицаемое Голець, и бы(с) тꙋ ѕ м(с)ць. И пакы бра(т) емꙋвъзтьжи по братѣ и поиде искати его. И иде и ѡбрѣте его въ мѣстѣ томь. И видѣвь его стыи ѿць грѧдѧща къ немꙋ, и прискрьбень бы(с), и помоли сѧ Бꙋ, рекь: Ѻче Ги, нб(с)ныи въседръжителю, великое основан їе, неисписанное бжство, сне бжїи и единочѧдыи Іу(с) Хе, въпльтивыи сѧ на(с) ра(д), за ны ѡбразь на(м) даль еси еще же ꙋтѣшителю и дше, приходѧ ѿ оца въ на(с), ꙋтѣшителю блгы , пр(с)но бѫди съ мноѫ въсег(д)а и сльзь мои(х) не прѣзри на въсѣко врѣмѧ молѧща ти сѧ: Ги Іу(с) Хе, црю нб(с)ныи и земни, аще и недостоинь  есмь сего глати, нѫ надѣѧ сѧ твоеи велицѣ мл(с)ти, рекль бо ни еси: Ищете, и ѻбрѧщете ; просите, и да(с) сѧ вамь; тльцѣте , и ѿврьзѫт сѧ вамь (Мат. 7:7). Сих же словеса надѣѧ сѧ, и дрьзнѫль есмь  глати. И иного не имамь ꙋтѣшителѣ  и събесѣдника, ни ѿца, ни матере, ты бо  мѧ еси прїѧль, ты же ми еси творець, ты же ꙋтѣшите(л), ты застѫпникь мои, ты же ми наставникь, ты же вѣра моа, ты же крѣпость моа, ты же и ꙋнынїе мое, ты же ꙋсклабленїе мое, ты же питатель мои, ты помощникь мои, ты въсѣ твориши видимаа и неви(д)маа, ꙗвленаа и неꙗвленаа, ты ѿць  мои, т(б)е, Ги, молѧ (с) азь грѣшнїн, и не имѣѧ помощника никогоже, нѫ  тькмо на тебе единого Ба възыра и о тебѣ сѧ хвалѧ  и о тебе сѧ ꙋтѣшаѧ. И азь единь есьмь въ сеи пꙋстыни, и не имѣѧ ничто же съ собоѫ, тькмо жезль единь. Тог(д)а прїиде  гла(с) съ нбсе  и р(ч)е  емꙋ: Ро(д)и сѧ, свѣтило мое въ пꙋстѣи сеи гор снѣжаннѣи; ра(д)уи сѧ,ѝ деннице моа свѣтлаа; ра(д)уи сѧ, слнце мое свѣтлое въ пꙋстыни Рылстѣи; ра(д)уи сѧ, пꙋстыни жителю, въ пльти си аггль; въстани и възми жезль свои и иди въ мѣсто, ꙋготованое тебѣ по(д) планинѫ имыи врьтопь.
