тро(п). гла(с). г͠. Велика ѡбрѣте въ бѣдахъ тебе помощьника⁘~
сѣ(д). гла(с) .д͠. по(д). Възнесыи сѧ на.
Подвигъ добрыи подвиза сѧ стр͠пце х͠въ вѣрою и м͠чтль обличилъ еси нечьстьѥ
жьртва же б͠гови приꙗтьна къ б͠ꙋ принесе сѧ. тѣмь и вѣньць приꙗлъ ѥси побѣдьныи
мл͠͠тми с͠те твоими вьсѣмъ даѥши грѣховъ прощениѥ.
гла(с). по(д). Скоро вари⁘~
Памѧ(т) твоꙗ славьне мч͠нче Дьмитриѥ просвѣти днь(с) цр͠квь х͠вѹ и всѧ сьбьрала
ѥсть пѣ(с)ми достоино похвалити тѧ бо͠͠мѹдре въ истинѹ ꙗко воина и врагомъ потрѣбителѧ.
тѣмь мл͠тми твоими сп͠си д͠ша наша⁘
кѡн(д) гла(с) .в͠. само(г).⁘
Кръвни твоихъ стрѹꙗми Дьмитрие цр͠квь б͠ъ обагъри давыи ти дьрьжавѹ непобѣѣдимѹ и на бъдѧ градъ твои неврѣдимъ. томѹ бо еси ѹтврьжениѥ.
їко(с). по(д). ѹꙗсни.
Сего великаго въ пѣ(с)хъ вси съшьдъше сѧ вѣрою ꙗко храбъра х͠ва мч͠ка Дьмитриа пѣ(с)ми и пѣнии възъпиимъ къ вл͠дицѣ и творцѹ вьселенѣи избавити нѧ ѿ трѹса бѣдьнаго члв͠клбче мл͠твами б͠ца и вьсѣхъ ст͠хъ мч͠͠нкъ. на тѧ бо ѹпъваемъ избавити сѧ бѣды и скъръби.
лю(д)
сті(х). на г͠и въз(в). гла(с). и͠. по(д). О преславьно.
О преславьное чюдо. х͠а ради прободенъ трьб͠лженыи Дьмитрие. на врагы бо вьсьгда орѹжиѥ ꙗви сѧ обоюдѹостро пожинаꙗ ꙗзычьнаꙗ вышьнѧꙗ и низложь вѣснаꙗ шатаниꙗ. ѥмѹже въпиѥмъ. с͠͠͠ты Дьмитриѥ покрыи ны вѣ рьно чьтѹщаꙗ тѧ любъвию вьсьгдь.
О преславьное чюдо. на н͠бси и на земли радость днь(с) вь памѧ(т) ꙗви сѧ Дьмитрїа мч͠ка. ѿ англъ хвалами вѣньчаѥть сѧ и ѿ члвкъ пѣниѥ приѥмлеть. о како пострадалъ ѥсть и добрѣ подвиза сѧ. имьже врагъ паде лѹкавыи х͠ѹ побѣждьшѹ и.
О преславьное чюдо. кръвавоѥ одѣниѥ ѿ стра(с)и мч͠нка царское ѹкрашениѥ цр͠кви бы(с) имьже ѹкрашьши сѧ поеть сь радостию женихѹ своемѹ въпиющи. о красьнаꙗ дѣла твоѧ Дьмитриѥ имиже х͠ѹ прѣкрасьнъ бы(с) ѹгодьникъ славьнъ..
Страстью стра(с)и ѹподоба сѧ живоносьнѣи х͠вѣ ѿ него дѣтель чюдесемъ приꙗтъ стр͠пце Дьмитриѥ и сп͠саеши притѣкающаꙗ ти многъ бѣдъ и прѣгрѣшении тѣхъ избавлѧꙗ имыи б͠оѹгодьно дьрьзновениѥ славьне кь б͠ѹ ѥмѹже престоиши нынѣ.
Кръвию своею каплѧ живодавьцѹ х͠ѹ кръвь свою чьстьнѹю за тѧ и излиꙗвъшѹмѹ приведенъ бы(с) Дмитрие и обьщника тѧ славѣ сѣдѣꙗ и цр͠ствиꙗ своего причастьна ꙗко доблевавъша на противьнаго и лютыꙗ того къзни до коньца ѹгашьша.
