ѿ еѵ(г)лїа, Оуꙁькь поуть въводе(и) въ животь. ѿ ап(с)ла. Не ѡдолеи се ꙁлобою, нъ ѡдолѣи꙼ се блг(с)тїю себѣ. Филимѡ(в), Лоукаваго моужа ины соуть помыслы, ини ре(ч)и, инаа же. раꙁнолична же въса, и противлꙗюще се себѣ. Климѣнтѡ(в). Иꙁмененїе ꙁлобѣ начеткь е(с) на сп҃сенїе. Ниловѡ, Ра(д)уи се ег(д)а добры дѣтели твориши нъ не грьды, ег(д)а ког(д)а потоп лимьни прїимеши. Доудимь, Въсакаа творимаа бл҃г(д)ть соущаство имѣе(т). еже въсег(д)а се творить, а не еже сътворила се е(с). Кѵ̈рїиль, По(д)баеть добродѣтелїю не храмати, ничимже, нъ бити съврьшеннꙋ, дѣлѡ(м) и мꙋ(д)ростїю. и по ѡбоемꙋ съвршити се. Плоутарь(х), Свѣтлость добродѣтели невидима е(с), ꙗко и ꙁлато въ кровѣ(х). пища же сла(д)ка, ꙗвлꙗет се страж(д)оущи(м). добродѣтель накаꙁанїе(м). Иже трѣбоуеть врачеванїемь. аще кого боли(т) зоу(б) или прьсть, то идѣⷮ къ враче(м). аще же ѡгнѣ(м) кто боли(т), то къ себѣ врача ꙁовѣть молѥ се помощи – а иже(м) оуимѣт се оумь, или на чрьнѣи꙼ кроучинѣ падѣть. или бѣсит се, то ни приходѣщаго врача трпить. къ себѣ, нъ вънь иꙁгонить или самь бѣгаеть. ꙁанѣ ѕѣлѡ ѡбоуꙗла е(с) болѣсть, а не раꙁꙋмѣеть ꙗко боли(т). такожде и слгшающїи (!) чл҃ци иже враж(д)оу имѣють нъ (!) ѡбличающыи(х) и(х) и накаꙁоующыи(х) и(х). то неисцѣлны бывають. трьпѣщи(ж)е и прїемлющїи словѡ ѡбличенїа, то кротчаишїи соу(т). аще кто съгрѣшивь да(с) се ѡбличникѡ(м), и стра(с)ть исповѣсть, и ꙁлобꙋ свою ѿврьжеть. и не ра(д)ует се тает се. ни любы(т) невѣдѡ(м) сы. нъ исповѣдаеть и м҃лит се могоуща и нъ (!) прави поуть наставити и накаꙁати. нъ (!) то(м) вѣлика ꙁнаменїа сп҃сенїю наꙁнаменоуют се. Лоукавїи моужїе аще бл҃гꙋю рѣчь съвѣщаю(т), нъ нрава дѣлꙗ невѣрни соу(т). Тако въсхощи жити да ни болѥ тебѣ, могоуще быти. быше бо тебѣ ѡбыдѣли. нъ ни ты боудеши страшнь, мьнши(м) въ себѣ. Аще н҃нꙗшнѥе врѣме добрѣ исправишїи. то и боу(д)щаго врѣменѣ добра чаи. Моужꙋ некоемꙋ насилїе сътворшꙋ плꙋтархꙋ. и бѣгающꙋ и стидѣщꙋ се оусрѣтати се съ ны(м). плоутарⷯь единою срѣ(т). ре(ч) емꙋ. Не тебѣ по(д)бае(т) ѿ менѣ бѣгати, нъ мене ѿ тебѣ. ꙁанѥ неправѣ(д)никь еси. Нѣ(с) по(д)бань ѱоу, ни ѡслѣтꙋ лоукавыи моужъ, аще и бога(т) е(с). лоукавство бо ѥго на немощь приходи(т) аще и пищею раꙁьсе(д)т се. Дїогѥнь видѣ димостенꙗ въ капилїи стидѣща се и бегающа, и ре(ч) къ нѥмѹ дроуже мои. аще болѥ ѿстꙋпаеши ѿ капилї, нъ болѣ въ нѥи еси. Сокра(т). Съи видѣвь дроуга своего, тьщеща се къ писцѣ(м). да быше написали ѡбраꙁь его на камени. и ре(ч) емꙋ ти се тьщиши, да бы камень быль по(д)бань тебѣ. а о семь въскоую се не печеши, да би се ты не оупо(д)биль камѣни. Ѯенофонь(т). Ѡбрадоваше же, ег(д)а лихоимца видѣше въ оубожьстве. а праве(д)никь въ бога(т)стве. хотѣ прав(д)оу, на(д) неправдою поставити. Тимѡ(н), Люто еже е(с) въ инѣ(х) въꙁлюбити добродѣанїе, а въ себѣ имѣти ꙁлобоу. Ѳимонаѯь. Съ же г҃лаше иже тѣлесе(м) пекоут се, а ѡ д҃ши небрѣгоу(т). по(д)бни соу(т) пекоущеи꙼ се о домꙋ о домашны(х) же небрѣгоу(т). Късно починаи꙼ дѣло, почнь въ брьꙁѣ кончаи꙼. Леѡндїи. Бл҃гоч(с)тнѣ по(д)баеть хранити съ граж(д)ьни лоучшее съвѣщати. и сладостїю вла(д)ти. насилїа ничтоже не творити. Лю(д)скаго врага, ꙗко своего врага мнѣти. по(д)роучныкь пїаны(х) не моучити. аще ли не тако живеши, то миши (!) се самь пїа(н). Пїѳаго(р), Сладолюбаць, и тѣлолꙋбаць, и ꙁлатѡлюбаць. и б҃голюба(ц) – единь моу(ж) не можеть быти. а тѣлолюбць вѣлми е(с), и ꙁлатолюбць. ꙁлатолюбцꙋ же ноуж(д)нѡ ѥ(с) правѣ(д)никꙋ быти. неправѣ(д)ник же и къ б҃оу нечастивь, и къ чл҃кѡ(м) беꙁаконикь. Аристотель. Бъ може(т) сътворити, елика хощеть, чл҃к же добрь, иже полъꙁнаа промысли(т). Ѡ моу(д)рѡ(с)ти Соломѡ(н). Лѣствица оутврж(д)ена нъ (!) саꙁ(д)анїе при косновѣнїе(м) не раꙁбїет се. тако и ср(д)це оутврж(д)ено мысльно. въ врѣме свѣта не оустрашит се. Игнатїе.Съврьшени соуще, съврьшенаа моу(д)рьствоуите. хотѣщим же намь добра творити, б҃ь готовь на поданїе. Дїонь римскыи.Въсакомꙋ хотѣщомꙋ к тебѣ что иꙁрѣщи, подаж(д)ь дрьꙁновенїе. аще бо оуго(д)ни ти боудꙋть ре(ч) его, то великоу польꙁꙋ прїимеши. аще же не послоушаеши, нѣ(с) ти пакости. оулючающи(х) же правдꙋ, хвали и ч(а)ти, ꙁамышлꙗем бо и(х) ты славнь еси. неоулꙋчающы(х) же не оукори, ни поноси. мысл(и) бо и(х) по(д)баеть съмотрити, а не по(н)сити. ꙁанѥ оумь не постигнꙋ лоучшаго. Плꙋтарь(х). аще же кого видыши съгрѣшающа. съмотрїи да не ког(д)а и ты въ то не ва(п)дѣши (!). Смѣшно е(с) иже г҃лѥ(т) ꙗко моу(д)рѡ(с) беꙁь ꙋченїа е(с). Беꙁ нѥе бо нѣ(с)польꙁы ѿ инѣ(х) хытростїи. Та бо е(с) вл(д)ка и красота и чинь въсѣ(м). съ по(д)бїемь к(о)гож(д)о исправлꙗеть. Сократь. Ег(д)асъвѣтоуеши помысли прѣж(д)ебывши(х). и приложи ѡна къ н҃нꙗшни(м). тем бо неꙗвлѥна ꙗвлѥны(м) скоро раꙁоумевают се. Иже ꙁлѣ съмотрить о свои(х), къко (!) ѡ чоуж(д)и(х) можеть добрѣ съмотрити. Иже въ се(м) житѣи꙼сце(м) пеци се паче о моу(д)рѡ(с)ти. да въмѣстишїи вѣлико въ мале. оума бл҃га въ малѣ тѣле. По(д)баеть нераꙁꙋмны(х) ѿгнати. Ꙗвлѥно бѡ е(с), иже себѣ потребнаго не ищеть къко (!) иного може(т) оумоу(д)рити. а оумны(х) и могоущы(х) лѣпотою ꙁрѣти. паче инѣ(х) хранити и оугаж(д)ьти имь. Съвѣтни(к) бл҃гы потребань е(с) и силнѣи꙼, въсакого стѣжанїа. Лѣпа бо рѣ(ч), велика ꙁнамѣнїа доброоумїю ꙗвлꙗе(т). Димонаѯь, Чюждїи(м) накаꙁанїемь кажи се самь. и беꙁь печали боудеши ѿ ꙁла. Соломѡ(н) г҃лаше, ꙗко видѣнїе ц҃ра е(с), надь въсѣ(м) соущъствѡ(м). Тако и моу(д)рѡ(с)ть, на(д) въсею бл҃г(д)тїю. Ꙁла(т)устѡ(в). Сицѣ по(д)баеть расмотрити, никоꙗже польꙁа на(м) ѡꙁлобыти инѣ(х). нъ како мы быхо(м) беспоносно дѣанїе оустрои꙼ли. врѣмени же бывшꙋ, въскоре съвещати, еда моу(д)ростїю нашею, инїи лоу(ч)шїи на(с) ꙗвѣт се. Арестидь. Побѣж(д)ати въ бранѣ(х) и простимь многаж(д)и прилꙋчает се. оумо(м) же и мл҃твою и моудростїю. едини ѡдолѣти могоуть, иже добре съвѣщати могоу(т). Съвѣщанїе нѣ(с) ино ничто(ж)е, неѡскоудѣнїе раꙁоума. невѣ(д)ще бо что по(д)баеть творити, или ни. того ра(дї) съвѣщае(м). Волꙗ бо кѡ(г) не въда(с) съмотрити, ꙗже по(д)бае(т) съмотрити. Дїонь римскыи, аще кто прѣж(д)е соуровствѡ(м), что почнеть творити а потѡ(м) раꙁкаав се, раꙁ(д)рꙋшить свое сътворенїе. въ истиню достои(н) е(с) порꙋганїа. Лѣпо бо е(с) живоущи(м) съ правдою. и добро трѣбоующы(м) вѣще(м) дрѣвлѥ съмотрити, ꙗже хотѣ(т). Срамно бо е(с) начети дѣло прѣ(д) словомь. имиже исправивше. оулꙋчити можеть его(ж) хощеть. не испитавше же бес промысла. ничтоже польꙁнаго не сътворите. Пїѳагорь.