You are here

Рилска повест на Владислав Граматик

         I. Врѣ́мени же по си́хъ мнмошъ(д)нюу ꙋбѡ̀ не ма́лѹ. и҆ чю́десемь та́ко прѣсла́внымь и҆ и҆сцѣлѥнїемь. ѹ прп(д)бнаго рак҇ы съдѣвающим се. гръкѡм же крѣпкѹ абїе и не прѣмѣнителнѹ и блъгарѡмь меж(д)ѹ собою съдръжещимь рать. бѹрю въз(д)вижеть и метежь непостоаньнь иже ѿ начела съмиренїю ратникъ, на въсе страны сѹщее гръчьскаго цр(с҃)тва и области блъгарскые и начелства же сръбскаго. и иные кѹпно въсе окръсть ихь къ сѣверѹ и западꙋ сущее страны. персе безбожнѣишее съ мнѡгы(м) нагльство(м). и разсверѣпѣнїе(м) съ вьстока подвигь. и напрасно ѿ нѹдь въсточнѹю въсѹ елико по(д) грыкы и южные страны съ Асїею повоевавше же и поѡбладаваше, постиѕаю(т) и въ Макѥдѡнїю. и тѹ по(д) собою въчинивше съраженїемь крѣпчаишее брани. сръбскые воѥ иже тогда въ тои сѹщее до конца въ нѥи повѣж(д)ьше, при рѣцѣ тако нарицаемѣи Марица, на сръбское абїе ѹстръмлꙗют се начелство. иже и съраженїю бывшѹ лютѣишѹ, на мѣсто г͠лѥмѣмь Косовѡ. пасти приключи се абїе посрѣдѣ рати лютомѹ насилникѹ, иже сихь начелство имѹщомѹ. достоиное възмъздые, своего безбожїа скорѣише прїемлющѹ, еже злѣ и непо(д)бнѣ варварскѹю свою и нечъстивѹю ѿвръщи д͠шꙋ. ѿ сръбскыихь вои напрасно посрѣдѣ разбоꙗ живѡта лишившѹ се. и тако прочее грѣхѹ прѣвъзышъ(д)шѹ ꙋвы наши(х) зъль, под(д)данїю тѣмь сръбсцѣи ѹстроити се земли.

         ІІ. Малѡм же по сихь, и блъгарскые ѹдръжавше прѣдѣлы ꙗкоже нѣкоторое хѹдо гнѣздо. Тако и съ чюднѣишїи(м) ѡнѣмь градѡмь, въ нѥм же чюдодѣивые чю(д)твориваго ѡ͠ца сълежаахѹ мощи. некротцѣ кѹпно и безбожнѣ ѥмлют се воинства пакы. плѣнованїа честаа и крьвопролитїа на къж(д)о д͠нь же и врѣме съдѣловающе. злобное тѣхь стръмлѥнїе никомѹже ѿнѹдь ѹдрьжати могѹщѹ. вьсѣмь и въсѹдꙋ бранными съражеими прѣделѣвающемь, и свѣтлые на нихь поставлꙗюще(м) побѣды.

         ІІІ. И симь ѹбѡ сице бываемѡ(м). и ꙗже онѣхь зломѹ по въсѹдꙋ и пагѹбномѹ распростирающѹ же се и ѹдръжавающѹ. мнѡгы страны и въсы кѹпно съ чъстными монастири же и бж(с҃)твными храмы ѡгнѥмь растлѣваеми, конъчномѹ ѿ сѹдꙋ прѣдаахꙋ се запѹстѣнїю.

         ІV. Тогда же и сего б͠гоноснаго ѡ͠ца ст͠ѣшїа обитѣль сѹщїа иже въ Рылсцѣи пѹстыни. въ нѥи же ѹбо пѹстыни. страдальчьское онѡ и постничьское прп(д)обныи, невещестьвное же и аг͠гелское въ плъти прѣбывае прѣпроводи житїе. ею же добрѣ ѕѣлѡ б͠лголѣпиѣ же послѣжде прѣвъзорныи ѡнь кѥсарь Хреліа, ѡбразом же инѡчьскыимь нареченныи Харїтѡнь монахь, въ чъсть с͠томѹ ѿ основанїа въздвиже же и създа, порѹшивши се ѹбо, конъчное прїемлѥть запѹстѣнїе. и бысть ѥи прѣбыти сице възапѹстѣни лѣта доволна. а еже како по сихь и которыимь ѡбразомь пакы та Хв͠ою обнови се блг(д)тїю. на пръвѹю свою въстѹпи добрѡтѹ и б͠лголѣпїе, ꙗкоже ѹбо имать и до дн(с҃)ь. нъ и с͠того къ симь чю(д)твориѣишїимь мощемь ѿ Тръновскаг(о) славнаго града въ тѹюж(д)е ѹбѡ обитѣль с͠тѹю еже како и которыимь також(д)е ѡбразомь прѣнесенїе же и възвращенїе бы(с҃). слово ѹже прѣдиды изьꙗвити хоще(т).