с(х)ті(х). на сти(х)вь(н). гла(с). а͠͠. само(г).
Пѣ(с)ною красотою наставъшии просвѣтимъ днь(с) и възла(с)мъ мч͠нча подвигы. предълежить бо намъ въ б͠лгохваление великыи Дьмитриї. ибо безаконьныхъ навождение мѹжьскы побѣдивъ къ мч͠нию съ дьрьзновениѥмь подвижа сѧ и побѣды преславьно приносѧ с͠псѹ молѧ сѧ сп͠си д͠ша наша.
сти(х) зау(т). гла(с). по(д). Радуи сѧ.
Приди мч͠нче х͠въ къ намъ трѣбѹющимъ милостивьна посѣщениꙗ избави озлоблены мч͠нчными прещениї и лютымь неистовьствъмь ересиї ѥюже ꙗко плѣньни и нази гоними ѥсмъ мѣсто съ мѣста часто прехажающе и блѹдѧще въ горахъ и въ вьртьпѣхъ. ѹщедри ѹбо прехвальне и дажь намъ ослабѹ. ѹстави бѹрю и раздрѣши негодовние ѥже на насъ б͠ѹ помолѧ сѧ подающѹмѹ миръ и велїю.
Стѣна твьрдаꙗ намъ по плѣнении вражиї не ѹбоꙗ сѧ поданъ бы(с) поганьскаꙗ падениꙗ ѹпражнѧꙗ и недѹгъ ѹставлѧꙗ нападениꙗ степень нераздрѹшимыи основаниѥ неѡборимоѥ и начальникъ житель и поборьникъ бы(с) своемѹ градѹ Дьмитриѥ. ѥгоже и нынѣ пр͠блжне бѣдьнѣ погывающа и отѧгъчена окаанѣ твоими мл͠твами сп͠си х͠ви помолѧ сѧ подающѹмѹ мирови велию мл(с)ть.
Всю добродѣтель въсприимъ ст͠рпчьскыї ликъ ꙗви сѧ. тѣмь пр͠чстаго и б͠жствьнаго живота пищѹ достоино наслѣдоваша съ нимиже подобьнъ сы досточюдне Дьмитриѥ и подобиемь х͠вмь ѹкрашаꙗ сѧ и хвалѧ сѧ копиꙗ равьньствьмь моли сѧ прилѣжьно избавити сѧ стадѹ твоѥмѹ ѿ стра(с)и и недѹгъ и лютыихъ напасти теплѣ молѧ сѧ подющѹмѹ мирови велию мл͠сть.
кано(н) гла(с). д͠. пѣ(с). а͠͠. Їрмо(с). Морѧ чьрьмь.
Б͠͠жствьнымъ м͠͠чниꙗ вѣньцьмь ѹвѧзъ сѧ о б͠͠зѣ ликѹеши лѹчами тамо сѹщими сиꙗꙗ и просвѣщениꙗ исплънѧꙗ сиꙗ великыи м(ч)нче досточюдьне.
Ꙗко сѹща въ истинѹ мч͠нка и до кръве подвигъша сѧ б͠лжне крѣпко твьрьдо же противлениѥ къ мч͠͠льмъ показавъша тѧ вл͠дка приꙗтѡва.
Злобѣ обрѣтателѧ низложилъ ѥси къ земли Дмитриѥ мч͠нымъ копиѥмъ раздрѹшивъ б͠жствьныиꙗ б͠лгости паче ѹма силами на се бл͠жне ѹкрѣплꙗемъ..
б͠
Без матере ꙗко б͠ъ пьрьвѣѥ сын бы(с) ѥже по насъ безъ ѡ͠ца ис тебѣ б͠це прѣпѣтаꙗ плъть приимъ по единению паче слова и разѹма.
пѣ(с). г͠. їрмо(с). Веселить сѧ ѡ те.
Не мьнѣ сѧ ни въ чьто же мч͠щихъ тобою повелѣниѥ. б͠жии бо страхъ паче вьсѣхъ страстотьрпьче изволилъ ѥси.
