тро(п). гла(с). г͠.
Велика ѡбрѣте въ бѣдахъ тебе помощьника
Селꙋнь ст͠рпче поганыꙗ побѣждающа ѧко и
Лꙋѥвꙋ раздрꙋши гърдыню и на сꙋдищю
ꙋкрѣпи Нестѣра. тако с͠тыи х͠а б͠а моли
даровати намъ велию милость.
сѣ(д). гла(с) .д͠. по(д). Възнесыи сѧ на.
Подвигъ добрыи подвиза сѧ стр͠пце х͠въ
вѣрою и м͠чтль обличилъ еси нечьстьѥ
жьртва же благоприꙗтьна къ б͠ꙋ принесе сѧ.
тѣмь и вѣньць приꙗлъ ѥси побѣдьныи
мл͠͠тми с͠те твоими вьсѣмъ даѥши грѣховъ прощениѥ.
гла(с). по(д). Скоро вари.
Памѧ(т) твоꙗ славьне мч͠нче Дьмитриѥ
просвѣти днь(с) цр͠квь х͠вꙋ и всѧ сьбьрала
ѥсть пѣ(с)ми достоино похвалити тѧ бо͠͠мꙋдре
въ истинꙋ ꙗко воина и врагомъ потрѣбителѧ.
тѣмь мл͠тми твоими сп͠си д͠ша наша.
кѡн(д) гла(с) .в͠. само(г).
Kръвни твоихъ стрꙋꙗми Дьмитрие цр͠квь б͠ъ обагъри
давыи ти дьрьжавꙋ непобѣѣдимꙋ и набъдѧ
градъ твои неврѣдимъ. томꙋ бо еси ꙋтврьжениѥ.
їко(с). по(д). ꙋꙗсни.
Сего великаго въ пѣ(с)хъ вси съшьдъше сѧ вѣрою
ꙗко храбъра х͠ва мч͠ка Дьмитриа пѣ(с)ми и пѣнии възъпиимъ
къ вл͠дицѣ и творцꙋ вьселенѣи избавити нѧ ѿ трꙋса
бѣдьнаго члв͠клбче мл͠твами б͠ца и вьсѣхъ ст͠хъ мч͠͠нкъ.
на тѧ бо ꙋпъваемъ избавити сѧ бѣды и скъръби.
лю(д) Томꙋ бо ѥси ꙋтвьр.
стї(х). на г͠и въз(в). гла(с). и͠. по(д). О преславьно.
О преславьное чюдо. х͠а ради прободенъ трьб͠лженыи Дьмитрие.
на врагы бо вьсьгда орꙋжиѥ ꙗви сѧ обоюдꙋостро пожинаꙗ
ꙗзычьнаꙗ вышьнѧꙗ и низложь вѣснаꙗ шатаниꙗ. ѥмꙋже въпиѥмъ.
с͠͠͠ты Дьмитриѥ покрыи ны вѣ рьно чьтꙋщаꙗ тѧ любъвию вьсьгдь.
О преславьное чюдо. на н͠бси и на земли радость днь(с) вь памѧ(т)
ꙗви сѧ Дьмитрїа мч͠ка. ѿ англъ хвалами вѣньчаѥть сѧ
и ѿ члвкъ пѣниѥ приѥмлеть. о како пострадалъ ѥсть
и добрѣ подвиза сѧ. имьже врагъ паде лꙋкавыи х͠ꙋ побѣждьшꙋ и.
О преславьное чюдо. кръвавоѥ одѣниѥ ѿ стра(с)и мч͠нка
царское ꙋкрашениѥ цр͠кви бы(с) имьже ꙋкрашьши сѧ поеть
сь радостию женихꙋ своемꙋ въпиющи. о красьнаꙗ дѣла твоѧ Дьмитриѥ
имиже х͠ꙋ прѣкрасьнъ бы(с) ꙋгодьникъ славьнъ..
Страстью стра(с)и ꙋподоба сѧ живоносьнѣи х͠вѣ ѿ него дѣтель
чюдесемъ приꙗтъ стр͠пце Дьмитриѥ и сп͠саеши притѣкающаꙗ ти
многъ бѣдъ и прѣгрѣшении тѣхъ избавлѧꙗ имыи
б͠оꙋгодьно дьрьзновениѥ славьне кь б͠ꙋ ѥмꙋже престоиши нынѣ.