И иде и ѻбрѣше пещерѫ и въниде, идеже слнце не призирааше, ни вѣтрь вѣаше, нѫ тькмо аггль единь прихождааше къ немꙋ, ношааше емꙋ маннѫ ѿ Ба ѡбразѡ(м) шипковѣ(м). И тоу прѣбивааше млѧ Ба днь и нощь, не почиваѫ1 и без сльзь не прѣбиваѧ николиже, молѧ  Ба. И прихождааше врагь прѣльстникь е бесѣдовааше словеса аггл(с)каа къ немꙋ, хотѧ его извести ѿ мѣста  стго , и не ꙋмѣ емоу что сътворити. Бѣше бо братанець стго ѡца съ нимь. И иде врагь прѣльстни(к) злыи къ братꙋ стго ѡца и навади его, рекь емꙋ: Азъ брата твоего ѻбрѣто(х) и дѣтѧ твое въ пꙋстыни съ нимь, идеже сльньце не сїаеть, ни вѣтрь вѣеть, тъкмо едины ѕвѣрїе, твое чѧдо изѣдено хоще(т) бити ѕвѣрїи. Слышав же бра(т) стго словеса сїа вражїа, разгнѣвав сѧ и поиде съ гнѣвѡ(м) да его изведе изь пꙋстынѧ дїаволскы(м) наꙋченїемь. И невѣдѧшꙋ емꙋ камо поити,  и р(ч)е емꙋ дїаволь прѣльстныи: Азь тѧ поведѫ на мѣсто, где живѣеть твои бра(т) стго, и прискрьбень бы(с) за чѧдо свое, и р(ч)е дїаволꙋ: Дрꙋже, веди мѧ на мѣсто то, да ти ссътворѫ, еже хощеши. И поиде дїаволь прѣ(д) нимь и идостѣ на мѣсто, идеже бѣ стыи ѿць пꙋстинныи Іѡаннь. И видѣвь ѝ его сты ѿць, и помли Ба, глѧ: Бже въседрьжителю, непобѣдимаа сило, пособїе  въ бѣда(х ) и въ радостѣ(х), члколюбивїи  пастырю, мл(с)рдїи ѿче, ненаѣѧщим сѧ надежда, просѧщи(м) помощь помощниче, смѣѧщи(м) сѧ пособьниче, въ бѣда(х) оутѣшителю, оуслыши мѧ, Ги, и помлꙋи мѧ, и избави мѧ ѿ врага сего похвалнаго, и бѣды ѻ(т)ими ѿ мене, и сътвори съ мноѫ мл(с)ть, и сп(с)и мѧ съ въсѣми ꙋгож(д)шими т(б)е. Еи, Ги, не ѻстави мене врагꙋ семꙋ въ радо(с). Сице емꙋ млѧщꙋ сѧ, прїиде бра(т) емꙋ дїаволїимь наꙋченїе(м) и възбесѣдова къ немꙋ словеса дїаволѣ, хотѧ стго прѣльстити и извести ѿ пѫти бжїа и ѿ лика аггл(с)ка ѿлѫчити. Разꙋмѣв же сты ѿць Іѡаннь, ꙗко нѣсѫть бесѣди брата его, нѫ бесѣди сѫть врага прѣльстника, не хотѧща добраа, нѫ злаа, и възрѣвь на нбо и ре(ч): Ги Іу(с) Хе, не ѡ(т)врьзи мене ѿ лица твоего и не ѡ(т)стѫпи ѡ(т) мене въ врѣмѧ печали моеѧ, нѫ избави мѧ ѡ(т) врага моего, ꙗкоже избави Данїила изь ꙋсть лъвовь и Ѳеклѫ ѡ(т) огнѣ, Ананїѫ и Азарїѧ и Мисаила ѡ(т) пещи огньни, сп(с)и мѧ, Ги, ѡ(т) ненавистника сего, прѣити мало се житїе прѣходное, и настави мѧ въ твое отишїе, ꙗкоже наставиль еси Іилѣ, бѣжѧщаго по морю ꙗко по сꙋхꙋ, а врагы его покры мѡре; и нинѣ, Ги, помлꙋи мѧ и низложи въстаѧщаго на мѧ пакостника, и посрами борѧщаго сѧ врага моего съ мноѫ, ꙗко ты, Ги, знаеши члвчьское сꙋетьство; бѫди ми помощникь и ꙋбыи приставникы, ѧже хотѧть на мѧ прїити, иже твои(х) заповѣди не вѣдѧть, сътвори ихь адꙋ причьстникы  и чрьвїемь, и въведи его въ вѣчныи огнь и въ мѫкѫ кромѣшнѧѧ, иже чрьвь хе ꙋсыпать  и огнь не ꙋгасаеть, а рабꙋ свемꙋ, Ги, даж(д)ь