Свѣтообразьнъ свѣтильникъ въ съвѣдѣниꙗ скиниꙗ бы(с) б͠жствьнымь свѣтъмь сьꙗꙗ мч͠нче ст͠рпче Дмитриѥ.
б͠
Исцѣлѧꙗ зракъ падъшии чл͠вчскыи причистꙗа симъ ис тебе одѣваѥть сѧ пребывъ ѥже бѣ чл͠вклюбць.
пѣ(с). д͠͠. їрмо(с). Възвижена тѧ.
Побѣдивъша лъжѹ нечьствиꙗ б͠жиѥ прѣвышьнеѥ видѧ слово славою вѣньчало ѥсть Дмитриѥ поюща слава сил.
Направлѧꙗ сѧ дланию живоносьною на пристанища постиже тихаꙗ идеже нынѣ радѹꙗ сѧ въпиеши Дмитриѥ. сла(в).
На прельсть побѣдѹ поставивъ побѣдїтельнъ вѣньць правды приꙗтъ Дмитриѥ въпиꙗ зижителю. Слава.
б͠
Ꙗко тварии вьсѣхъ чс͠тѣиши м͠ти б͠жиꙗ быти ѥдина съподоби сѧ. Того бо родила ѥси мира бл͠гдтию б͠͠оразѹмиꙗ просвѣтивъшаго.
пѣ(с). е͠. їрмо(с). Ты г͠и ми свѣтъ.
Огнь любъве б͠жствьныꙗ въ ср͠дци приимъ огнь ѹгасилъ еси безбожныи идольскаго гнѣва славныи Дьмитриѥ.
Избавлѧꙗ насъ ѿ бѣдъ ꙗви сѧ Дьмитриѥ м͠литвами си покрываꙗ вѣрою и любъвию хвалѧщаꙗ тѧ.
ѳ͠
Слово б͠жиѥ о͠цѹ ѥдиносѹщьно твое бываеть б͠ом͠ти паче ѹма и слова с͠на единосѹщьныи.
пѣ(с). ѕ͠. їрмо(с). Пожьрѹ ти съ гла.
Съгласнь но съшьдъше сѧ въспоимъ славнюѹ свѣтоносьнѹю твою па(ч) чюдесъ исплънъ и даровъ ст͠го и чьстьнаго пр͠бл͠͠жне д͠ха.
Раздрѣши ми пленица грѣховьныи мл͠тми ти. ꙗкоже бо непобѣдимъ м(ч)къ дьрьзновениѥ имаши къ вл͠дцѣ и бѹди ми прибѣжище и покровъ Дьмитриѥ.
б͠
Нескрвьрньнъ по середѣ тьрьниꙗ обрѣтъ ꙗко прч͠стыи цвѣтьць и въ ѹдолѣхъ цвѣтъ о б͠ом͠͠ти женихъ въ чрѣво твое слово въсели сѧ.
пѣ(с). з͠. їрмо(с). Въ пещи огньнѣ.
Просвѣщенъ б͠жствьною славою и б͠лгдтию мч͠нче ст͠рпче сиꙗѥши свѣтообразньно и просвѣщаеши зовѹщаꙗ. б͠͠лн.
Ꙗко багрѧницею ѹкрашенъ своѥю кръвию имѣꙗ въ скипетра мѣсто славьноѥ крь(с) съ х͠смь цр͠͠ствѹеши нынѣ бл͠͠гнъ.
б͠͠
Прославлена просвѣщена м͠ти д͠во всѧ чьтѹщаꙗ тѧ всеистиньѹю б͠цѹ съблюди бл͠гна ѥси въ женахъ непорочьнаꙗ вл͠дчице.
пѣ(с). и͠. їрмо(с). Рꙋцѣ распрость
Омрачилъ еси вьсь вражии гнѣвъ славьнѣ и брани непотрѣбимою силою х͠вою препоꙗсавъ сѧ и побѣдоносьць бывъ мч͠нче въпиꙗше. б͠лте.