Кръвию своею каплѧ живодавьцꙋ х͠ꙋ кръвь свою чьстьнꙋю за тѧ
и излиꙗвъшꙋмꙋ приведенъ бы(с) Дмитрие и обьщника тѧ славѣ
сѣдѣꙗ и цр͠ствиꙗ своего причастьна ꙗко доблевавъша
на противьнаго и лютыꙗ того къзни до коньца ꙋгашьша.
с(х)тї(х). на сти(х)вь(н). гла(с). а͠͠. само(г).
Пѣ(с)ною красотою наставъшии просвѣтимъ днь(с) и възла(с)мъ мч͠нча подвигы.
предълежить бо намъ въ б͠лгохваление великыи Дьмитриї. ибо безаконьныхъ
навождение мꙋжьскы побѣдивъ къ мч͠нию съ дьрьзновениѥмь
подвижа сѧ и побѣды преславьно приносѧ с͠псꙋ молѧ сѧ сп͠си д͠ша наша.
сти(х) зау(т). гла(с). по(д). Радꙋи сѧ.
Приди мч͠нче х͠въ къ намъ трѣбꙋющимъ милостивьна посѣщениꙗ
избави озлоблены мч͠нчными прещениї и лютымь неистовьствъмь ересиї
ѥюже ꙗко плѣньни и нази гоними ѥсмъ мѣсто съ мѣста часто прехажающе
и блꙋдѧще въ горахъ и въ вьртьпѣхъ. ꙋщедри ꙋбо прехвальне и дажь намъ ослабꙋ.
ꙋстави бꙋрю и раздрѣши негодовние ѥже на насъ б͠ꙋ помолѧ сѧ подающꙋмꙋ миръ и велїю.
Стѣна твьрдаꙗ намъ по плѣнении вражиї не ꙋбоꙗ сѧ поданъ бы(с)
поганьскаꙗ падениꙗ ꙋпражнѧꙗ и недꙋгъ ꙋставлѧꙗ нападениꙗ
степень нераздрꙋшимыи основаниѥ неѡборимоѥ и начальникъ житель
и поборьникъ бы(с) своемꙋ градꙋ Дьмитриѥ. ѥ гоже и нынѣ пр͠блжне бѣдьнѣ погывающа
и отѧгъчена окаанѣ твоими мл͠твами сп͠си х͠ви помолѧ сѧ подающꙋмꙋ мирови велию мл(с)ть.
Всю добродѣтель въсприимъ ст͠рпчьскыї ликъ ꙗви сѧ. тѣмь пр͠чстаго и б͠жствьнаго
живота пищꙋ достоино наслѣдоваша съ нимиже подобьнъ сы досточюдне Дьмитриѥ
и подобиемь х͠вмь ꙋкрашаꙗ сѧ и хвалѧ сѧ копиꙗ равьньствьмь моли сѧ прилѣжьно
избавити сѧ стадꙋ твоѥмꙋ ѿ стра(с)и и недꙋгъ и лютыихъ напасти теплѣ молѧ сѧ
подющꙋмꙋ мирови велию мл͠сть.
кано(н) гла(с). д͠. пѣ(с). а͠͠. Їрмо(с). Морѧ чьрьмь.
Б͠͠жствьнымъ м͠͠чниꙗ вѣньцьмь ꙋвѧзъ сѧ о б͠͠зѣ ликꙋеши
лꙋчами тамо сꙋщими сиꙗꙗ и просвѣщениꙗ исплънѧꙗ
сиꙗ великыи м(ч)нче досточюдьне.
Ꙗко сꙋща въ истинꙋ мч͠нка и до кръве подвигъша
сѧ б͠лжне крѣпко твьрьдо же противлениѥ къ мч͠͠льмъ
показавъша тѧ вл͠дка приꙗтѡва.
Злобѣ обрѣтателѧ низложилъ ѥси къ земли Дмитриѥ
мч͠нымъ копиѥмъ раздрꙋшивъ б͠жствьныиꙗ б͠лгости
паче ꙋма силами на се бл͠жне ꙋкрѣплꙗемъ..
б͠
Без матере ꙗко б͠ъ пьрьвѣѥ сын бы(с)
ѥже по насъ безъ ѡ͠ца ис тебѣ б͠це прѣпѣтаꙗ
плъть приимъ по единению паче слова и разꙋма.