         V. Бранемь прочее ратныимъ по врѣмени мнѡѕѣ ѹмлъкнѹвшимь, иже прѣж(д)е блъгарскые съдръжеще бѣхѹ страны. и лю(д)скыим нестроителнымь вещемь, въ тишинѹ прѣложившим се.

         Мѹжїе нѣцїи ѿ иже въ мирѣ сѹщїихь, б͠лгоговѣины и б͠лгородны по рѡдѹ сѹще. блъгаре же родомь. при Велбѹжди на селѣ нѣкоторѣ(м) живѹще, Граница же убѹ томѹ прозванїе имѹщѹ. самѡмь с͠щенства ѹкрашени. съжителници ѹбо свое къ г͠ѹ прѣ(д)пославше. и мирскыихь въсѣхь измѣнше се. и б͠лгое Хв͠о иго на се въспрїемше. и множае страхѡ(м) б͠жїи(м) ѹмиливше се, дѡмѹ и ѿч͠ьства своего въ пѹстыню прѣходници бывают Рылскѹю. и тамо юже въ обитѣль вышереченнѹю прп(д)обнаго тъщно въселꙗют се. пѹстѣ, сѹщеи тои и нежителнѣ тогда ꙗкоже прѣ(д)сказано бы(с҃) врѣменемь множаишїимь. ѹстроившои се ѹже, ѡбразь и по(д)писанїе тѹ добродѣтѣлнаго жителства собою въсѣмь елико по тѣхь бывающе. въ трѹдѣхь и пѡдвиѕѣхь обѹчавающе себе присно, и въ тръпѣни мнѡѕѣ. въ м͠лтвах же пожидающе и пѣнихь. въ постѣ, и прочитани бж(с҃)твныихь словесь. и прочїихь таковыхь, их же нѣ(с) ми лѣть въ н͠нꙗшнѥе съписовати врѣме. иного ѹпражнѥнїа опаснѣишаго о семь трѣбѹющѹ.

         VІ. Бѣхѹ же ѹбо си, трїе числѡмь. и братїа сѹще по пльти. с͠нѡве же, иже добрѣ ѕѣлѡ с͠тльствомь, ѹпасшаго въ дн͠и оны словесное стадо Хв͠о иже въ Крѹпницѣ, блаженнѣишаго еп(с҃)кѡпа кѷрь Іакѡва. ѿ них же, ѡвь ѹбо званїемь нарицааше се Іѡасафь. иже и прьвствꙋе бѣше тѣмь въ жителствѣ ихь ѿ начела абїе. овомѹ же пакы именованїе бѣ, Дв͠дь. и иномѹ Теѡфань. и си ѹбо трїе въ прѣ(д)реченнѹю пришъ(д)ше пѹстыню ꙗкоже рече се, селитвѹ свою въ нѥи сътворити хотеще. и се не единою же абїе ни въкѹпѣ. нъ дрѹгыи по дрѹѕѣмь пришъ(д)ше, и кьснѣ. и зданїа въса обитѣли прп(д)обнаго ѡпровръгшаа се обрѣтше и разорена до конца, развѣ цр͠кве тъчїю единое и пирга. въса абїе б͠ѹ поспѣшьствовавшѹ имь ѿ оснѡванїа пакы въздвигоше. и съвръшенѣ та исправивше и наздавше, б͠лголѣпнѣ ѹкрасише. мнѡгые трѹды и пѡдвигы онихь показавше, и иждитїа иждивше. и не тъчїю же собою сами. и иждитїемь свои(м). и съ елико иже о тѣхь послѹшное имѹщїими ѡбщею въсего монастира братїею, сїа ѹправише. нъ и приданїемь нѣкыхь б͠голюбьзнѣишїихь мѹжеи. их же изредство и бл͠гоѹкрасителное ихь и до н͠ніа. мнѡгы не тъчїю ѿ их же окръсть тамо съ близь прилежащїихь странь и съ тѡземци же сѹщїими, нъ ѹже и ѿ далече сѹщїихь. ꙗкоже нѣкоторыи од͠шевлѥнныи магнить по желѣза ѡбразꙋ къ б͠голюбнои привлачещи ревности. не оскѹдѣвають абїе, ѹсръднаѣише и многою вѣрою притичюще тамо. приносещѹ комѹж(д) о ихь ꙗже противѹ силѣ ихь ѿ сѹщїихь въ рѹкѹ ихь обитѣли с͠тѣи бл(с҃)венїе. и паче же въ д͠нь памети с͠тго. и ползѹ ѿ тѹдѹ множаишѹ ꙗко паче приобрѣтюще. радостною прочее д͠шею и веселїемь многыи(м), своа онѣмь ѿ онѹдꙋ постиѕати прѣбывалища пакы.