Мч͠нчскоѥ б͠͠лгостоꙗниѥ показавъ мч͠ско бл͠гословиѥ мч͠че наслѣдилъ ѥси банею измывъ сѧ ст͠ою ѥюже вътороѥ не ѡсквьрьнѧют сѧ грѣховъ приложениї копиемь пробадаѥмъ и зова. бл͠те.
Чюдесъ твоихъ множьство паче ѹма даръ иже ти подасть х͠͠съ всѣмъ показа славьне. и бл͠гдть ицѣлениї паче словъ твоихъ ꙗвѣ бл͠гдть проповѣдаеть намъ въпиющимъ. бл(с)те.
ѳ͠
Единѹ въ вьсѣхъ родѣхъ д͠вою мт͠рь и б͠цѹ чс͠тѹ пѣсньно славословимъ. та бо с͠псению намъ ходатаи ꙗко вьсего мира избавителꙗ слово родивъши ѥмѹже въпиемъ. б͠лте.
пѣ(с). ѳ͠. їрмо(с). Камень нерѹко.
Растрьгни ѹзы грѣховьныꙗ поющихъ тѧ ст͠рпче. ѹстави стра(с)и приложениꙗ. мѧтежь раздрѹши ересьскыи. напастиї ѹтоли бѹрю мл͠твами си.
Направи на стьзѧ правыꙗ цр(с)тва нб͠снго с͠щное свое стадо вѣньченосьче настави на пажить с͠псьнѹю и на мѣсто вѣчьноѥ.
б͠
Ꙗко корень источьникъ и винѹ нетьлѣниꙗ тѧ д͠вце вси вѣрьнии сътѧжавъше хвалами славимъ. ты бо съставное бесъмьртиѥ намъ источила еси.
кано(н). в͠. гла(с). д͠.
пѣ(с). а͠. їрмо(с). ѿвьрз ѹс.
Отъ мьглы лютыꙗ и невѣжьствиꙗ очисти ны ꙗко оч͠стволюбьць мѹдре Дьмитриѥ. м͠лтвами си даи въспѣвати свѣтлое твое рожьство въ д͠ньшьниї д͠нь.
Речена быша дивьна и въ варъварѣхъ твоꙗ чюдеса. варъвары бо погѹби въсѧ пришьдъша на достоꙗниѥ х͠а твоѥго в͠лдкы на градъ Амастридскы. тѣмь же ти цр͠квь зижеть.
Вельми просвѣтила ѥсть и красьноѡбразьно показа мѹдрость чьрьпавъши пива н͠бснго тѧ Дьмитриѥ дасть помощьника о͠чстволюбьца славьна селѹню славьнꙋмѹ.
ѳ͠
Чрътогъ б͠жствьныи ꙗко рожьши женихъ х͠а призъвавъша всѧ вѣрьныꙗ къ чрътогѹ б͠жствьнѹмѹ м͠рню въсхвалимъ просѧще въсхожениꙗ въ чьртогъ н͠бсьныи.
пѣ(с). г͠. їрмо(с). Твоꙗ пѣвьца.
Наѹченъ из млада премѹдрости подобьно створи премѹдре въ ѹностьствѣ вѣньць. и копиѥмь бодомъ ꙗко подобьникъ храборъ х͠ꙋ рожьшꙋмꙋ сѧ ѿ д͠вы.
Тр͠ци свѣтлѣи ꙗко гражданинъ трьгѹбь ꙗви сѧ намъ прьвѣѥ мѹкъ славьнъ и въ подвизѣ ꙋгодникъ и по ꙋмьртвии чьстьнъ твоими чюдесы пр͠блжне.
Копиемь бодомъ ты Дьмитриѥ въпиꙗше веселѧ сѧ х͠ѹ. чьто за вьсе принесѹ тї прободенѹмѹ въ ребра мене ради. нъ м(ч)ниѥмь моимь б͠жию чашѹ нынѣ їспїю.
б͠
Огньныꙗ ѹмъ Исаиꙗ наѹчи жьзлъ тѧ п͠рчстаꙗ прочвьтъши цвѣтъ бл͠говѣрьныимъ прогонѧщь вьсѧ воню смрадьнѹю и прабабьнюю.
пѣ(с). д͠. їрмо(с). Неислѣдьнѹмѹ.