пѣ(с). г͠. їрмо(с). Веселить сѧ ѡ те.
Не мьнѣ сѧ ни въ чьто же мч͠щихъ тобою повелѣниѥ.
б͠жии бо страхъ паче вьсѣхъ страстотьрпьче изволилъ ѥси.
Свѣтообразьнъ свѣтильникъ въ съвѣдѣниꙗ
скиниꙗ бы(с) б͠жствьнымь свѣтъмь сьꙗꙗ мч͠нче ст͠рпче Дмитриѥ.
б͠
Исцѣлѧꙗ зракъ падъшии чл͠вчскыи причистꙗа симъ
ис тебе одѣваѥть сѧ пребывъ ѥже бѣ чл͠вклюбць.
пѣ(с). д͠͠. їрмо(с). Възвижена тѧ.
Побѣдивъша лъжꙋ нечьствиꙗ б͠жиѥ прѣвышьнеѥ
видѧ слово славою вѣньчало ѥсть Дмитриѥ поюща слава сил.
Направлѧꙗ сѧ дланию живоносьною на пристанища пос8тиже тихаꙗ
идеже нынѣ радꙋꙗ сѧ въпиеши Дмитриѥ. сла(в).
На прельсть побѣдꙋ поставивъ побѣдїтельнъ вѣньць
правды приꙗтъ Дмитриѥ въпиꙗ зижителю. Слава.
б͠
Ꙗко тварии вьсѣхъ чс͠тѣиши м͠ти б͠жиꙗ быти ѥдина съподоби сѧ.
Того бо родила ѥси мира бл͠гдтию б͠͠оразꙋмиꙗ просвѣтивъшаго.
пѣ(с). е͠. їрмо(с). Ты г͠и ми свѣтъ.
Огнь любъве б͠жствьныꙗ въ ср͠дци приимъ огнь ꙋгасилъ еси
безбожныи идольскаго гнѣва славныи Дьмитриѥ.
Избавлѧꙗ насъ ѿ бѣдъ ꙗви сѧ Дьмитриѥ м͠литвами си
покрываꙗ вѣрою и любъвию хвалѧщаꙗ тѧ.
ѳ͠
Слово б͠жиѥ о͠цꙋ ѥдиносꙋщьно твое бываеть б͠ом͠ти
паче ꙋма и слова с͠на единосꙋщьныи.
пѣ(с). ѕ͠. їрмо(с). Пожьрꙋ ти съ гла.
Съгласнь но съшьдъше сѧ въспоимъ славнюꙋ свѣтоносьнꙋю твою
па(ч) чюдесъ исплънъ и даровъ ст͠го и чьстьнаго пр͠бл͠͠жне д͠ха.
Раздрѣши ми пленица грѣховьныи мл͠тми ти. ꙗкоже бо непобѣдимъ м(ч)къ
дьрьзновениѥ имаши къ вл͠дцѣ и бꙋди ми прибѣжище и покровъ Дьмитриѥ.
б͠
Нескрвьрньнъ по середѣ тьрьниꙗ обрѣтъ ꙗко прч͠стыи цвѣтьць
и въ ꙋдолѣхъ цвѣтъ о б͠ом͠͠ти женихъ въ чрѣво твое слово въсели сѧ.
пѣ(с). з͠. їрмо(с). Въ пещи огньнѣ.
Просвѣщенъ б͠жствьною славою и б͠лгдтию мч͠нче ст͠рпче
сиꙗѥши свѣтообразньно и просвѣщаеши зовꙋщаꙗ. б͠͠лн.
Ꙗко багрѧницею ꙋкрашенъ своѥю кръвию имѣꙗ въ скипетра
мѣсто славьноѥ крь(с) съ х͠смь цр͠͠ствꙋеши нынѣ бл͠͠гнъ.
б͠͠
Прославлена просвѣщена м͠ти д͠во всѧ чьтꙋщаꙗ тѧ всеистиньꙋю б͠цꙋ
съблюди бл͠гна ѥси въ женахъ непорочьнаꙗ вл͠дчице.
пѣ(с). и͠. їрмо(с). Рꙋцѣ распрость
Омрачилъ еси вьсь вражии гнѣвъ славьнѣ и брани непотрѣбимою
силою х͠вою препоꙗсавъ сѧ и побѣдоносьць бывъ мч͠нче въпиꙗше. б͠лте.