Ни конꙗ беꙁь оуꙁд(д)ы (!) въꙁможно тврьдо дрьжати, ни блг(д)тства беꙁь оума. Гаїѥ. Съи ѥ(с) цѣломоудрь, иже прѣж(д)е паденїа блюдет се ѿ падѣнїа. нежели оуже паде се жалоуе(т). Епикти(т). Съмотри въ себѣ хытро прѣж(д)е рѣчи, и дѣанїа. иꙁрек бо или сътворивь, не може ѡпе(т) въꙁети ре(ч)ннаго, или сътворѣнна. По(д)бае(т) бл҃гомꙋ моужꙋ пом(и)нати бывшаа, а соущаа творити, а хотѣщи(м) быти пещи се и оутврьж(д)ати. Въсилїе. Цѣломоудрїе, еже при старо(с)ти нѣ(с) цѣломоудрїе нъ немощна похоть, мрт҃вць же не вѣчает (!) се. Никтоже правѣ(д)ныкь, не въсхощи дѣло на ꙁло. Не дивим бо се никомꙋже иже не въꙁмагаѥ(т) сътворити ꙁла. нъ та дѡ(с)тоинь е(с) дивлѥнїа, иже могыи съгрѣшити и не съгрѣши(т). Ꙁла(т)устѡ(в). Иже съ женамы живѣⷮ, съ похотною любовїю, и бесѣдамь и(х) ра(д)уетсе, тъ ѿ ны(х) мънїи е(с). нъ калныи и блꙋдныи, невѣж(д)а въсѣ(м) ꙁлы(м) обьѥ(т), аще бо хоще(т) иꙁрещи, ѿ иꙁгрѣбїи мльви(т). еꙁыкꙋ его прѣѡбраꙁившꙋ се, женскы(м) рече(м). аще же и что твори(т), то съ вѣликою раб(о)тою творить. и не бываеть потребно ни на чтоже ѿ вѣликыи(х) исправлѣн(ї)и. Ѿ лѣствице. Иже оугаж(д)ьеть чрьвꙋ своемꙋ, и побед(и)ти надѣе се блꙋдноую стр(с)ть. по(д)бань е(с) гасещомꙋ ꙁапалѥнїе дрѣвено(м) масло(м). Димократь. Соу(т) нѣцїи градови ѡбла(д)юще, женам же работающе. Антїногѥ(н). Иже прикает се ꙁлы(м) дѣлѡ(м), съ нѣ(с) цѣломꙋдарь. иже въкоусивь грѣховнїе сладости и ꙁла дѣла въꙁ(д)ьрьжит се, по малѣ(х) д҃не(х). Епїкти(т). Иже себѣ не въꙁ(д)рьжи(т), съ несвободнь. Софокли(т), Бывшїи же ѿ добра рѡда, сра(м) и(х) е(с) жити съ стиденїемь. Димитрїе фалирїискыи ре(ч). Дѡ(с)и꙼но е(с) чъстныи(м) юноша(м), въ домоу стидети се родытлїи свои(х). а на поути оусрѣтающи(х) ѥ. а въ поустинїи себѣ. О моу(ж)стве и о крѣпости. Соломѡ(н), Нѣ(с) чл҃коу моудрости. ни е(с) моужства. ни е(с) съвѣта противꙋ г҃вы. Конь оуготовает се въ д҃нь брани, ѿ г҃а же помощь. Сира(х), Крѣпчаишомꙋ себѣ не приражаи се. кое бо причестїе грьнцꙋ къ котлꙋ. съм (!) бо прикоснет се съм (!) же съкрꙋшит се. Ꙁла(т)усть, Ихже ради жити хощеши, тѣхь ради не ѡблени се оумрѣти. Ни оуклонити се по(д)бае(т) ѿ брани, ни паки искати брани. съмѣмь (!), тако бо намь победа свѣтлѥишїи боудѣ(т). и дїаволꙋ побеж(д)енїа смѣшьна. влѣкоми же да станѣ(м) крѣпько. не ꙁовоми же да млчи(м) и жиди(м) врѣменѣ бранна. Страшлива и некрѣпька д҃ша бываеть невѣж(д)аство(м), а не е(с)ство(м). Ег(д)а бо оуꙁроу дрѣвлѥ храбра, а н҃нꙗ страшлива соуща. то раꙁꙋмѣю, ꙗко ѿ е(с)ства стра(с)ти нѣ(с) сїе. е(с)ство бо не иꙁмѣнꙗет се. пакы ег(д)а оуꙁрꙋ дрѣвлѥ страшливыи(х), вънѣꙁаапꙋ храбрьствоующи(х), тож(д)е число дрьжꙋ. понѥж(е) и оученици быше ѕѣло страшливи. прѣж(д)е не оувѣдѣше таины, д҃хвнꙗго дарованїа спо(д)бивше се. Леоньдїи. Леондїи лакѥдемонскы(и) мало имѣе вои иде на перьси. инѥм же рекши(м) емꙋ, къмо (!) съ малѥмы идеши на толикꙋ ꙁемлю. ѡнь же ѿвѣща. съ малѣмь идꙋ, нъ съ хотещими и съ довлѥщими. Льгко онь (!) немощнь си тѣлѡ(м), нъ (!) плькь идѣше. инем же прашающи(м) его, къмо (!) таковыи идеши. ѡн же ре(ч) ꙁа ѿчьство и оумрѣти. А(л)ѯан(д)(е)рь, Семоу идꙋщоу на рать. Аристотѣль ре(ч); дож(д)и съврьшенна въꙁраста, и тог(д)а воюи꙼. Ѡн же ре(ч), бою се да не ког(д)а до савръшена въꙁраста, юношскоую крѣпость испоущꙋ. Плꙋтарь(х). Дарїе перьскы ц҃рь поемь т҃, тьсоущь вои. иде на марафона. Афїнѣи꙼ же единꙋ тисоущꙋ послаше противꙋ емꙋ. поставише же емꙋ воеводы. полꙋꙁила. калимаха. кꙋнегїра. и мльдїада. Състоупившимь плькѡ(м) полꙋꙁиль видѣнїе видѣвь паче чл҃чскаго ѡбраꙁа, и ѡслѣпе. и слеп сы оубы н҃, моужїи. калимах же многыми копїи бодо(м) не падѣ се, нъ стоꙗше мр҃тьвь. коунегїр же, корабль емь перскыи. и оуѥ(с)та бы(с) дѣсница его. и та приклон се ꙁоубы ѥсть его, и вои꙼ его прискочивше ѥше корабь та. и тѣ(м) побѣж(д)ены бывше, дарїевы вои꙼ бѣгающе г҃лаахꙋ Ѡ, соуѥ(т)ное испльченїе. ѡ несъвршенїи троудь. что ѿвѣщаемь нашемꙋ царꙋ. что пошль еси на бесъмр҃тьныѥ съпостати. бодоми не па(д)ють. сѣчемы не бѣгаю(т). единь моужь погоубы въсе вое. Посрѣ(д) стои(т) крьвавь. корѣнїемь желѣꙁныи(м) пѡтврьж(д)ае(м), и не хощеть пасти се. корабници же въскликнꙋше. съ приходить на наше людїи. крьмници вратите се, да пробегнѣ(м) гроꙁы мрьтьвца. О правде Соломѡ(н). Копаеи ꙗмоу по(д) ближни(м) свои(м), въпа(д)ете (!) въ ню. вълаеи꙼ къмень на себѣ повали(т). Лоучше малое именїе съ правдою нежели много бес правды. Въсилїе (!), Иже истинныѥ правды не има(т) лежещее въ своеи꙼ д҃ши, нъ именїе хотѣ въꙁѣти. или дроугꙋ оугодїе по любви, и(л) на(д) ненавидимы(м) масть творе. или силнаго бое се и стидѣ се. тоу сꙋда не може(т) сътворити. платѡ(н), Чъстнь е(с) иже ничтоже неправды не твори(т). Чъ(с)тнѣи꙼ши же е(с) соугꙋбо, иже дрьꙁновенїа никоегоже не да(с), неправдоующїи(м). ѡн бо единого вѣнца достонь е(с), а съ многа. малїи Димостѣнь. По(д)бае(т) соудїамь не прилагати чл҃колюбїа къ ꙁакономꙋ повѣленїю. ни горчаи꙼шы(м) ꙁакона(го) ѡсоуж(д)енїа быти. иже бо или приложи(т) на(д) ѡсоуж(д)енныи(м), или оумалить своее дѣлꙗ кротости, та беꙁакон(а)нь е(с). Плꙋтрь(х). Аще что неправо еси сътвориль. а потом се мниши оутврьдити сътворенное, то соугꙋ(б) кривинꙋ имаши. Москїѡ(н). Оунѥ е(с) право соудившомꙋ поношенꙋ быти ѿ ѡсоуж(д)еныаго беꙁ правди. нежели неправо соудившꙋ(м) е(с)ствѡ(м), по правдѣ поношенꙋ быти. Ипередїи. Двое ради выни чл҃ци ѿ прав(д)ы ѿстоупаю(т). или страха ра(дї), или срама ра(дї). Филимѡ(н). Моужь правѣ(д)никь е(с), не иже не ѡбиди(т). нъ иже ѡбидѣти могыи, тѡ(г) не въсхоще(т). Епикти(т), Аще хощешїи правь соу(д) сътворити. никогоже ѿ стоужещи(х) се твори се ꙁнаенъ ть(к)мо самь пре. Ꙁинѡ(н) сикїискыи въпрошень бы(с). аще можеть чл҃кь ѡбыде инѣ(х) б҃а оутаити се. и ѿвѣща, не може(т) ни помышлꙗе. Филогѡ(н), Ѿ бл҃гаго мꙋжа, ничтоже не чаи꙼ ꙁла. правоков(а)рьн же моу(ж), нѣ весть ѡбыдети. Беꙁмѣстно ѥ(с), аще рѣхѡ(м) (!) дрьжими соу(т) иже нарекоше се иныи(м) правдꙋ подаати. а иже мьꙁдꙋ ѥмлю(т) на неповин(н)ы(х), то ѿноу(д) лꙋкавы соу(т), моужїе съми (!) и бѣсы. а иже на повинны(х), то наполилоувьство. О дрꙋжбѣ и о братолюбы Соломѡ(н). Вынꙋ прикладꙋѥ(т) моужь, хотѣи꙼ раꙁлꙋчити се ѿ дроугь. Лоучше е пища съ ꙁѣлїемь съ любовїю и съ блг(д)тїю, нежели прѣ(д)ложень оупїтень тельць съ враж(д)ею. Не ѡстьви дроуга вѣрьнꙗаго, нови бо не боудѣть емꙋ по(д)бань. Прѣж(д)е ꙁлыи(х) добрїе дрьжи, и николиже ꙁль не боудеши. Враж(д)еванїю коньць вѣж(д)ь, любвы же николиже. Ꙁла(т)уть, Иже дрꙋжит се съ врагѡ(м) царевїѥ(м), то нѣ(с) дроугь ц҃ревы. Болше е(с) въ тмѣ прѣбывати, нежели беꙁ дроуга добра, иже бо дроугы имать, та печалию не побеж(д)ает се. Аще дроу(г) не можеш(и) быти по лꙋбви, къко (!) можеши чюж(д)емꙋ вѣрнь быти. Фотїе патрїархь, Иже любы(т)ненавидѣщїи(х), бл҃жень е(с). а иже ненавидить любѣщы(х), чл҃ко ѡбычно. а иже ненавидить любѣщы(х), се ни ѕѣре(м) (!) не по(д)баеть. Фирми(т). Въ ины(х) мѣроу дрьжи. а въ любви иже болшꙋю чьсть дрьжи(т), съ б҃голюбывь е(с). Дїодо(р) Сїкѥлискыи. Дїонисїю новомꙋ цр(с)твоующꙋ въ сиракꙋсїи. нѣкто пиѳа(го)рїи꙼скыи ꙋченикь. еть бы(с) и ѡсоуж(д)ень, и мысли нъ (!) ц҃ра. вѣдомꙋ емꙋ на посеченїе. испроси врѣме да бы промыслиль о свое(м) имѣнїи. иꙁвѣща испороу(ч)ника дати ꙁа себѣ дроуга своего. ц҃роу ж(е) дивѣщꙋ се, аще е(с) таковь моужь. иже може(т) дати себѣ ꙁа дроуга на посеченїе. ѡн же приꙁвавь своего дрꙋга, пиѳагоранина, ре(ч): Съи꙼ боуды ꙁа мѣ. и таи не оусамнѣв се притече и испорꙋчи се. Писпевшꙋ (!) же часꙋ посеченїа притекоше въси людїе видѣти. аще вѣрнь боудѣть, иже порꙋкꙋ ꙁаставивь. Часꙋ же мимоити хотещꙋ въси ѡчааше се, мнѣще ꙗко не придѣ къ самр҃ти ѡсоуж(д)ени. финитїа же елїко же могыи, тьщаше се текыи. да бише не посекли дрꙋга его дамона въ нѥго мѣсто, и чюдише се въси любвы его. ц҃р же видѣвь съврьшенїе дроужне е(с), ѿпоусти финитїю ѿ осоуж(д)енїа. и скаꙁа ѡбѣма. и пом҃ли се има, да биста его прїела на дроужбꙋ. Плꙋтарь(х). Коннаа хытрѡ(с) на рати ꙁнает се, а дроугь вѣрьнь въ бѣдѣ. Ихже любви ни тврьда, то ѿгнати и(х) не ѡблѣни се. Прѣж(д)е испита(в) моужа люби се съ ны(м), люто бѡ ѥ(с) послѣды ѿгнати его. Сократь Никого(ж)дроугѡ(м) твори, прѣж(д)е да(ж)е не испитаешїи, къко живѣть съ прѣж(д)ны(м) дроугѡ(м). Надѣи꙼ бо се таковомꙋ и к тебѣ томꙋ быти, ꙗко(в) е(с) и