Се ты просвьтѣ сѧ ꙗкоже пишеть бл͠жны Исаиа д͠хмь паче свьтѧ сѧ камениꙗ ѿ ѹфираже и злата неискѹсьна. тѣмже градъ твои чьтеть тѧ.
Ꙗко же възпи с͠те славьне поѧ Соломонъ въ пѣниихъ. ты же ꙗви сѧ ꙗко сьсьцу х͠вѹ ветъха же и нова бл͠жене съсавъ ѹчениꙗ.
Къто ꙗко ѹслыша ты възискаꙗ въходомь г͠а рече. изиде д͠ша моꙗ его ради тѣмь же теплою Дьмитриѥ томѹ послѣдова любовию.
Сиче възлюбль мч͠нче х͠въ вьсь градъ твои съвѣдыи хвалить сѧ нынѣ праздьнѹꙗ свѣтло Ѳесалоникии днь(с) въ свѣтлѣѣ ти търъжьство славьне.
б͠
Рожьши плътию сладость всю красотꙋ пр͠чс͠таꙗ сѹща въ горести и нынѣ лютыхъ грѣхъ омраченыꙗ ѹслади и мл͠тми твоими просвѣти.
пѣ(с). е͠. їрмо(с). ѹдивиша сѧ вь.
Нова тѧ съвѣдѹщи землѧ твоꙗ ꙗко Мосеа славьне поражьша льсть идольскѹю и люди своꙗ въ вѣчьныꙗ обитѣли бл͠͠жне въводѧща чьстьно днь(с) чте тѧ достоино свавѧщи.
Вышьниї ꙗви сѧ воеводьствъмь храбре дрѣвьнѧго Ї͠са Мосѣова отрока всѧ брани не ꙗко тъ побѣжаꙗ чюдеса же паче сильна съвыше ꙗвлѧꙗ и хранѧ ѡ͠цьство си.
Вели ꙗви сѧ пача Самѱона Дьмитрие еще же и Гедеона мѹжьствъмь. и сыи ѹнъ крѣпостию градъ си избавлѧꙗ мѹдре роꙗ противьныхъ и злобы варъварьскыꙗ. слава о͠чю.
б͠͠
Д͠во ꙗко рожьши ꙗзыкомъ избавлениѥ даи вѣрою въпиющиимъ прѣгрѣшени избавлениѥ нынѣ дарование ч͠ста стра(с)и ѿгонѧщи варъварскы непорочьнаꙗ.
пѣ(с). ѕ͠. їрмо(с). Б͠жье се и всечьст.
Храмъ твои с͠тыи обьстоꙗще въ памѧ(т) Исаиевѣ бывъши вѣрьниї г͠лющю въ вѣчьныхъ основаниихъ домове с͠тхъ тѧ почитають.
Н͠бснаго тѧ съвѣдыи гражанина бл͠жне градъ твои свѣтло чьтеть тѧ ꙗкоже ѹчить Паулъ славьныи и величить днь(с) славѹ твою славьне.
Ѹнъ бл͠жне сыи бл͠гдтию въ слѣдъ х͠а ходилъ ѥси ꙗкоже Соломонъ поет. масть тѣмьже ꙗви сѧ бл͠͠гоѹханиꙗ даꙗ чьстьно своемꙋ градѹ.
б͠
Пристанище тѧ съвѣдѹще д͠во трѹжающе сѧ лютѣ ꙗко въ горести житисцѣ вьси тишины просимъ ѿ вѣрою непорочьнаꙗ.
пѣ(с). з͠. їрмо(с). Не послѹжиша.
Истачаѥта ꙗко медъ чьстьнѣи твои ѹстьнѣ мѹдрость ꙗко Соломонъ въспѣтъ. ꙗвѣ бо наѹчивъ сѧ въпити прѣпѣтыи ѡ.
Искѹси тѧ зиждитель прѣславьне ꙗко срѣбро и ꙗко злато ѡѱанзъ свѣтло тѧ ꙗви мчнии славьне. тѣмь же веселѧще сѧ поемъ. прѣпѣтыи.