крѣпость и бдѣнїе и помо(щ), по твои(м) стьза(м) ходити и т(б)е  слꙋжити  въ вѣкы вѣкѡ(м), аминь. Чюв же дїаволь, еже ре(ч) стыи ѡ(т)ць Іѡаннь, аминь, ꙋжаснѫ сѧ и бѣжа въ мѣсто  свое, а бра(т) емꙋ оста. И разꙋмѣ бра(т) емꙋ силѫ стго ѡ(т)ца и не смѣ бесѣдовати емꙋ ничто же: оста бо единь, а врагь его бежа, иже его ꙋчаше злымь бесѣда(м), хотѧ его смѣсти ѡ(т) пѫти бжїа. И приближи сѧ бра(т) емꙋ молѧ(с) молбо(ѫ) великоѫ  и сльзами велицѣми да емꙋ  да емꙋ пꙋсти дѣтища. И ѡ(т)пꙋсти дѣтища стыи, и поиде съ ѡ(т)цемь свои(м). Бѣше бо дховно дѣтѧ то; вѣдѣше бо пꙋстынны житель ѡ(т)ць Іѡаннь, ꙗко дѣтѧ дховно е(с), помли сѧ Г(с)ви и р(ч)е: Г(с)и, да не погыбне(т) дша праведнаго, и не напиши его съ грѫшникы. И ꙋслыша Бъ млтвѫ  стго и прѣпо(д)бнаго оца Іѡанна. И тѡ(м) часѣ повелѣ змїи, и ꙋꙗде дѣтища идѧща пѫте(м) съ ѡце(м) его. И възврати сѧ ѡ(т)ць его и повѣда стмꙋ ѡ(т)цꙋ Іѡаннꙋ . И ꙋслыша стыи ѡ(т)ць о дѣтищи и прослави Ба и рече: Ги, прїими дшѫ праведничѫ, да почиеть с Авраамо(м) и Ісаакѡ(м)  и Іакѡвѡ(м). И тѡмь часѣ изыде дша изь дѣтища. И въземь ѡ(т)ць его и несе емꙋ. И повелѣ стыи ѡ(т)ць Іѡаннь нести отрочѧ на мѣсто, имене(м) Осѣново. И погребе  ѡ(т)ць его и ѡ(т)иде. Стыи  же ѡ(т)ць Іѡаннь ходѣше на мѣсто того дша тоѧ ради праведничѫ. И сътвори себѣ мѣсто то покоище, а змїѫ тѫ помрамори, да сѧ вѣсть сила м(л)твы стго ѡ(т)цаь Іѡанна. И приходѧщ їе людїе въземл(т)ѧ ѡ(т) неѧ на врачбѫ въсемꙋ. И сътвори в пещере тои стыи ѡ(т)ць Іѡаннь не изходѧ  г лѣта и ѕ м(с)ць.

И излѣзе вьнь и обрѣте камень, высота емꙋ м съжнеи, а ширина емꙋ ꙗко щить великь. И възлѣзе на камень тъи, и стоа на немь з лѣ(т) и д м(с)цѧ, днь и нощь не почиваѧ, биѧ прьсы  своѧ и колѣнѣ прѣкланѣѧ и сльзы точѧ постѡ(м) и бдѣнїемь ꙋбиваѧ тѣло свое, мразѡ(м) и бꙋреѫ, трьпѧ знои и гра(д) съ нб(с)е, постѡ(м) и бдѣнмь днїѫ и нощїѫ, и подвигы и трꙋды его аггль  г(с)нь възношааше на нбо прѣ(д) Ба. И ꙋвѣдѣвь Бъ трьпѣнїе его, и аггль г(с)нь прихож (д)ааша къ  немꙋ приносѧ емꙋ маннѫ. И ꙋвѣдѣ врагь прьвы, ꙗко прїѧта бы(с) млтва его прѣ(д) Бмь, и разгнѣва сѧ и поѧть инѣхь мнѡѕѣ(х) съ собоѫ, и сътвори съборь и прїидошѫ на мѣсто, идеже стоаше на камени стыи ѡ(т)ць Іѡаннь , молѧ Ба. И прїидошѫ  напрасно съ страхомь  велїемь, мнѧше ꙋстрашити его, хотѧще да бѣжить ѡ(т) мѣста  стго , и не могошѫ емꙋ что сътворити, бѣше бо аггль г(с)нь хранѧ и крѣплѧ его. И начѧ дїаволь бѣжати, а стыи ѡ(т)ць Іѡаннь бѣ стоѧ на камени, молѧ сѧ Бꙋ дныѧ и нощїѫ, не прѣстаѧ сльзы точѧ. И приходѧще враѕи низрѣваахѫ ѡ(т) камене того. Высота бо бѣ камене того м съжнеил. не хотѣше обыти инѣмь пѫтѣ(м), има(т) бо пѫтшце мало на мѣсто то стое. Нѫ ѡвого смѣтаахѫ, тѣм же пѫтишцѣмь възлазѣше.