Мч͠нчскоѥ б͠͠лгостоꙗниѥ показавъ мч͠ско бл͠гословиѥ мч͠че
наслѣдилъ ѥси банею измывъ сѧ ст͠ою ѥюже вътороѥ не ѡсквьрьнѧют сѧ
грѣховъ приложениї копиемь пробадаѥмъ и зова. бл͠те.
Чюдесъ твоихъ множьство паче ꙋма даръ иже ти подасть х͠͠съ
всѣмъ показа славьне. и бл͠гдть ицѣлениї паче словъ твоихъ
ꙗвѣ бл͠гдть проповѣдаеть намъ въпиющимъ. бл(с)те.
ѳ͠
Единꙋ въ вьсѣхъ родѣхъ д͠вою мт͠рь и б͠цꙋ чс͠тꙋ
пѣсньно славословимъ. та бо с͠псению намъ ходатаи
ꙗко вьсего мира избавителꙗ слово родивъши ѥмꙋже въпиемъ. б͠лте.
пѣ(с). ѳ͠. їрмо(с). Камень нерꙋко.
Растрьгни ꙋзы грѣховьныꙗ поющихъ тѧ ст͠рпче. ꙋстави
стра(с)и приложениꙗ. мѧтежь раздрꙋши ересьскыи.
напастиї ꙋтоли бꙋрю мл͠твами си.
Направи на стьзѧ правыꙗ цр(с)тва нб͠снго с͠щное свое стадо вѣньченосьче
настави на пажить с͠псьнꙋю и на мѣсто вѣчьноѥ.
б͠
Ꙗко корень источьникъ и винꙋ нетьлѣниꙗ тѧ д͠вце вси вѣрьнии сътѧжавъше
хвалами славимъ. ты бо съставное бесъмьртиѥ намъ источила еси.
кано(н). в͠. гла(с). д͠.
пѣ(с). а͠. їрмо(с). ѿвьрз ꙋс.
Отъ мьглы лютыꙗ и невѣжьствиꙗ очисти ны
ꙗко оч͠стволюбьць мꙋдре Дьмитриѥ. м͠лтвами си
даи въспѣвати свѣтлое твое рожьство въ д͠ньшьниї д͠нь.
Речена быша дивьна и въ варъварѣхъ твоꙗ чюдеса.
варъвары бо погꙋби въсѧ пришьдъша на достоꙗниѥ х͠а
твоѥго в͠лдкы на градъ Амастридскы. тѣмь же ти цр͠квь зижеть.
Вельми просвѣтила ѥсть и красьноѡбразьно показа мꙋдрость
чьрьпавъши пива н͠бснго тѧ Дьмитриѥ дасть помощьника
о͠чстволюбьца славьна селꙋню славьнѹмꙋ.
ѳ͠
Чрътогъ б͠жствьныи ꙗко рожьши женихъ х͠а призъвавъша
всѧ вѣрьныꙗ къ чрътогꙋ б͠жствьнꙋмꙋ м͠рню въсхвалимъ
просѧще въсхожениꙗ въ чьртогъ н͠бсьныи.
пѣ(с). г͠. їрмо(с). Твоꙗ пѣвьца.
Наꙋченъ из млада премꙋдрости подобьно створи премꙋдре
въ ꙋностьствѣ вѣньць. и копиѥмь бодомъ
ꙗко подобьникъ храборъ х͠ꙋ рожьшꙋмꙋ сѧ ѿ д͠вы.
Тр͠ци свѣтлѣи ꙗко гражданинъ трьгꙋбь ꙗви сѧ намъ
прьвѣѥ мꙋкъ славьнъ и въ подвизѣ ꙋгодникъ
и по ꙋмьртвии чьстьнъ твоими чюдесы пр͠блжне.
Копиемь бодомъ ты Дьмитриѥ въпиꙗше веселѧ сѧ х͠ꙋ.
чьто за вьсе принесꙋ тї прободенꙋмꙋ въ ребра мене ради.
нъ м(ч)ниѥмь моимь б͠жию чашꙋ нынѣ їспїю.
б͠
Огньныꙗ ꙋмъ Исаиꙗ наꙋчи жьзлъ тѧ п͠рчстаꙗ прочвьтъши цвѣтъ
бл͠говѣрьныимъ прогонѧщь вьсѧ воню смрадьнꙋю и прабабьнюю.