Ꙗко же възъпи д͠хъ въ пѣниихъ. стълъпъ Дв͠дъ крѣпъкъ выꙗ твоꙗ дрьжавьна тысѹщами ѹкраси сѧ щиты дхвьными. тѣмь же ꙗви сѧ защитьникъ поющимъ и хранитель градѹ своемѹ.
Въ славьныи д͠нь праздьнолюбьци свѣтло възыграимъ ѹмы своꙗ чьстьно ѡчищающе вьси поюще. Х͠ꙋ. Прѣпѣтыи.
б͠
Невъмѣстимыи вьсь миръ ѥгоже въ чрѣвѣ своѥмь въмѣсти пр͠ста. нъ чьтѹщеи рожьство твоѥ твьрдою вѣрою да ꙗвимъ сѧ ѿ напасти миръныꙗ неврѣдими мл͠твами твоими присно д͠во.
пѣ(с). и͠. їрмо(с). Отрокы пр͠чсты.
Нестера ѹорѹжь вѣрою на Люꙗ борюща сѧ посълалъ ѥси ѥгоже образа и побивъ ꙗвлѧше невидимаго змиꙗ мѹдре Дьмитриѥ. тѣмь же поемъ вѣрно и прѣвъзносимъ.
Ты ѥгда ѹслыша пр͠блжне ѿ ан͠глъ о͠чьствѹ си разорениѥ стра(с)но възъпи къ зижителю си. аще сп͠сеши мѧ радъ ѥсмь мл͠стиве. тѣмь же ти дасть мч͠нче цѣлъ градъ твои х͠с въ вѣкы.
Въпиѥм ти бл͠жне. сп͠си ны вѣрою поющиимъ твою памѧ(т) ѥще же и молѧще сѧ. сп͠си рабы своꙗ ѿ напасти Дьмитриѥ грѧдѹщихъ нынѣ. га въспѣваите дѣла.
Въсхвали въпиющи похвально свѣтло Ѳесалоникии и ликѹи же ꙗко въсиꙗ рогъ дьрьжавьныи Дьмитриа днь(с) свѣтло праздьньство г͠а хвалѧще непрѣстаньно и прѣвъ.
б͠
Жьзлъ Аронь ты ꙗви сѧ д͠во архиїереа въсꙗвъши вьсѣмъ страшьно сѹщиимъ порожениемь с͠щновъводѧще въ с͠таꙗ с͠тыхъ премѹдро не ѥдиного нъ мъножьство вѣрьныхъ на б͠жиѥ съврьшениѥ.
пѣ(с). ѳ͠. їрмо(с). Вьсѧкъ земьнъ.
Престолѹ б͠жию свѣтло предъстоꙗ мѹдре Дьмитриѥ не забѹди насъ нъ чьстьно моли сѧ о нашемь окааниї страньнымъ с͠те нынѣ поющимъ твоѧ величьꙗ ꙗко възирающе надѥмъ сѧ твьрдо на твою мольбѹ.
Ѹслыши славьне нищаꙗ твоꙗ нынѣ и ѹмоли сѧ ꙗко ѿлꙋчихомъ сѧ далече сѹще ѿ свѣтлаго храма твоего. и горѧть вънѹтрь ср͠дца наша и желаѥмъ с͠та твоеꙗ цр͠кве и поклонити сѧ къгда твоими молитвами.
По чьто мѹдре нищиї твои раби ѥдини лишаемъ сѧ твоеꙗ ѹбо красоты любъве ради зиждителѧ и чꙋжимъ землѧмъ и градомъ ходѧще на посрамлениѥ бл͠жне триꙗзычьникъ и еретикъ лютъ воини бывающе.
б͠
Безначальнаꙗ тр͠це ѥꙗже трепещѹть анг͠ли и страшьнаꙗ серафимъ даи хвалѧщимъ тѧ вѣрѹ ѹпъваниѥ и любъвь неразлѹчимѹю къ цр͠ствѹ с͠тѹмѹ наставлꙗющи ны мольбами нынѣ м͠ченика ти и застѹпника твьрда градѹ нашемѹ.
Служебен миней за октомври от 1096 г. (РГАДА, ф. 381, Син. тип. № 89, лл. 100а –107а)