къ темь быль. И не скоро дроу(г) боуды, быв же, боуды до конца. Дрꙋга же ищи крѣпко съмысльна, и польꙁꙋ тебѣ ищꙋща о въсемь. Дїѡнь, Еликоже кто имѣе дрꙋговь, толикоже ꙭчїю. имиже ꙗже хощеть види(т). толикоже и оушию, имиже слиши(т) ꙗже дѡ(с)ить. толицѣмы(ж) мысльми помышлꙗе(т), ꙗже емꙋ нъ (!) полꙁꙋ. по(д)бнь е(с) томꙋ, ꙗкоже аще б҃ь оустрои(л) е(с) едино тѣлѡ, а д҃шь много промыслѥщы(х) о нѥмь. Сокра(т), Любыбеꙁго(д)на е(с) по(д)бна ненависти. истина бо въ напастѣ(х)не боите се. Тьщивомꙋ дроугꙋ дѡ(с)ино на веселїе ꙁванꙋ быти, и прїи(т). а при печали и ноуж(д)и съмомꙋ (!) неꙁванꙋ прїити. Мосхїѡ(н). Того мни дрꙋга иже тебѣ любыть, а не еже окр(с)ть тебѣ. Катѡ(н). Ижедроуга печальна бѣгае(т), то ни оу радѡ(с)ти его дѡ(с)и꙼нь бывае(т). Сокра(т). Иже братїю и ѡ҃це ѡставывше, ины(х) ꙁовꙋ(т) на дроужбо (!). по(д)бныи соу(т) свою ꙁемлю ѡставивши(м), а тоуж(д)ꙋ дѣлающи(м). Не прїиѡбрѣтаи꙼ дроуга емꙋже вѣри не имѣши. И дроуга не тог(д)а ищи, ег(д)а ти вѣлика потреба до нѥго е(с). такова бо любы врѣмен(н)а ѥ(с), и неоу(т)врьж(д)ена. Кѵ̈рїи(л). Цр҃ь въвѵ̈лонскы, посла къ кїровїи раꙁличьнїе дары красни. и сїе въꙁь(м) раꙁ(д)ьсть (!) дрꙋжинѣ. Въпрошен же, къко (!) не ѡстави себѣ ничтоже, ре(ч): Мое бо тѣло не може(т) того носити нъ (!) красотꙋ себѣ, дроугы(ж) ꙋкрашени ꙁрѣ, великꙋ славꙋ въмѣнꙗю себѣ имѣти.О мл(с)тини Соломѡ(н). Мл(с)тынѥю и вѣрою ѡчищают се грѣсы. Не рци ѿшь(д) прїидꙋ, и оу(т)ро въда(м). могоущꙋ дн(с)ь добро сътворити мы (!) не веси бо что родить приходѣи꙼ д҃нь. Сирахь. Ѡгнюпламень оугасит сие водою, мл(с)тнꙗ же ѡчисти(т) грѣхы. Ꙁатвори мл(с)тню въ ср(д)цы своемь, и въ скровищы(х) свои(х). и та те иꙁбави(т) ѿ въсакое напасти. и протоу(в) съпостатомь въꙁбрани(т) ꙁа рꙋ (!). Твореи꙼ добро мымоходѡ(м), а своимь врѣменнаа не подае тьта (!) е(с). Василїе Толико ѡбыдишїи, елико могыи даати не даси. Ꙋбогыи пришь(д), ѿиде(т) не оулꙋчивь прошенїа. Бою се х҃е да не и аꙁь ѿ твоею роукꙋ тьщь ѡтидꙋ. иже бо кто не да(с), да не надѣет се въꙁѣти. Не иꙁрьци гла(с) съ рьптанїе(м) дае(с), ꙗкоже мноꙁы творѣть дающе. ни испитꙋи꙼ просѣщаго, или дѡ(с)инь е(с) въꙁетїа, или ны. большее бо е(с) дѡ(с)и꙼ны(х) ради и недо(с)и꙼ны(м) даати. нежели достои꙼ны(х) ѿвр(а)тити се, недѡ(с)ины(х) ради. Едино бога(с)тво мни, тврьдо и некрадомо. еже раꙁдаати богаство оубогыи(м). имже помагати при напасти и при т(р)бовани. Ꙁлао(т)усть, Слѣпць помиловань, вѣсть вѣсти въ цр(с)тво нб(с)ное. иже тльчет се по стгна(м), и въ ꙗмы въпа(д)ет се. Та проводь бываеть на нб(с)ныи въсхѡ(д). Ег(д)а напитаеши оубогаго, тог(д)а мни ꙗко себѣ напиталь еси. Даемаа бо нами къ на(м) въꙁвратет се.. Глють нѣцїи въдаль еса(м). не дѡ(с)ит ти прѣстати тако творѣщꙋ. тог(д)а бо можеши ѿвѣщати, ег(д)а не достанеть. а дондѣже имаши, аще и тмамы еси даль. Дроуꙁыи же алчюще просеть, то нѣ(с) ти ни единого ѿвѣта. Аще стран(н)а не примешїи, ꙗко и х҃а, о семь ты вѣси. аще ли же ꙗко х҃а прїимѣши, не стиди се ногꙋ ѡмити емꙋ. Стѣжанїе мноꙁы дають на не бьдро, а еже собою оугодити просѣщи(м), и съ бь(д)ростїю мл(с)тию творити. и съ любовїю и съ братолюбїе(м), вѣлѥд҃шьны могоу(т) сътворити. Не срамлꙗи꙼ се своею роукою даати нищїи(м). Хс не стидыт се роукы простирати и въꙁѣти обраꙁѡ(м) оубогаго. ты же что стидиши се роукы простирати и даати мл(с)тню. Ниль, Ꙗкоже е(с)ство е(с) свѣтꙋ свѣтити. також(д)е и б҃оу е(с)ство е(с) миловати и ще(д)рити свою тварь. Плꙋтарьхь. Блꙋдномꙋ даати и мр҃твце оукрасити по(д)бно ѥ(с). и ꙁмїю питати и блꙋдомꙋ даати, по(д)бьно е(с). ѿ ѡбою ничто добромылно не раж(д)аѥт се. Дїмостень. Дїѡнисїе ц҃рь слышѥ гоудца добре гоудꙋща, ѡбеща се даровати емꙋ капꙋ ꙁлатоу. Оутроу же бывшꙋ, прїидѣ гоудьць просе ѡбѣщннаго. ѡнь же ѿвѣща: ты въчера гоудѣ, въꙁве(с)лиль ме еси пѣ(с)(н)ми. аꙁ же також(д)е въꙁвеселил те еса(м) ѡбѣщанїе(м). н҃нꙗ же ѿ(т)идѣ (!) ѿ оушию моѥю веселїе, а ѿ тебѣ оупованїе. Мо(с)хїѡ(м). Иже блꙋдъномо въдаси себѣ, ѡсꙋж(д)аеши. ꙗко еже въ добрѡ(м) не д҃шегоубно ти е(с). Иже богатомꙋ даеть, нѣ(с) далѥче въмещꙋщаго въ морѣ именїе. приливающаго въ поучин(н)ѹ рекꙋ. Не поноси дроугꙋ еже в(д)а(а)си, боудеши бо ꙗко не въда(в). Могыи даꙗти дарь не к(а)сьни нъ скоро даи꙼. вѣси бо ꙗко именїа чл҃кꙋ не оу(т)врж(д)ена соу(т). Дїѡнь. По(д)баеть съгрѣшающаго м҃ловати и накаꙁовати и оучити. добро хвалити и любыти. Овласти и кнежствꙋ Сыра(х). Ꙗковь же боудѥ(т) соудїа людѣ(м), такови же и слоугы его. ꙗкоже властелинь града, також(д)е и живоущыи въ нѥмь. Властелинь да не грьдит се властїю своѥю, да не како ѿпадь, поущїи боудеть нищаго. Се е(с) ц҃рь истиныи, иже въꙁ(д)рьжит се ѿ ꙗрѡ(с)ти. и ѿ ꙁависти, и ѿ сладости, въсе водить по(д) ꙁаконо(м) б҃жїе(м). и оумь свои съблюдѥть свобо(д)нь. и не да(с)ть владати на(д) своею д҃шею вл(д)чьствꙋ сладостномꙋ. Того бы(х) нарекль ц҃ри. ꙁемли и морꙋ и градовѡ(м) и вое(м) и люде(м). иже бо оумь приставить на(д) стра(с)тми д҃шевны(м)и, та крѣпко можеть вл(д)а(а)дати на(д) чл҃кы съ бж(с)твныи(м) ꙁаконѡ(м). и быти по(д)роучныко(м) свои(м), съ васакою кротостїю беседꙋе по въсѣмь градѡ(м). а иже мнить, на(д) чл҃кы имѣти власть. и ꙗрости и боуести, и сладости работае, то прьвеѥ боуде(т) въ по(д)смѣхь лю(д)ѥмь. ꙁанѥже ꙁла(т) вѣньць носить и оураше(н) (!) мноцѣнны(м) (!) каменїемь, цѣломоу(д)рїем же не вѣнча се. тѣлѡ его хламыдою покрито пр(о)савте се, д҃ша же его скврь(н)на остави се. о томже нѣ вѣсть како вла(с)ть свою исправити иже бо на(д) собою не оумѣеть владати, како инѣ(х) можеть вѣсти къ бж(с)твномꙋ ꙁаконꙋ. Ег(д)а ц҃рь непорочнь боудеть въсе(м) нравѡ(м), тог(д)а можеть съ вѣликою властїю. моучити и пращати въсѣ(х) соущы(х) по(д) ни(м). Іѡаннь Дамаскі̇нь, Та е(с) вла(с)тѣли(н) истинныи, иже себѣ испитае(т) и расꙋж(д)аеть. свою съвѣсть горькаго соудїю на(д) собою поставлꙗеть, а по(д)роучникѡ(м) свои(м) съгрѣшающи(м) ѿпоущае(т). Плꙋтарь(х), Цра вѣнць моу(д)ра не творить, оум бо цр(с)твоуеть.Врипи(д) (!) Бога(т)ство и цр(с)тво, м(н)оꙁѣ(х) има(т) ꙁавидѣщи(х). соу(т) же дрꙋꙁы, иже въдавше се властѣ(м). хотѣли бише едини быти оу ни(х), а иномоу не дадѣ(т) приникнꙋти. Алеѯан(д)рь. Съ въпрошень, котори ц҃рь лꙋчши е(с), ѿвѣща. иже дрꙋжинꙋ дарованїемь ищеть. а врагы бл҃годарѣнїемъ примираеть, слꙋги же свое кротостїю и любовїю. Съ въпроше(н) бывь. къко (!) въꙁможно съ правдою жити, и ѿвѣща. ꙗкоже при ѡгны. ни велми се приближити да не ѡжеже(т), ни далече ѿстоупати да не ꙁыма не постигнѣ(т). Солѡ(н). Влада(и) прѣж(д)е оучинив се по(д) властїю. Оучив бо се томꙋ власти боудеши и ты хытрь. Сократь. Пеци се ѡ людѣхь, и съмотри беꙁпрѣстан(н)о. како бы и ти вла(д)ль на(д) ними радостно. вѣси бо ꙗко та дльго владае(т), иже людѣмь оугаж(д)аеть. а дроу(г) дроуга ѡбидѣти не даи꙼. ни ѡбыдимаго не прѣꙁри(и), нъ мотри. (!) имже лꙋчшее и частнеишее боудѣ(т), а прость и беꙁь ѡбыди. Агаѳѡ(н). Кнеꙁꙋ д(с)(т)ѡи꙼ть три вѣщи въспоминати. Прьвꙋ ꙗко на(д) ч҃лкы владае. вторꙋ ꙗко ꙁаконь емꙋ варꙋчень ѿ б҃а. третїа же ꙗко власть сїа врѣмен(н)а соущїи ислѣвае(т) (!). Црь Филипь. Цреви сїе дѡ(с)и꙼нно въспоминати. ꙗко члкь сы власть въспрїель е(с)т равно б҃оу. да бы бж(с)твнаа и лꙋчшаа въспрїель. и беꙁаконїе ѿметае, моудрости же чл҃чскые потрѣбоваль. Агапи(т), Плтскыи соущьство(м) равань е(с) въсѣмь чл҃кѡ(м) ц҃рь. властїю же сънновною (!) по(д)бнь б҃оу вышнѥмꙋ. не