пѣ(с). д͠. їрмо(с). Неислѣдьнꙋмꙋ.
Се ты просвьтѣ сѧ ꙗкоже пишеть бл͠жны Исаиа д͠хмь паче свьтѧ сѧ
камениꙗ ѿ ꙋфираже и злата неискꙋсьна. тѣмже градъ твои чьтеть тѧ.
Ꙗко же възпи с͠те славьне поѧ Соломонъ въ пѣниихъ. ты же ꙗви сѧ
ꙗко сьсьцу х͠вꙋ ветъха же и нова бл͠жене съсавъ ꙋчениꙗ.
Къто ꙗко ꙋслыша ты възискаꙗ въходомь г͠а рече. изиде д͠ша моꙗ
его ради тѣмь же теплою Дьмитриѥ томꙋ послѣдова любовию.
Сиче възлюбль мч͠нче х͠въ вьсь градъ твои съвѣдыи хвалить сѧ нынѣ
праздьнꙋꙗ свѣтло Ѳесалоникии днь(с) въ свѣтлѣѣ ти търъжьство славьне.
б͠
Рожьши плътию сладость всю красотѹ пр͠чс͠таꙗ сꙋща въ горести
и нынѣ лютыхъ грѣхъ омраченыꙗ ꙋслади и мл͠тми твоими просвѣти.
пѣ(с). е͠. їрмо(с). ꙋдивиша сѧ вь.
Нова тѧ съвѣдꙋщи землѧ твоꙗ ꙗко Мосеа славьне
поражьша льсть идольскꙋю и люди своꙗ въ вѣчьныꙗ обитѣли
бл͠͠жне въводѧща чьстьно днь(с) чте тѧ достоино свавѧщи.
Вышьниї ꙗви сѧ воеводьствъмь храбре дрѣвьнѧго Ї͠са
Мосѣова отрока всѧ брани не ꙗко тъ побѣжаꙗ чюдеса же
паче сильна съвыше ꙗвлѧꙗ и хранѧ ѡ͠цьство си.
Вели ꙗви сѧ пача Самѱона Дьмитрие еще же и Гедеона
мꙋжьствъмь. и сыи ꙋнъ крѣпостию градъ си избавлѧꙗ мꙋдре
роꙗ противьныхъ и злобы варъварьскыꙗ. слава о͠чю.
б͠͠
Д͠во ꙗко рожьши ꙗзыкомъ избавлениѥ даи вѣрою въпиющиимъ
прѣгрѣшени избавлениѥ нынѣ дарование ч͠ста стра(с)и
ѿгонѧщи варъварскы непорочьнаꙗ.
пѣ(с). ѕ͠. їрмо(с). Б͠жье се и всечьст.
Храмъ твои с͠тыи обьстоꙗще въ памѧ(т) Исаиевѣ бывъши вѣрьниї
г͠лющю въ вѣчьныхъ основаниихъ домове с͠тхъ тѧ почитають.
Н͠бснаго тѧ съвѣдыи гражанина бл͠жне градъ твои свѣтло чьтеть тѧ
ꙗкоже ꙋчить Паулъ славьныи и величить днь(с) славꙋ твою славьне.
Ѹнъ бл͠жне сыи бл͠гдтию въ слѣдъ х͠а ходилъ ѥси ꙗкоже Соломонъ поет.
масть тѣмьже ꙗви сѧ бл͠͠гоꙋханиꙗ даꙗ чьстьно своемѹ градꙋ.
б͠
Пристанище тѧ съвѣдꙋще д͠во трꙋжающе сѧ лютѣ ꙗко въ горести
житисцѣ вьси тишины просимъ ѿ вѣрою непорочьнаꙗ.
пѣ(с). з͠. їрмо(с). Не послꙋжиша.
Истачаѥта ꙗко медъ чьстьнѣи твои ꙋстьнѣ мꙋдрость
ꙗко Соломонъ въспѣтъ. ꙗвѣ бо наꙋчивъ сѧ въпити прѣпѣтыи ѡ.
Искꙋси тѧ зиждитель прѣславьне ꙗко срѣбро и ꙗко злато ѡѱанзъ
свѣтло тѧ ꙗви мчнии славьне. тѣмь же веселѧще сѧ поемъ. прѣпѣтыи.