         VІІ. Въсих же и въ таковыихь ѹбо тѣмь сѹщемь. и множае же еще въ трѹдѣхь и дѣланихь монастирскаго градежа ѹпражнꙗющем се. слѹхѹ прочее о нихь по въсѹдꙋ въ окръстныихь добродѣтѣлномѹ изьшъ(д)шꙋ. приходить къ нимь въ монастирь абїе, онѣхь юже люботрѹднаго еже нѡ б͠ѕѣ дѣланїа и достохвалнаго ихь жителства, мнѡгыими ѹже въслышани бывь. презвитерь нѣкыи имененемь Іакѡвь, града Филїюуполскаго протопѡпа сыи. възвѣщае ѹбо тѣмь о прп(д)обнаго чю(д)дѣивѣи рацѣ. тои ѹже тогда въ Триновскои архїеп(с҃)кѡнїи ѿ лѣть многыхь сълежимѣ сѹщеи, покръвенѣ нѣкако и несвѣдомѣ же въ конъць. изьобꙗвити се ѥи ꙗвъстьвнѣише въ тѡ ѹбо врѣме къ вьнѣшнїимь г͠лѥ. и сеи томѹ самовидцѹ быти извѣствѹющѹ. тамо томѹ г͠лющѹ потрѣбы ради нѣкые съ своим митрополїтѡмь шъствїе имѣвшѹ, и с͠щенныимь мощемь прп(д)бнаго и с иже о нѥмь не малыми поклонникꙋ ѹже бывшѹ. и честь нѣкѹ ѿ нихь въ бл(с҃)венїе себѣ ѿ тамо сѹщїихь клирикь испросити ꙗвлꙗющѹ.

         VІІІ. Таковаа же ꙗко ѹслыша иже ѹбо ѡбитѣли настоеи тогда, чъстнѣишїи въ їерѡмонасѣхь кѷрь Дв͠дь, и прочее о Х͠ѣ бра(т)ство. чьстномѹ ономѹ презвитерѹ повѣдающѹ имь сїа, д͠шею ѕѣлѡ възрадовавше се быше. иже и бѣхѹ абїе прилежнѣе того прочее испытѹюще о тѡмь. ѹже Іѡасафѹ въ тѹ ѹбо врѣме, прѣ(д)начелствовавшѹ тѣмь въ прьвыхь ꙗкоже слово постигь изьꙗви. и начело ѡснованїе добродѣтѣли въ нихь положьшѹ. старѣишѹ настоещомѹ обитѣли тогда иже по пльти братꙋ, къ г͠ѹ ошъ(д)шѹ бывшѹ. врѣменнѹю сїю измѣнившѹ присно прѣбываемою и нетлѣнною жизнїю.

         ІХ. Таже пакы по сихь по малѣ ѹбо врѣмени. се и дрѹгыи вѣстникь пришъ(д) къ нимь и тож(д)е по(д)бнѣ повѣдѹе бѣше имь. ꙗко и томѹ також(д)е г͠лющѹ по нѣкоемь приꙋчаю въ Трїнѡвѣ бывшѹ. и с͠того чюдотворивѹю ракѹ своима очима видѣвшѹ. и ꙗже о нѥмь извѣстно извѣдѣвшѹ въсе. си же и еще не имѹще ѹтвръж(д)ень пѡмысль съвръшенѣ о тѡмь, аще ꙗко въистинѹ сїа сице бѹдѹть, повѣдѹемыимь въ конъць вѣры не можахꙋ ѥти. даже бо до толи никако же слышали бѣхѹ или разѹмѣли по истинѣ что, ꙗко еже прп(д)обнаго рацѣ тогда въ Трїнѡвѣ быти. врѣменемь множаишїимь забытїа глъбинамь вещи прѣдавши се. и паче же бывшїихь ради неѹстроенїи и метежи градѹ въ врѣме егова прѣѥтїа варварскыи(м) нахожденїемь, егда того прѣдасть б͠ь въ рѹцѣ врагь ради наших грѣхь. и сѹщаа, въ нѥмь ст͠аа и чъстнаа, инаа и намо напрасно ѿносима бываахꙋ, и сеи нѣкамо тогда съѿнести се мнеще.