имат бо на ꙁемли вышшаа себѣ. Дѡ(с)и꙼т же емꙋ не грьдети се, ꙁанѥ тлѣннь е(с). ни пакы гнѣвати се ꙗко Бь е(с). по ѡбраꙁꙋ бж(с)твн(о)мꙋ ч(с)тнь ѥ(с), нъ съ прстны(м) обраꙁѡ(м) смѣшень ѥ(с). Димократь. Лоукавыи е(с)ствѡ(м) власть прїемь много ꙁла и насти (!) твори(т). Люто бо е(с) и горко, иже ꙁлїи на(д) добры(м)(и) ѡбла(д)ють и несъмыслнїи на(д) моудрыми. Лютѣ бѣсноующим се ножь дати ѡстрь, и люкавомꙋ вла(с) и силꙋ. О лъжи и о клѣтвѣ Ꙁла(т)усть. Мноꙁы чл҃цы по свое(м) грѣсе побараю(т), а тоуждїи ѡсоуж(д)ають. Маѯїи(м). Клѥвѣщꙋщомꙋ на дроуга въ твоꙗ слоуха, оуста ꙁагради. да не соугꙋбь грѣ(х) съ нимь съгрѣш(и)ши. и себѣ поꙋчаеши къ ꙁлѣи꙼ стра(с)ти. ѡномꙋ не въꙁбранꙗе на дроуга клѥвѣтати. Сократь. Шъпьтника и клевѣтника моу(ж)а не прїими. не добромыслїем бо сїе творить. ꙗкоже тоуж(д)ꙋ таинꙋ ѿкриваеть прѣ(д) тобою, також(д)е и твою ѿкрываеть прѣ(д) инѣмы. Нелепи(д), Съ бы(с) воевода и пришь(д)ше вои꙼ его клеветаше на дроуга своего храбра соуща, г҃люще. ꙗко при на(с) хоулꙋ на те г҃лаше. Ѡнь же ре(ч), аꙁь храбрьство его видѣвь и свѣ(д)телствꙋю о нѥ(м). Хоули же его не слиша(х) не слыша(х) не имꙋ вѣры. Филимѡ(н), Иже клеветанїе прѣтрпи(т), крѣпли е(с) въсѣ(х). аще бо ѡклеветае(м) не творит се ни слꙋшае. то ѡклеветающомꙋ горчаи꙼ше е съм҃рти. Дїогѥнь. Мноꙁы вещьшее ꙁло прїеше ѿ клеветникь, неже(л) ѿ ратникь. Дїонисїе ц҃рь. Съ слишавь ц҃рь. ꙗко два юноши много мльвита на нь и на цр(с)тво его въ пирꙋ. пославь приꙁвавь и(х) на ѡбѣдь. видев же единого ѡпивша се, и много соуетїе г҃люща, а дроугаго съ страхѡ(м) пїюща и са блюденїемь. ѡного ѿпоусти ꙗко е(с)ствѡ(м) пїаница бы(с). а ѡного посѣче ꙗко ꙁлооумника, и волѥю блѥдѣща. О ласканїи Ꙁла(т)оусть. Ег(д)а прѣмѣнѥнїе боудѣть ѿ бога(т)(с)ва на оубожаство. тог(д)а и лица ласкающы(х) иꙁмѣнꙗют се. тог(д)а ликь лицѣмерїа и(х) ѡбличает се. и хытрость и(х) ꙗвлꙗет се. тог(д)а и оуста и(х) ѿврьꙁают се. Еꙁыци, иже при власти его хвалꙗхꙋ. ти тог(д)а хоулити начноу(т), г҃люще ск(в)рьнныи крьвопїиць. лꙋкави прѣлюбодѣи꙼. не того ли хвалеще ласкасте вчера; не то ли роуце лобиꙁа(а)сте; и прѣ(д) ногама его валꙗасте се; не г҃мь ли того ꙁваасте; и лицемѣрїе бѣше въсе. н҃нꙗ же прїиде времѣ. ѿврьгохѡ(м) лицемѣрїе и ꙗвихѡ(м) се къцы (!) оумѡ(м). Плꙋтарь(х). Ласканїе по(д)бно е(с) щитꙋ нетврьдꙋ, шарѡ(м) оукрашенꙋ. на ньже ꙁрети слатко, потребы нѣ(с) въ нѥ(м) ни единое. Дрьва ѡгнь растеть ѡ нѥгоже истлѣн(н)а соу(т). Бога(т)ство же питаеть ласкающыи(х), ѿ ни(х)же нѣ(с) польꙁы никаковїе. Димостень. Ꙗко(ж) ахѳеѡ(н) свое ѱе въскрьмивь, ѿ ны(х) сънѣдень бы(с), також(д)е и ласкателїе своего питатиелꙗ сънѣде(т). Да ꙗко и врагы ꙁлы ѿгони ласкающїи(х). О бога(т)ствѣ и оужстве (!) Ꙁла(т)оусть. Ꙗкоже ѿ многаꙗденїа раж(д)ьет се ѿтокь. и ѿ ѡтока ѡгнь. и ѿ ѡгнꙗ съм҃рть, також(д)е и ѿ многаго бога(т)ства несъмысльны(м), беꙁьꙋмїа и шетанїа прибываю(т). Грїгорїе ни(с)кы. ч(с)тнѣе е(с) мало имѣти съ добрѡ(м), нежели многѡ съ ꙁло(м). Филимѡ(н). Красота бога(т)ства, не въ скровищыи(х) ꙁнает се. нъ вънег(д)а помагаеть требоующїи(м). Иже желаю(т) многаго имѣнїа и сили, ты своꙗ лѣта истащаю(т) и живѡ(т) погоубе(т). не лѣпо би и(м) живо(т) свои щедѣти, нежели тѣ(х) въꙁысковати. Плꙋтарь(х), Ни конꙗ беꙁь ꙋꙁ(д)ы невъꙁможно тврьдо оудрьжати, ни бога(т)ство беꙁь раꙁꙋма. Моужь страшливь на себѣ носить ороужїе, також(д)е несамыслныи, на се стѣжанїе имѣеть. Дїмокра(т), Бога(т)ство е(с)ствное исплни(т) се хлѣбѡ(м) и водою, и простою ѡдѣж(д)ею. А иже лишъшаа желаеть, то дшꙋ свою моучи(т). Дїѡгѥ(н). Съ въпрошень ѿ нѣкы(х), въскоую ꙁлатѡ бледо ѥ(с), ѿвѣща. ꙁанѥ мноꙁы на нѥго помышлꙗть. Менань(д)рь, Иже простирае(т) роукꙋ на ꙁлаѿиименїе (!). аще и не мльвить, нъ ѡбаче лоукава мысль. Лѹкїань. На ꙁемлю прїидѡ(х) нагь, наг же и подь ꙁемлю ѿхож(д)оу. и что въсоуе троуж(д)аю се, нага ꙁре коньца. Фїлостїѡнь, Аще и могыми ꙁемлꙗмы ѡбладаеши при животѣ. оумрь же, трыми лактми боудѣши вл(а)дніи (!). Дїмостень рито(р), Съи꙼ видѣвь нѣкоего ꙁлатѡлюбца къ гробоу носима, ре(ч). таи живь бывь, жить житїемь житеи꙼скы(м). и н҃нꙗ въ житеи꙼скыи(х) его иныи꙼ живоуть. Феѡкри(т), Богатїи ꙁлатолюбци, и срѣбролюбцы. не владаю(т) на(д) свои(м) имѣнїемь, нъ хранителїе соу(т). О оудобїи Соломѡ(н), Бога(т)ства и оубожства не даж(д)ь мы г҃и. нъ сътвори ме ꙗко(ж) по(д)бна и оудобьна. да не ког(д)а наситивь се льжь боудꙋ и рѣкꙋ кто мѣ видить. или ѡбьоубожа(в) оукрадꙋ, и ꙁакльнꙋ се имене(м) б҃жїемь. Ꙁла(т)сть. Лоучше хлѣбь съ солїю въ мльчанїи и беꙁ печлїи (!). нежели прѣ(д)ложенїе брашнь многоцѣнны(х), съ мѣтеже(м) и млвою. Клїмень(т), Въсакое прѣꙁ мѣрꙋ недобро ѥ(с). Филонь. Не ѡбоучаи꙼ рабь свои(х) гладꙋ, ни паче ситости ꙗдѣнїю. гладꙋ бо въследꙋеть ть(т)ба. многопитанїю е(ж) беꙁоумїе. Москыѡ(н), Болше ѥ(с) въ хоудїе риꙁы одѣваемꙋ радовати се, нежели въ могоцѣнные съ печалїю. О мл҃тве Ап(с)ль, Страж(д)ет ли кто въ ва(с) да м҃лить. ра(д)ует ли се да поѥ(т). боли(т) ли кто въ ва(с). да приꙁове(т) попы(и) цр҃ковные да пом҃лет се ꙁа нѥго, помаꙁавше маслѡ(м) въ име г҃нѥ. ибо мл҃тва вѣрны(х) страж(д)оущаго сп(с)еть. Ниль. Прѣж(д)е м҃ли се ѡ обще(м) сп҃сенїи, и пото(м) ѡ свое(м). Евсевїе, Ꙗко(ж) пьтенць крила(т) съ летенїе(м) по въꙁдꙋхꙋ высоко пари(т). також(д)е и бл҃гоч(с)тивь моужь, ѿ ꙁемлнаго къ неб(с)номꙋ, мл҃твою прѣложит се. Алеѯан(д)рь, К томꙋ иног(д)а аньтипатарь, клѥветаше на м҃трь его, великы клѥветиі. и та ѿвѣща. антипатре не веси ли ꙗко ꙗко (!) едина каплꙗ сльꙁь м҃терны(х), многа прѣгрѣшенїа и клевѣты ꙁаграды(т). Епикїрь, Аще бы б҃ь послоушаль мл҃твы въсѣ(х) чл҃кь, и твори(л) въ слѣдь и(х) м҃лѥнїа, то въсь рѡ(д) чл҃чскы погыбал бы. ꙁанѥ многа ꙁла дроу(г) на дроуга молѥ(т). О ꙋченїи и о бѣсѣ(д) Ап(с)ль. Боуды всакыи чл҃кь скорь на послꙋшанїе, и къснь на г҃ланїе. и аще кто слово(м) не сагрѣшае(т), та съвршень е(с), могы ѡбоуꙁ(д)ати въсе тело свое. Бгослѡ(в), ꙋчеи꙼ оучи нравомь а не словѡ(м). оучеи же словѡ(м) тачїю а дѣла его несаврьшена, то хромь е(с). а иже еꙁыкь доброг҃лывь има(т), дѣла же его недобра ни накаꙁана. то непрїетнь е(с). нъ та прв(ы)и иже о добродеꙗнїи мала да г҃леть, а многа дѣемаа добрѣ да ꙗвлꙗе(т). прилагае(т) вѣрꙋ къ своемꙋ оученїю житїемь своимь. Исїдѡрь. Добро житїа беꙁ ꙋченїа паче полꙁꙋеть, ѡв же аще и въпїеть то болѥ съмоущае(т). а емꙋже и слово и добро житїе съвакоуписта се, тѡ(г) д҃ша оукрасите въсакы(м) обраꙁѡ(м). философскыи(м) и б҃говидѣнїемь. Москїѡ(н), Ег(д)а бесѣдꙋеши съ иными. прѣж(д)е съмотрїи аще болши тебѣ е(с) съповѣсникь та. или хоужшїи или равьн ти. Аще(ж) раꙁꙋмеѥши лꙋчшаа себѣ, покори се емꙋ аще ли хоуж(д)шаа, покори его. аще ли равьнь тебѣ, единомысли съ ны(м). Сократь, По лꙋкавѣ моужи не присе ни помагаи꙼ емꙋ. мнѣ(т) бо тѣ людїе таковаж(д)е ꙗци соу(т) и ты, по ни(х)же побараеши. О любомоудрїи и о ꙋченїи чедьꙀла(т)сть. Ꙗкоже дрѣвосъдцїи по(д) льсо(м) ровы копають, да не поврѣж(д)ь тю и(х) животьнаа. також(д)е и ꙁакон(ы)и оучитель съ ваниманїе(м) накаꙁꙋеть чеда, да быше въдроуꙁыли въ ср(д)це и(х) стра(х) б҃жїи. и лѣторасль прьваа ѿ ни(х) растѣ(т). ꙗко печа(т) прилѥплꙗет се къ ме(г)кꙋ воскꙋ. також(д)е и оученїе моудрыи(х), и оу млади(х) детѣ(х) ѡбраꙁꙋѥт се. добро съꙁ(д)ан(н)а бо, и мокра е(с) юность. имже жестоко не ꙋмꙋчит се. Съи꙼ ре(ч), нелѣпо наꙋченꙋ съ ненаꙋченныи(м) бесѣдовати, ꙗкоже и треꙁвꙋ съ пїанѣ(м). Съ ре(ч) въпроси(м) что сла(д)ко въ все(м) жит(ї)и. и ре(ч). оученїе и накаꙁанїе. и вѣ(д)нїе прьвые вещїи. ѡ богаⷮстве и оубожьстве Сира(х) Въспомѣни гла(д) въ врѣме ситости. оубожїе же и скоудость, въ врѣме бога(т)ства. ѿ оутра до вѣ(ч)ра прѣменꙗет се врѣме. Съи꙼ ѥ(с) раꙁоумни крьмникь. иже ни п(о)радости грьдит се, ни при печали оуничижает се.
