You are here

Житие на св. Георги от Стишния пролог. Първи (Търновски) превод

М(с)ца то(г) .к҃г. памѧ(т) ст҃го великом(ч)нка и побѣдоносца геѡ(р)гиа.

 

Врагы поражаѧ геѡ(р)гие вь бране(х).

волеѧ ѿ врага посѣцаетсѧ м(ч)емь.

ѡднѧ геѡ(р)гиꙗ главѫ ме(ч). вь .к҃г.

 

Славны и дивны. великы м(ч)нкь геѡ(р)гие. бѣше вь врѣмена диѡклітиꙗна ц҃рѣ. ѿ страны кападокиискыѧ. ро(д)а нарочита и свѣтла. вь трївꙋнⸯстѣмь воиньствѣ бывь. идеже постра(д)ти хотѣаше. комись бѣше сано(м). ц҃рю ꙋбо иже на христиꙗны болѣꙁньнѫѧ рать по(д)вигⸯшꙋ. и повелѣние пꙋстившꙋ. и(х). же ѿметаѫщи(х)сѧ х(с)а. и не именовавшии(х). даровыи чести. подати цр҃скыѫ. не покарѣѧщим же сѧ сьмрьтнѫѧ тьщетѧ приѫти. сьи с͠ты самь прише(д) хрїстиꙗнина себе. проповѣда. идолское сꙋетие и немощъ ѡбличивь. и ꙋничиваѫ иже вь и(х) вѣрꙋѧщи(х). и ниже ласканми. ниже ѡбьѧтии же многаа творѣше м(ч)тль ѡко(л) его. нѫ бестраха бѣше и многаа прѣꙁираѫ. прьвѣе же с копиемь вь ѧтрѡбѫ пробаетсѧ. и ꙗко мноꙃѣ крьви истекⸯши. и прись(х)ши же ранѣ. прѣбы(с) с҃ть беꙁ врѣда. таже и на колеси привѧꙁань. ѡстраа желѣꙁа имѧщꙋ. ниꙁоꙋ погорь хльмꙋ пꙋстень. и настоꙗниемь аглⸯскиимь. ꙗви сѧ ц҃рю и магнетию сьприсѣдалⸯникꙋ его жрѫщимь. и ꙁане же ꙁ(д)равь покаꙁа сѧ. многыѧ притрьже кь х(с)вѣ вѣрѣ и повелѣниемь цр҃вѣмь внѣ гра(д) глвы и(х) ѿсѣкошѫ. пристѫпи же кь х(с)ꙋ ц҃рица алеѯанⸯдра. и прѣ(д) мѫчителе(м) б҃а исповѣда того быти. вѣровашѫ же вь х(с)а ини мноꙃи. ви(д)ѣвше ст҃го неврѣдима ѿ рова варѣнаго иꙁьше(д)ша. идеже повелѣль бѣше ц҃рь того вьврѣщи. по семь вь сапогы желѣꙁны гвоꙁⸯдиѧ и мѧщѧ. на ноꙃѣ его ѡбꙋшѫ. и кⸯтомѹ сѹхыми жилами волѹꙗми биень бы(с) беꙁ мл(с)ти. магнетию ꙁна(м)(е)ние поискавшомѹ. аще кто можеть вьскрѣсити лежѫщ вь ви(д)мыи(х) гробо(х) иже ѿ житиꙗ прѣж(д)е ѿше(д)шии(х). помл҃шѹсѧ с҃томꙋ над гробныимь покрываломь. и вьскрьсе мрьтвь и поклонисѧ ст҃мѹ. и прослави бж(с)во х(с)во. и ц҃рю вьпро(с)(и)вьщѹ. кⸯто есте вы. и ког(д)а ѿ житиꙗ ѡше(л) еси. прѣж(д)е сьнитиꙗ х(с)ва пожихомь ре(ч). и ра(д)и иже кь идоломь прѣльсти. ѿ ликымы ѹже лѣты ѡгⸯнемь жегоми есмы. идеже и тог(д)а многыимь вь х(с)а вѣровавшїимъ и вынѫ прилагаѫщесѧ къ вѣрѣ. въ их же бѣше и гликерїе емѹже ꙋмрѣ воль и въꙁдвиже его с͠тыи. таковомѹ же чюдеси глїкерїе. еже на х(с)вѫ вѣрѫ себе иꙁвѣстївъ. мѫченїю вѣнецъ въсприѫтъ. мечемъ ѿ невѣрни(х) съсѣченъ. многыимъ ѹбѡ тогда къ х(с)ѹ притичѧщїимъ ради ст҃го геѡ(р)гїа. нѣкогда же ст҃мѹ въше(д)шꙋ въ цр҃квъ идѡлскѫѧ. и единомꙋ ѿ истꙋканиы(х) пристѫпивъ ре(ч). ты ли еси б͠ь и тебѣ ли по(д)баетъ покланѣтисѧ. бѣсⸯже иже вь немь плачѫ и рыдаѫ ѿвеща. ꙗко едінь б҃ь ѥ(с) х҃сь. и ѡ томъ смѧтошѧ(с) вⸯси идолі падше съкрꙋшишѧ(с). и не могѫщи тръпѣти слꙋгы бѣсовⸯскыѧ. нѫ емⸯше ст҃го приведошѧ къ ц҃рю и скороѥ ѡсѫж(д)еніе на нь испросивше. ц҃рю же повелѣвшꙋ того и цр҃ца александрѫ мечемъ. посѣщи. и абие ст҃мꙋ гл҃вѧ ѿсѣкошѧ. ѡна же помолше сѧ д҃хъ прѣда(с). съвръшаеть же сѧ съборь его въ с҃тѣмь его м(ч)ніи сѫщомꙋ въ девтерии.

Transcript: 

 (Зограф 80, л. 53а)

Библиография: 
Terms: 
Transcription: 
Ана Стойкова