Ꙗко же възъпи д͠хъ въ пѣниихъ. стълъпъ Дв͠дъ крѣпъкъ
выꙗ твоꙗ дрьжавьна тысꙋщами ꙋкраси сѧ щиты дхвьными.
тѣмь же ꙗви сѧ защитьникъ поющимъ и хранитель градꙋ своемꙋ.
Въ славьныи д͠нь праздьнолюбьци свѣтло възыграимъ ꙋмы своꙗ
чьстьно ѡчищающе вьси поюще. Х͠ѹ. Прѣпѣтыи.
б͠
Не въмѣстимыи вьсь миръ ѥгоже въ чрѣвѣ своѥмь въмѣсти пр͠ста.
нъ чьтꙋщеи рожьство твоѥ твьрдою вѣрою да ꙗвимъ сѧ ѿ напасти
миръныꙗ неврѣдими мл͠твами твоими присно д͠во.
пѣ(с). и͠. їрмо(с). Отрокы пр͠чсты.
Нестера ꙋорꙋжь вѣрою на Люꙗ борюща сѧ посълалъ ѥси ѥгоже образа
и побивъ ꙗвлѧше невидимаго змиꙗ мꙋдре Дьмитриѥ .
тѣмь же поемъ вѣрно и прѣвъзносимъ.
Ты ѥгда ꙋслыша пр͠блжне ѿ ан͠глъ о͠чьствꙋ си разорениѥ
стра(с)но възъпи къ зижителю си. аще сп͠сеши мѧ радъ ѥсмь мл͠стиве.
тѣмь же ти дасть мч͠нче цѣлъ градъ твои х͠с въ вѣкы.
Въпиѥм ти бл͠жне. сп͠си ны вѣрою поющиимъ твою памѧ(т)
ѥще же и молѧще сѧ. сп͠си рабы своꙗ ѿ напасти Дьмитриѥ
грѧдꙋщихъ нынѣ. га въспѣваите дѣла.
Въсхвали въпиющи похвально свѣтло Ѳесалоникии
и ликꙋи же ꙗко въсиꙗ рогъ дьрьжавьныи Дьмитриа
днь(с) свѣтло праздьньство г͠а хвалѧще непрѣстаньно и прѣвъ.
б͠
Жьзлъ Аронь ты ꙗви сѧ д͠во архиїереа въсꙗвъши вьсѣмъ
страшьно сꙋщиимъ порожениемь с͠щно въводѧще въ с͠таꙗ с͠тыхъ премꙋдро
не ѥдиного нъ мъножьство вѣрьныхъ на б͠жиѥ съврьшениѥ.
пѣ(с). ѳ͠. їрмо(с). Вьсѧкъ земьнъ.
Престолꙋ б͠жию свѣтло предъстоꙗ мꙋдре Дьмитриѥ не забꙋди насъ
нъ чьстьно моли сѧ о нашемь окааниї страньнымъ с͠те нынѣ поющимъ
твоѧ величьꙗ ꙗко възирающе надѥмъ сѧ твьрдо на твою мольбꙋ.
Ѹслыши славьне нищаꙗ твоꙗ нынѣ и ꙋмоли сѧ ꙗко ѿлꙋчихомъ сѧ
далече сꙋще ѿ свѣтлаго храма твоего. и горѧть вънꙋтрь ср͠дца наша
и желаѥмъ с͠та твоеꙗ цр͠кве и поклонити сѧ къгда твоими молитвами.
По чьто мꙋдре нищиї твои раби ѥдини лишаемъ сѧ твоеꙗ ꙋбо красоты
любъве ради зиждителѧ и чѹжимъ землѧмъ и градомъ ходѧще
на посрамлениѥ бл͠жне триꙗзычьникъ и еретикъ лютъ воини бывающе.
б͠
Безначальнаꙗ тр͠це ѥꙗже трепещꙋть анг͠ли и страшьнаꙗ серафимъ
даи хвалѧщимъ тѧ вѣрꙋ ꙋпъваниѥ и любъвь неразлꙋчимꙋю къ цр͠ствꙋ с͠тꙋмꙋ
наставлꙗющи ны мольбами нынѣ м͠ченика ти и застꙋпника твьрда градꙋ нашемꙋ.
Служебен миней за октомври от 1096 г., (РГАДА, ф. 381, Син. тип. № 89, л. 100а –107а)