189. Бгословь, Не по(д)смѣи꙼ се паденїю ближнꙗго. нъ прїими съ оусрдїе(м), ꙗко можешїи. и подаж(д)ь рꙋкꙋ долѣлежещомꙋ. Нѣ(с) дѡ(с)и꙼но грьдети на(д) въсакы(м) падающи(м). и на(д) съгрѣшающи(м) ч҃лкѡ(м). и аще же и ꙁапеть боудеть врагь твои꙼, не ра(д)уи се, аще и моужь крьвы е(с). Ег(д)а оуꙁриши грѣшна, въ славѣ и бога(т)ствѣ. тог(д)а плачи на(д) ни(м) мачь б҃жїи остри(т) се на нь. Ег(д)а твоꙗ вещь исправлꙗет се тог(д)а чаи꙼ иꙁменѥнїа. пакы ег(д)а ѡбстоупить те напасть нечаема, тог(д)а надеи꙼ се болшемоу житїю. Сократь. Никомꙋже напасти, не поноси, обще бо житїе се. и невѣдомо бо ѥ(с) что хощеть быти. Мни ꙗко ничтоже чл҃чско тврьдо. сице бо ни при славѣ въꙁвисиши се, ни при печали ниꙁиши се. Іѡсїфь. Ꙗко(ж)е беꙁꙋмны соу(т), иже грьдеть ѕѣло, съпостати победивьшеи꙼, також(д)е страшливи и немоу(ж)ствни соуть, и ѿноудь смѣрет се и боет се ег(д)а побѣж(д)ени соуть. въ ѡбоих же скора прѣменѥнїа бывають. О ꙗрѡсти и гнѣвѣ Ꙁла(т)усть. Ни на чтоже тако тьщим се въꙁьлюблѥнїи, ꙗко на ѡчищенїе ѿ ꙗрѡсти съматрающе въсѣ(х) къ себѣ чисто. аꙁ бо ꙁаповѣдаю въмь (!) да вѣсте ꙗко ни мл҃тва, ни мл(с)тнꙗ, ни пѡ(с), ни причещенїе с҃ты(х) таи꙼нь. ни инно ничтоже таковое можеть прѣ(д)ставити на(с) въ ѡнь д҃нь страшныи, аще въспоминанїе ꙁлобѣ дрьжи(м). въсакь иже ре(ч)ть, ꙗко та грѣ(х) е(с) вѣщьшїи въсакого грѣха. та въ истинꙋ оулꙋчи(т) правдꙋ. ничтоже бо тако ненавидить б҃ь и гнꙋшает се, ꙗкоже чл҃ка поминающа ꙁлобꙋ и хранеща гнѣвь. Еѵгрїе, Иже постит се ѿ пище и ѿ питїа, гнѣв же беꙁ съмысла въꙁ(д)вижеть, съ по(д)бнь е(с) кораблю по воде плавающꙋ, крьмника имоущꙋ дїавола. Плꙋтарь(х). Ꙗрѡ(с)ть по(д)бна е(с) коучцѣ. ꙗко(ж)е ѡна слѣпо щене раж(д)ьеть, також(д)е и ѿ ꙗрости вини исходѣть. Димитрїе. Иже не можеть крѣпко дрьжати печаль, то ни радости не трьпить. О мльчанїи Соломѡ(н). Иже храни(т) оуста своꙗ, храни(т) д҃шꙋ свою. Лоубеи꙼ животь свои꙼, храни(т) оуста своꙗ. Сира(х) Моудрость съкрьвена и скровище не ꙗвлѥно, каа польꙁа въ ѡбои(х). Ꙁла(т)усть. Моудрѡ(с) г҃леть, слышаль ли еси слово да оумрѣть с тобою. оугасї е и погриꙁї е, не въдаи꙼ емоу иꙁити ѿ себѣ. ни двигнꙋти се ни мала оубїи. иꙁре(ч)нное ꙁабитїю прѣдаи꙼, да боудѣши по(д)бнь слишещїи(м). Мноꙁы чл҃ци, ег(д)а иꙁрекоу(т) таины. молѥт се слышавшомꙋ, и ꙁаклинꙗю(т) и да не бы неиповѣда(л) (!) никомꙋ слова того. тѣмь ꙗвлꙗюще, ꙗко непотребнꙋ вѣщь сътворише, и дѡ(с)и꙼нꙋ хоулѣ. Аще бо ти дроуга м҃лиши не исповѣдати ре(ч)наго, почто ты не тако съблюль еси таины. нъ испоустиль еси иꙁ ꙋсть. Плꙋтарь(х), Иже хощеть таи꙼нѣ своеи не проꙗвленѣ быти. къ единомоу иꙁрьци ср(д)чномꙋ дроугꙋ. или таковаго не имѣе дроуга, не иꙁрци никомоуже. ѡле како вѣры ищеши оу иного, еже съмь (!) себѣ не оухрани (!) еси. Ꙁинѡ(н). Моучи(м) ц҃ремь димитрѡ(м). да бы проꙗвиль которою таинꙋ ѿчьства своего ноудимь сы оухапїи еꙁыка своего, и раꙁьжвавь плюнꙋ на нь. Ꙁлаго моужа мльчанїа блюди се, ꙗкоже ѿтаи꙼ (!) оуꙗдающа(го) ѱа. Съ въпрошень кто таи꙼нꙋ можеть съхранити, и ѿвѣща. иже оугль горѣщь можеть въꙁложити на еꙁыкь. Питако(с). Иже хощеши творити прѣж(д)е не г҃лы, еда како не оулꙋчивь порꙋгань боудеши. Некомоу понашающоу емꙋ ꙗко вонꙗе(т) емꙋ д҃ша, ѿвѣща. многы бо таини иꙁьгнили въ мое(м) грьлѣ.О мнѡ(г)питанїи и мъчтанїи Кто можеть тако бл҃гоч(с)тїе ѡбрѣсти, ꙗкоже х҃с скаꙁал ны е(с). Аꙁь рече ѿць аꙁь брать, аꙁь жены(х), аꙁь дѡмь, аꙁь крьмытѣ(л), аꙁь рыꙁи, аꙁь корѣнїе, аꙁь основанїе, въса ꙗже хощешїи аꙁь еса(м). не требоуи꙼ никогоже аꙁь слоужꙋ ти, аꙁ ти дроу(г), и глава и брать, и сестра и м҃ти, тькмо любы се съ мною и мои боуды. аꙁь оубогь и нищь тебѣ ради. въ неб(с)ныи(х) м҃лю ꙁа те ѿца. и на ꙁемлю м҃лтвныкь еса(м) пришаль к тебѣ ѿ ѡ҃ца. въсе мы еси ты. и дроугь и наслѣдьникь и оудь. къ семꙋ что хощеши въскоую любѣщаго ѡставивь ѿвращаеши се. въскоую мирꙋ пристрадꙋеши, некоаж(д)о ли хытрость коньць има(т). покаꙁати ми житїа сего коньць не можеши; Соуѥтны(х) соуетны(х) бо въса соуѥта. Кѵрїи꙼ль, Въ смѣтене оумѣ ни помысль добрь раж(д)ает(с)е. ни б҃жїи страхь. ни бл҃г(д)ть бываеть въ нѥ(м). Гѥрїмь. Съи꙼ оуꙁре моужа на н҃бо ꙁрѣща, и ꙁвѣꙁ(д)ы питающа, въ пропасть въпадша ре(ч). по дѡ(с)ианїю еси прїель. иже ꙁемльна(а) не вѣси, а нб(с)наа испытаеши. Ст҃го Въсилїа. ѡ мнѡ(г)имѣнїи. Иже чюжь(да)го желае(т), та по малѣ(х) д҃нѣ(х) по свое(м) ридае(т). Иже чюж(д)аа грабе и мл(с)тинѣ тѣми твореі, съ не помиловань. нъ ѡбидливь и съгрѣшае грѣхь послѣ(д)ныи. аще бо мл(с)тинѥ творити си(х) грабиши, то пом҃лꙋи прѣж(д)е тѣ(х) ихже еси грабы(л). не та бо е(с) бл҃гоч(с)тывь, иже многы милꙋеть, нъ иже никогоже ѡбыди(т). Ꙁла(т)усть. Иже своего желанїа не може(т) оуставити. аще и въсѣ(х) ꙁемль ꙁла(т)ѡ съберѣть то оубогь е(с). Аще Каи꙼нь втораа приносивь. и не прѣѡбыдѣвь никогоже, великоу моукꙋ прїѥ(т). къко (!) мы оубѣжи(м) гнѣва б҃жїа, ѿ въсхыщенїа и ѿ ѡбыди приносѣще мл(с)тыню. единомоу бо молещꙋ а другомꙋ кльнꙋщꙋ, каа польꙁа быва(т). Медвѣды бо и вльцїи, ег(д)а прїимоу(т) ситость. насытивше се тою пищею ѿходѣ(т). хыщникꙋ же нѣ(с) ситости. б҃ь же того ради съꙁ(д)аль ѥ(с) роуце намь да быхѡ(м) помагали дроугь дроугꙋ. аще бо хоще(м) потребовати и мы на вражїе граблѥнїе, то лоучше ѿѥтѡ(м) имь быти. Богатїи немл(с)тывїи, поуще ѥ(с) ѡсоуж(д)еннаго. ѡн бо свѣꙁань ѥ(с) тѣлѡ(м) а съ д҃шею. тко (!) свѣꙁана видить и не пом҃лꙋѥ(т). а съ ꙁанѥ свѣꙁань е(с) не ноуж(д)ею, на (!) волѥю иꙁволиль оуже. Сокра(т), Съ въпроше(н). которы ꙁвѣрїе соу(т) поуще, ѿвѣща еже ѿ живоущы(х) въ селѣ(х). медвѣды и лютїи ꙁвѣрїе. а въ градѣ(х) мытарїе и клевѣтници. О части родитѥ(л) Иже чеда не наꙁꙋѥ(т) (!) цѣломоу(д)рїемь, и ꙁакоными вѣщмы. то не родителїе соу(т), на чедооубыцѣ. паче же и тѣ(х) вѣщьше, оубїица бо съм҃рти прѣдавае(т) тѣло а ѡны, д҃шꙋ. Про(к)пїе. Елико блг(д)ти въꙁ(д)ати чеда родителѥ(м), никтоже може(т) иꙁрещи. на (!) тог(д)а пораꙁꙋмѣеть кто, ег(д)а са(м) боуде(т) ѿць. имже бо любовь имѣеть ка свои(м) детѣ(м), вѣсть къци (!) соу(т) были къ нѥмꙋ родытелїе. По(д)бае(т) с҃новы рабоу быти ѡ҃цꙋ своемꙋ, нежели съмомꙋ (!) рабꙋ. с҃нь бо е(с)ство(м) рабь е(с) ѿцꙋ, а рабь ꙁаконѡ(м). Соло(н) Къ с҃нꙋ и къ дащери, не льсти се нь ѡсклабеи꙼ се да не послѣди просльꙁыши. Вїась. Съ въпрошень, что въ се(м) жити беꙁ страха ѥ(с). и ѿвѣща, съвесть права. Ѡ скоро въꙁвращьши(х) се и о покаанїи Соломѡ(н). Ꙗкоже пьсь въꙁвращающи(х) се на свое блювотини, въꙁнѣнавидени соу(т). також(д)е и беꙁьоумныи꙼ своею ꙁлобою, въꙁвращает се на свои грѣхь. Сира(х). Моужь посте се ѡ свое(м) грѣсе, и пакы ходѣ и таж(д)е творе мл҃тви кто послꙋшае(т). Ꙁла(т)усть. Никтоже коупць въпадь въ раꙁбоиникы, или въ ин(о)го плѥменїе. и иꙁгоубивь коуплю прѣста ѿ коуплѥ. на пакы по морꙋ и по селѡ(м) ходи(т), и ищеть стѣжати хоте прьвое бога(т)ство. Многаж(д)и видѣхѡ(м) горцѣ па(д)шее се, и по падѣнїи вѣнчавшее се. и вои꙼никь многа(ж)ьды бѣжавыи, послѣди побѣдьни(к) ꙗви се, и ратникомь ѡдолѥвь. мноꙁи же и х҃а ѿмѣтавшеи꙼ се, страха ради м(ч)нїа. въꙁыскаше