         Х. Не могѹще же ѹбѡ о слышанныхь ꙗкоже рече се въвѣрити се до конца. и хотеще прочее извѣстити се о тѣхь аще истинна бѹдѹть. посилають абїе брата нѣкоего ѿ обитѣли тамо, иже бѣше вѣдокь земли тои. запорѹчившие емѹ извѣстно о въсемь изьобрѣсти по тънкѹ. и быти томѹ самовидцѹ прп(д)обнаго мощемь. да егда пакы възвратити се ѿ тѹдѹ къ нимь, ꙗже видить и ꙗже разѹмѣеть опасно тѣмь скажеть.

         ХІ. И семꙋ ѹбо сице бывшѹ. и посланномѹ о въсемь испытнѣе по заповѣданномѹ изьобрѣтшѹ. и къ тѣмь скорѣе възвратившѹ се. и симь истинѹ въсѹ извѣстившѹ, спѣхѡмь мнѡѕѣмь и тъщанїемь блгочъстивѣи абїе цр͠ци кера Марїи о тѡмь оповѣдають. ꙗже бѣше дъщи ѹбо бл͠гочъстиваго г͠на деспѡта Гѥѡргїа, бывшаго въ врѣменехь онѣхь вл(д)кы сръбскаго, жена же сѹщїи великаго оного и самодръжавнаго амире Мѹрата, иже въ ратехь и побѣдахь бранныхь, мнѡго сего древнѣишїихь прѣпрослѹтаго. на селѣ тои и не въ цр(с҃)кыихь тогда прѣбывающои, въ нѥм же и жилище ѹбо свое имѣющи бѣше та. стадїи не малыми Сѣрскаго ѿстоещи града, къ полѹдн͠ьнѣи ѹже тамо клонещи се странѣ. въкѹпѣ же и молеть тѹ и бѣдеть. не небрѣжително быти тои да прп(д)бнаго ѿ онѹдѹ с͠щенные прѣнесѹт се мощи въ того с͠тѹю обитѣль иже въ Рылѣ. и о то(м) мъздѣ велицѣ ѿ б͠а тои на н͠бси прѣ(д)лежати рекше.

         ХІІ. Бл͠гочъстиваа же она и б͠глюбиваа цр͠ца, таковаа ѿ мнихь ꙗко ѹслышавши ꙋбѡ. и множае же паче раченїемь бж(с҃)твныимь ѹꙗзвивши си д͠шѹ. молѥнїемь ихь прѣклонивше се, повелѣваемое ими въ дѣло произвести скорѣише нотъща се. и ѹбо по врѣмени ключимѣмь ѹ самодръжавнаго бывши великааго амирее Моамеда, строещаго тогда цр(с҃)твїа скѷптры. и ѿ сигклїта славномѹ о с͠томь бесѣдовавши. и ꙗко мнѡго и прѣизлиха дръзновенїе ѹ ц͠ра имѹщи, надеж(д)е не погрѣшивши искомое полѹчаеть. и писмена о семь повелителнаа къ сѹдїи тръновсковѹ ѿ цр(с҃)кые въспрїемши дрьжавы, еже съ вьсацѣмь спѣхѡмь подати се онѣ(м) искомое. къ себѣ тѣхь на село прѣбывалища ѥе призвавши по еже възвратити се ѿ цр(с҃)твѹщаго, въ рѹцѣ симь абїе та върѹчаеть. они же сїа ꙗко въспрїемше ѹбо. тъщателнѣише и елика скорость къ монастирю пакы възвращают се. и съборь сътворивше. прочее их же прѣ(д)разсѹдише за с͠тго послати се. ѡбьщнѣ сихь наредивше, къ Тръновѹ ѿпѹщают. прѣ(д)начелствѹщю ꙋбѡ тѣмь въ таковои слѹжбѣ, чъстнѣишомꙋ въ с͠щенноинокѡ(х) Теѡфанѹ. иже бѣше сѹщомѹ тогда прьвостоателю обитѣли с͠тые приснѣишїи по пльти брат. и втораа по онѡмь абїе ꙗже обитѣлнаго печаловничьства имѹщѹ въса. бѣше бо мѹжь по истинѣ довольнь въ разѹмѣ въсакѡмь сь, и въ бж(с҃)твныи(х) писанїи искѹснѣиши сыи. пѡдвигы же постничьсыими наи паче и ѹмною ѡстротою, прѣвъсходе сѹщїихь иже въ обитѣли не мало. ꙗко быти ѿ сѹдꙋ ꙗвѣ ѹбо и въ иныхь добродѣтѣлныихь лихоимствѡхь изреднаго жителства прѣизещьствѹющѹ семѹ прочїихъ.