Е(с) бо каме(н) тъ высокьь и стрьмень, ѫдꙋ же смѣтааха и мѫчаахѫ стго. Ꙍн же съ радостїѫ прїемлѣше  въсе то. И до днешнѣго дне знаати е(с) стопы ногꙋ его по камени и крьвь его. И ꙋмиливь сѧ, вьзрѣвь на нбо и р(ч)е: Бже въседрьжителю, не ѡ(т)стѫпи  ѡ(т) мене, нѫ бѫди ми помощни(к) на врагы сїѧ, сп(с)и мѧ и помози ми мало прѣхожденїа сего прѣити, и не помѣни мои(х) грѣхь иже сътвори(х), или словѡ(м) или дѣлѡ(м), или помышленїемь, или по воли или по неволи, ꙗко Бъ мл(с)рдь, помоѕи ми, да не р(ч)еть безаконныи где е(с) Бъ; тѣм же, Ги, потьщи сѧ избавити мѧ ѡ(т) врага сега, ꙗко да прославит сѧ имѧ твое въ вѣкы. И егда р(ч)е стыи ѡ(т)ць Іѡаннь ами(н), въ тои чась ꙋдари аггль въ клепало каменно, и ѕвонецъ поѕвьнѣ на(д) гробѡ(м) стго ѡца, и потр ѧсе сѧ пꙋстынѣ и потрепета ꙗко и езеро, и поѕьвнѣшѫ горы ꙗко и камьбань. Ичювь дїаволь ами(н) и клепола и ѕвонець, и ꙋдари въ мѣсто ꙋготованное емꙋ, идеже нь свѣта, нѫ тьма пр(с)но. И тѡ(м) часѣ прїиде аггль съ нб(с) ѡ(т) Ба, глѧ : Мѫжаи сѧ и крѣпи сѧ, възлюблениче мои, азь есмь пр(с)но с тобоѫ, не ꙋжасаи сѧ, нѫ ра(д)уи сѧ, сънаслѣдниче прр(о)ка моего пр(д)течѧ и кр(с)тителѣ , ибо и тъи бы(с) възпитѣнь въ пꙋстыни, и ты пꙋстынѧ възлюби, тъи бо роди сѧ ѡ(т) не пл(д)ѡви, а ты ѡ(т) плода;  ра(д)уи сѧ, ѕеннице моа прѣсвѣтлаа, въ пꙋстѣи сеи горѣ, ра(д)уи сѧ, слнце мое присвѣтлое, въ пꙋстыни Рылстѣи, ра(д)уите  сѧ, и вы горы, прїемше свѣтилника въ пꙋстыни, веселите сѧ въси рѡди земни, припа(д)ѫщи къ моще(м) пꙋстыножителѣ  Іѡанна, ра(д)уи  же сѧ и ты пꙋстыне, прїемши свѣтилника своего и събесѣдника моего, въ пльти равень агглѡ(м), земнаго аггла и небеснаго члвка.