пакы въꙁвратити. и м(ч)нїа вѣнцѣ(м) оувеꙁше се ѿтидоше. аще же къжьдо и(х) прьвою ꙗꙁвою, ѡчаавше се полекоше, то како быше приѡбрѣли прьваа бл҃гаа. О грѣсе и о исповѣданїи Сира(х). Бл҃гаа бл҃гыи(м) съꙁ(д)ана быше испрьва, також(д)е и грѣшны(м) ꙁлаа. Ст҃го Въсилїа. Многащи млветь на ц҃ра. ꙁа соудїю жалꙋюще на нь, ꙗко беꙁꙋмїе(м) не исправлꙗеть лю(д)скые вещи. аꙁ же г҃лю ꙗко не владꙋющаго беꙁꙋмїе(м), нъ нашь грѣ(х) искривлꙗеть въсе. тъ бо въса ꙁлаа привѣ(д) не ѿиндѣ, нъ на на(с) иꙁлїа се печали множьство. тѣ(м) аще авраамь ѡбладае(т) нами, или моѵ̈си. или дв҃дь. аще ли соломѡ(н) прѣмоу(д)рыи, ꙁанѥ мы съгрѣшае(м), то не оубежи(м) выни. Еже бо г҃ле(т) писанїе. въда(х) вамь по ср(д)цꙋ вашемꙋ кнѥꙁа. еже нѣ(с) инь раꙁвѣ съ. Ако прѣж(д)е съгрѣшивше. також(д)е прѣ(д)стателѥ оулꙋчивше. Аще и ѕѣло правѣ(д)ныкь ѥ(с) кнѣꙁь или ц҃рь. и до моѵ̈сеи꙼скаг(о) добродѣанїа прїети г҃ль. то како можеть правда того единого, покрити прѣгрешенїа въсѣ(х) по(д)роучникь. Питагорь. Грѣха своего не словомь покриваи꙼, нъ ѡбличенїемь исцѣли. О чрѣꙁьситости и чревꙋоугаж(д)ающїи(х) Ст҃го Въсилїа. Ѿ тльстїе пище, ꙗкоже пепелныи ды(м) пꙋщае(м). ꙗкоже ѡблакь прѣсецае(т) ст҃го д҃ха сїанїе, не да(с) въместити се въ нашь оу(м). Ꙁла(т)усть. что рекоу(т) иже васъ д҃нь почивають на ѡдрѡвѣ(х), и на постелꙗ(х) лежеще. и съвакꙋплꙗюще оу(т)рѡ съ ѡбѣдо(м), и ѡбедь съ ве(ч)рею. и чрѣво раꙁшираю(т), многоцѣними пищами прѣпльнꙗюще. и тѣгостїю корабль потапьлꙗюще. Епикти(т). Ег(д)а ꙗси въспомени ꙗко дво (!) въпрїель еси д҃шꙋ и тѣло. да что тѣлꙋ даси то раꙁлїаль еси, а что д҃ши то вынꙋ хранишїи. Въ домѡ(х) въ ны(х)же готовины лежеть, тоу мыши многѡ и молѥве. так(о)ж(д)е и тѣлеса многы пищеи прїемлюще, многы недꙋгы нъ (!) се вълѥкоу(т). О печали и беспе(ч)ли Сира(х). Ѿ печали въходи(т) съмрть, скрьб же ср(д)чнꙋ преклони(т) крѣпо(с). Въсилїа Ꙗко(ж) чрьвїе въ сагнилѣ дрѣве раж(д)аюте(с), також(д)е и печали въ мек(г)їе ч҃лкы въходеть. Иже г҃леть ꙗко не дѡ(с)и꙼но правѣдникꙋ печали имѣти. кто може(т) иꙁрещи. ꙗко не дѡ(с)и꙼но борьцꙋ противна(а) имѣти. нъ къко (!) поꙁнаѥ(т) се хытрѡ(с)ть его, беспротивна. Еѵрипи(д), Иже противꙋ напсти волѥю не печалит се, дѣлом же противлꙗет се. то не могꙋ(т) и на(д) гра(д)мы и на(д) людмы владати. ѡбаче нѣ(с) ѡбрѣсти житїа беспечалнаа ни оу когоже. О сънѣ Соломѡ(н). Ѡблѣчет се всакь сънливыи въ раꙁ(д)ранаа. Ꙁла(т)усть. Да стане(м) въ нощи на мл҃тве. аще ли не ва полꙋнощїи, понѣ къ самы(м) ꙁау(т)рны(м) пом҃лим се. не тѣлꙋ единомꙋ ѿлꙋчена е(с) нощь нъ и д҃ши. Платѡ(н), Сънь многь, ни д҃ши ни тѣлꙋ польꙁнь, ни деанїемь. О пїанствѣ Соломѡ(н).Оунѥ ѥ(с) ити въ дѡ(м) печалныи, нежели къ домꙋ пира. Ст҃го Въсилїа. Пїанство б҃а не прїемлѥ(т), и д҃хь с҃ты ѿгони(т). дымь прогонить пчелы, пїанство же ѿженѣ(т) дарованїа д҃хвнаа. Ꙁла(т)усть. Живоущїи(м) въ пїанствѣ и въ блоудѣ. д҃нь въꙁвращает се на тмоу нощнꙋю. не с҃льнцꙋ оугасающꙋ, нъ оумь и(х) ѡмрачает се пїанство(м). Еѵгрїе, Вино въ мерꙋ оукрѣплае(т) тело, а д҃шꙋ слово б҃жїе. Клеостраль, Къ семꙋ некто ре(ч). ег(д)а сѣдиши въ пирꙋ. прьвꙋю ч(а)шоу испїеши ꙁ(д)равїю. а вторꙋ сладости, трѣтїю же беꙁꙋмїю. а послѣ(д)ноую бесовствоу. О дрновенїе (!) и ѡ обличенїи꙼. Не просипли оуглїе обличае грѣшника, еда въꙁгоришїи въ пламени грѣ(х) и(х). Сира(х). Испитаи꙼ доброоумнїе по(д)роучникы свое. и даж(д)ь и(м) дрьꙁновенїе. да вънѥг(д)аже се съмниши о чемь. ѡни бесъмнѣнїа бесѣдоую(т) ꙗже вѣде(т). Арїстони(м). Врагь истинꙋ исповѣдавь, лоучши е(с) лицѣмернаго дрꙋга. о клѣтве Сира(х), Моужь клѣтволюбаць, попь(л)ꙁнеть въ беꙁаконїе, и не ѿстоупи(т) ѿ домꙋ его рана. Ст҃го Въсилїа Иже се клне(т) по правꙋ, съ нъпасти (!) лажнїе не иꙁбежи(т). Клетвꙋ насилнꙋю прїемати двоего дѣла. или себѣ ѿ великїе вины раꙁ(д)решае, или дроуга ѿ великые напасти спа(с)е. Еѵсевїе, Мноꙁы кажоу(т) чл҃цы клѣти се по правьдѣ. аꙁь же г҃лю, ꙗко нѣ(с) прѣпо(д)бно и н-и-ꙁначела клѥти се. ни по правеи вине ни по кривѣи꙼. О тъщеславыи Сира(х). Не ваꙁнеси себѣ, да не ког(д)а падѣши. и принесѣши свои(м) беꙁчастїемь. ненавидимо бо е(с) тьщеславїе прѣ(д) б҃гѡ(м). Ꙁла(т)усть Иже хощеть грьдаго чл҃ка обличити, не дльгы речи трѣбоуе(т). нъ тькмо да васпоминать емꙋ ѥ(с)ство и ꙁапрѣщае(т) ѕѣло тако г҃лѥ. что боуꙗеши ꙁемлꙗ и пепеле. имже по съм҃рти ꙗвите се. смѣри его жива н҃нꙗ, не вѣсть ꙗко ꙁемлꙗ е(с) и пепель. види(т) красотоу тѣлеснꙋю, види(т) оугож(д)енїе ласкающи(х). чрѣвоработник(и) послѣдꙋюще по нѥ(м). види(т) рыꙁи многѡценныє на себѣ и вѣнць съ порьфирою. тѣмь видѣнїе(м) прѣльщает се, и ꙁаб(и)ваеть е(с)ства своего. вѣмы ꙗко ꙁемлꙗ есмы и пра(х), нъ цѣломоу(д)рꙋи(м). ѡн же не ждить коначнаго ꙗвлѥнїа, ни ходи(т) по гробѡ(м), по скровище(м) пр(д)ѣдьнѥ(м). нъ на сїю жиꙁнь ꙁрить, и о хотѣщи(м) быти не печет се. Тѣ(м) наоучи прѣж(д)е ꙗко ꙁемлꙗ ѥ(с) и пепель. рци емꙋ что грьдиши ꙁемлѥ и пепеле. и при твои(м) бо животе, вънꙋтрьнꙗа чрево испльнѥно бесчастые(м) и ꙁловонїе(м). Видель ли еси хоудо(с)ть времѣннаго е(с)ства, да тѣ(м) оувеж(д)ь свою немощь. ег(д)а оуꙁриши ког(д)а грьдаго выю висещꙋ и брьви въꙁвышающа и на колѣсници сѣдеща, и ꙁапрѣщающа и въ тамници въмѣтающа и съм҃рти прѣдавающаа, и многа ꙁлаа съдѣвающа, рци емꙋ. Что боуꙗеши ꙁемлꙗ и пра(х). ꙗко при животе твое(м) съгни се оу(т)роба твоꙗ. Сїа вса не тькмо ѡ просты(х) чл҃цѣ(х) иꙁрекохѡ(м). нъ и о само(м) сѣдещи(м) на прѣстолѣ цр(с)цѣ(м). не въꙁри бо на порфїрꙋ и на вѣнць и на ꙁлатые рыꙁи. нъ съмое е(с)ство съмотри, и ѡбрѣщеши ꙗко въса ꙁемлꙗ покрїеть. въсака бо слава чл҃чскаа, ꙗко цвѣ(т) травныи иꙁсише(т). Лѣствичьни(к).Тать ненавиди(т) сл(н)ца, грьди же кротькааго хоули(т). О истинѣ и о льжи Соломѡ(н),Иже съ льжею оутврьж(д)аеть, та пасе(т) вѣтри и птице крилатеі. Ꙁла(т)усть Ни единое помощи трѣбоуеть истина(а) сила. нъ аще и мноꙁы хоте(т) оугасити ю, не оугасит се. паче же болѥ просвѣтит се. Бгословь. Истина едина, а льжа многомыслна. Философь. Съ въпрошень, что полꙁа ѿ лаже лъжꙋщыи(м), ре(ч). ащ(е) и право что мльве(т), не имоу(т) и(м) вѣры. О хвалѥнїи Въсилїе (!) Аще е(с) крѣпкь бж(с)твныи(м) дѣлѡ(м). болѥ ми дѡ(с)ино боꙗти се, и блюсти се ѿ хвалещи(х) менѣ. иже бо въсхвалѥ(т) ме бїют ме. Чюж(д)ь хвала сла(д)ко ѥ(с) слышати по(д)бно, а иже себѣ хвали(т), та пороугань е(с)ть ѿ инѣ(х). бестоу(д)ни бо соу(т) иже съми (!) се хвале(т). на (!) чл҃кѡ(м) дѡ(с)и꙼но стидѣти се, ег(д)а ѿ инѣ(х) хвалими бываю(т). Плꙋтар(х). Иже хоще(т) хвали(м) быти, да оучит се инѣ(х) хвалити. и тѣ(х) прїимешїи правꙋ хвалꙋ. Мосхїѡ(н). Тъщи се такѡ(в) быти да при свое(м) животе славань боудещи (!), а по съмр҃ти б҃жїи. Ꙁла(т)усть. О красоте . л҃ѕ. Въскоую ꙩꙩчи и помислїи, и ср(д)це свое попоущаеши на хранителнице въсакое скврницꙋ слишите испїтливїи. и на тоуж(д)ꙋ крарасотꙋ (!) ꙁреще и г҃люще, ꙁри(м) нъ не самꙋщаем се. дв҃дь искоушенїе прїемь, а ти ли не искоусиши се; ѡнь побѣж(д)ень бы(с), а ты ли храбровати; имѣѥи꙼ толикꙋ блг(д)ть д҃хвною ꙋꙗꙁвлѥнь бы(с). а тебѣ ли имоу вѣрꙋ, ꙗко не ꙁвѣре(м) оуꙗдѣнь еси; еда камень еси; еда желѣꙁнь еси; нъ ч҃лкь еси по ѡбичаю еи꙼ немощи е(с)ства страж(д)е. ѡгнь дрьжиши и не ѡжежеши ли се; приложи свѣщꙋ къ сенꙋ, и можеши ли рещи ꙗко не иꙁгорит се; Котори же и се ѿвѣ(т). видѣ бо ре(ч) д҃вдь, женꙋ мыющꙋ се въ оградѣ нагꙋ, добрꙋ и бл҃гообраꙁьнꙋ ѕѣло. и оуловлень бывь красотою