         ХІІІ. Постигшим же посланныимь цр(с҃)твнѣишаго града блъгарѡмь Трънѡва. и станѡмь ѹже тамо на мѣстѣ обиталища бывшемь, идеже с͠тыи сълеже бѣше. винѹ пришъствїа ихь пръвїи ѿ граждань ѹвѣдѣвше ѹбо, млъвѹ не малѹ о тѡмь и метежь велеи въ людехь сътворише. крамолеще се ѹбо и которающе кѹпно съ онѣми, въ еже не дати симь никакоже ст͠го из града изнести. нъ ѡбразомь въсачьскымь бездѣлны тѣхь и безь ѹспѣха паче въ своа их пакы ѿслати велещимь. ꙗко ѹбо мнѡгѹ съ противорѣчїю и несъставномѹ ѿ сѹдѹ гатканїю помеждѹ обоихь даже до трехь нѣгде д͠неи о тѡмь ѹже бывшѹ. и крамолѣ же на величьство доволно съвъземлющи се ѿ людеи прочее. ꙗко даже и до сѹдещїихь ꙗже о вещи произыти симь. пристѹпають ѡбои кѹпно ѿ съгласїа къ сѹдїи гра(д)скомѹ, любопърное ихь о искомѣмь раздрѣшити абїе.

         И ѹбо цр(с҃)кыимь въдавшем се писанїѡмь ѿ иночьствѹющїихь сѹдещомѹ, повелѣвающемь ономѹ скорѣише дати пѹстыннымь мѹжемь пѹстыннаго свѣтилника Іѡанна. дает се тѣмь ѿ сѹдешаго въ рѹкы абїе ѿ желаемое тѣми скровище, емѹ же неравностоателно ничтоже ѿ их же въ мирѣ. въсечъстнаа(ж) ѹбо б͠гоноснаго ѡ͠ца рака. и тако крамола ѿ сѹдѹ коньць прїемши ѹже, и любопърное ѿ срѣды въ обоихь раздрѣши се.

         ХІV. Иноци же съ многою абїе чъстїю кѹпно же и обрадованїемь, с͠щеннꙋю прп(д)обнаго еже ѿ онѹдѹ въспрїемша ракѹ. и чистѣишїими понꙗвици сїю опретавше. и мѷры бл͠говѡнными об͠лговонивше, не к томѹ и мали что въ градѣ съобращающе се бѣахꙋ прочее. нъ кѹпно въ ѹтрѣшныи из града изышъ(д)ше ракѹ ст͠го на по(д)ꙗръмное възложивше, къ своимь ѡбращают се. никомѹже сѹщѹ иже ѿ града проваждающѹ ихь ꙋбо, тъчїю малѣмь нѣцѣмь ѿ нищїихь и ѿ иночьствѹющїх же також(д)е.

         ХV. Та же рѣкы нѣкоторые дошъ(д)шее, иже наричет се тѣми людми Росита. ꙗже и не мнѡгымь ѕѣлѡ растоянїемь града ѿстоещи бѣ. рѣцѣ же ѹбѡ онѡи велми тогда наводнѥнѣ сѹщи, ꙗко испльнꙗти се ѥси въ вьсемь ложи своемь. и ѿнѹдь никомѹже могѹщи прѣминѹти тѹ, за ѕѣлное възврѣнїа ѥе и непристѹпное стрѹи. и тѹ тако имѹщѹю ѹбо видеще. скрьбїю велїею одръжими бѣхѹ ѕѣлѡ, ꙗко не могѹще тьно прѣити. и въ недоѹмѣни сѹще мнѡѕѣ о тѡмь ꙋбо и скръби велицѣ. вънезаапѹ ꙗви се имь изьшъ(д) ѿ ковчега ст͠го ꙗкоже нѣкоторыи дымь бл͠гоѹханьнь, и въсе мѣсто онѡ испльни ꙗко на два часа. они же абїе дръзновенїе прїемше. и въ рѣкѹ въшь(д)ше, и без врѣда прѣшъдше, носими м͠лтвами ст͠го. въ пѹ(т) свои идѣхѹ радѹюще се и веселеще.