Тогда прїиде Бгословь Іѡаннь къ немꙋ и обьемь его ꙗко мти мл(д)ца своего и облобиза и р(ч)е емꙋ: Ра(д)уи сѧ, възлюбленниче г(с)нь ꙋготова бо ти сѧ вѣнець славѣ, слава ботвоа просьвте сѧ; въстани и възми  жезль свои и иди въ мѣсто прѣж(д)нѣе, идеже еси прїѧль инѡчьскы ѡбра(з), и остави тꙋ жезль свои, да бѫдеть  мирꙋ въ знаменїе, а тебѣ въ памѧ(т), р(ч)ено бо ти е(с) ѡ(т) Ба.   И въставь пꙋстыножитель ѡ(т)ць Іѡанньи иде на мѣсто, идеже прьвѣе прїѧть инѡчь(ств)о, по(д) планинѫ, имѧ еи Рꙋень, въ мѣстѣ, зовомое Скрыно. И ѡ(т)иде  ѡ(т)тѫдꙋ , и никто же его видѣ, когда прїиде и когда ѡтиде; и жезль свои мирꙋ остави знаменїе, а себѣ на памѧ(т), повелѣнїемь г(с)нимь. И въставь отиде въ Перигь и обрѣте мѣсто каменно близь рѣки, именемь Стрꙋма, и тꙋ  сътвори себѣ покоище. И ѡ(т)тѫдꙋ иде въ планинѫ Витошѫ, и тꙋ сътвори себѣ покоище  И, прїиде къ немꙋ аггль г(с)нь и р(ч)е емꙋ: Ра(д)уи сѧ, слꙋжителю г(с)нь и събесѣдниче агглѡ(м), сътвори повелѣное тебѣ; въстани ѡ(т)с ѫдꙋ и иди на мѣсто свое, ꙋготованое тебѣ въ пꙋстыни Рылстѣи. И, повелѣнїемь аггловѡ(м), въставь и иде на мѣсто, идеже си бѣ оуготоваль гробь своима рѫкаама стыма въ пꙋстыни Рылстѣи.
Бѣше бо тогда Петрь црь въ Ср(д)ѣци градѣ, и прочю сѧ слово ѡ стѣ(м). Ѻ семь чю и Петрь црь и избра ѳ мѫжїи хытрѣхь ловцѧ и повелѣ имь ити въ Рыла ловь ловити, запорѫчивь имь, глѧ: Да сѧ не възвратите къ мнѣ, донелиже не обрѣщете мѣсто стго ѡ(т)ца, да и азъ ше(д), поклонѧ сѧ емꙋ. И поидошѫ мѫжїи, ꙗко(ж) повелѣ имь црь ловь ловити, и ищехѫ мѣсто стго и не обрѣтаахѫ его. И проводишѫ мнѡго дни въ пꙋстыни тои, ни стго мѣсто обрѣтошѧ, ни лова
ꙋловишѧ. И прискрьбни бишѧ, и не можаахѫ възвратити сѧ къ црю, не бѣхѫ бо ни единоѧ работи сътворили, иже имь бѣ повелѣль црь. Бѣхѫ бо и не ꙗдше многы дни, и нарекошѫ  имѧ стго и помолишѫ(с), рекше: Ѽче стыи, проповѣж(д)ь сѧ на(м) да не погыбнемь ѡ(т) црѣ. И смилихѫ сѧ емꙋ вѣдѣше бо стыи ѡ(т)ць  съвѣта и помишленїа црва. Въ тѡ(м) часѣ обрѣтошѫ стьзицѫ малѫ и прославишѫ Ба, и идѣшѫ по стьзи тои и ѡбрѣтошѫ его. И видѣ ихь стыи ѡ(т)ць и въпроси ихь, глѧ : Чѧда, о щомь есте прїшли? Егда до сели вы не ꙗдше есте? Видѣше бо ихь ꙗко е дни имѫть не ꙗдше. Ѻни же изповѣдошѫ емоу въсѫ истинѫ. Бѣше бо въ томь томь часѣ принесль емꙋ аггль съ нбсе пищѫ, ѡбраз ѡ(м шипковѣмь, и, бжїѣемь повелѣнїемь, сътвори сѧ просфора, и постави имь маннѫ стыи ꙗсти. Бѣше бо единь въ ни(х) велеꙗдець; видѣвь просфорицѫ малѫ и помысли въ ср(д)ци своемь, рекь: Що ще намь зде бити ѳ ти(м) мѫжемь въ просфорици сеи единои? И проразꙋмѣвь помышленїе его стыи ѡ(т)ць Іѡаннь и въздьхнѫвь къ Бꙋ, р(ч)е въ ср(д)ци свое(м): Ги, ꙗко же еси насытиль пѧтими хлѣбы  пѧ(т) тысѫща нарѡда, сътвори и зде знаменїе свое и бл(с)ви имь трапезѫ сїѫ. И ꙗдошѫ въси и насытишѧ(с), и оста половинѫ просфоры. И бѣ болень единь ѡ(т) ни(х), и абїе ꙗдши изцѣлѣ, ꙗкоже ре(ч)но въ книгахь: хлѣбь аггльскыи ꙗде члвкь (Пс. 77, 25). Тогда же мѫжїе ꙗдошѫ и прославишѫ Ба и възвратишѧ(с) съ радостїѫ вь црвы и сказашѫ все, еже видѣшѫ ꙋ стго. И чювь Петрь црь и прослави Ба.