ѥе. и ꙋдаре(н) стрѣлою ꙗꙁвꙋ прїеть, и сътвори беꙁаконїе. ꙁачет же жена та, и тече къ ц҃ревы и ре(ч). ц҃рꙋ погынꙋ(х), въ чрѣвѣ прїехь. аще придѣ(т) моу(ж) мои и видит ме, что има(м) ѿвѣщати. е(с)т ми печиль (!) о ѡбличенїи бесчастїа. ц҃рь вои꙼на своего бои꙼ть се. вѣнць ноша(а)ше, и вои꙼на своего и поношенїа бои꙼ть се; видиши ли колико ꙁло е(с) грѣ(х), приде бо оурїа ѿ вои꙼скы. и ре(ч) емꙋ ц҃рь, что е(с), Оурїе, къко (!) брань. Ѡн же ре(ч), добрѣ ѡдолѣхѡ(м). ѡ чюдо. вои꙼нь ѡдолѣ, а ц҃рь свои(м) грѣхѡ(м) плѥнень бы(с). и ꙁри что сътворы. Писа ка воеводе. ѡстави Оурїю на тежцѣи꙼ крилѣ браны чесѡ ради, да ꙋбїень боуде(т). ѡ ѡкаанныи грѣ(х). и дае(т) епістолїю Оурїи. и носи(т) на се ѡбыдьни ножь. потом же поставлень бы(с) и оубїень бы(с) люта ꙗꙁва и великь строупь. пишет бо се, не прѣлюбїи дѣи꙼, не оубїи. Дв҃дь ѡбѣ ꙁаповеды прѣстѡ(у)пи. прѣлюбодѣи꙼ствовь оубо, и потомь ѡбыдимаго оубывь. Видель еси его падьша, виж(д)ь его покааꙗвша се. въниде бо ка нѥмꙋ Наѳань пр(о)ркь и ре(ч). Скрьбы(м) и има(м) при. чл҃кь нѣкыи въса имѣе стадь воловны(х) и ѡвчїи(х) многоо. инь же бы(с) оубогь, и не имее раꙁвѣ единꙋ ѡвцꙋ. ꙗже ѿ трапеꙁы его. питаше се, и ѿ чаше его пїише. и на ѡдрѣ лѣга(а)ше. приде къ бога(т)мꙋ моужꙋ некто стра(н)нь. и не ваꙁеть ѡ свои(х) стадь. на (!) пославь въсхыти ѡвьче оубогаго. и слышавь ц҃рь, въꙁьꙗри се и ре(ч), да ѡроужїе(м) оумреть таи. и ѡвче четвѣрицею въꙁврати(т) потѡ(м) ѿкриі пр(о)ркь прїитчю и ре(ч). ты еси ц҃роу, и ѡнь, Съгрѣши(х) г҃вы моемꙋ. пр(о)рк же и г҃ь ѿеть грѣ(х) твои скоро покаанїе(м) скореи꙼шаа же и ѿда(а)нїа г҃лѥ(т) бо, исповеж(д)ь ты грѣхы свое прьвее да ѡправдиши се. ꙗкоже бо велико имене ѿдаанїе покаанїю. також(д)е прѣбоуе(м) велїе оу(т)врьж(д)енїе. и боꙗти се и трѣпетати дѡ(с)и꙼ны есмы, да не падемсе въ прьвы грѣ(х). Се красота доброѡбраꙁно твори(т) лице, нъ видѣщаго похоть. к҃ꙁ О хотѣщїи(м) быти соудѣ Ꙁла(т)усть, Иже многѡ съгрѣшающе, беꙁь печали и бе(з) напасти живоу(т). дльжны соуть боꙗти се и трепетати. растеть бо имь соугꙋба моука, дльготрьпенїе(м) б҃жїе(м). боуде(т) житїе наше подробнꙋ ѡбличено. Не еже ридати люто, нъ еже рыданїю дѡ(с)и꙼наа тв(о)рити. ни плачь ѿлꙋчень ѥ(с), нъ еже плачевнаа дѣла дѣати. не боуды м(ч)нїа желае. не ваниди въ гѥенꙋ аꙁь не ридаю. Оунѥ бо на(м) печаловати се, нежели въ ѡно времѣ лоученѡ(м) быти. О славе. л҃н Ст҃го Въсилїа (!). Аще славы желаеши, и хощеши на(д) многыми славити се. и въ многы(х) веще(х) хощеши быти. то боуды кроткь, моудрь, чисть. и оумо(м) храбрь. трьпеливь ѡ бл҃гоча(с)ты. тако бо и себѣ сп҃сеши. и большимы бл҃гыми свѣ(д)ль боудеши. Бгословь. Пеци се въ истинꙋ ѡ вѣчнеи꙼ славе, сїа бо врѣмен(н)а лъже(т) по васе д҃ны. Алеѯен(д)рь. Съи꙼ плѣнивь индїанына славна стрелꙗнїе(м) и нарочити иныи(м) рекши(м), съ може(т) скроꙁѣ прьстень прострелыти. повелѣ емꙋ прѣ(д) собою ꙗвити хытрость свою. и не хотещꙋ емꙋ, повелѣ посещи его. вѣдом же на посеченїе, г҃ла къ водѣщомꙋ его. ꙗко много врѣме минꙋ, ѿнелиже въ роукꙋ лоука не прїехь и бою се еда погрешꙋ се, и погоублю славꙋ. слышав же Алеѯен(д)рь, дыви се. поусти его съ дары, ꙁанѥ оумрѣти иꙁволи. нежели славꙋ свою погꙋбити. О многомльвлѥнїи Его(ж) не хощеши то ни г҃ли. а егоже не хощеши ни г҃лати то ни слыши. ѿ оушїю бо и ѿ еꙁика великы напасти бываю(т). Аполонїе. Мнѡгомльвлѥнїе мнѡго падѣнїе бываѥ(т). Мльчанїе же тврьда вещь. Глꙋкѡ(н). Ꙗко ластовица ч(с)е(т)щ(е)їи пѣ(с)нь, сладѡ(с) пѣ(с)ннꙋ ѿгони(т). також(д)е и мнѡгоре(ч)вїи. често бесѣдꙋюще несла(д)кы ꙗвлꙗю(т) се слышещїи(м). О промыслѣ .м҃. Ап(с)ль. Ѡ гльбина прѣмоудрости, и раꙁꙋма б҃жїа. ꙗко неиспитаны соу(д)бы его, и неислѥдими поутїе его. Никтоже себѣ милѡ(у)еть ꙗко(ж) въсех ны б҃ь велмы болѥ на(с) ѡнь не хощеть ничтоже ꙁла намь постра(д)ти. не вѣси ты польꙁны(х) ѡ чл҃че, многащи просишїи ꙁлаго, нъ ѡнь промышлꙗе(т) болѥ ѡ твое(м) сп҃сены. твоего сп҃сенїа не ванимае(т) нъ прѣ(д) помышлѥнїе(м) польꙁнос-т-и промыслить. Ѳеѡпемть. Не мни и бж(с)тва повина ꙁлꙋ. ни пакы беꙁ съмотренїа напасти на(с) прїемлющїи. О смерѣны Ст҃го Въсилїа, Иже имѣеть покорѣнїе къ васѣ(м). та хоули(м) не може(т) гнѣва оудрьжати, ни печали трьпенїе(м) ѿгнати. Ѿць Ниль, Б(л)жень моужь иже житїе высоко има(т), оум же смѣре(н). Живыи съ имоущимы смѣренїе, оучи се нравꙋ и(х). аще бо накаꙁанїа и(х) польꙁна, кольми паче оусть и(х). Дїонь. Ѡбычаи꙼ чл҃кѡ(м) непокоривымь, противити се и чрѣꙁь силы. покарающим же се оугаж(д)ьти и слꙋжити. О враче(х) Сира(х), Хытрость врачевнаа въꙁне(с)ть главꙋ. и при вѣлмꙋже(х) чю(д)неи ꙗвит се. Грїгорїе Нисскыи, Елма д҃ша лоучшїи ѥ(с) тѣла, тѣ(м) и д҃шевныи врачь лꙋчшїи ѥ(с) телеснаг(о) врача. Стратѡникь. Съ ѡкр(с)ть врача ласкааше г҃лѥ. Хвалю твою хытрость. ꙗко не даеши недꙋжны(м) гнити, скоро ихъ прѣмѣнае ѿ живота. О вѣре Ап(с)ль, Блг(д)тїю емы сп҃сени и вѣрою. и се не ѿ на(с) на Бжїи дарь. ни дѣло(м) да никто(ж) се хвали(т). Иже нераꙁꙋмно се ни вѣрьно ꙁависти дѣлꙗ. скв҃рьны(м) бо д҃ша(м), н(и)чтоже ѿ добраго вѣрно ѥ(с). О памети Бгословь. Въспом(и)наи꙼ б҃а паче дыханїа. и чати его дѣлѡ(м), и хвали словѡ(м). и помыслѡ(м) бои꙼ се. Епїкти(т). Ѡбнавлꙗи꙼ бж(с)твное слово, по все д҃ны паче брашна. Ꙗко(ж) сла(д)ко ѥ(с) видѣти морѥ съ брѣга. також(д)е сла(д)ко въспоминати сп(с)номꙋ троудь имже сп҃сет се. О д҃ши Ст҃го Въсилїа (!). Тѣлесно оубожїе, бога(т)ство д҃ши ѥ(с). телꙋ же богатꙋ соущꙋ, д҃ша оубожаеть. Плꙋтарь(х). Дшꙋ имѣе ꙗкоже воеводꙋ, тѣло же ꙗко(ж) вои꙼на. а промысли абїе вои꙼нь воеводѣ покорить, а воевода вои꙼нꙋ. О ꙁависти Ꙁла(т)усть. Ничтоже тако раꙁлꙋчае(т) дрꙋга ѿ дроуга ꙗкоже ꙁависть. Срѣбролюбц бо тог(д)а веселит се, ег(д)а съмь (!) въꙁмѣть. иным же дае не радꙋет се. Ꙁавистливыи же тог(д)а веселит се, ег(д)а дроуга въ насти (!) оуꙁри(т) се бо его радѡ(с), а не ег(д)а что добро, или бога(т)ства добоуде(т). а бесь ꙁави(д)ить, не бесꙋ, нъ чл҃кѡ(м). ты же чл҃к сы, въскоую чл҃кѡ(м) ꙁавидиши. и которое оулꙋчишїи прощенїе. Метафраст. Лꙋкавїи мꙋжїе не толико ра(д)уют се ѡ свое(м) добрѣ, ꙗкоже ѡ чюж(д)еи꙼ бѣдѣ. Вїась. Бл҃гь ли еси ꙁнаменаи꙼ се симь, имже бл҃гость поꙁнана ѥ(с). бл҃гост бо не да(с)ть никомꙋже николиже ꙁавидети. О волнѣм и неволне(м) Сира(х). Съꙁ(д)аи желанїа своего не ходы и ѿ хотѣнїа твоего въꙁдрьжи се. Аще подаси д҃ши своеи꙼ волю. тѡ̏ хотѣнꙋю сътвориши радѡ(с) врагѡ(м). Климѣнь(т). Хр(с)тїанѡ(м) не повелѣно е(с). насилїе(м) или бїемь съгрѣшающа(го) исправити. не сы(х) бо вѣнчае(т) б҃ь иже страха ради чл҃чскаго ѿстоупаю(т) ѿ ꙁла, нъ иже бж(с)твнїе ꙁаповѣди боеще се прѣклоне(т) се ѿ страха къ бл҃гости. О раꙁоумеи о себѣ Ап(с)ль. Иже мнит се раꙁꙋмети что, съі еще не раꙁꙋмѣ, ꙗкоже дѡ(с)и꙼но раꙁоумети. Сира(х), Съблюди и ванимаи ѕѣло, ꙗко съ падѣнїе(м) своѥ(м) ходищи (!). Иракли(д), Съ юноша сы привѣ(д)нь бы(с) прѣ(д) оучитлꙗ, вънег(д)а философїю оуча(а)ше. и въпрошен си ѿ нѥго. что юноше оучиль еси, и ѿвѣща се оучиль еса(м), ꙗко не вѣ(м) ничтоже. и вси ѡкр(с)ть стоеще оучитлꙗ рекоше. въ истинꙋ съи꙼ юноша, хытрѣи꙼ въсе(х) на(с) ѥ(с). О бл҃гсти Дїонисїе. Ни бы(с) ни боуде(т). ни быти може(т), иже лише(н) е(с) б҃лг(о)ости. Мена(н)да(р). Ник(т)оже бл҃гыи꙼ лꙋкаво твори(т). о ꙁаконѣ. Дїонь. До(с)тои꙼но лежещїи ꙁаконь тврьдо хранити, и ни единого и(х) иꙁменити. оунѥ го(!). дрѣвныи дрьжати ꙁако(н), нежели нови, аще и лоучши