         ХVІ. Прѣшъдьшим же ѹбѡ имь прѣдѣлы оны, и в Срѣдьць ѹже постигшимь. лѣпо быти и по(д)бно въмѣни се ѹбо тѣ(м), ꙗко да въ монастирь пришъствїе ихь еже съ с͠тыи(м) прѣ(д)възвѣстеть, посланїе въдавше единомѹ ѿ слꙋжитель своихь имѹщее сице:

         Чъстнѣишомѹ въ с͠щенноинокѡ(х), нам же ѡ͠цѹ и игѹменѹ с͠щенные обитѣли прп(д)обнаго и б͠гоноснаго ѡ͠ца нашего Іѡанна пѹстыни жителꙗ. їерѡмонахѹ кѷрь Дв͠дѹ, и въсемѹ о Х͠ѣ братьствѹ. мъншїи въ инокѡ(х) Теѡфан, и съ братїами. радовати се о г͠и. и да ѹвѣсте, ꙗко изыдохѡмь ѿ прѣдѣль Еврѡпїискыихь, о вьсемь добрѣ б͠жїею ѹбо възлагаеми блг(д)тїю. и м͠лтвами вы. съприносеще съ събою и въсечъстнѹю прп(д)бнаго ракѹ. и есмы и͠нꙗ въ Срѣдьчьскѡмь градѹ. и зде хощемь прѣбыти петь или шесть д͠нїи. и тако къ монастирю пѹта ѥти се. да о семь потыщанно бѹди вашеи с͠тости, ꙗко за съ по(д)баюшею чъстїю въ срѣтенїе с͠того изыдете. и молите о нас.

         ХVІІ. Посланникѹ же абїе ѿпѹщено бывшѹ. и онѣм же покои полѹчавающемь, шестод͠невное въ градѣ ꙗкоже ѹже и ꙗвлено бысть прѣпроваждающемь врѣме. ѿ въсѣхь славимѡ(м) и почитаемѡмь сѹщемь. жена нѣкаа ѿ богатыихь тѹ, творещи бѣше ковчегь с͠томѹ ѿ дрѣвесь негнїющїихь, цѣною сѹща пѣнеѕемь стѡмь. и въ новѹ ракѹ положивше ст͠го. мѹжь тоѥ жены давь шесть златникь, и кѹпивь свѣтлѹ понꙗвицѹ, покры(т) ковчегь ст͠го.

         ХVІІІ. Седмомѹ же ѹбо наставшѹ д͠неви. и обычныимь ѹже славословїамь ѹтрънꙗго пѣснословїа съвръшившим се. ѹвѣдѣвше жителїе града ꙗко хотеть двигнѹти се съ ст͠ыимь. и кѹпно въси събравше се съ женами и дѣтми въ цр͠кѡвь великѹю ст͠го и славнаго великом(ч҃)нка и побѣдоносца Хв͠а Гѥѡргїа иже въ митропѡлїи, идеже ѹбо съ с͠тыимь обитающе бѣхѹ. съвѣть творахѹ междѹ собою, ꙗко да с͠томѹ провожденїе сътвореть с͠щенници въ одеждахь с͠щенныхь съ свѣщами и кадилы. нѣцїи же ѿ нарѡда не даахѹ. гл͠аахѹ бѡ боим се чедь агарѣнскыихь зависти, да не нѣчто ненадеж(д)но съдѣють намь. и ѹгодьнь бысть въсѣмь съвѣ(т) сь. и тако съ нарѡдомь двигше с͠того конникь изьбранныихь мѹжь. дрѹѕїи же нарѡды мнѡжьство пѣши. мнѡжаишїи же ѿ нихь босы, съ женами и дѣтми. и сице проваж(д)ающе тѣхь вънѣ града ꙗко на четыри пъприща, съ сльзами и съ вьплѥмь пририщѹще. и лобзающе ракѹ ст͠го ꙗкоже бѣ на носилѣ г͠лаахѹ. ѿходиши ѿ нась дивныи ѡ͠че, възвращаахѹ се. велмѹжїе же съ с͠щенници и иноци съ тѣми шъствїе твореще до мѣста Лѣшница нарицаемо. и тѹ тѣхь ѹгостивше. и обычныи мирь възъмше, въ своа идѣахѹ. дрѹѕїи же ѿ нихь съ онѣми идѣхѹ даже и до монастира. ѿ толи же начеше носити ст͠го на своихь раменѡ(х), съносещаго и даже до толи обычнаго по(д)ꙗръмника сънъмше.