 И поѧ съ собоѫ мнѡ(ж)ство лю(д)еи и воѧ своѧ и поиде да ви(д)ть стго  ѡ(т)ца, и доиде до рѣкы, именень Рыла. И глашѧ емꙋ: Се знаменїе стго  ѡ(т)ца и того мѣста, идеже сїа рѣка изходитъ. И поиде въз рѣкѫ и доиде до камене, именемь Стогь. И не могохѫ прѣити, бѣ бо ѫзско и стрьмно. И поидошѫ въ планинѫ, имене(м) Книшава, и повѣдашѫ емꙋ горѫ и камень, идеже живеше стыи ѡ(т)ць. И възхотѣ црь поити, и не може пꙋстынеѫ, нѫ абїе посла два отрока и р(ч)е имь: Ше(д)ше рцѣте стомꙋ ѡцꙋ: ѡче, пришель есмь да ви(д)имь ч(с)тное ти лице, аще ти есть възможно. И ѡ(т)вѣща има стыи ѡ(т)ць, глѧ: Идѣта и рцѣта емꙋ: Црю, стыи и славныи, ѡ(т) Ба въсѣ възможна, а не ѡ(т) члвкь; аще хощеши да мѧ ви(д)ши и да тѧ ви(ж)дѫ, постави ты тѧнтѧ на врьсѣ, а азь да сътворѧ димь, да ти видиши дымь, а аз да виждѫ тентѫ, тако на(м) е(с) повелѣно видѣти сѧ.

……
Сьбрашѫ же сѧ людїе да идѫ(т) донести тѣло стго ѿца, идошѫ  же и не възмогошѧ двигнѫти тѣло стго, и оскрьбишѫ(с) скрьбиѫ великоѫ, начѧшѧ млити Ба. Тогда прїиде стомꙋ гла(с) , глѧ  съ нбе(с): Възлюбленниче мои, повелѣное тебѣ съврьшити. И абїе двигнѫ сѧ тѣло стго. И начѧшѧ людїе ти звати глас ѡ(м) великѡ(м): Ги, помлꙋи. И поидошѧ ꙗможе хотѣшѧ, и тѣло стое идѣше по повелѣнїю бжїю. И доиде тѣло стго  въ Срѣдечьскыи гра(д). И сътворишѫ емꙋ ковчегь и съзидашѫ емꙋ хра(м), и тꙋ положишѫ тѣло стое прѣпо(д)бнаго  ѡца Іѡанна пꙋстыножителѣ Рылскаго, и къ немꙋ приходѧще недѫ(ж)ни прїемлѧ(т) ицѣленїа. Сицеваа сѫть чюдеса славнаго прѣпо(д)бнаго оца Іѡанна пꙋстыножителѣ за преданнѫѧ емꙋ блг(д)ть ѿ Га нашего Іу(с)  Ха. Бѫди же на(м) помощникь послꙋшаѧщи(м) и чьтѧщи(м) и пишѧщи(м) и мл(с)ть обрѣсти и оставленїе грѣхомь наши(м) въ днь сѫдныи, блгтїю и члколюбїемь Га нашего  Іу(с) Ха, емꙋ(ж) по(д)баеть слава, чьсть и покланѣнїе, оцꙋ и снꙋ и стмꙋ дхꙋ и нинѣ и пр(с)но и въ вѣкы вѣкѡ(м), аминь.