мнит се. О словеснѣмь и ср(д)чнѣ(м) Еѵ(г)лїе. Бл҃гы чл҃кь ѿ бл҃гы(х) скровищы(х) иꙁноси(т) бл҃гаа, лоукави же ѿ лꙋкавы(х) иꙁноси(т) ꙁлаа. Ниль. Иже бж(с)твьнꙋю ꙁаповѣдь исплнити хощѣть. дльжнь ѥ(с) хра(н)ти свои оумь, непорабощень въсакои꙼ страсти. О беꙁоумїи Соломо(н). Съ беꙁоумни(м) не оумножи рѣчи. и ка нераꙁоумномꙋ не ходы. Сира(х). На(д) мр҃твы(м) плачи, ꙁанѥ ѡскꙋдѣ ѿ него свѣть. а на(д) блоу(д)нимь також(д)е плачи, ꙗко ѡкоуде (!) ѿ нѥго раꙁꙋмь. Ꙁино(н). Нѣк(т)о беꙁꙋминь юноша въ акамїи (!) прѣше се по д҃ши. Ꙁинон же ре(ч), аще се приши не ѡмочивь еꙁика въ оумѣ много съгрѣшиши въ слове. О ѡбичаи и о нравѣ Чл҃кь ѡб(и)кыи слышати словеса поноснаа. неоудобь накажет се. Дїмосте(н). Не таа пшеница добра мнит се, истлѣвающее нъ на Ба жива. Ниль. Иже тьщит се ѡ сѣ(м) жити, си боудꙋщаго вѣка печали не имоу(т). Сокра(т), Иже въ бога(т)стве грьды велми. тъ пѡ(д)бнь моужꙋ текоущꙋ на непотькновѣн(н)ꙋ коню по голомꙋ лѣдꙋ и по пльꙁкꙋ поутꙋ. Димокра(т), При врѣмен(н)ѣ(м) иꙁмѣнѥнїи. иже древлѥ ѕѣло въꙁможни быше немощнымь молет се. Ꙗко дѡ(с)и꙼ть почитати блг(д)ть, ꙁлобоу же ѿражати Сира(х). Не дѡ(с)ить порꙋгати се оубогомꙋ. ниже лѣпо прославити моужа грѣшна. Аще блаꙁїи ꙁлыи(х) видѣть въ хоулѣ, болше моу(д)рѡ(с) примоу(т) на добродѣанїе. Съ въпрошень, которы гра(д) добрѣ стои(т), ѿвѣща. Въ нѥмже съ ꙁаконѡ(м) живꙋть. и ѡбыдѣщїи(х) каꙁнѥть. О самолюбїи. Платѡнь. Ег(д)а пороугаем се ины(м), тог(д)а врати(м) къ себѣ. ег(д)а и мы тѣмь порꙋганїе(м) повинны есмы. многы бо съмолюбїе покрывае(т). Дїогѥ(н), Дрꙋꙁї и чл҃ци инѣ(х) оучеть, а сами своего оученїа не послꙋшающе. ты по(д)бни соу(т) гоуслѥ(м), иже добарь гл(с)ь собою поущаю(т). съми (!) же не слише(т). Ако не въсег(д)а прїѥтна ѥ(с) болшаа честь Ап(с)ль. Въ цр҃кви хощꙋ петь словесь г҃лати мыслїю своею, нежели тмꙋ словесь иꙁг҃лати еꙁыко(м). Въсилїе (!), Иже посрѣдѣ мира живѣ(т). аще исправи(т) чьсть ꙁаконнꙋю, лꙋчьшїи ѥ(с) поустиника не въсѣго ꙁакона исправивша. Сокра(т). Иꙁволи срѣ(д)нѥе житїе съ правдою, нежели велико бога(т)ство съ неправдою. О оупованїи Ѿ еѵ(г)лїа. Въꙁрите нъ (!) птице нб(с)ные. ꙗк(о) не сею(т) ни жнꙋть, ни събирають въ житницꙋ свою. и ѿць вашь нб(с)ныи питае(т) и(х). Бгословь, Ни ѕѣло надѣи се, ни велми ѿчаи се. ѡвѣм бо раслаблѥнь боудеши, ѡвем же прѣвращень. ни при печали ѿчаи꙼ се славы, ни при славѣ печали. едино лѣто д҃, чести имѣеть врѣменные. и едина срока врѣменнаа, многы вещи иꙁьмѣнные. Ꙁла(т)усть. Паче въсѣ(х) сꙋщїи(х) надѣж(д)а ѥ(с) еже къ б҃оу, прочаа же въса не постоеть е(с)ствѡ(м), нъ мнѣт се. Еже о жена(х) Ꙁла(т)усть. Въ трїе(х) ноуж(д)ихь быль еса(м). въ граматикїи, въ оубожстве и двою ноуждꙋ оубѣжа(х), а ꙁли жени не м(о)гѡ(х) оутещи. Прьва и неѡклѣветана жена, иже поваплѥнїемь мажет се, ни красит се паче мѣри. Беꙁаконо и горько и послѥ(д)нꙗа хꙋла, аще кто женою ѡблада(н) е(с). Съ видѣвь жены перꙋщее се, ре(ч). Ꙁрите къко (!) аспіда ѿ ехыдни ѕѣлїа проси(т). Мена(н)дарь. По(д)бно е(с) себѣ трое. гнѣвь, море ꙁла жена. Сепин(д)ь. Съ въпрошень, что ѥ(с) жена и ѿвѣща, домꙋ печаль и пагꙋба. животꙋ плѥнь. метѣжи въсед҃невныи. больнаа ра(т). многооустроеннаа брань. медведь питае(м) съ моужьмы. прїседѣщїа печаль. обнимающїи, львица оукрашена. О старости и юности Солѡмонь. Трїе(х) вещи въꙁненавидѣ д҃ша моꙗ. ст(а)ра блꙋдника. и оубога гїиꙁдава. и богата лъжа. Ꙁла(т)усть. Аще тебѣ хꙋли(т) юноша ꙁа сединѣ се ѥ(м) къжеши (!) емꙋ свою старость и жалꙋеши на нь. и стидѣти се сединь твои(х) велиши емꙋ. Ты првее стиди се и(х). аще ли же съмь свои(х) сѣди(н) не стидиши се старь сы, како юношꙋ тоужди(м) стидѣти се велиши. Сѣдина бо тог(д)а частнаа е(с), ег(д)а седин(н)а(а) дѣла твори(т). а дондеже оукрашаеши се и юношкы ходиши, дотолѣ порꙋгань еси. елико можеши юношнїи бегаи꙼. сѣдини бо соу(т) не того ради еже бѣлы, и ѡбраꙁь лꙋчшїи чрьнаго. нъ ꙁанѥ ꙁнаменїе соу(т) добромꙋ житїю. Бели бо власи никогоже не сп҃саю(т). седина бо не бели власы, нъ д҃шевнаа блг(д)ть. Ни юношꙋ хꙋли ни стараго хвал(и). не раꙁаньством бо въꙁраста бываѥ(т) ꙁлоба или доброта, праꙁ(д)ньствѡ(м) (!), помысла. иже въ и꙼стинꙋ старь, не продльженїе(м) ꙁнаменает се, нъ похвалны(м) и съвршенныи(м) житїе(м). О съмр҃ти Ꙁла(т)усть, что бы рекла сарраа слишавши ꙗко повелѣ б҃ь авраамꙋ ꙁаклати ісаака. Даж(д)ь мы чедо коньчное обьетїе. аꙁь надѣах се тобою погрѣбена быти, и моеи꙼ съмр҃ти оукрашене быти твоими сльꙁамы. нъі понѥже повелѣнїе жи(д)телѥво, ѿѥ(т) оупованїе мое. плачю тебѣ ѿ негоже ѡплакана надеах се быти. тькмо сего прошꙋ оу тебѣ. ег(д)а въстоупиши нъ (!) ꙁаколѥнїи олтарь, пом҃ли се б҃оу ꙁа мене. да ѿтидꙋ ѿ житїа сего, прѣж(д)е даже не въꙁврати се ꙇереи꙼ ѿ жртвы. не могꙋ бо ѿноудь ꙁрети, окрьвавлѥни крьвїю дѣтищиѥю. ѿ слоугь же ѡвь постоꙗвь рекал би о дѣтищи. Странно родил се ес(и) и страж(д)еши и гинеши беꙁ врѣменѣ. чю(д)на же кончина единь паче въсѣ(х) ѿ непло(д)нїе оутробы; единь слишыши рыданїе погребателное ѡ кы обраꙁь вл(д)ка нашь погꙋбы(т) ѿ житїа сего. сыцѣ быше рекли каж(д)о и(х) себѣ, коупно же вси въꙁвративше се въ дѡ(м) иꙁг҃лали быше, ꙗко единѣми оусты. Ходи оуже ѡ старче, се ткмо послꙋшаи꙼, ꙗко аще сего ꙁаколѥши, иного с҃на ѿ стары(х) не ѡбрѣщеши. Плꙋтарь(х). Болше беꙁь грѣха оумрѣти, нежели грѣхы и стра(с)тьмы д҃шꙋ мрачити. Ѳаворїе, Арїисто(н) правѣ(д)ныи꙼ въпрошень бы(с), колико лѣть чл҃кꙋ жити добр(о) е(с), и ѿвѣща. дондеже раꙁꙋмѣе(т), ꙗко съм҃рть лꙋчшїи паче живота. О трьпенїи и дл҃год҃шїи Ꙁла(т)усть. Ег(д)а те кто дрьжи(т), и досаж(д)аеть ты не на того ꙁри, нъ на бѣса, иже въшль ѥ(с) вань и по(д)виꙁае(т) и. гнѣвь свои нъ источи (!) нь, съмого же моужа милꙋи, и вѣж(д)ь ѿ кого ѥ(с) пострекае(м). Ег(д)а въ болѣꙁнь въпадѣши чл҃че. въспоминаи꙼ іѡва, и с҃тоую пльть его. с҃то бо бы(с) и ч(с)то, аще и толико стрꙋпь имѣль. к(т)о бо виде чл҃ка въ толикꙋ ноуж(д)ꙋ въпа(д)ша. и въ толикꙋ ꙗꙁвꙋ по(д)робнꙋ тѣлꙋ его истлѥваемꙋ. источникь крьви емꙋ въсоудꙋ иꙁливаше се ѿ стра(с)ти тѣлеснїе и въсоудꙋ смрадь тѣлꙋ раꙁдѣлꙗемꙋ. и гла(д) бѣ емꙋ. страннь и гла(д)нь и чюды(м) (!). ѿ смрада же не можаше прїемати пище даемїе смрьд же что е(с) се. еже ведѣше съмого (!) б҃а попоустивша на нь, тѣм же и не съмоущааше се. видѣ правѣ(д)на б҃а. емоуже въсемы лици оугоди, съпостата себѣ беꙁ всакое выни. еже ради то въсе навѣде б҃ь на нь. Хощеши ли да прѣ(д)ставлю пре(д) ꙩꙩчма твои꙼ма е(с)ствнꙋю брань, съ великы(м) трьпенїе(м), на сего іѡва въꙁложенꙋ. і҃ чедь иꙁгꙋбы и васе въкꙋпе, и въ еди(н) ча(с) и вънеꙁапоу, и въ самы цвѣтныи въꙁьрасть. и великѡ(м) добродѣанїе(м) оукрашени, и не ѡбичны(м) е(с)ствны(м) ꙁаконѡ(м). нъ лютою съм҃ртїю и страшною. кто желеꙁныи꙼ чл҃кь или кы адамнть (!) сътрьпѣл би такѡваа ꙁла прїѥмле. что ꙁлѣишее ісаава. не блꙋ(д)ник ли бы(т); ꙗкоже паѵль г҃ла. не ѡ҃цеоубыц ли; и не въꙁненавиден ли ѿ б҃а; ꙗкоже и писанїе свѣ(д)тльствоуеть г҃лѥ. іꙗкова въꙁлюбы(х), исаава же въꙁненавидѣ(х). нъ васкоую (!) не иꙁьчеꙁнеть, ни искорени(т) се, и ꙁлѣ моуцѣ прѣда(с)т се. добро братїе вынꙋ иꙁрещи. аще бо бы се искорени(л), великь плѡ(д) правды мирь погоуб(и)л бы. и како слиши. исаавь роды Рагоуи꙼ла, рагꙋи꙼ль же зара. зар же, іѡва. видыши ли колик би и каковь цвѣ(т) трьпенїа погыбаль, аще би б҃ь прѣ(д)варивь ѿѥль коренїе.
Извлечение от Пчела по ркп. 424 САНУ, нач. на XVII в., л. 321а–363а