         ХІХ. Слышавше же чл͠вци ѿ окрѣстныи(х) странь пришъствїе ст͠го. и съвькѹплъше се на рѣцѣ г͠лѥмѣи Гѥрмань въ нѣкоторои въсы, близь монастира ꙗко д͠нь и поль шъствїа. ждаахѹ его тѹ. ѹвѣдѣв же игѹмень и братїа ꙗко приближает се ст͠ыи. двиг се съ сѹщїими по(д) нимь иже въ обитѣли лѹчившїими се с͠щенныими, и ѿ братеи нѣкыими, възъмше свѣще и кадила б͠лговоннѣишаа. и того въ въсы, вышереченнои при рѣцѣ чъстнѣ ѹсрѣтаеть. и на мѣстѣ прѣбыше тѡмь дн͠ь и нѡщь покои полѹчающе. тѹ сѹщѹ и събравшомѹ се ѹбо нарѡдѹ. заѹтра же въжегше свѣще и кадила, и мл͠твѣ бывши. самь игѹмень и съ иже ѡ немь с͠щенници възъмше мощи ст͠го, идѣаше прѣ(д) ковчегѡмь веселе се и поѥ, ꙗкоже древлѥ бгоѿць прѣ(д) сѣннымь. и сице идѹще бѣахѹ пѣши съ вьсѣмь нарѡды даже и до гѡры великые. и тамо бывше по(д) горою. повелѣваеть игѹмень да сѣдше въкѹсеть пищѹ, да не нѣцїи изнемогѹть не ꙗдше г͠лѥ. и тако възлегоше нарѡды по травѣ зеленѣ. ꙗкоже при Х͠а моего чюдесехь нѣкогда. и тѹ знаменїе сътворише въ име ст͠го. идеже и до н͠нꙗ на въсако лѣто въ дн͠ь памети ст͠го тръжьствѹють чл͠вци на мѣстѣ тѡмь.

         ХХ. Таже ѿ тѹдѹ въставше, приходеть абїе въ метѡхь монастирскыи зовомыи Ꙍрлице, и въ цр͠кѡвь с͠тыихь ап(с҃)ль. ею же бѣше самь ть иногда настоеи обитѣли тогда кѷрь Дв͠ь въ мѣстѣ тѡмь ѿ основанїа люботрѹднѣ въздвигнѹль. заѹтра бѡ бѣ празникь връхѡвныихь ап(с҃)ль Петра и Павла. и тако съ нарѡды тръжьствовавше. и д͠нь почътше, б͠ви бл͠годарьствнѹю въздаше хвалѹ. заѹтра же въставше, иже ѥсть Л҃ їѹнїа м(с҃)ца. и пакы игѹмень съ с͠щенници, и съ еи еп(с҃)кпѡмь кѷрь Іѡсифѡмь, иже бѣше и ты сыи емѹ по пльти брать, възъмь ракѹ ношааше. нарѡды же послѣ(д)ствоваахѹ пѣши зовѹще г͠и пом͠лѹи, даже и до самого моста иже ѥ(с҃) выше метоха. ѿтѹдѹ же нѣцїи ѿ нарѡда прѣѥмше ст͠го быстротечною лъгкотою бж(с҃)твнаго д͠ха выкрилꙗеми, и въскорѣ ѿ тѣхь невидими быше. паче бѡ бръзїихь еленеи или ѡрлова нѣкако лѣтанїа течаахѹ. и не ꙗко носеше ст͠го, нъ носими ст͠ыимь невидимо. и послѣдовааше сїе чюдо пачи иныхь чюдесь. они же въсѣдше на конѥ, и гнааше въслѣдь въсходеще и нисходеще, не можаахѹ постигнѹти ст͠го ни очима ѹзрѣти. ꙗко и мноѕѣмь о прѣславнѡмь видѣни тѡмь въ ѹдивлѥни бывшемь ѹже гл͠ати ѹбо, что хощеть быти се дивное и прѣславное чюдо.

         ХХІ. Мѹжїе же иже ст͠го носещеи, едва възмогоше поздѣ ѹдръжати ракѹ съ трѹдѡмь. и тѹ дождати тѣхь тако и съ изьоставшїими нарѡды. таже ѿ тѹдѹ двигше се бывше ѹбѡ. и мало походившие, ꙗко на поль пъприща ѿ того мѣста. ѹсрѣтаеть абїе тѣхь братьство въсе иже въ монастири съ иконами и чъстными дрѣвесы, на мѣстѣ зовомѣмь Връбица, нижае състатїа ѡбоимь рѣка(м) великы(м). Рылы же прѣ(д)нарековаемые ѹбѡ, иже Илїина прозванїе обычнѣ имѹщои, и тѹ съвькѹпльше ликъ въ едино. и пѣвше пѣсни бж(с҃)твные. и лобзавше с͠таа и дрꙋгь дрꙋга, ѡбьщнѣ въси кѹпно ѿ тѹдѹ въ монастирь постигоше. и ст͠го вънесше въ цр͠кѡвь, съ мнѡгою его чъстїю и ѱалчопѣнїемь на проѹготованнѣмь емѹ въ нѥи положише мѣстѣ. въ лѣто ЅЦ͠ОЗ їндїктїѡ(н҃), В҃. м(с҃)ца їѹнїа, Л҃. тїи. идеже и до дн(с҃) чъстные того лежещи мощи, исцѣлѥнїа безмъзднаго пр(с҃)нотекѹщїи источник(к҃) истакают, иже съ вѣрою топлою къ нимь притичющїимь. и тако въсенощное прочее бдѣнїе съврьшивше, и д͠нь почьтше. въчинише на въсако лѣто ѿ толи творити агрипнїю въ обитѣли прп(д)обномѹ въ а҃ їѹлїа м(с҃)ца съ с͠тыими кѹпно бесребръници Козмою же и Дамїанѡ(м). празникь чъстънь съвръщающе томѹ, о възвращени чъстныихь мощеи его. и пѣти же емѹ параклись на въсакѹ седмицѹ, въ д͠нь четврътка.

         ХХІІ. По сем же пакы посилають къ бл͠гочъстивои ц͠рци Кера Марїи вѣдѣнїе о с͠томь, и тѣхь пѹтнѡмь шъствованїи. прочътши же ц͠рца посланїе. и ѹбѣдѣвши пришъствїе с͠тго. и велми възразовавши се и съ б͠лгородными своими, къ нимь въсписѹеть б͠лгодарьстьвнаа писанїа г͠лющи. б͠лгодарꙋ г͠а б͠а моего, ꙗко въ дн͠и наше бы(с҃) възвращенїе моще(м) ст͠го. и тѹ въдаеть посланникѹ понꙗвицѹ свѣтлѹ, въ еже поставити сїю на кївѹрь ст͠го. въ хвалѹ б͠ѹ, и въ чъсть же прп(д)обномꙋ. и тоѥ въ вьсегдашнѥе въспоминанїе.

         ХХІІІ. И сїа ѹбѡ тако ꙗже о с͠тѣмь ѿ начела даже до зде и ѡбразомь таковым же абїе, пакы томѹ еже ѿ прѣсловѹща(г) ѹже града Трънова и ѿ земле Загорскые, въ свою емꙋ любьзнѣишѹю пѹстыню Рылсскѹю, въ нѥи же паче ч͠лка подвиѕа се и поста теченїе съврьши. по мнѡгыхь онѣхь и длъгыхь лѣтѣхь иже тамо прѣбытїа его, възвращенїе ѹбѡ бысть. б͠ѹ и се въсакостроннѣ нѣкако и съмотрителнѣ ѹбо съдѣлавшѹ, и б͠лгопроизволившѹ сїе тако быти. ꙗко да и западнаа пакы страны блъгарскые того ѿч͠ьствїа пришъствїемь его ос͠тет се, и на лѹчьшаа наздаютъ.

         ХХІV. Нъ ѡ прѣчъстнаа главѡ, и блг(д)ти ст͠го д͠ха испльнѥнаа Іѡанне. с͠псѡво съ ѡ͠цемь обитѣлище. прѣ(д)стое ѹ прѣстола въсѣхь ц͠ра. и ꙗсно наслаж(д)ае се свѣта единосѹщные троице. и херѹвимскы съ аг͠глы възглашае пѣснь трис͠тѹю. велико и незслѣдованно дръзновеніе ꙗко имѣе. моли се въсемл(с҃)тивомѹ вл(д)цѣ сп͠сти твое сънорадникы, единорѡдныи ти езыкь. блъгаре же и сръблѥ. и помѡѕи дръжавныимь господамь нашимь. и покори имь въсе противные врагы по(д)нѡѕѣ ихь. вѣрꙋ непорочнꙋ съблюди. жителство наше въ б͠лгѡстоателнѡмь прѣбыванїи ѹтвръди. мирь въсь ѹмири. глада и пагѹбы избави ны. старые ѹтѣши. юнные накажи. безѹмные ѹмѹдри. вдовице помилѹи. сирѡты застѹпи. младенце въспитаи. и въсе люди твое съхрани ѿ въсѣхъ напастеи. и въ д͠нь страшнаго сꙋда, шѹѥе ны чести избави. и съ десными ѡвцами мл͠твами си спо(д)би. и слышати бл͠женныи ѡнь глась ѿ вл(д)кы Х͠а. прїидѣте бл(с҃)венїи ѡ͠ца моего наслѣдѹите ѹготованное вамь цр(с҃)твїе ѿ сложенїа мира. ꙗко томѹ подобаеть слава, чъсть и дръжава въ бесконъчные вѣкы, аминь.

Transcript: 

Рилски панегирик от 1479 г. (автограф на Владислав Граматик), сбирка на Рилския манастир,сигнатура: Рила 4/8

Transcription: 
Екатерина Тодорова